Doktrinal nga Kahanas: Mga Hebreohanon 12:9

Ang Langitnong Amahan mao “ang Amahan sa mga Espiritu.”

Imahe

A young man reading scriptures.

Sa imong pagtuon sa Mga Hebreohanon 12:9, imong nakat-onan ang mahitungod sa imong relasyon ngadto sa Dios, kinsa mao “ang Amahan sa mga espiritu,” ug sa unsang paagi kini nakaapekto sa imong kinabuhi. Kini nga leksiyon makatabang nimo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa Mga Hebreohanon 12:9, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga sitwasyon sa kinabuhi.

Pagsabot, paggamit, ug pagsag-ulo. Sa dihang ang mga estudyante nakasabot og una, dayon nakat-on unsaon paggamit niini nga pagsabot sa ilang mga kinabuhi, ang pagsag-ulo sa mga tudling sa doktrinal nga kahanas mahimo nang mas sayon. Labawng importante, ang doktrina ug ang mga baroganan gikan sa mga tudling dako og purohan nga adunay mahangtorong epekto.

Pagpangandam sa estudyante: Dapita ang mga estudyante sa paghunahuna og mga sitwasyon nga ilang giatubang diin mahimong makatabang kanila ang pagsabot o paghinumdom nga sila mga anak sa Langitnong Amahan.

Posible nga mga Kalihokan sa Pagkat-on

Kini nga leksiyon sa tudling sa doktrinal nga kahanas gidisenyo aron itudlo human sa leksiyon sa “Mga Hebreohanon 12:9,” nga mao ang pangkontekstong leksiyon para sa tudling sa doktrinal nga kahanas sa Mga Hebreohanon 12:9 . Kon gikinahanglan nga kining leksiyon sa tudling sa doktrinal nga kahanas ibalhin ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Ipasabot ug Isag-ulo

Tabangi ang mga estudyante sa pagbansay sa pagpasabot sa doktrina diha sa ilang kaugalingong mga pulong. Ang mosunod mao ang usa ka paagi aron mabuhat kini. Kini nga kalihokan mahimong ipahiangay pinaagi sa pagdapit sa mga estudyante sa pagdrama-drama niini nga sitwasyon nga magkapares, sa gagmayng mga grupo, o isip usa ka klase.

Sa miaging leksiyon imong nakat-onan nga ang Dios mao ang Amahan sa atong espiritu. Handurawa nga ikaw nakig-istorya sa usa ka higala kinsa nagpangutana kon kinsa sila. Gamita ang Mga Hebreohanon 12:9 aron matabangan sila. Diha sa imong pagtubag sa iyang mga pangutana o pagtubag sa iyang mga kabalaka, mahimong ilakip ang mosunod:

Unsa ang ipasabot niini nga kita mga anak sa Dios ug nganong importante nga mahibaloan kini
Sa unsang paagi nga ang pagsabot o wala pagsabot niini nga kamatuoran mahimong makaapekto sa atong pagkatawo ug bili sa kaugalingon
Mga paagi nga ang kalibotan misulay pag-impluwensiya sa atong kahibalo mahitungod kon kinsa kita ug sa atong relasyon ngadto sa Dios, ug nganong gusto man natong suklan kini nga mga impluwensiya

Tabangi ang mga estudyante sa pagsag-ulo sa pakisayran sa kasulatan ug sa mahinungdanong hugpong sa pulong sa kasulatan alang sa Mga Hebreohanon 12:9 , nga “ang Langitnong Amahan mao ‘ang Amahan sa mga espiritu.’” Usa ka paagi sa pagbuhat niini mao ang pagpakita sa unang mga letra sa matag pulong sa pakisayran sa kasulatan ug sa mahinungdanong hugpong sa pulong sa kasulatan didto sa pisara: M H 12:9, a L A m “a A s m e.”

