Christ at the tomb of Lazarus. He has His hand extended to the entry of the tomb as He commands Lazarus to rise from the dead. Lazarus (in burial robes) is visible standing inside the entry to the tomb. A man is moving the stone door of the tomb away from the tomb entry. Several people (men and women) are watching the miracle in amazement.
Si Maria ug Marta mihangyo kang Jesus sa pag-adto ug pagtabang sa masakiton nilang igsoon nga si Lazaro. Nalangay si Jesus sa Iyang biyahe ug miabot upat ka adlaw na human namatay si Lazaro. Si Jesus mipakita sa iyang kalooy og mibakho uban sa managsoong babaye. Unya gibuhi Niya si Lazaro gikan sa pagkamatay. Kini nga leksiyon makatabang nimo sa pag-ila sa mga kamatuoran mahitungod ni Jesukristo ug sa mga baroganan nga makagiya kanimo sa mga pagsulay sa kinabuhi.
Pagtugot sa mga estudyante sa pag-ila sa nagkalainlain nga doktrinal nga mga kamatuoran ug mga baroganan. Ang pagkat-on kon unsaon sa pag-ila sa doktrina ug mga baroganan sa ebanghelyo nga makaplagan diha sa mga kasulatan magkinahanglan og mahunahunaon nga pagbansay. Ang mga magtutudlo kinahanglan nga makugihong motabang sa mga estudyante sa pag-angkon og abilidad sa pag-ila ug makapahayag sa mga doktrina ug mga baroganan nga sila mismo.
Pagpangandam sa estudyante: Awhaga ang mga estudyante sa pagkat-on sa Juan 11 ug pagpangita og mga baroganan nga makatabang nila nga makadawat sa tabang sa Manunubos panahon sa ilang mga pagsulay. Mahimo nila kining buhaton nga sila mismo o kauban sa ilang pamilya. Awhaga sila sa pag-adto nga andam mopaambit sa unsay ilang nakat-onan.
Posible nga mga Kalihokan sa Pagkat-on
Hinumdomi nga kini mao ang una sa duha ka leksiyon sa Juan 11 . Kini nga leksiyon makatabang sa mga estudyante sa pag-ila sa mga baroganan nga anaa niining kapitulo. Ang ikaduhang leksiyon nagtugot sa mga estudyante sa pagtudlo mahitungod sa usa niini nga mga baroganan. Matngoni ang mga estudyante nga lagmit nag-atubang og lisod nga mga hagit. Kon gikinahanglan, ipahiangay ang mosunod nga senaryo o paghimo og lain pang senaryo nga tingale mas makatabang sa mga estudyante.
Paghunahuna og usa ka tawo sa imong pamilya. Hunahunaa nga sila dunay grabe nga sakit nga anaa sa kakuyaw ang ilang kinabuhi.
Unsa kaha nga pagbati ang imong masinati?
Unsa kaha ang imong buhaton?
Unsa kaha ang imong mga pangutana?
Sa Juan 11 , sila si Maria, Marta, ug Lazaro nag-atubang niini nga sirkumstansya. Bisan og ang ilang kasinatian nalambigit sa sakit ug kamatayon, magamit nato ang mga baroganan nga atong nakat-onan gikan sa ilang kasinatian ngadto sa mga hagit nga lagmit atong atubangon.
Dapit sa ibabaw sa imong papel, isulat ang “Unsa ang angay nimong mahibaloan kon mag-atubang og mga hagit.” Sa kinatibuk-an sa leksiyon, hunahunaa ang mga hagit nga imong giatubang o lagmit maatubang. Tinguhaa ang pag-ila sa mga kamatuoran mahitungod kang Jesukristo ug sa Iyang ebanghelyo nga gibati nimong makagiya ug makahatag kanimo og paglaom panahon niana nga mga hagit. Irekord ang imong mga hunahuna diha sa imong papel. Hunahunaa pag-ayo kon sa unsang paagi ang matag kamatuoran nga imong gitino makatabang nimo nga mobati sa gugma alang ug gikan sa Manluluwas.
Pagpangita sa mga Kamatuoran
Tinoa kon asa sa mosunod nga mga kalihokan ang labing makatabang sa mga estudyante. Kon ang mga estudyante nakahimo na dayon sa pag-ila sa mga baroganan nga sila mismo, ikonsiderar nga tugotan ang mga estudyante sa pagtuon ug pag-ila sa mga baroganan nga sila mismo nga walay pagpaila niini alang kanila. Pahinumdomi sila bahin sa pagpangandam sa estudyante, ug dapita sila sa paggamit sa ilang mga ideya gikan niana nga kalihokan alang sa nahabilin pa nga leksiyon.
Usa sa kahanas sa pagtuon sa kasulatan nga makatabang sa pag-ila sa mga baroganan mao ang paghunong kon ugaling makabantay ka nga adunay importanting mga detalye nga makapangutana og yanong mga pangutana, sama ninii:
Unsa kahay gusto sa Langitnong Amahan nga akong makat-onan gikan niini nga mga bersikulo?
