A e ke pyetur ndonjëherë veten nëse dikush tjetër e kupton vërtet atë që po kalon ti në jetë? Libri i Hebrenjve na mëson se Jezu Krishti zbriti nga froni i Tij qiellor për të jetuar si një njeri i vdekshëm në tokë dhe për të kryer një Shlyerje të pafundme për ne. Për shkak të kësaj, Ai na njeh përsosurisht dhe e di përsosurisht si të na ndihmojë. Ky mësim mund ta rritë sigurinë tënde që Jezu Krishti mund të të ndihmojë në kohë nevoje.
Përdorimi i muzikës për të ftuar Shpirtin. Muzika, veçanërisht himnet e Kishës, mund të luajnë një rol domethënës për t’i ndihmuar nxënësit të ndiejnë ndikimin e Frymës së Shenjtë në përvojën e tyre të të mësuarit të ungjillit. Të kënduarit e një ose më shumë strofave të një himni që lidhet drejtpërsëdrejti me mësimin, mund t’i ndihmojë nxënësit të përgatiten për t’i studiuar parimet e ungjillit ose për t’i përsëritur parimet që kanë mësuar.
Përgatitja e nxënësve: Ftojini nxënësit të shqyrtojnë fragmentin e zotërimit doktrinor tek Alma 7:11–13 dhe të vijnë në klasë të përgatitur për të treguar se pse ndiejnë se ky është një fragment me vlerë për t’u kuptuar.
Veprimtari të Mundshme të të Mësuarit
Shpëtimtari e kupton
Merreni parasysh të këndoni një himn që flet rreth aftësisë së Shpëtimtarit për të na dhënë ngushëllim dhe paqe, për ta filluar orën mësimore. Nxënësve mund t’u kërkohet të vënë veshin për pikëpamje rreth Jezu Krishtit ndërkohë që këndojnë së bashku.
Mund të shohësh edhe materialin filmik “Where Can I Turn for Peace?” [“Ku Mund të Gjej Paqe?”] (04:03) te ChurchofJesusChrist.org.
Si do ta shpjegoje mesazhin e këtij himni me vetë fjalët e tua?
Në ditarin tënd të studimit, shkruaj rreth diçkaje për të cilën të nevojitet vërtet ndihmë në jetën tënde.
Në këtë letër drejtuar hebrenjve, Pali u dha mësim shenjtorëve rreth Jezu Krishtit dhe se si Ai mund t’u jepte atyre forcë në rrethanat me të cilat përballeshin (shih Hebrenjve 4:16). Ndërkohë që studion, kërko mënyrën se si mund të të ndihmojë Jezu Krishti.
Merreni parasysh të krijoni kolonat e sugjeruara më poshtë në tabelë. Ndërkohë që nxënësit kërkojnë në shkrimet e shenjta për përgjigje, ftojini ata t’i shkruajnë zbulimet e tyre në kolonat e duhura.
Në ditarin tënd të studimit, krijo një tabelë të ngjashme me atë më poshtë.
Përse Jezu Krishti është në gjendje të më kuptojë?
Çfarë bekimesh mund të më japë Jezu Krishti për shkak se Ai më kupton?
Lexo te Hebrenjve 2:9–10, 13–18 dhe 4:12–16 , duke kërkuar përgjigje për pyetjet në tabelë. Shkruaji përgjigjet poshtë krerëve të duhur. Vër re se vargjet te Hebrenjve 2:9 dhe 16 po i referohen lënies së fronit qiellor nga Jezu Krishti për të jetuar si një njeri i vdekshëm në tokë.
Çfarë mësove për Jezu Krishtin që ndien se mund të të ndihmojë ty ose të tjerët?
Dëgjoni me vëmendje dhe vëzhgoni ndërkohë që nxënësit tregojnë në klasë. Kërkoni udhërrëfim nga Fryma e Shenjtë për t’i dalluar nevojat e nxënësve. Bëni pyetjet vijuese ose pyetje të tjera, sipas nevojë, për t’i diskutuar frazat nga shkrimet e shenjta me më shumë hollësi.
Pse mund të jetë ngushëlluese të dish që Jezu Krishti mund t’i dallojë “mendimet dhe dëshirat e zemrës”? ( Hebrenjve 4:12 .)
Çfarë kupton nga fraza Ai “mund t’u vijë në ndihmë atyre që tundohen”? ( Hebrenjve 2:18 .) Vër re se fjala e përkthyer “tundohen” mund të përkthehet edhe “sprovohen” ose “u nënshtrohen sprovave”. Fraza vijë në ndihmë do të thotë të shkojë për t’i dhënë ndihmë dikujt.
