Hyrje në Zotërimin Doktrinor

Qëllimi i Zotërimit Doktrinor

Ky mësim do të të njohë me zotërimin doktrinor dhe se si ai mund ta bekojë jetën tënde dhe të të ndihmojë ta ndërtosh themelin tënd shpirtëror mbi Jezu Krishtin.

I frymëzuar dhe i kohës. Presidenti M. Rasëll Ballard, i Kuorumit të Dymbëdhjetë Apostujve, bëri deklaratën e mëposhtme për mësuesit e seminarit dhe të institutit: “[Zotërimi Doktrinor] është [i] frymëzuar dhe [i] kohës. A[i] do të ketë një ndikim të mrekullueshëm tek të rinjtë tanë. Sidoqoftë, suksesi i Zotërimit Doktrinor … do të vare[t] deri në një shkallë të rëndësishme nga ju” (M. Rasëll Ballard, “Mundësitë dhe Përgjegjësitë e Mësuesve të SAK-ut në Shekullin e 21-të” [mbrëmje me një Autoritet të Përgjithshëm, 26 shkurt 2016], broadcasts.ChurchofJesusChrist.org).

Përgatitja e nxënësve: Ftojini nxënësit të zgjedhin njërin prej fragmenteve të zotërimit doktrinor që u duket interesant, që mund t’i ndihmojë për një nevojë personale apo që i përgjigjet një pyetjeje që kanë. Një listë e fragmenteve ndodhet në programin kompjuterik Doctrinal Mastery [Zotërimi Doktrinor] ose afër fundit të materialit Dokumenti Bazë i Zotërimit Doktrinor.

Veprimtari të Mundshme të të Mësuarit

Ndërtimi i një themeli mbi Jezu Krishtin

Tornado, building and power lines in Cordele, Georgia, on April 5. 2017. (vert)

Plaku Nil L. Andersen, i Kuorumit të Dymbëdhjetë Apostujve, paralajmëroi për vorbulla erërash shpirtërore:

“Më shqetësuese se tërmetet dhe luftërat e profetizuara [në ditët e mëvonshme], janë vorbullat e erërave shpirtërore, të cilat mund t’ua shkulin nga rrënjët themelet tuaja shpirtërore dhe mund ta vendosin shpirtin tuaj në vende që asnjëherë nuk i përfytyruat të mundura, nganjëherë duke mos e vënë re fare se jeni lëvizur”.

(Nil L. Andersen, “Vorbullat e Erërave Shpirtërore”, Ensign ose Liahona, maj 2014, f. 18.)

Cilat janë disa nga vorbullat e erërave shpirtërore që përpiqen të na i shkulin nga rrënjët themelet tona shpirtërore?

Mendoni për një vorbull ere shpirtërore me të cilën mund të jeni duke u përballur. Lexojeni vargun te Helamani 5:12 dhe kërkoni mënyra si t’i bëni ballë kësaj vorbulle ere.

Çfarë vutë re që mund t’ju ndihmojë t’u bëni ballë vorbullave të erërave shpirtërore?
Si mendoni, çfarë do të thotë të ndërtojmë një themel mbi Jezu Krishtin?
Në çfarë mënyrash do të përfitonit ju vetë nga ndërtimi i një themeli të fortë mbi Jezu Krishtin?

Themeli Im Shpirtëror

Mendo për themelin tënd shpirtëror dhe vlerësoje veten sipas pohimeve të mëposhtme me “Jam Dakord”, “Jam Disi Dakord”, “Nuk Jam dhe aq Dakord” ose “Nuk jam Dakord”.

Jam duke ndërtuar një themel të fortë mbi Jezu Krishtin dhe ungjillin e Tij.
Jam duke i shtuar njohuritë e mia për Jezu Krishtin dhe doktrinën e Tij.
Ndiej se mundem t’i përdor shkrimet e shenjta për të shpjeguar doktrinën e Jezu Krishtit.
Jam në gjendje t’u gjej përgjigje pyetjeve që unë apo të tjerët kemi rreth ungjillit.

Zotërimi doktrinor

Seminari mund të të ndihmojë të ndërtosh themelin tënd mbi Jezu Krishtin teksa mëson doktrinën e Tij, vjen tek Ai dhe bëhesh dishepulli/ja i/e Tij (shih 3 Nefi 11:39). Lexoji dy paragrafët e parë në kapitullin “Hyrje në Zotërimin Doktrinor” te Dokumenti Bazë i Zotërimit Doktrinor (2022), duke kërkuar mënyra se si seminari mund të të ndihmojë të ndërtosh themelin tënd mbi Jezu Krishtin.

Çfarë gjete?

Ka dy rezultate kryesore për zotërimin doktrinor që do të të ndihmojnë të ndërtosh themelin tënd mbi Jezu Krishtin. Lexoji dy rezultatet për zotërimin doktrinor në kapitullin “Hyrje në Zotërimin Doktrinor” te Dokumenti Bazë i Zotërimit Doktrinor.

