Hebreo 11, Fizarana 1

Finoana an’i Jesoa Kristy

Maro ireo olona miresaka ny fananany finoana—amin’ny tenany, amin’ny hafa, ary eny hatramin’ny zava-mitranga na zavatra iray aza. Noho izany, inona ny antony mahatonga ny fananana ny finoana an’i Jesoa Kristy ho mampanan-kery no sady manan-danja? Hitantsika ao amin’ny Hebreo 11 ny fampianaran’ny Apôstôly Paoly mahakasika ny fampitomboana ny finoana an’i Jesoa Kristy. Ity lesona ity dia hanampy anao hahatakatra ny atao hoe finoana an’i Jesoa Kristy sy ny maha-zava-dehibe izany aminao manokana.

Mifantoha amin’ireo fitsipika izay mitondra fiovam-po. Rehefa mamaritra ny fandehan’ny lesona ianao, dia ataovy azo antoka fa ampy ny fotoana lany amin’ny fanampiana ireo mpianatra mba handray anjara amin’ny ampahany amin’ny lesona izay mifantoka amin’ireo fitsipika izay mitondra fiovam-po.

Fiomanan’ny mpianatra: Asao ireo mpianatra mba hameno ny fehezan-teny hoe “Ny finoana dia ________” ary mba ho vonona hizara ny valin-teniny ao an-dakilasy.

Sahanasa fianarana azo atao

Ny fahazoana antoka avy amin’ny finoana an’i Jesoa Kristy

Ity no ampahany voalohany amin’ny lesona misy fizaràna roa izay manasongadina ny fampianaran’i Paoly momba ny finoana ao amin’ny Hebreo 11. Raha toa ka voafetra ny fotoam-pianarana ary lesona iray monja momba ny Hebreo 11 no azo ampianarina, dia hevero ny hitadiavana fomba ahafahana mampianatra tsara ireo lesona roa ireo.

Azon’ireo mpianatra atao ny mampiasa ny fiomanan’ny mpianatra izay nataony amin’ity sahanasa manaraka ity. Mety hanampy ny fanoratana ny famaritana ny atao hoe finoana eny amin’ny solaitrabe mba ho hitan’ny rehetra, sy manasa ireo mpianatra mba handahatra ireo teny ireo mandritra ny lesona.

• Inona ny zavatra mety holazainao raha sendra ka misy olona manontany anao hoe inona no atao hoe finoana?

Soraty ao amin’ny diary fandalinanao na amin’ny taratasy fandraisana naoty nomerika ny famaritana izay hitanao. Hevero ny hanova na hanampy ilay famaritana sy handray an-tsoratra ireo eritreritra sy fahatsapana hafa rehefa manao fandalinana ianao anio.

Vakio ny Hebreo 11:1 ary asio marika ny fomba namaritan’ny Apôstôly Paoly ny atao hoe finoana. Mety hanampy ny mahafantatra fa ao amin’ny Dikantenin’i Joseph Smith amin’ity andininy ity dia novain’ny Mpaminany ny teny hoe zavatra mba ho lasa fahatokiana, izay teny midika ho fahazoana antoka na fitokisana .

Hevero ny hanasa ireo mpianatra mba hamerina hanonona ny Hebreo 11:1 amin’ny fitenin’izy ireo manokana mba hahazoana antoka fa takany ny hevitr’ireo teny ao min’ity andininy ity.

• Inona araka ny eritreritrao no dikan’izany hoe mahazo antoka na manam-pahatokisana amin’ny zavatra izay antenaina izany?

• Ahoana ny fomba ahafahanao mahazo porofo momba ny zavatra izay tsy hitanao maso akory?

• Raha miainga avy amin’io andininy io, inona no mety ho fanovana na fanampiana hataonao amin’ny famaritana ny atao hoe finoana?

Hevero ny hanoratra ity fanambarana manaraka ity eny amin’ny solaitrabe na asao ireo mpianatra mba hanitsy ny famaritany ka hampiditra ireo hevitra izay mitovitovy amin’izany.

Fahamarinana tsotra iray izay ampianarin’ny Hebreo 11:1 dia ny hoe ny finoana dia fahatokiana ny amin’ny zavatra antenaina, fanehoana ny zavatra tsy hita.

