Hebrenjve 7–10

“Fitoi një Shpëtim të Amshuar”

A ke përjetuar ndonjëherë një rast kur kishe nevojë që të vërtetohej besimi yt te Jezu Krishti? Kur ke ndier që kishe nevojë për ca ndihmë shtesë për të qëndruar në shtegun e besëlidhjeve? Shenjtorët hebrenj po kërkonin të siguroheshin rreth besimit të tyre te Jezu Krishti dhe fuqisë së Tij për t’i shpëtuar. Pali u shkroi për t’ua ofruar këtë siguri. Ai u kujtoi atyre se vetë ligji i Moisiut i drejtonte te Jezu Krishti dhe Shlyerja e Tij si burimi i vërtetë i shpëtimit. Ky mësim ka për qëllim të të ndihmojë ta forcosh besimin te Jezu Krishti si Shpëtimtari dhe Shëlbuesi yt duke të të ndihmuar t’i kuptosh simbolet e lashta në ligjin e Moisiut.

Përfshirja e paraqitjes së mësuesit. Marrja e një roli aktiv në procesin e të mësuarit i ndihmon nxënësit t’i kuptojnë dhe zbatojnë doktrinën dhe parimet nga shkrimet e shenjta. Sidoqoftë, ajo nuk e zëvendëson tërësisht nevojën për një mësues që ta paraqesë në mënyrën e duhur informacionin ndërkohë që nxënësit dëgjojnë. Ndonjëherë, një mësues duhet t’i shpjegojë, qartësojë dhe ilustrojë konceptet që nxënësit t’i kuptojnë ato më qartë.

Përgatitja e nxënësve: Ftojini nxënësit të sjellin një objekt në klasë dhe të shpjegojnë se si ai dëshmon për Jezu Krishtin ose ua kujton Atë. Për shembull, një nxënës mund të sjellë një gomë dhe të shpjegojë se ajo i kujton Jezu Krishtin sepse Ai mund t’i fshijë ose falë mëkatet tona.

Veprimtari të Mundshme të të Mësuarit

“Të gjitha gjërat japin dëshmi për [Jezu Krishtin]” ( Moisiu 6:63)

Nëse është e mundur, merreni parasysh ta skiconi tabernakullin (shihni diagramin më tej në këtë mësim) në dysheme përpara orës mësimore, duke përdorur ngjitëse letër ose spango. Ose vizatojeni diku ku nxënësit mund ta shohin. Përndryshe, paraqitni disa ose të gjitha figurat në këtë mësim që nxënësit t’i shohin gjatë gjithë orës mësimore.

Gjej një objekt afër që të kujton Jezu Krishtin ose që mund të përdoret për të dëshmuar për Të. Merr parasysh çfarë ka objekti që të kujton (ose përfaqëson) Jezu Krishtin.

Plotësoje thënien vijuese duke përdorur këtë objekt:

Paraqiteni fjalinë e paplotë në vijim dhe ftojini nxënësit ta plotësojnë atë duke përdorur objektin që zgjodhën gjatë përgatitjes për orën mësimore. Ata mund ta bëjnë këtë në dyshe, në grupe të vogla ose si klasë.

“__________________ më kujton Jezu Krishtin sepse ________________________.”

• Si mund të të ndihmojnë simbole dhe krahasime si këto për ta thelluar të kuptuarit tënd për Jezu Krishtin dhe atë që Ai ka bërë për ty?

Shkrimet e shenjta shënojnë se të gjitha gjërat e dhëna nga Perëndia dëshmojnë për Jezu Krishtin (për shembull, shih 2 Nefi 11:4 ; Moisiu 6:63).

• Si mund të të ndihmojë të kujtuarit e kësaj?

Ceremonitë dhe ordinancat e ligjit të Moisiut kishin për qëllim të funksiononin si një “simbol” apo “shenjë” që i drejtonte izraelitët te Jezu Krishti dhe flijimi i Tij shlyes (shih 2 Nefi 11:4 ; Jakobi [LiM] 4:4–5 ; Mosia 3:15). Në letrën e tij drejtuar hebrenjve, Pali diskutoi simbolikën e ligjit të Moisiut dhe tabernakullit të lashë për t’u kujtuar shenjtorëve nevojën e tyre për Jezu Krishtin dhe Shlyerjen e Tij. Ai donte t’i ndihmonte shenjtorët judeas të qëndronin besnikë ndaj Jezu Krishtit, në vend që të ktheheshin te ndjekja e ligjit të Moisiut, dhe mësimet e tij mund të na ndihmojnë edhe ne ndërsa përpiqemi të qëndrojmë besnikë ndaj Shpëtimtarit sot. Në këtë mësim, do të keni mundësinë ta kuptoni më mirë se si simbolika në shkrimet e shenjta na drejton dhe dëshmon për Jezu Krishtin.

