Mga Hebreohanon 11, Bahin 2
Pagkinabuhi nga may Hugot nga Pagtuo kang Jesukristo
Natingala ka ba kon giunsa sa ubang mga tawo pagpabiling matinud-anon bisan kon nahiatubang sa labing malisod nga mga pagsulay sa kinabuhi? Unsa ang ilang nasabtan mahitungod sa Langitnong Amahan ug kang Jesukristo nga nakatabang kanila sa paglahutay? Human matudloan ang mga Santos nga Hebreohanon mahitungod sa hugot nga pagtuo, gidasig sila ni Pablo nga bansayon ang ilang hugot nga pagtuo kang Jesukristo sama sa gibuhat sa ubang matinud-anong mga tawo. Kini nga leksiyon makatabang kanimo nga madugangan ang imong tinguha sa pagkinabuhi nga may hugot nga pagtuo diha ni Jesukristo ug pag-ila sa mga panalangin nga gihatag sa Dios kanimo tungod sa imong hugot nga pagtuo.
Pagdasig sa mga estudyante nga mahunahunaong maningkamot aron mahimong mas susama ni Jesukristo. Tabangi ang mga estudyante aron makasabot nga ang pagkahimong sama sa Manluluwas usa ka proseso nga nagkinahanglan og hugot nga pagtuo. Ang hugot nga pagtuo kang Jesukristo mahimong usa ka hiyas sa ilang kinaiya diha sa ilang pagkat-on Kaniya ug pagbuhat nga may hugot nga pagtuo Kaniya.
Pagpangandam sa estudyante: Dapita ang mga estudyante sa paghunahuna mahitungod kon sa unsang paagi sila o ang ilang kaila napanalanginan sa Dios tungod kay sila nagbansay sa ilang hugot nga pagtuo diha kang Jesukristo. Dasiga sila nga mangandam sa pagpaambit og usa ka kasinatian ngadto sa klase.
Posible nga mga Kalihokan sa Pagkat-on
Paglihok diha sa hugot nga pagtuo
Aron sugdan ang leksiyon, mahimong magpakita og pipila ka mga hulagway gikan sa mga kasulatan o sa kasaysayan sa Simbahan nga nagpakita sa usa ka tawo nga nagbansay sa iyang hugot nga pagtuo diha kang Jesukristo. Pagdapit og pipila ka mga estudyante aron mubo nga mosugilon og sugilanon sa usa ka indibidwal ug mopasabot sa unsang paagi napanalanginan ang tawo tungod sa iyang paglihok diha sa hugot nga pagtuo. Mahimong gamiton sa mga estudyante ang pagpangandam sa klase nga buluhaton alang niini nga kalihokan.
Paghunahuna og mga indibidwal diha sa mga kasulatan o sa kasaysayan sa Simbahan o sa mga tawo nga imong kaila kinsa gipanalanginan sa Dios tungod kay sila mipakita sa hugot nga pagtuo diha kang Jesukristo. Ang mosunod nga mga hulagway mahimong makatabang kanimo sa paghinumdom sa pipila niini nga mga asoy.
-
Unsa ang mipatigbabaw kanimo niini nga istorya sa tawo?
-
Sa unsang paagi kita naimpluwensiyahan kon kita makadungog o makapaambit sa mga sugilanon sa hugot nga pagtuo? Ngano man?
Sa miaging leksiyon, imong nakat-onan ang mahitungod sa unsa ang pasabot kanimo nga maanaay hugot nga pagtuo kang Jesukristo. Hunahunaa kon sa unsang paagi nga ang pagbansay sa pagpataas sa hugot nga pagtuo Kaniya makapalig-on kanimo sa mga dapit diin ikaw lagmit mobati og kaluya ug kahuyang. Mahimong makatabang ang pagrekord niining mga impresyon diha sa imong journal sa pagtuon. Diha sa imong pagtuon karon, pamalandong kon unsaon nimo nga madugangan ang imong tinguha ug abilidad sa pagbansay sa imong hugot nga pagtuo.
