Përsëritja 22 e Zotërimit Doktrinor

Mësoji Përmendsh Referencat dhe Frazat Kyç të Shkrimeve të Shenjta

Family in New Zealand sitting in the living room reading scriptures together.

A e ke pyetur veten ndonjëherë se përse është e rëndësishme që t’i mësosh përmendsh shkrimet e shenjta? Mësimi përmendsh i shkrimeve të shenjta mund të të ndihmojë të marrësh frymëzim, të kujtosh Shpëtimtarin dhe t’ua mësosh ungjillin të tjerëve. Ky mësim ka për qëllim të të ndihmojë të mësosh përmendsh disa nga referencat e shkrimeve të shenjta dhe frazat kyç të shkrimeve të shenjta nga fragmentet e zotërimit doktrinor në Dhiatën e Re.

Nxitja e një mjedisi të sigurt të të mësuarit me pranim dhe respekt. Kur nxënësit e dinë që mësuesit e tyre dhe shokët e shoqet e tyre të klasës i duan dhe i pranojnë, ka më shumë gjasë që të vijnë në orën mësimore të përgatitur për të mësuar dhe për të kontribuar në përvojën e të mësuarit. Kërkoni mënyra për t’i ndihmuar nxënësit të ndiejnë se i duan dhe për t’i ndihmuar ta shprehin në mënyrën e duhur dashurinë për njëri-tjetrit.

Përgatitja e nxënësve: Ftojini nxënësit të bisedojnë me një pjesëtar të familjes ose shok apo shoqe rreth mënyrës se si mësimi përmendsh i shkrimeve të shenjta e ka frymëzuar atë pjesëtar të familjes ose shok apo shoqe ose e ka ndihmuar atë t’i afrohet më pranë Shpëtimtarit.

Veprimtari të Mundshme të të Mësuarit

Pse t’i mësosh përmendsh shkrimet e shenjta?

Mund të jetë e nevojshme të jepet një mësim për fragmentet e zotërimit doktrinor në vend të këtij mësimi për përsëritje. Referojuni udhëzuesit të ritmit mësimor të ofruar nga drejtori apo bashkërenduesi zonal ose rajonal për t’u siguruar që të jepet çdo mësim për fragmentin e zotërimit doktrinor gjatë zhvillimit të seminarit.

Përfytyro sikur po merr pjesë në një anketë për revistën Për Forcën e Rinisë. Si mund të përgjigjeshe po të të bënin pyetjen në vijim:

• Cilat janë pesë arsyet kryesore pse duhen mësuar përmendsh shkrimet e shenjta?

Nxënësit mund të mendojnë rreth asaj që mësuan gjatë veprimtarisë së përgatitjes së nxënësve ndërkohë që i përgjigjen pyetjes.

Ka shumë arsye të mira pse duhen mësuar përmendsh shkrimet e shenjta. Shkrimet e shenjta të mësuara përmendsh mund të jenë si miq që na japin frymëzim, ngushëllim dhe motivim në kohë nevoje (shih Riçard G. Skot, “Fuqia e Shkrimeve të Shenjta”, Ensign ose Liahona, nëntor 2011, f. 6-8). Të mësuarit përmendsh i shkrimeve të shenjta mund të na ndihmojë të “sh[ohim] te [Shpëtimtari] në çdo mendim” ( Doktrina e Besëlidhje 6:36). Të mësuarit përmendsh i shkrimeve të shenjta mund të na ndihmojë të “fito[jmë] fjalën e [Perëndisë]” ( Doktrina e Besëlidhje 11:21).

• Si mund të ndikojë të mësuarit përmendsh i shkrimeve të shenjta te marrëdhënia juaj me Jezu Krishtin?

Mësoji përmendsh fragmentet

Shpenzo disa minuta për të mësuar përmendsh ose kujtuar referencat dhe frazat kyç të shkrimeve të shenjta të fragmenteve vijuese të zotërimit doktrinor nga Dhiata e Re. Pasi të ndiesh siguri se i di këto referenca dhe fraza kyç, zgjidh një ose më shumë nga veprimtaritë vijuese për ta vënë në provë kujtesën tënde.

Paraqiteni tabelën vijuese ose jepjuani atë nxënësve si fletushkë.

