A woman holding a small picture of Jesus Christ. The picture is a reproduction of a painting by Robert Barrett.
Daghang mga tawo ang nagsulti mahitungod sa pagbaton og hugot nga pagtuo—sa ilang kaugalingon, sa uban, ug bisan sa mga hitabo o mga butang. Busa, unsay nakapahimo sa pagbaton og hugot nga pagtuo diha kang Jesukristo nga makagagahom ug importante? Sa Mga Hebreohanon 11, atong mabasa ang mga pagtulun-an ni Apostol Pablo sa pagpalambo sa hugot nga pagtuo kang Jesukristo. Kini nga leksiyon makatabang kanimo nga makasabot unsa ang hugot nga pagtuo kang Jesukristo ug nganong importante kini kanimo sa personal.
Tutukan ang makakabig nga mga baroganan. Samtang nag-ila sa dagan sa leksiyon, seguroha nga adunay igong panahon nga igahin sa pagtabang sa mga estudyante nga malambigit sa mga bahin sa leksiyon nga nagpokus sa pagkabig sa mga baroganan.
Pagpangandam sa estudyante: Dapita ang mga estudyante sa pagkompleto sa pamahayag “Ang hugot nga pagtuo mao ang ________” ug aron maandam sa pagpakigbahin sa ilang mga tubag sa klase.
Posible nga mga Kalihokan sa Pagkat-on
Ang kasegurohan sa hugot nga pagtuo diha ni Jesukristo
Kini mao ang unang bahin sa duha ka hugna nga leksiyon nga nagpasiugda sa mga pagtulun-an ni Pablo sa hugot nga pagtuo sa Mga Hebreohanon 11. Kon ang oras sa klase limitado ug usa lamang ka leksiyon sa Mga Hebreohanon 11 ang mahimong itudlo, ikonsiderar kon sa unsang paagi ang duha ka leksiyon lagmit epektibong mahiusa.
Ang mga estudyante mahimong mogamit sa ilang pagpangandam sa estudyante alang sa mosunod nga kalihokan. Mahimong makatabang ang pagsulat diha sa pisara og ginama sa klase nga kahulogan sa hugot nga pagtuo ug ipahiangay sa mga estudyante ang pagkasuwat sa kinatibuk-an sa leksiyon.
Unsa ang imong isulti kon adunay mangutana kanimo unsa ang hugot nga pagtuo?
Isulat ang imong kahulogan diha sa imong journal sa pagtuon o sa usa ka digital nga note. Mahimong magbuhat og mga kabag-ohan o pagdugang niini nga kahulogan ug pagrekord og uban pang mga hunahuna ug mga impresyon diha sa imong pagtuon karon.
Basaha ang Mga Hebreohanon 11:1 ug markahe giunsa ni Apostol Pablo paghatag og kahulogan sa hugot nga pagtuo. Mahimong makatabang ang pagkasayod nga sa Paghubad ni Joseph Smith niini nga bersikulo, ang Propeta miilis sa pulong nga substansya ngadto sa kasegurohan, usa ka pulong nga nagkahulogan og pagseguro o pagsalig (tan-awa ang Mga Hebreohanon 11:1 , footnote b).
Mahimong dapiton ang mga estudyante sa pagsubli sa Mga Hebreohanon 11:1 sa ilang kaugalingong mga pulong aron maseguro nga sila nakasabot sa mga pulong sa bersikulo.
Unsa sa imong hunahuna ang pasabot sa pagka adunay kasegurohan o pagsalig sa mga butang nga imong gilaoman?
Unsa ka posible ang pagbaton og ebidensiya sa mga butang nga dili nimo makita?
Base niini nga bersikulo, unsaon kaha nimo pag-usab o pagdugang sa imong paghatag og kahulogan sa hugot nga pagtuo?
Mahimong isulat ang mosunod nga pamahayag sa pisara o dapiton ang mga estudyante sa pagpahiangay sa kahulogan nga namugna sa klase aron malakip ang parehas nga mga ideya.
Usa ka yanong kamatuoran nga gitudlo sa Mga Hebreohanon 11:1 mao nga ang hugot nga pagtuo usa ka kasegurohan sa mga butang nga gilaoman, ang ebidensiya sa mga butang nga dili makita.