Dapita ang mga estudyante sa pagsulti og balik sa pakisayran ug sa mahinungdanong hugpong sa pulong sa kasulatan pinaagi sa paggamit sa unang mga letra isip mga tima-ilhan. Human sa pipila ka mga pagbalik-balik, papasa ang pipila sa unang mga letra ug tan-awa kon ang mga estudyante makahimo pa ba gihapon sa pagbatbat niini sa eksakto. Dayon, papasa ang tanang mga letra ug balika paglitok ang pakisayran sa kasulatan ug ang mahinungdanong hugpong sa pulong sa kasulatan isip usa ka klase.

Bansaya ang paggamit

Tabangi ang mga estudyante sa pagrebyo sa mga baroganan sa pag-angkon og espirituhanong kahibalo. Ang mosunod nga kalihokan usa ka paagi aron mabuhat kini. Mahimong ipakita ang mosunod nga mahinungdanong mga pulong ug ipangutana ang mga pangutana sa ubos.

Aron matabangan ka sa pagrebyo sa tulo ka mga baroganan sa pag-angkon og espirituhanong kahibalo, mahimong ikonsiderar ang mosunod nga mahinungdanong mga pulong:

Hugot nga pagtuo
Panglantaw
Mga Tinubdan

Tubaga ang mosunod nga mga pangutana. Kon gikinahanglan, mahimo kang mudangop sa mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

Sa unsang paagi nga ang matag usa niining mga pulong adunay kalabotan sa tulo ka mga baroganan sa pag-angkon ug espirituhanong kahibalo?
Nganong importante man nga masabtan ug magamit kini nga mga baroganan?

Dapita ang mga estudyante sa pagpangandam sa paggamit sa mga baroganan sa pag-angkon og espirituhanong kahibalo ug sa doktrina nga gitudlo sa Mga Hebreohanon 12:9 . Usa ka paagi sa pagbuhat niini mao ang pagpakita sa mosunod nga pangaghat [prompt] nga adunay mga blangkong luna diha sa pisara ug pun-an ang nawala nga mga elemento kauban sa klase. Isip alternatibo, mahimong gamiton ang senaryo nga gihatag isip usa ka pananglitan human sa pangaghat.

Si_______________________(Ngalan) usa ka batan-on kinsa __________________________________________________________________ (sitwasyon o panagbangi). Kini nakahimo niya nga mobati nga ____________________________________________________________. Kalabot sa iyang relasyon ngadto sa Dios, siya naghunahuna nga ___________________________________________________________________________________________________________________________________________________________________________________________________________________________________________________________.

Pananglitan, usa ka nakompletong senaryo lagmit mahimong ingon niini:

Si Leslie usa ka batan-on kinsa milabaw sa daghang extracurricular nga mga kalihokan ug usa ka lider taliwala sa iyang mga kauban. Kini nakahimo niya nga mobati nga malipayon. Kalabot sa iyang relasyon ngadto sa Dios, siya naghunahuna nga ang iyang kinabuhi maayo na kaayo og dagan nga wala na gayod niya nakita ang panginahanglan sa dakong pagtutok ngadto Kaniya.

Mahimong ipakita ang mga pangutana nga anaa makita ubos sa matag mosunod nga mga baroganan sa pag-angkon og espirituhanong kahibalo. Ang mga estudyante mahimong maghisgot niini isip usa ka klase, magpares, o sa gagmayng mga grupo.

Susiha ang mga konsepto ug mga pangutana inubanan sa mahangtorong panglantaw

Unsa sa imong hunahuna ang pagtan-aw sa Langitnong Amahan niining tawhana? Nganong importante man alang niining tawhana ang pagkahibalo sa unsang paagi siya nakita sa Langitnong Amahan?
Sa unsang paagi nga ang mas maayo nga pagsabot sa ilang balaang pagkatawo isip usa ka anak sa Dios makaapekto sa tawo niini nga sitwasyon?