Një e vërtetë që mund të kesh zbuluar, është se ngaqë Jezu Krishti vuajti dhe u tundua në të gjitha gjërat, Ai na kupton dhe mund të na ndihmojë në kohë nevoje. Profeti Alma në Librin e Mormonit e dha mësim gjithashtu këtë të vërtetë. Merre parasysh ta bësh referencë kryq fragmentin e zotërimit doktrinor Alma 7:11–13 me Hebrenjve 2:18 .
Ftoni nxënës të japin pikëpamjet e tyre nga përgatitja e nxënësve.
Plaku Dejvid A. Bednar, i Kuorumit të Dymbëdhjetë Apostujve, shpjegoi si ta kuptosh më mirë aftësinë e Shpëtimtarit për të të kuptuar dhe ndihmuar. Ti mund të duash të shohësh materialin filmik “I Duronin Barrët e Tyre me Lehtësi” (16:23), në dispozicion në ChurchofJesusChrist.org, nga kodi kohor 12:15 deri në 13:21 ose lexo thënien vijuese.
Pamja
Elder David A. Bednar, Quorum of the Twelve Apostles official portrait. 2020.
“Nuk ka dhembje fizike, as plagë shpirtërore, as ankth të shpirtit apo të zemrës, as dobësi apo lëngatë që ju ose unë do të hasim ndonjëherë në vdekshmëri, të cilën Shpëtimtari nuk e përjetoi fillimisht. Në një çast dobësie ju mund të thërrisni: ‘Askush s’e di si është. Askush s’e kupton.’ Por Biri i Perëndisë di dhe kupton në mënyrë të përsosur, sepse Ai i ka ndier dhe i ka mbajtur barrët tona vetjake. Dhe për shkak të flijimit të Tij të pafund dhe të përjetshëm (shih Alma 34:14), Ai ka dhembshuri të përsosur dhe mund të na e shtrijë krahun e Tij të mëshirës. Ai mund të na arrijë, prekë, ndihmojë, shërojë e forcojë që të jemi më shumë sesa mund të ishim ndonjëherë dhe që të na ndihmojë të bëjmë atë që nuk mund ta bënim kurrë duke u mbështetur vetëm mbi vetë fuqinë tonë.”
Si të ndihmojnë vargjet tek Alma 7:11–13 ose thënia nga Plaku Bednar për ta kuptuar më mirë aftësinë e Shpëtimtarit për të të ndihmuar?
Mendo për një shembull nga jeta jote, jeta e të tjerëve ose nga shkrimet e shenjta, që e ilustron të kuptuarit përsosurisht nga Shpëtimtari të përvojave dhe nevojave tona. Nëse të duhet ndihmë për të menduar për një shembull, merre parasysh të studiosh vargjet te Gjoni 11:21–27, 32–36 ; Mosia 24:11–15 ose Doktrina e Besëlidhje 122:5–9 .
Si mund të të ndihmojë ky shembull që të mbështetesh te Jezu Krishti?
Ftojini nxënësit të japin shembujt që përcaktuan. Nëse nxënësit janë ngurrues për të folur, merreni parasysh të tregoni një përvojë vetjake ose të diskutoni njërin nga fragmentet e sugjeruara të shkrimeve të shenjta.
Afrimi me guxim te froni i hirit
Lexo te Hebrenjve 4:16 , duke kërkuar atë që na fton të bëjmë Pali për të marrë ndihmën që na nevojitet. Merre parasysh ta shenjosh atë që gjen.
Çfarë mendon se do të thotë t’i “afrohemi … me guxim fronit të hirit”?
Mund të jetë e dobishme të vini në dukje se kur ne vijmë para Perëndisë, kjo duhet të bëhet me nderim të përulur, admirim plot adhurim dhe përgjërim me pendesë. Ne mund të kemi siguri te vetja, jo për shkak të mirësisë ose aftësive tona, por për shkak të meritave të Jezu Krishtit, i cili bën të mundur që të vijmë para Perëndisë (shih 2 Nefi 2:8).
Për çfarë duhet të kemi siguri kur i qasemi Perëndisë?
Si mund të na duket dhe si mund të ndihemi po t’i “afrohemi … me guxim fronit të hirit”?
Merreni parasysh të jepni një dëshmi vetjake për Jezu Krishtin dhe Shlyerjen e Tij. Ftojini nxënësit të afrohen me guxim te froni i hirit për të gjetur forcë dhe ndihmë në kohën kur kanë nevojë.
Komente dhe Informacion për Rrethanat
Çfarë është denjimi i Jezu Krishtit?
Plaku Kuentin L. Kuk, i Kuorumit të Dymbëdhjetë Apostujve, dha mësim:
Pamja
Official portrait of Elder Quentin L. Cook. Called to the Quorum of the Twelve Apostles on 6 October 2007.