Alang sa pagpalahi sa pagbasa sa sunod nga mga bersikulo, mahimong bahinon ang klase og katunga o dapiton ang mga estudyante sa pagbuhat diha sa manag paresan. Dapita ang katunga sa mga estudyante sa pagbasa sa Alma 32:21 ug ang laing katunga sa pagbasa sa Mga Artikulo sa Hugot nga Pagtuo 1:4. Ang mga estudyante mahimo dayon nga magtandi kon unsa ang ilang nakat-onan.
Unsa pa man ang imong nakat-onan mahitungod sa hugot nga pagtuo?
Unsaon nimo pag-usab o pagdugang sa imong paghatag og kahulogan sa hugot nga pagtuo tungod sa unsa ang imong nakat-onan?
Imahe
“Christ and the Rich Young Ruler,” by Heinrich Hofmann.
Usa ka paagi sa pagpahiangay sa miaging pamahayag sa kamatuoran mao ang hugot nga pagtuo kang Jesukristo mao ang kasegurohan sa mga butang nga gilaoman, ang ebidensiya sa mga butang nga dili makita nga tinuod.
Kon ang miaging pamahayag o paghatag og kahulogan sa klase nasulat sa pisara, ipahiangay ang pagkasulat aron ang “hugot nga pagtuo diha kang Jesukristo” klaro nga mapasabot.
Aron matabangan ang mga estudyante nga mapalawom ang ilang pagsabot sa hugot nga pagtuo kang Jesukristo, ikonsiderar ang pagpangutana sa pipila sa mosunod nga mga pangutana. Tabangi sila nga maila ang tahas sa Manluluwas sa plano sa kaluwasan ug ang Iyang personal nga tahas sa ilang kinabuhi.
Mahimong makatabang ang pagpaambit sa unang pamahayag ni President Russell M. Nelson diha sa “Komentaryo ug Background nga Impormasyon” nga bahin niini nga leksiyon.
Sa unsang paagiha sa imong hunahuna ang pagbaton og hugot nga pagtuo diha kang Jesukristo lahi kaysa pagbaton og hugot nga pagtuo sa usa ka tawo o usa ka butang?
Sa unsang paagi kaha ang imong hugot nga pagtuo diha kang Jesukristo makatabang kanimo nga mosalig Kaniya kon ikaw nag-atubang sa mga pangutana o walay kasegurohan?
Palawomi ang imong pagsabot sa hugot nga pagtuo diha kang Jesukristo
Pamalandong kon unsa ang imong gibati mahitungod sa imong personal nga pagtuo diha kang Jesukristo. Sa unsang mga paagi nimo gibati nga lig-on ang imong hugot nga pagtuo Kaniya? Sa unsang mga paagi nimo gibati nga ang imong hugot nga pagtuo Kaniya mahimong mas lig-on pa?
Si Elder Neil L. Andersen sa Korum sa Napulog Duha ka Apostoles mitudlo:
Imahe
Official portrait of Elder Neil L. Andersen of the Quorum of the Twelve Apostles, 2010, August.
Ang pagtuo dili moabot kanato pinaagi sa sulagma ni magpabilin kanato pinaagi sa katungod sa pagkatawo. … Ang pagtuo diha ni Jesukristo usa ka gasa gikan sa langit nga moabot samtang kita mopili nga motuo ug samtang kita magtinguha ug maghupot niini. Ang inyong pagtuo mahimong mag-anam kalig-on o mag-anam kahuyang. Ang pagtuo usa ka baroganan sa gahom, importante dili lamang niining kinabuhia, apan sa atong pag-uswag human sa kamatayon. Kay tungod sa grasya ni Kristo, usa ka adlaw kita maluwas pinaagi sa hugot nga pagtuo diha sa Iyang ngalan [tan-awa ang Mga Taga-Efeso 2:8]. Ang gidak-on sa inyong pagtuo sa umaabot dili pinaagi sa sulagma, apan pinaagi sa pagpili.
Unsa ang mipatigbabaw kanimo gikan sa mga pulong ni Elder Andersen?