Tinguhaa ang dugang nga panabot pinaagi sa balaanong gitudlo nga mga tinubdan

Unsa ang imong nakat-onan gikan sa imong pagtuon sa Mga Hebreohanon 12:9 nga makatabang niini nga sitwasyon?
Unsa pay laing mga tinubdan ang mahimong tun-an sa tawo diha sa imong senaryo nga siya ra, aron makakaplag og dugang nga mga panabot?

Hatagi ang mga estudyante og panahon sa pagpangita, pagsiksik, ug pagpaambit sa pipila sa dugang nga mga kapanguhaan nga nahisgotan sa pangutana sa ibabaw. Kon sila nanginahanglan og tabang, mahimong itudlo sila ngadto sa “Komentaryo ug Background nga Impormasyon” nga bahin sa kataposan sa miaging leksiyon, “Mga Hebreohanon 12:9.”

Lihok diha sa hugot nga pagtuo

Unsa nga kasinatian, personal man o lahi, ang moabot sa imong hunahuna kung ikaw maghunahuna sa paglihok diha sa hugot nga pagtuo? Unsaon nimo paggamit niini aron matabangan ang tawo sa imong senaryo?
Unsa nga mga sugyot ang lagmit nimong mahatag sa tawo sa imong senaryo aron matabangan siya sa paglihok diha sa hugot nga pagtuo?

Ikonsiderar ang pagtapos pinaagi sa paghatag og pagpamatuod sa atong balaang pagkatawo isip mga anak sa Dios o pagdapit sa mga estudyante sa pagpaambit sa ilang mga pagpamatuod. Mahimong makaayo usab ang pagtugot sa mga estudyante sa pagpaambit unsa ang ilang nakat-onan ug nabati pinaagi sa pagpangutana. Pananglitan, “Ngano sa imong hunahuna nga ang Mga Hebreohanon 12:9 usa ka tudling sa doktrinal nga kahanas?” “Unsa ang imong nakat-onan sa imong pagtuon niini nga tudling nga wala pa nimo nahibaloan kaniadto?” o “Sa unsang paagi nimo personal nga magamit kini nga tudling diha sa imong kinabuhi?”

Rebyo sa doktrinal nga kahanas

Ang mosunod nga rebyo nga kalihokan kinahanglan nga gamiton sa usa ka leksiyon nga itudlo sa umaabot human niining usa.

Aron matabangan ang mga estudyante sa ilang pagsag-ulo ug pagsabot sa Mga Hebreohanon 12:9 ug sa mahinungdanong hugpong sa pulong sa kasulatan niini, isulti ang pakisayran ug dapita ang mga estudyante sa pagsulti og balik sa hugpong sa pulong nga, “ang Langitnong Amahan mao ‘ang Amahan sa mga espiritu.’” Dayon balika pagsulti ang hugpong sa pulong ug dapita ang mga estudyante sa pagsulti sa pakisayran. Lagmit makaayo usab ang paglakip sa laing mga tudling sa doktrinal nga kahanas sa Bag-ong Tugon isip kabahin niini nga pagrebyo.

Dugang nga Kalihokan sa Pagkat-on

Alternatibong mga senaryo

Isip usa ka alternatibo sa pagpatubag sa mga estudyante sa pangaghat [prompt] nga gihatag diha sa sayong bahin sa leksiyon, ikonsiderar ang pagpakita sa pipila ka yanong mga senaryo, sama sa mosunod, ug tugoti ang mga estudyante sa pagpili og usa nga tubagon.

Si Susie adunay bati nga relasyon sa iyang mga ginikanan. Kon siya maghunahuna mahitungod sa pagka anak sa Dios, naghunahuna siya kon Siya usa lamang ka laing tawo nga wala malipay sa iyang mga pagpili ug gustong sultihan siya kon unsa ang angayng buhaton.
Si Amari naggahin og dakong panahon sa pagsunod sa unsay nauso sa kalibotan. Siya usahay makaapil sa mga binuhatan nga sukwahi sa mga sugo sa Dios ug nahibulong nganong wala siya makabati og dugang nga kalipay sa iyang kinabuhi.