Në bazë të nevojave të nxënësve dhe kohës që ka mbetur nga mësimi, përcaktoni a do të përqendroheni te pjesa “Priftërinjtë sipas urdhrit të Melkizedekut”, te pjesa “Simbolika e tabernakullit të lashtë” apo tek të dyja.

Priftërinjtë sipas urdhrit të Melkizedekut

Në letrën e Palit drejtuar hebrenjve, prifti i lartë dhe priftërinjtë e tjerë të izraelitëve të lashtë simbolizojnë Jezu Krishtin.

Njëri rol i priftërinjve qe të vepronin si ndërmjetës, duke qëndruar simbolikisht mes njerëzve dhe Perëndisë. Ata e përmbushnin këtë rol duke ofruar flijime të përditshme kafshësh për mëkatet dhe shkeljet e izraelitëve (shih Levitiku 1 ; Hebrenjve 10:11). Kjo bëhej në tabernakull.

Lexo te Hebrenjve 7:22–28 , duke vënë re Përkthimin prej Joseph Smith-it për Hebrenjve 7:25–26 (gjendet te shtojca e Përkthimit prej Joseph Smith-it). Kërko mënyrën se si veprimet e këtyre priftërinjve të lartë na ndihmojnë të kuptojmë se Jezu Krishti ofroi jetën e Vet si fli për mëkatet tona. Merri parasysh përkufizimet e mëposhtme ndërkohë që studion:

Paraqitini pyetjet vijuese që nxënësit t’i shohin ndërsa lexojnë:

“Garant” te Hebrenjve 7:22 i referohet dikujt që jep siguri për borxhin financiar të një personi tjetër.

“Besëlidhjeje shumë më të mirë” i referohet besëlidhjes së epërme të ungjillit të themeluar nga Krishti.

“Ai” te Hebrenjve 7:24 i referohet Jezu Krishtit.

“Plotësisht” te Hebrenjve 7:25 do të thotë “tërësisht” dhe “përjetësisht”.

Merreni parasysh t’i ftoni nxënësit t’i shkruajnë përgjigjet e tyre për pyetjet vijuese në tabelë:

• Cilat fjalë ose fraza në këto vargje qenë më kuptimplota për ty? Përse?

• Cilat pjesë në këto vargje na mësojnë që Jezu Krishti ofroi jetën e Vet si flijim për mëkatet tona?

• Çfarë di ti rreth Jezu Krishtit ose çfarë përvojash ke pasur me Të që të japin siguri që Ai mund të të shpëtojë?

Simbolika e tabernakullit të lashtë

Merreni parasysh t’i vini në dukje pjesët e ndryshme të tabernakullit ndërkohë që shpjegoni Ditën e Shlyerjes.

Një herë në vit, në Ditën e Shlyerjes (shih Levitiku 16), prifti i lartë kryente flijime të veçanta kafshësh përpara se të hynte te pjesa e tabernakullit që njihej si vendi më i shenjtë (ose Shenjtërorja e Shenjtëroreve). Kjo pjesë e tabernakullit simbolizonte mbretërinë celestiale, ose praninë e Perëndisë. Këto flijime dhe veprime të priftit të lartë kishin për qëllimin të simbolizonin mënyrën se si Jezusi, Kryeprifti i Madh, do të bënte një flijim që do të përgatiste një udhë që njerëzit të hynin në praninë e Perëndisë (shih Hebrenjve 9:1–15).

Nëse është e mundur, shiko materialin filmik “The Tabernacle” [“Tabernakulli”] (07:18) për ta kuptuar më mirë këtë simbolikë. Ky material filmik është në dispozicion në ChurchofJesusChrist.org.

Për veprimtarinë e radhës, merreni parasysh ta ndani klasën në gjysmë dhe ta ftoni njërën gjysmë të lexojë fragmentet te Hebrenjve 9 dhe gjysmën tjetër të lexojë fragmentet te Hebrenjve 10. Mund të jetë e dobishme t’i paraqitni pyetjet që nxënësit t’u referohen ndërsa lexojnë vargjet. Lëvizni nëpër klasë dhe jepuni ndihmë nxënësve të veçantë sipas nevojës.

Kërkoji përgjigjet për pyetjet e mëposhtme ndërkohë që lexon te Hebrenjve 9:11–15, 24, 28 ose Hebrenjve 10:4, 10–17 .

• Çfarë mësove nga këto vargje rreth Shpëtimtarit dhe Shlyerjes së Tij?