Unsa ang iyang natabang kanimo aron makasabot mahitungod sa hugot nga pagtuo diha kang Jesukristo?
Paggahin og panahon sa pagkat-on og dugang mahitungod sa hugot nga pagtuo diha kang Jesukristo pinaagi sa pagtuon sa pipila sa mosunod nga mga kapanguhaan. Irekord ang imong mga panabot diha sa imong journal sa pagtuon. Pagmahunahunaon, ug dapita ang Balaang Espiritu aron tabangan ka nga makat-on unsa ang imong gikinahanglan karong adlawa.
Ipakita ang mosunod nga mga pangutana ug gisugyot nga mga kapanguhaan aron dangpan sa mga estudyante diha sa ilang pagtuon. Mahimong makatabang ang paghatag og pipila sa giimprinta nga mga kopya sa usa o daghan pang mga pakigpulong alang sa mga estudyante nga walay digital nga mga himan aron ma-access kini nga mga materyal.
Maampingong ikonsiderar ang mga abilidad sa pagkat-on o mga panginahanglanon sa indibidwal nga mga estudyante sa klase. Ang uban tingale makabenepisyo gikan sa pagtuon kauban ang usa ka pares. Ipahiangay ang buluhaton o ang kauban nga mga pangutana kon gikinahanglan.
Mahimo kang maghunahuna mahitungod niining mga pangutana o imong kaugalingong mga pangutana diha sa imong pagtuon:
Unsa ang kahulogan sa hugot nga pagtuo diha kang Jesukristo alang kanako?
Nganong importante nga mapalambo ang akong hugot nga pagtuo Kaniya?
Unsa ang akong buhaton aron madugangan ang akong hugot nga pagtuo diha ni Jesukristo?
Mahimong molibot sa tibuok lawak klasehanan [classroom] samtang nagtuon ang mga estudyante aron maila ang mga indibidwal kinsa lagmit adunay mga pangutana o nagkinahanglan og tabang. Dasiga sila sa pagpadayon sa pagsulay, o pagpangutana og makapatin-aw nga mga pangutana aron matabangan ang mga estudyante nga malunsay ang ilang mga panghunahuna.
Bible Dictionary o Giya ngadto sa mga Kasulatan, “ Hugot nga Pagtuo ”
Mahimo kang makakita og lain pang mga kapanguhaan sa mga kasulatan o sa Gospel Library nga app pinaagi sa pagpangita sa termino nga “Hugot nga Pagtuo diha ni Jesukristo.”
Gisugyot nga tambag gikan sa mga Lider sa Simbahan
Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 101–4
Richard C. Edgley, “Hugot nga Pagtuo—ang Pagpili Inyo,” Liahona, Nob. 2010, 31–33
Mahimong bahinon ang klase ngadto sa manag paresan o diha sa gagmay nga mga grupo aron ang mga estudyante makapaambit kon unsa ang ilang nakat-onan. Kon itugot sa panahon, ang andam nga mga estudyante mahimong magpaambit sa ilang mga panabot ngadto sa klase. Dasiga ang mga estudyante sa pagpangita og kahigayonan sa pagpaambit unsa ang ilang nakat-onan kauban sa ilang mga pamilya o sa simbahan. Mahimong pangutan-on ang mga estudyante kon giunsa pagkausab sa ilang paghatag og kahulogan sa hugot nga pagtuo diha kang Jesukristo sa tibuok nga leksiyon.
Komentaryo ug Background nga Impormasyon
Nganong importante man ang pagbutang sa akong hugot nga pagtuo diha ni Jesukristo?
Si Presidente Russell M. Nelson mitambag:
Imahe
Official portrait of President Russell M. Nelson taken January 2018
Kon hisgotan nato ang [hugot nga] pagtuo—ang [hugot nga] pagtuo nga makabalhin og mga bungtod—dili [hugot nga] pagtuo sa kinatibuk-an ang atong gihisgotan apan [hugot nga] pagtuo diha sa Ginoo nga si Jesukristo. …
Tingali tagsatagsang makapangutana sa atong kaugalingon, asa man diay ang atong hugot nga pagtuo? Naa ba sa team? Naa ba sa brand? Naa ba sa mga sikat? Bisan ang pinakasikat nga team mapildi. Ang mga sikat molubad. Ngadto lang sa Usa ka Tawo may kasiguroan ang inyong pagtuo, ug kana ngadto ni Ginoong Jesukristo.