Çdo javë në seminar do të punosh me zotërimin doktrinor. Në pjesën më të madhe të këtyre mësimeve, do të studiosh njërin prej 24 fragmenteve të shkrimit të shenjtë nga Dhiata e Re që njihen si fragmente të zotërimit doktrinor. Diagrami i mëposhtëm ilustron se çfarë do të bësh në mësimet e zotërimit doktrinor.

Merreni parasysh ta shfaqni diagramin ose ta vizatoni atë në tabelë. Ky diagram përfaqëson mënyrën se si janë të organizuara mësimet e zotërimit doktrinor.

Njiheni dhe shpjegojeni doktrinën

Jini të ndjeshëm ndaj pjekurisë shpirtërore të secilit nxënës. Kërkoni plot lutje udhërrëfimin e Frymës së Shenjtë ndërsa e përshtatni mësimin me nevojat e nxënësve.

Më herët në mësim ju e vlerësuat veten në lidhje me faktin se sa ndieni se mundeni t’i përdorni shkrimet e shenjta për të shpjeguar doktrinën e Jezu Krishtit. Pavarësisht se si e vlerësuat veten, studimi i zotërimit doktrinor do t’i rritë njohuritë tuaja për Shpëtimtarin dhe doktrinën e Tij. Aftësia juaj për të shpjeguar doktrinën e Tij duke përdorur shkrimet e shenjta do të rritet.

Këqyreni listën e fragmenteve të zotërimit doktrinor të Dhiatës së Re dhe frazat e tyre kyç të shkrimeve të shenjta. Këtë listë mund ta gjeni pranë fundit të materialit Dokumenti Bazë i Zotërimit Doktrinor. Përzgjidhni njërin prej fragmenteve që ju duket interesant, që mund të ndihmojë për një nevojë personale ose që mund të ndihmojë për një pyetje që keni.

Nxënësit mund të përfitojnë nga diskutimi i pyetjeve të mëposhtme me një partner.

Cilin fragment të shkrimit të shenjtë përzgjodhe?
Çfarë të mëson ky fragment rreth Jezu Krishtit apo doktrinës së Tij?
Në çfarë mënyrash do të bekohej jeta jote po të dije se si ta shpjegoje doktrinën nga ky fragment?

Marrja e njohurisë shpirtërore

Nxënësit do të kenë përvoja të ndryshme me parimet e marrjes së njohurisë shpirtërore. Përshtateni këtë pjesë të mësimit sipas nevojave dhe aftësive të nxënësve. Ka mësime të veçanta më vonë në programin mësimor për secilin nga tre parimet e marrjes së njohurisë shpirtërore. Nëse shumica e nxënësve kanë pak apo aspak përvojë me përdorimin e parimeve të marrjes së njohurisë shpirtërore, merreni parasysh të jepni mësim pjesët 1, 2 dhe 3 te “Marrja e Njohurisë Shpirtërore” përpara se të jepni mësimin për fragmentin e parë të zotërimit doktrinor.

Në mësimet për zotërimin doktrinor, do të keni mundësinë të mësoni më shumë dhe të praktikoheni mbi përdorimin e parimeve të marrjes së njohurisë shpirtërore për t’ju ndihmuar t’u përgjigjeni pyetjeve personale dhe shoqërore, si edhe pyetjeve rreth doktrinës, praktikave apo historisë së Kishës. Mësimi dhe përdorimi i këtyre parimeve do t’ju ndihmojë të ndërtoni themelin tuaj mbi Shpëtimtarin dhe të ktheheni tek Ai kur hasni pyetje. Tre prej parimeve të marrjes së njohurisë shpirtërore që do të praktikoni në seminar janë:

Veproni me besim.
Shqyrtojini konceptet e pyetjet me një këndvështrim të përjetshëm.
Kërkoni kuptueshmëri të mëtejshme nëpërmjet burimeve të caktuara në mënyrë hyjnore.

Nëse nuk keni njohuri për këto parime, mund të lexoni nëse dëshironi paragrafët 5–12 në kapitullin “Marrja e Njohurisë Shpirtërore” te Dokumenti Bazë i Zotërimit Doktrinor.

Çfarë di për këto parime?
Çfarë përvojash ke pasur me këto parime?
Në çfarë mënyrash mendon se këto parime mund të të ndihmojnë ta ndërtosh themelin tënd mbi Krishtin dhe t’u bësh ballë vorbullave të erërave shpirtërore?

Fragmentet e shkrimeve të shenjta për zotërimin doktrinor

Çdo vit në seminar do të inkurajohesh të mësosh përmendsh një frazë kyç të shkrimit të shenjtë për 24 fragmentet e shkrimeve të shenjta të zotërimit doktrinor.

Plaku Riçard G. Skot (1928–2015), i Kuorumit të Dymbëdhjetë Apostujve, dha mësim për futjen në kujtesë të shkrimeve të shenjta.