Doctrinal Mastery

Zotërimi Doktrinor i Dhiatës së Re: 1 Korintasve – Zbulesa

1 Korintasve 6:19–20	“Trupi juaj është tempulli i Frymës së Shenjtë.”
1 Korintasve 11:11	“Në Zotin as burri s’është pa gruan, as gruaja pa burrin.”
1 Korintasve 15:20–22	“Ashtu sikur të gjithë vdesin në Adamin, kështu të gjithë do të ngjallen në Krishtin.”
1 Korintasve 15:40–42	Në Ringjallje, ka tri shkallë lavdie.
Efesianëve 1:10	“Kur të plotësoheshin kohërat, t’i sillte në një krye të vetëm, në Krishtin, të gjitha gjërat.”
Efesianëve 2:19–20	Kisha është “ndërtuar mbi themelin e apostujve dhe të profetëve, duke qënë Jezu Krishti vetë guri i qoshes”.
2 Thesalonikasve 2:1–3	“Dita e Krishtit … nuk do të vijë, pa ardhur më parë rënia.”
2 Timoteut 3:15–17	“Shkrimet e shenjta … mund të të bëjnë të ditur për shpëtimin.”
Hebrenjve 12:9	Ati Qiellor është “Ati [i] shpirtrave”.
Jakob [Bibël] 1:5–6	“Por në qoftë se ndonjërit nga ju i mungon urtia, le të kërkojë nga Perëndia.”
Jakob [Bibël] 2:17–18	“Besimi, në qoftë se s’ka vepra, është i vdekur.”
1 Pjetër 4:6	“Ungjilli [iu] predikua edhe të vdekurve.”
Zbulesa 20:12	“Dhe të vdekurit u gjykuan … sipas veprave të tyre.”

Mundësia 1: Bëj një vizatim

Ftoni një nxënës të përzgjedhë një fragment të shkrimit të shenjtë për zotërimin doktrinor pa u thënë nxënësve të tjerë se cili është fragmenti. Nxënësi do të bëjë ndihma me skica (pa përdorur numra ose germa) derisa një nxënës tjetër të përcaktojë referencën e duhur të shkrimit të shenjtë dhe frazën kyç. Nxënësit mund të punojnë në dyshe, në grupe të vogla ose si klasë. Pas ushtrimit, nxënësit mund të diskutojnë për pyetjen vijuese si klasë ose në grupe të vogla.

• Në ç’mënyrë mendon se një shkrim i shenjtë i mësuar përmendsh mund të jetë si një mik që mund të të japë frymëzim, ngushëllim dhe motivim në kohë nevoje?

Mundësia 2: Shkruaje

Merreni parasysh t’i ndani nxënësit në grupe të vogla. Jepini çdo nxënësi një fletë letre. Ftojini anëtarët e grupit të zgjedhin një fragment të zotërimit doktrinor. Më pas ata mund të shkruajnë me radhë nga një fjalë nga referenca e shkrimit të shenjtë dhe fraza kyç e shkrimit të shenjtë. Pasi një anëtar i grupit të shkruajë një fjalë, atëherë ai ose ajo ia kalon letrën anëtarit tjetër të grupit që e shkruan fjalën e ardhshme, derisa grupi ta ketë shkruar saktë të gjithë referencën dhe frazën e shkrimit të shenjtë. Grupet mund ta përsëritin këtë veprimtari dhe t’i vënë kronometër vetes për të parë se sa përmirësohen. Pas ushtrimit, nxënësit mund të diskutojnë për pyetjen vijuese si klasë ose në grupe të vogla.

• Si mendon që mund të të ndihmojë mësimi përmendsh i shkrimeve të shenjta që të “sh[ohësh] te [Shpëtimtari] në çdo mendim”? ( Doktrina e Besëlidhje 6:36)

Mundësia 3: Emërtoje referencën e shkrimit të shenjtë

Ndajeni klasën në dyshe ose grupe të vogla. Ftojeni një nxënës të tregojë se sa fjalë mendon se do t’i nevojiten nga një frazë kyç e shkrimit të shenjtë për të gjetur referencën e shkrimit të shenjtë. Një nxënës tjetër më pas përzgjedh një frazë kyç të shkrimit të shenjtë dhe lexon me zë të lartë atë numër fjalësh nga fraza kyç e shkrimit të shenjtë. Nxënësi i parë më pas përpiqet të përcaktojë referencën e shkrimit të shenjtë. Nxënësit mund ta përsëritin këtë ushtrim aq herë sa të duan dhe ta ndryshojnë numrin e fjalëve që duhet lexuar nga fraza kyç e shkrimit të shenjtë. Pas ushtrimit, nxënësit mund të diskutojnë për pyetjen vijuese si klasë ose në grupe të vogla.

• Si mendon se mund të të ndihmojë mësimi përmendsh i shkrimeve të shenjta që të jesh i/e përgatitur për ta përhapur ungjillin tek të tjerët?

Reflekto për përvojën tënde

• Çfarë ushtrimesh përdore për të të ndihmuar t’i mësoje përmendsh referencat e shkrimeve të shenjta dhe frazat kyç të shkrimeve të shenjta?

• Si po ecën me mësimin përmendsh të referencave dhe frazave kyç të shkrimeve të shenjta për fragmentet e zotërimit doktrinor për Dhiatën e Re? Çfarë plani ke për t’i mësuar përmendsh ato me të cilat po punon ende?

• Si mendon se mund ta bekojë jetën tënde të mësuarit përmendsh i shkrimeve të shenjta?