“Shembulli i përulësisë dhe i sakrificës së Shpëtimtarit për tërë njerëzimin është ngjarja më e rëndësishme e historisë. Shpëtimtari, edhe si një pjesëtar i Kreut‑Perëndi, ishte i gatshëm të vinte në tokë si një foshnjë e vobektë dhe të fillonte një ekzistencë që përfshiu mësimdhënien dhe shërimin e vëllezërve dhe të motrave të Tij dhe më së fundi vuajtjen e një dhembjeje të papërshkrueshme në Gjetseman e në kryq, me qëllim që ta përsoste Shlyerjen e Tij. Ky veprim dashurie dhe përulësie nga ana e Krishtit njihet si denjimi i Tij. Ai e bëri këtë për çdo burrë e çdo grua që Perëndia e ka krijuar ose do ta krijojë.”
Presidenti Hauard W. Hanter (1907–1995) dha mësim sa vijon:
Pamja
Howard W. Hunter
“Është e rëndësishme të kujtojmë se Jezusi ishte në gjendje të mëkatonte, që Ai mund të ishte nënshtruar, që plani i jetës dhe i shpëtimit mund të kishte dështuar, por që Ai qëndroi i vërtetë. Nëse nuk do të kishte mundësi dorëzimi nga Ai ndaj tundimit të Satanit, nuk do të kishte provë reale, fitore të vërtetë si përfundim. Në qoftë se Atij do t’i ishte hequr e drejta të mëkatonte, Atij do t’i ishte hequr vetë liria e zgjedhjes. Ishte Ai që pati ardhur të mbronte dhe të siguronte lirinë e zgjedhjes së njeriut. Ai duhej të ruante aftësinë dhe zotësinë të mëkatonte nëse do të donte të vepronte kështu. Sikurse shkroi Pali: ‘Edhe pse ishte Bir, mësoi të jetë i bindur nga ato që pësoi’ ( Hebrenjve 5:8) dhe Ai ‘u tundua në të gjitha ashtu si ne, por pa mëkatuar’ ( Hebrenjve 4:15). Ai ishte i përsosur dhe i pamëkatë, jo ngaqë duhej të ishte, por përkundrazi ngaqë Ai qartazi dhe vendosmërisht dëshironte të ishte.”
(Howard W. Hunter, “The Temptations of Christ”, Ensign, nëntor 1976, f. 19)
Hebrenjve 4:16. Cila është domethënia e “fronit të hirit”?
“Në shumë kultura në lashtësi, t’i afroheshe fronit të një mbreti pa të ftuar ishte rrezik për jetën, por me ftesën e mbretit, personi mund të afrohej dhe të fliste me siguri. T’i afrohemi Perëndisë ‘me guxim’ do të thotë të kemi siguri se Perëndia dëshiron që ne t’i afrohemi fronit të Tij dhe që do të marrim ndihmën e Tij” (New Testament Student Manual [2018], f. 477).
Për sa i përket mëshirës që na ofron Perëndia, Plaku Xhefri R. Holland, i Kuorumit të Dymbëdhjetë Apostujve, dha mësim:
Pamja
Official Portrait of Elder Jeffrey R. Holland. Photographed January 2018.
“Sigurisht gjëja që Perëndinë e gëzon më shumë rreth të qenit Perëndi, është emocioni i të qenit i mëshirshëm, veçanërisht për ata që nuk e presin ose shpesh ndihen sikur nuk e meritojnë”.
(Xhefri R. Holland, “Punëtorët në Vresht”, Ensign ose Liahona, maj 2012, f. 33)
Veprimtari Plotësuese të të Mësuarit
Sprovat e mia mund të më ndihmojnë t’i kuptoj dhe ndihmoj të tjerët
Pasi ta diskutoni aftësinë e Shpëtimtarit për të na kuptuar, shpërndani thënien vijuese nga Plaku Jozef B. Uirthlin (1917–2008), i Kuorumit të Dymbëdhjetë Apostujve:
Pamja
Last official portrait of Elder Joseph B. Wirthlin of the Quorum of the Twelve Apostles, 2004. Died December 1, 2008.
“Për shkak se Jezu Krishti vuajti së tepërmi, Ai i kupton vuajtjet tona. Ai e kupton brengën tonë. Ne përjetojmë gjëra të vështira në mënyrë që edhe ne të mund të kemi një dhembshuri dhe mirëkuptim më të madh për të tjerët.”
Për t’i ndihmuar nxënësit të reflektojnë për këtë thënie, bëni pyetje të tilla si: “Kur të ka ngushëlluar dikush që ka pasur një përvojë të ngjashme me tënden?” “Si ke arritur t’i kuptosh më mirë të tjerët për shkak të sprovave që përjetove?”