Kadtong nagpakabuhi “[diha sa hugot nga pagtuo]”
Sa narekord sa Mga Hebreohanon 11 , mipaambit si Pablo og daghang mga ehemplo sa mga indibidwal sa Daang Tugon kinsa nagkinabuhi “diha sa hugot nga pagtuo” ug “pinaagi sa hugot nga pagtuo.” Lagmit imong mamatikdan kining mga hugpong sa mga pulong nga gisubli sa makadaghan diha sa Mga Hebreohanon 11. Diha sa imong pagtuon sa pipila ka mga ehemplo nga gipaambit ni Pablo sa mga Santos nga Hebreohanon, paghunahuna mahitungod sa unsang paagi nga ang gugma ug pagkamanggihatagon sa Dios gipakita sa mga ganti ug mga panalangin nga Iyang gihatag ngadto sa mga milihok diha sa hugot nga pagtuo.
Alang sa mosunod nga kalihokan, mahimong bahinon ang klase ngadto sa tulo ka mga grupo, nga ang matag grupo hatagan og usa ka set sa mga bersikulo aron tun-an. Kon nahuman na ang mga estudyante, mahimo silang dapiton sa pagpaambit unsa ang ilang nakat-onan ngadto sa usa ka estudyante nga nagtuon og usa ka lahi nga asoy.
Pagmugna og usa ka tsart nga adunay duha ka kolum diha sa imong journal sa pagtuon parehas sa mosunod. Seguroha nga adunay dakong bakante nga luna ubos sa matag ulohan.
|
Sa unsang paagi nga ang hugot nga pagtuo nabansay |
Sa unsang paagi gigantihan sa Dios ang matinud-anong mga buhat |
Pagtuon og labing menos usa sa mosunod nga mga set sa mga bersikulo. Sa imong pagtuon, irekord ang imong mga panglantaw diha sa tsart sa imong journal sa pagtuon.
Mga Hebreohanon 11:4–11, 17–22
Ikonsiderar ang paggamit sa mosunod nga mga pangutana aron matabangan ang mga estudyante sa pagrebyo kon unsa ang ilang nakat-onan.
-
Unsa ang pipila sa mga paagi nga ang mga tawo nga nahisgotan diha sa imong mga bersikulo nakapakita sa ilang hugot nga pagtuo sa Dios?
-
Unsa ang pipila sa mga paagi nga ang Dios nihatag og ganti kanila sa Iyang gahom ug mga panalangin?
-
Unsa ang imong nakat-onan gikan niini nga mga bersikulo nga makatabang kanimo sa imong kinabuhi?
-
Gikan sa imong pagtuon niini nga mga bersikulo, unsa ang imong nakat-onan mahitungod sa Dios?
Pinaagi sa matinud-anong mga ehemplo nga gipaambit ni Pablo, makakat-on kita og daghang mga kamatuoran mahitungod sa hugot nga pagtuo, sa Dios, ug sa atong kaugalingon. Usa sa mga kamatuoran nga gihulagway sa tibuok niini nga kapitulo gitudlo diha sa Mga Hebreohanon 11:6 : Ang Dios magganti sa kadtong mga nagbansay og hugot nga pagtuo diha kang Jesukristo. Kon wala pa nimo nahimo, mahimong markahan ang “gantihan niya ang nangita kaniya” diha sa bersikulo 6 .
-
Sa unsang paagi nga ang makugihong pagpangita sa Dios usa ka paagi sa pagbansay sa imong pagtuo?
-
Ngano sa imong hunahuna nga ang Langitnong Amahan mahimuot kon kita magbansay sa atong hugot nga pagtuo?
Mahimong ipakita ang mosunod nga mga pangutana ug dapita ang mga estudyante sa paghisgot niini diha sa gagmay nga mga grupo.
Kon naglisod ang mga estudyante sa ikaduhang pangutana, mahimong ipaambit ang pamahayag ni Elder Ronald A. Rasband diha sa “Komentaryo ug Background nga Impormasyon” nga bahin sa leksiyon.
-
Ngano sa imong hunahuna nga ang pagbansay sa hugot nga pagtuo gikinahanglan aron kita makadawat sa mga panalangin sa Dios sa atong mga kinabuhi?
-
Unsa ang makatabang nimo aron makalahutay kon ang mga panalangin alang sa matinud-anong mga buhat daw dili moabot?
Pagkinabuhi nga may hugot nga pagtuo
Agig dugang sa pagpanalangin sa daghang mga tawo sa nangaging panahon tungod sa pagbansay sa hugot nga pagtuo nganha Kaniya, ang Dios usab “ [tigganti kanila] nga magapangita kaniya” ( Hebreohanon 11:6) sa atong panahon.
Paghunahuna og panahon diin ikaw o ang imong kaila nakadawat sa mga panalangin sa Dios tungod sa pagbansay og hugot nga pagtuo diha kang Jesukristo.