Mba hahitana fahasamihafana eo amin’ny famakiana ireto andininy manaraka ireto, dia hevero ny hizara roa ny mpianatra na ataovy miasa mandeha tsiroaroa. Asao ny antsasaky ny mpianatra mba hamaky ny Almà 32:21 ary ny antsasany iray hafa kosa hamaky ny Fanekem-pinoana 1:4. Afaka mampitaha ny zavatra izay nianarany ireo mpianatra rehefa avy eo.

Vakio ny Almà 32:21 sy ny Fanekem-pinoana 1:4 , ary tadiavo ireo hevi-baovao fanampiny momba ny finoana. Ianao dia mety te hampifandray na hampifanaraka ireo andininy roa ireo ao amin’ny Hebreo 11:1 .

• Inona ihany koa ny zavatra hafa izay nianaranao momba ny finoana?

• Ahoana no mety hanovana na hanampianao ny famaritana ny atao hoe finoana noho ireo zavatra izay nianaranao ireo?

Fomba iray hanitsiana ny fanambarana ny fahamarinana teo aloha momba ny finoana an’i Jesoa Kristy dia ny fahatokiana ny amin’ny zavatra antenaina, fanehoana ny zavatra tsy hita izay marina.

Raha toa ka nosoratana teny amin’ny solaitrabe ilay fanambarana na ilay famaritana teo aloha, dia amboary ireo teny mba hazava tsara ny fampitàna ny atao hoe “finoana an’i Jesoa Kristy”.

Mba hanampiana ireo mpianatra hampitombo ny fahatakarany ny finoana an’i Jesoa Kristy, dia hevero ny hametraka ny sasany amin’ireto fanontaniana manaraka ireto. Ampio izy ireo mba hamantatra ny anjara asan’ny Mpamonjy ao amin’ny drafitry ny famonjena sy ny anjara asany manokana eo amin’ny fiainan’izy ireo.

Mety hanampy ny fizarana ny fanambarana voalohany izay nataon’ny Filoha Russell M. Nelson ao amin’ny fizarana “Fanazavana sy fampahalalana avy amin’ny zava-miseho” ao amin’ny lesona.

• Inona araka ny eritreritrao no maha-samihafa ny fananana finoana an’i Jesoa Kristy amin’ny fananana finoana olona iray na zavatra hafa?

• Ahoana no mety hanampian’ny finoanao an’i Jesoa Kristy anao mba hatoky Azy rehefa miatrika fanontaniana na fisalasalana ianao?

Ampitomboy ny fahatakaranao ny finoana an’i Jesoa Kristy

Saintsaino ny fahatsapanao mikasika ny finoanao manokana an’i Jesoa Kristy. Amin’ny fomba ahoana no ahatsapanao fa matanjaka ny finoanao Azy? Amin’ny fomba ahoana no ahatsapanao fa tokony mbola hatanjaka kokoa ny finoanao Azy?

Ny Loholona Neil L. Andersen ao amin’ny Kôlejin’ny Apôstôly Roambinifolo dia nampianatra fa:

Tsy tonga amintsika noho ny kisendrasendra ny finoana, na mitoetra eo amintsika noho ny fizokiana. … Ny finoana an’i Jesoa Kristy dia fanomezana avy any an-danitra izay tonga rehefa misafidy ny hino isika sy rehefa katsahintsika sy hifikirantsika izany. Na mihamatanjaka ny finoanao na izany mihamalemy. Ny finoana dia fitsipiky ny hery izay tsy vitan’ny hoe manan-danja eo amin’ity fiainana ity ihany, fa manan-danja koa amin’ny fivoarantsika any ankoatry ny fahafatesana. Noho ny fahasoavan’i Kristy, dia ho voavonjy isika indray andro any amin’ny alalan’ny finoana ny anarany [jereo ny Efesiana 2:8]. Ny finoanao amin’ny ho avy dia tsy avy amin’ny kisendrasendra, fa avy amin’ny safidy.

(Neil L. Andersen, “Ny finoana dia tsy avy amin’ny kisendrasendra fa avy amin’ny safidy,” Liahona, nôv. 2015, 65)

• Inona ny zavatra nanaitra anao tamin’ny teny izay nataon’ny Loholona Andersen?

• Inona tamin’izany no nanampy anao hahatakatra ny finoana an’i Jesoa Kristy?