• Në bazë të këtyre vargjeve, çfarë bekimesh mund të na vijnë për shkak të Shlyerjes së Jezu Krishtit?

Ndihmojini nxënësit të përcaktojnë të vërteta nga këto vargje. Një e vërtetë e mundshme që mund të përcaktojnë, është se nëpërmjet Shlyerjes së Jezu Krishtit, ne mund të pastrohemi nga mëkati dhe të marrim premtimin për jetë të përjetshme.

• Çfarë të mësojnë bekimet e premtuara nga Shpëtimtari rreth asaj që Ai dëshiron për ty?

• Si mund ta tregosh mirënjohjen tënde për atë që Jezu Krishti ka bërë për ty?

Jepuni nxënësve kohë të mjaftueshme për të përsiatur për udhëzimet vijuese dhe për të shkruar në ditarët e tyre. Inkurajojini ata t’i ndjekin nxitjet. Jepni dëshmi për Jezu Krishtin si Shpëtimtari dhe Shëlbuesi ynë.

Përsiat për faktin se si të ndihmoi studimi i krahasimeve dhe i simbolikës në këtë mësim për ta kuptuar më mirë Jezu Krishtin dhe Shlyerjen e Tij.

• Cilat janë disa simbole në kohën tonë që na drejtojnë te Jezu Krishti?

Merr parasysh se si kërkimi më i shpeshtë i simbolikave rreth Jezu Krishtit mund të ndikojë te marrëdhënia jote me Të. Kërko ndihmë nga Ati Qiellor nëpërmjet Frymës së Shenjtë për të përcaktuar se si mund ta bësh këtë më shpesh në studimin tënd personal të shkrimeve të shenjta. Vepro sipas çdo nxitjeje që merr.

Komente dhe Informacion për Rrethanat

Çfarë ishte Dita e Shlyerjes?

Një herë në vit, në ditën e shenjtë judease të quajtur Dita e Shlyerjes (e quajtur edhe Yom Kippur [Jom Kipur]), priftit të lartë i lejohej të hynte në vendin shumë të shenjtë (të quajtur edhe Shenjtërorja e Shenjtëroreve) në tabernakull, ose, më vonë, në tempullin e Jerusalemit. Në altarin e flijimit, që ndodhej pikërisht jashtë vendit të shenjtë, prifti i lartë flijonte një ka dhe një cjap. Ai më pas do e spërkaste gjakun e kafshëve në vendet e caktuara në vendin më të shenjtë për të simbolizuar Shlyerjen e Krishtit për mëkatet e priftit dhe për mëkatet e popullit. Prifti i lartë më pas, në mënyrë simbolike i transferonte mëkatet e popullit te një cjap tjetër (të quajtur cjap fajshlyes), i cili më pas nxirrej në shkretëtirë, për të simbolizuar heqjen e mëkateve të popullit. Ai gjithashtu flijonte dy desh si një flijim për veten e tij dhe njerëzit. (Shih Bible Dictionary, “ Fasts ”; shih edhe Levitiku 16:22 .)

Veprimtari Plotësuese të të Mësuarit

Priftëria Melkizedeke

Nëse nxënësit do të merrnin dobi nga përqendrimi te Priftëria Melkizedeke, merrni parasysh të përdorni pjesën “Priftëria Melkizedeke më Drejton për te Jezu Krishti” nga përvijimi Eja, Më Ndiq “6–12 Nëntor. Hebrenjve 7–13: ‘Kryeprifti i të Mirave që do të Vijnë’”, (Eja, Më Ndiq – Për Individët dhe Familjet: Dhiata e Re 2023). Ftojini nxënësit të përcaktojnë mënyra sipas të cilave ordinancat e Priftërisë Melkizedeke mund t’i ndihmojnë t’i afrohen më shumë dhe të bëhen më shumë si Jezu Krishti.

Ordinancat e lashta dhe moderne

Nëse nxënësit do të merrnin dobi nga përqendrimi te mënyra se si ordinancat e priftërisë të drejtojnë te Jezu Krishti, merrni parasysh të përdorni pjesën “Ordinancat e lashta dhe moderne të drejtojnë te Jezu Krishti” nga përvijimi te manuali Eja, Më Ndiq “6–12 Nëntor. Hebrenjve 7–13: ‘Kryeprifti i të Mirave që do të Vijnë’”, (Eja, Më Ndiq – Për Individët dhe Familjet: Dhiata e Re 2023). Ftojini nxënësit të diskutojnë se si ordinancat e ndryshme dëshmojnë për Jezu Krishtin. Për shembull, ata mund të diskutojnë se si pagëzimi simbolizon vdekjen, varrimin dhe ringjalljen e Krishtit (shih Romakëve 6:1–6).