Mahimong dapiton ang mga estudyante sa pagrekord sa ilang mga tubag sa mosunod nga mga pangutana diha sa ilang journal sa pagtuon sa dili pa magdapit og mga boluntaryo nga mopaambit sa ilang mga tubag ngadto sa klase.
-
Unsa ang imong nakat-onan mahitungod sa Langitnong Amahan ug ni Jesukristo gikan niadto nga kasinatian?
-
Sa unsang paagi kaha nga ang maong kasinatian mahimong makatabang kanimo sa umaabot aron mabansay ang imong hugot nga pagtuo ngadto Kanila?
Mahimong mopaambit og usa ka personal nga pagsaksi sa mga panalangin sa pagbansay sa hugot nga pagtuo diha kang Jesukristo. Ang mosunod nga pamahayag mahimong basahon sa makusog alang sa pagtapos sa leksiyon.
Si Presidente Russell M. Nelson mitudlo:
Ang tanan nga maayo sa kinabuhi—ang matag kalagmitan nga panalangin nga may mahangturong kahulogan—magsugod sa hugot nga pagtuo. Ang pagtugot nga ang Dios mopatigbabaw sa atong kinabuhi magsugod sa hugot nga pagtuo nga Siya andam nga mogiya kanato.
(Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 102)
Pamalandong kon unsa ang imong nakat-onan ug unsa ang imong gibati diha sa imong pagtuon mahitungod sa hugot nga pagtuo sa Mga Hebreohanon 11. Unsa ang imong nabati nga nadasig buhaton isip resulta sa imong nakat-onan karong adlawa? Unsa man ang imong mahimo aron mobuhat inubanan sa mas hugot nga pagtuo diha kang Jesukristo? Irekord ang imong mga hunahuna ug mga impresyon diha sa imong journal sa pagtuon.
Komentaryo ug Background nga Impormasyon
Sa unsang paagi ako makadawat og mga panalangin gikan sa Dios?
Si Elder Dale G. Renlund sa Korum sa Napulog Duha ka Apostoles mitudlo:
Kadaghanan sa mga panalangin nga tinguhang ihatag sa Dios kanato nagkinahanglan og buhat sa atong bahin—lihok nga magbase sa atong [hugot nga] pagtuo kang Jesukristo. Ang [hugot nga] pagtuo diha sa Manluluwas usa ka baroganan sa paglihok ug gahom. Una molihok kita inubanan sa [hugot nga] pagtuo; dayon moabot ang gahom—sumala sa kabubut-on sa Dios ug panahon. Mahinungdanon kini nga paagi. Ang gikinahanglan nga lihok, bisan pa, kanunayng gamay kon itandi sa mga panalangin nga unya atong madawat [tan-awa ang Mosiah 2:24–25].
(Dale G. Renlund, “Magamadagayaon [Buhong] sa mga Panalangin,” Liahona, Mayo 2019, 70)
Unsa ang akong makat-onan gikan sa mga ehemplo sa matinud-anong mga miyembro sa Simbahan karon?
Ang mosunod nga bidyo nag-asoy sa mga ehemplo sa mga indibidwal nga nagbansay sa hugot nga pagtuo sa Langitnong Amahan ug ni Jesukristo. Paghunahuna mahitungod sa unsang paagi nga ang ilang mga ehemplo mahimong makaimpluwensiya kanimo aron magpakita og mas dakong hugot nga pagtuo sa imong kinabuhi. Kini nga bidyo anaa sa ChurchofJesusChrist.org.
Bidyo nga kinutlo: “Ang [Hugot nga] Pagtuo Dili pinaagi sa Sulagma, apan pinaagi sa Pagpili” [10:49–14:13]
Kon ako dili makadawat og mga tubag o mga panalangin, wala ba koy igong hugot nga pagtuo?