Makà fotoana hianarana misimisy kokoa momba ny finoana an’i Jesoa Kristy amin’ny alalan’ny fandalinana ny sasany amin’ireto loharanom-pahalalana manaraka ireto. Raketo an-tsoratra ao anatin’ny diary fandalinanao ny hevitrao. Eritrereto tsara, ary asao ny Fanahy Masina mba hanampy anao hianatra ny zavatra izay ilainao androany.

Asehoy ireto fanontaniana sy loharanom-pahalalana naroso manaraka ireto mba hojeren’ireo mpianatra rehefa mandalina izy ireo. Mety hanampy ny fanomezana ireo mpianatra izay tsy manana fitaovana nomerika ny dika mitovy vita pirinty iray na maromaro amin’ireo lahateny ireo mba ho solon’izany fitaovana izany.

Jereo tsara ny fahaiza-manao sy ny zavatra izay ilain’ny mpianatra tsirairay ao an-dakilasy. Mety hitondra fahombiazana kokoa ho an’ny sasany ny miara-mianatra amin’ny namany. Ahitsio araka izay ilaina ny asa fampiharana na ireo fanontaniana izay mifandray amin’izany.

Mety hieritreritra ireto fanontaniana ireto ianao na fanontaniana hafa avy aminao manokana rehefa mandalina:

• Inona no dikan’ny hoe finoana an’i Jesoa Kristy amiko?

• Nahoana no zava-dehibe ny fampitomboako ny finoana Azy?

• Inona ny zavatra azoko atao mba hampitomboana ny finoako an’i Jesoa Kristy?

Hevero ny hivezivezy manerana ny efitrano fianarana rehefa mandalina ireo mpianatra mba hijerena ireo mpianatra izay mety manana fanontaniana na mila fanampiana. Amporisiho ireo mpianatra hanohy, na hametraka fanontaniana mitondra fanazavana mba hanampiana azy ireo hanatsara ny fisainany.

Soratra masina naroso sy fitaovana manampy amin’ny fandalinana

Almà 32:26–34

Etera 12:6–9

Torolalana ho an’ny Soratra Masina, “ Finoana ”

Mety hahita loharanom-pahalalana hafa ao amin’ny soratra masina na ao amin’ny application Médiathèque de l’Evangile ianao amin’ny alalan’ny fikarohana ny teny hoe “Finoana an’i Jesoa Kristy.”

Torohevitra avy amin’ireo mpitarika ny Fiangonana

Russell M. Nelson, “Nitsangana i Kristy; hamindra tendrombohitra ny finoana Azy,” Liahona, mey 2021, 101–4

Neil L. Andersen, “Ny finoana dia tsy avy amin’ny kisendrasendra fa avy amin’ny safidy,” Liahona, nôv. 2015, 65–68

Richard C. Edgley, “Ny Finoana—anao ny safidy,” Liahona, nôv. 2010, 31–33

Hevero ny hizara ireo mpianatra tsiroaroa na anaty vondrona kely mba hahafahan’izy ireo mizara ny zavatra izay nianarany. Raha ohatra ka misy fotoana, dia afaka mizara ny hevitr’izy ireo amin’ny iray kilasy ireo mpianatra izay maniry ny hizara izany. Amporisiho ireo mpianatra mba hitady fotoana hahafahan’izy ireo mba mizara ny zavatra izay nianarany amin’ny fianakaviany na any am-piangonana. Hevero ny hanontany ireo mpianatra momba ny fiovan’ny famaritan’izy ireo ny atao hoe finoana an’i Jesoa Kristy rehefa mandritra ny lesona.

Fanazavana sy fampahalalana avy amin’ny zava-miseho

Inona no maha-zava-dehibe ny fametrahana ny finoako eo amin’i Jesoa Kristy?

Ny Filoha Russell M. Nelson dia nanoro hevitra hoe:

Rehefa miresaka momba ny finoana isika—ilay finoana izay afaka mamindra tendrombohitra—dia tsy miresaka finoana amin’ny ankapobeny fa ilay finoana an’i Jesoa Kristy Tompo. …

Mety hanontany tena isika tsirairay hoe aiza ny finoantsika? Ao amin’ny ekipa iray ve izany? Ao anatin’ny marika famantarana zavatra amidy iray ve izany? Ao anatin’ny olo-malaza iray ve izany? Na ny ekipa mahay indrindra aza dia mety ho resy. Afaka mihalefy laza ireo olo-malaza. Ao anatin’ilay Iray izay ihany no ho voaro foana ny finoantsika, dia tsy aiza fa ao amin’i Jesoa Kristy Tompo izany.