Nganong angay man nakong sulayan sa pagdugang ang akong hugot nga pagtuo diha kang Jesukristo?
Si Presidente Russell M. Nelson mitudlo:
Imahe
Official portrait of President Russell M. Nelson taken January 2018
Ang akong panawagan kaninyo … mao nga sugdi karon ang pagpalambo sa inyong hugot nga pagtuo. Pinaagi sa inyong hugot nga pagtuo, si Jesukristo mopalambo sa inyong abilidad sa pagbalhin sa mga bukid diha sa inyong kinabuhi, [tan-awa ang 1 Nephi 7:12 ], bisan og ang inyong personal nga mga hagit parehas kadako sa Bukid sa Everest.
Ang inyong mga bukid tingali mga kasubo, pagduhaduha, sakit, o ubang personal nga mga problema. Ang inyong mga bukid managlahi, ug bisan pa ang tubag sa matag usa sa inyong mga hagit mao ang pagpalambo sa inyong hugot nga pagtuo. Nagkinahanglan kana og buhat. …
Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto sa magatuo [tan-awa sa Marcos 9:23].
Unsa ang gikinahanglan kanako aron makat-on pinaagi sa Hugot nga Pagtuo?
Si Elder David A. Bednar sa Korum sa Napulog Duha ka Apostoles miingon:
Imahe
Elder David A. Bednar, Quorum of the Twelve Apostles official portrait. 2020.
Ang kasinatian nakapahimo nako sa pagsabut nga ang tubag nga gihatag sa laing tawo sa kasagaran dili mahinumduman og dugay, kon mahinumduman man gani. Apan ang tubag nga atong nadiskobrehan o naangkon pinaagi sa paggamit sa hugot nga pagtuo, sa kasagaran, mahinumduman sa tibuok kinabuhi. Ang labing importanting mga pagkat-on sa kinabuhi mao ang gikaplagan—dili kay gitudloan.
Ang espirituhanong pagsabot nga nadawat ninyo ug kanako, ug diin gikompirmar nga tinuod diha sa atong mga kasingkasing, dili gayod ikahatag ngadto sa laing tawo. Ang bayad sa kakugi ug pagkat-on pinaagi sa hugot nga pagtuo kinahanglang mabayran aron maangkon ug personal nga “makapanag-iya” sa maong kahibalo. Niini lamang paagiha nga unsay nahibaloan sa hunahuna mausab ngadto sa unsay gibati sa kasingkasing. Niini lamang paagiha nga ang usa ka tawo molihok lapas sa pagsalig sa espirituhanong kahibalo ug kasinatian sa uban ug moangkon niadtong mga panalangin alang sa iyang kaugalingon. Niini lamang paagiha nga kita espirituhanong makaandam sa unsay umaabot. Kita kinahanglang “mangita sa pagtulun-an, gani pinaagi sa pagtuon ug usab pinaagi sa hugot nga pagtuo” ( D&P 88:118).
(David A. Bednar, “Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 23)
Sa unsang paagi nga ang hugot nga pagtuo diha kang Jesukristo makaapekto sa akong adlaw-adlaw nga kinabuhi?
Dugang nga Kalihokan sa Pagkat-on
Ang lima ka mga sugyot ni Presidente RussellM. Nelson aron mapalambo ang hugot nga pagtuo
Mahimong ipaambit ang lima ka mga sugyot ni Presidente Russell M. Nelson aron mapalambo ang hugot nga pagtuo kang Jesukristo, nga anaa makita sa iyang pakigpulong nga “Si Kristo Nabanhaw; Ang Hugot nga Pagtuo Kaniya Makapabalhin og mga Bukid” (Liahona, Mayo 2021, 103–4). Dasiga ang mga estudyante sa pagpili og usa sa mga sugyot ug sa paghimo og usa ka plano aron buhaton kini sulod sa usa ka semana. Dapita sila sa pagreport ngadto sa klase sa pag-uswag nga ilang nahimo o mga hagit nga ilang nasinati.