Si Elder Ronald A. Rasband sa Korum sa Napulog Duha ka Apostoles mitudlo:
Ang mga milagro, mga timailhan, ug mga katingalahan makita nga daghan kaayo taliwala sa mga sumusunod ni Jesukristo karon, diha sa inyong mga kinabuhi ug sa akoa. …
… Dili kini kanunay mao kon unsay atong gipangayo o atong gilaoman, apan kon mosalig kita sa Ginoo, Siya maanaa didto, ug Siya dili masayop. Ipahiangay Niya ang milagro sa higayon nga gikinahanglan nato kini. …
Adunay mga higayon nga kita naglaom alang sa usa ka milagro nga mamaayo ang usa ka minahal sa kinabuhi, nga balihon ang usa ka dili makiangayon nga binuhatan, o humokon ang kasingkasing sa usa ka masuk-anon o nahisalaag nga kalag. Kon ikonsiderar ang mga butang sa mortal nga panglantaw, gusto kita nga ang Ginoo manginlabot, nga moayo sa unsay naguba. Pinaagi sa hugot nga pagtuo, ang milagro moabot, bisan dili gayod sa atong gusto nga higayon o sa pamaagi nga maoy atong gitinguha. Nagpasabot ba kana nga dili igo ang atong [hugot nga] pagtuo o dili kita angayan sa Iyang pagpanginlabot? Dili. Kita gipangga sa Ginoo. Gihatag Niya ang Iyang kinabuhi alang kanato, ug ang Iyang Pag-ula nagpadayon sa pagpalingkawas kanato gikan sa mga palas-onon ug sala samtang kita maghinulsol ug mopaduol ngadto Kaniya.
Ang Ginoo nagpahinumdom kanato, “Ang akong mga laraw dili sama sa inyong mga laraw” [ Isaias 55:8]. Siya mitanyag, “Duol kamo kanako, kamong tanan nga gikapoyan ug gibug-atan sa inyong gipas-an ug papahulayon ko kamo” [ Mateo 11:28 ]—pahulay gikan sa kabalaka, pagkadismaya, kahadlok, pagkamasinupakon, kabalaka alang sa mga minahal sa kinabuhi, alang sa nawala o naguba nga mga pangandoy. Ang kalinaw taliwala sa kalibog o kaguol usa ka milagro. Hinumdomi ang mga pulong sa Ginoo: “Wala ba Ako magsulti og kalinaw nganha sa imong hunahuna mahitungod niini nga butang? Unsa ka labaw nga kamatuoran ang imong maangkon kay sa gikan sa Dios?” [ Doktrina ug mga Pakigsaad 6:23]. Ang milagro mao nga si Jesukristo, ang Halangdon nga Jehova, ang Anak sa Dios nga Labing Halangdon, mitubag uban sa kalinaw.
(Ronald A. Rasband, “Tan-awa! Ako Mao ang usa ka Dios sa mga Milagro,” Liahona, Mayo 2021, 109, 111)
Dugang nga mga Kalihokan sa Pagkat-on
Mga Hebreohanon 11. Pag-ila sa mga sumbanan ug pagkanahisama ni Jesukristo
Ikonsiderar ang pagdapit sa mga estudyante sa pagpamalandong kon sa unsang paagi ang pipila sa mga ehemplo sa hugot nga pagtuo nga gihatag ni Pablo sa Mga Hebreohanon 11 motakdo sa mga panghitabo gikan sa kinabuhi ni Jesukristo. Kini mahimong makatabang sa mga estudyante aron makasabot nga daghan sa mga istorya sa Daang Tugon ang mga sumbanan ug mga pagkanahisama sa kinabuhi sa Manluluwas.
Pananglitan, ang pagkaandam ni Abraham sa paghalad kang Isaac isip usa ka sakripisyo (tan-awa ang Mga Hebreohanon 11:17) lagmit nga matandi diha sa paghatag sa Langitnong Amahan sa Iyang Bugtong nga Anak (tan-awa ang Juan 3:16). Sa susama, ang pagtandi ni Pablo sa mga halad sa mga sakripisyo nilang Cain ug Abel (tan-awa ang Mga Hebreohanon 11:4) lagmit matandi diha sa pagtanyag ni Jehova sa Iyang kaugalingon aron mahimong atong Manunubos diha sa premortal nga konseho sa langit (tan-awa ang Moises 4:1–4). Si Noah, kinsa “[miandam og] arko aron sa pagluwas sa iyang panimalay” ( Mga Hebreohanon 11:7), mahimong itandi kang Jesukristo, kinsa “giandam gikan sa katukoran sa kalibotan sa pagtubos sa [Iyang] mga katawhan” ( Ether 3:14).
Ether 12. Mga ehemplo sa hugot nga pagtuo gikan sa Basahon ni Mormon
Samtang ang mga estudyante nagtuon sa mga ehemplo ni Pablo sa matinud-anong mga tawo sa Mga Hebreohanon 11 , mahimong dapiton sila sa pagrebyo sa Ether 12:13–22 alang sa dugang nga mga asoy sa matinud-anong mga indibidwal.