(Russell M. Nelson, “Avelao ny finoanareo hiseho,” Liahona, mey 2014, 29)

Nahoana aho no tokony hiezaka hampitombo ny finoako an’i Jesoa Kristy?

Ny Filoha Russell M. Nelson dia nampianatra hoe:

Ny antsoko aminareo … dia ny mba hanombohanareo androany amin’ny fampitomboana ny finoanareo. Amin’ny alalan’ny finoanareo, i Jesoa Kristy dia hampitombo ny fahafahanareo mamindra ireo tendrombohitra eo amin’ny fiainanareo [jereo ny 1 Nefia 7:12 ], na dia mety ho lehibe tahaka ny tendrombohitra Evresta aza ireo fanamby izay atrehanareo manokana.

Mety ho fanirery, na ahiahy, na aretina na olan’ny tena manokana hafa ireo tendrombohitrareo. Hiovaova ireo tendrombohitrareo saingy ny valiny tsirairay tandrify ireo fanambinareo dia natao hampitombo ny finoanareo. Mitaky asa anefa izany. …

Ny finoana an’i Jesoa Kristy no hery lehibe indrindra omena antsika eto amin’ity fiainana ity. Ny zavatra rehetra dia hain’ny mino [jereo ny Marka 9:23].

(Russell M. Nelson, “Nitsangana i Kristy; hamindra tendrombohitra ny finoana Azy,” Liahona, mey 2021, 102–3, 104)

Inona ny antony ilana ahy mba hianatra amim-pinoana?

Ny Loholona David A. Bednar ao amin’ny Kôlejin’ny Apôstôly Roambinifolo dia nilaza fa:

Ireo zavatra izay efa avy niainako dia namela ahy hahatakatra fa matetika ny valin-teny izay omen’ny olona iray dia tsy tsaroana maharitra, raha ho tadidy akory aza. Fa ny valin-teny izay hitantsika na azontsika mandritra ny fampiharana ny finoana kosa, mazàna, dia tadidy mandritra ny androm-piainana iray manontolo. Ny lesona manan-danja indrindra eo amin’ny fiainana dia takarina —fa tsy ampianarina.

Ny fahatakarana ara-panahy ny fitahiana izay nomena ahy sy anao, ary nohamafisina fa marina ao am-pontsika, dia tsy azo omena olon-kafa fotsiny tsotra izao. Ny saram-pianarana fahazotoana sy fandalinana amim-pinoana dia tsy maintsy efaina mba hahazoana sy “hananana” ny fahalalana manokana tahaka izany. Amin’ny alalan’izany fomba izany ihany koa no ahafahana manova ny zavatra tsapa ao am-po ho lasa fantatra ao an-tsaina. Amin’ny alalan’izany fomba izany ihany koa no ahafahan’ny olona iray mihoatra amin’ny fiankinana amin’ny fahalalana sy traikefa ara-panahin’ny hafa ary mitaky ireny fitahiana ireny ho an’ny tenany manokana. Amin’ny alalan’izany fomba izany ihany koa no ahafahantsika miomana ara-panahy hiatrika izay ho avy. Isika dia tokony “hikatsaka ny hianatra, na amin’ny alalan’ny fandalinana izany na amin’ny alalan’ny finoana” ( D&C 88:118).

(David A. Bednar, “Seek Learning ny Faith,” Ensign, Sept.. 2007, 67)

Inona no fiantraikan’ny finoana an’i Jesoa Kristy eo amin’ny fiainako andavanandro?

Sahanasa fianarana fanampiny

Ny Filoha Russell M. Nelson miresaka momba ny soso-kevitra dimy ahafahana mampitombo ny finoana

Hevero ny hizara ireo soso-kevitra dimin’ny Filoha Russell M. Nelson mba hampitomboana ny finoana an’i Jesoa Kristy, izay hita ao amin’ny lahateniny hoe “Nitsangana i Kristy; hamindra tendrombohitra ny finoana Azy” (Liahona, mey 2021, 103–4). Amporisiho ireo mpianatra mba hisafidy iray amin’ireo soso-kevitra ireo ary mba hanao drafitra hanatanterahana izany mandritra ny herinandro. Asao izy ireo mba hanao tatitra amin’ny iray kilasy ny fivoarana izay vitany na ireo fanamby izay niainany.