“Fuqi e madhe mund të vijë nga futja në kujtesë e shkrimeve të shenjta. Futja në kujtesë e shkrimeve të shenjta është si të krijosh miqësi të re. Ajo është si të zbulosh një individ të ri që mund të të ndihmojë në kohë nevoje, të japë frymëzim e ngushëllim dhe të jetë një burim nxitjeje për ndryshimin e nevojshëm.”

(Riçard G. Skot, “Fuqia e Shkrimeve të Shenjta”, Ensign ose Liahona, nëntor 2011, f. 6.)

Si mendon, përse do të ishte e dobishme të futësh në kujtesë fragmente të ndryshme të shkrimeve të shenjta?
Si mendon se mund të të ndihmojë futja në kujtesë e shkrimeve të shenjta për të ndërtuar themelin tënd mbi Jezu Krishtin dhe për t’u bërë ballë vorbullave të erërave shpirtërore?

Kushtoji pak çaste shqyrtimit të 24 fragmenteve të zotërimit doktrinor dhe frazave kyç të shkrimeve të shenjta për kursin e Dhiatës së Re. Mund të përdorësh programin Doctrinal Mastery [Zotërimi Doktrinor] ose materialin Dokumenti Bazë i Zotërimit Doktrinor. Nëse dëshiron, mund të fillosh ta mësosh përmendsh referencën dhe frazën kyç të shkrimit të shenjtë për fragmentin që zgjodhe më herët.

Komente dhe Informacion për Rrethanat

Përse është i rëndësishëm zotërimi doktrinor?

Presidenti M. Rasëll Ballard, i Kuorumit të Dymbëdhjetë Apostujve, dha mësim:

“[Zotërimi doktrinor] do të përqendrohet te ndërtimi dhe forcimi i besimit të studentëve tanë te Jezu Krishti dhe fortifikimi i tyre me mundësi më të madhe për ta jetuar dhe vënë në zbatim ungjillin në jetën e tyre. Duke i përdorur shkrimet e shenjta dhe fjalët e profetëve, ata do të mësojnë si të veprojnë me besim në Krisht për të marrë njohuri shpirtërore dhe kuptueshmëri për ungjillin e Tij. Dhe ata do të kenë mundësi për të mësuar se si ta vënë në zbatim doktrinën e Krishtit dhe parimet e ungjillit për pyetjet dhe sfida që dëgjojnë dhe shohin çdo ditë midis bashkëmoshatarëve dhe në median shoqërore.”

(M. Rasëll Ballard, “Mundësitë dhe Përgjegjësitë e Mësuesve të SAK-ut në Shekullin e 21-të” [mbrëmje me një Autoritet të Përgjithshëm, 26 shkurt 2016], ChurchofJesusChrist.org.)

Veprimtari Plotësuese të të Mësuarit

Veprimtari për shenjimin e shkrimeve të shenjta të zotërimit doktrinor

Për t’i ndihmuar nxënësit t’i shenjojnë fragmentet e shkrimeve të shenjta për zotërimin doktrinor, merreni parasysh të përdorni këtë veprimtari. Përcaktojeni numrin e fragmenteve që do të përdorni në këtë veprimtari dhe caktojini secilit nxënës një fragment (disa nxënësve mund t’u caktohet i njëjti fragment).

Jepuni kohë nxënësve të përgatiten, pastaj ftojini të bëjnë si vijon: 1) të vizitojnë një anëtar tjetër të klasës, 2) të ndajnë fragmentet e tyre të shkrimeve të shenjta për zotërimin doktrinor me njëri-tjetrin dhe 3) t’i shenjojnë fragmentet. Përsëriteni këtë veprimtari disa herë.

Për t’i shtuar më shumë larmi veprimtarisë, merrni parasysh t’i ftoni nxënësit t’i përgjigjen një pyetjeje për t’i ndihmuar të njihen me njëri-tjetrin, ose të tregojnë një situatë në të cilën ata mendojnë se do të ishte e dobishme ta dinin këtë shkrim të shenjtë.

Programi Kompjuterik Doctrinal Mastery [Zotërimi Doktrinor]

Ndihmojini nxënësit ta shkarkojnë programin Doctrinal Mastery [Zotërimi Doktrinor] në aparatin celular. Përdoreni kohën në klasë për t’i ndihmuar nxënësit të familjarizohen me programin dhe të punojnë me disa prej veprimtarive. Nxitini nxënësit ta përdorin programin jashtë klasës.

Mësimi përmendsh i shkrimeve të shenjta

Ftojini nxënësit ta përfytyrojnë veten si misionarë, prindër apo që u përgjigjen pyetjeve të shokëve për ungjillin. Kërkojuni nxënësve të tregojnë mënyra se si mund t’i ndihmojë në ato situata mësimi përmendsh i shkrimeve të shenjta.