Unsa ang gitudlo niini nga asoy ngari kanako mahitungod ni Jesukristo?
Basaha ang Juan 11:1–7 , ug pangutan-a ang imong kaugalingon sa mga nag-una nga pangutana.
Dapita ang mga estudyante sa pagpaambit kon unsay ilang nakat-onan. Isulat sa pisara ang mga baroganan nga ilang gipaambit. Kon ang mga estudyante maglisod sa pag-ila sa mga baroganan o kon kini makadugang ba og mapuslanong mga ideya, ikonsiderar ang pagsulat sa mosunod nga mga baroganan ngadto sa pisara ug sa pagpangutana sa mga mosunod.
Adunay nagkalainlain nga mga baroganan nga mahimo nimong mailhan gikan niini nga mga bersikulo. Ang mosunod mao ang pipila ka mga ehemplo. Alang sa matag sanglitanan nga baroganan, ikonsiderar ang pagmarka sa hugpong sa mga pulong o mga detalye gikan sa mga bersikulo nga imong nabasa nga nagsuporta sa maong baroganan.
Bisan og gihigugma kita ni Jesukristo, makasinati kita og mga pagsulay.
Bisan og kita matinud-anong nagsunod ni Jesukristo, makasinati gihapon kita og mga pagsulay.
Kon mag-atubang kita og mga pagsulay, makapangita kita sa tabang sa Ginoo, ug Siya motubag diha sa Iyang kaugalingon nga panahon ug sa Iyang kaugalingong paagi.
Ikonsiderar ang pagsulat niini nga mga baroganan diha sa imong piraso nga papel.
Sa unsang paagi ang pagkahibalo niini nga mga kamatuoran makatabang kanimo?
Duha ka Adlaw human makadungog ang Manluluwas mahitungod sa sakit ni Lazaro, ang Manluluwas mibiyahe padulong sa balay ni Lazaro. Sa Iyang pag-abot, upat na ka adlaw nga gilubong si Lazaro (tan-awa sa Juan 11:17).
Si Elder Bruce R. McConkie (1915–85) sa Korum sa Napulog Duha ka Apostoles mipasabot unsa ang kahulogan sa upat ka adlaw.
Imahe
Head and shoulders portrait of Elder Bruce R. McConkie.
Ang pagkadunot haduol na; ang kamatayon dugay nang nahibaloan isip usa ka labing siguro nga moabot. … Ngadto sa mga Judeo ang termino nga upat ka adlaw adunay espesyal nga kahulogan; nabantog sa ilang tinuohan nga sa ikaupat nga adlaw ang espiritu sa kataposan ug sa dili na mausab nga paagi mibiya na gikan sa nahimutangan sa patay nga lawas.
(Tan-awa sa Bruce R. McConkie, Doctrinal New Testament Commentary, 3 vols. [1965–73], 1:533)
Ipadayon ang pagbansay sa pag-ila sa mga baroganan samtang imong basahon ang Juan 11:18–46 . Hunong panagsa, ug pangutan-a ang imong kaugalingon kon makasugat ka og mahinungdanong mga detalye, sama sa giunsa ni Maria ug Marta pagpakita sa ilang hugot nga pagtuo kang Jesukristo o giunsa sa Manluluwas pagsanong ang matag kahimtang. Idugang sa imong dokumento ang baroganan nga imong nakaplagan, ug ikonsiderar nga markahan ang mahinungdanong mga detalye ug ang paghimo og lain pang mugbo nga mga sulat diha sa imong mga kasulatan.
Unsa kaha ang gusto sa Langitnong Amahan nga imong makat-onan gikan niini nga istorya?
Unsa ang gitudlo niini nga asoy kanimo mahitungod ni Jesukristo?
Dapita ang mga estudyante sa pag-adto sa pisara aron isulat ang baroganan nga ilang nailhan. Tingale may nailhan silang mga kamatuoran sama niini:
Mahimo nga pilion nato ang paggamit sa atong pagtuo kang Jesukristo atol sa atong mga pagsulay (tan-awa sa Juan 11:20–27).
Ang Manluluwas makahimo og mga milagro sa atong kinabuhi ingon nga kita molihok uban sa pagtuo diha Kaniya (tan-awa sa Juan 11:20–27, 38–44).
Si Jesukristo mao ang Pagkabanhaw ug ang Kinabuhi (tan-awa sa Juan 11:25).
Ang mga milagro sa Ginoo sa atong kinabuhi moabot sumala sa Iyang kabubut-on ug panahon (tan-awa sa Juan 11:1–7, 11–17, 39–45).
Mahimo kitang mosunod sa mga ehemplo ni Jesukristo pinaagi sa pagpakita og kalooy sa uban (tan-awa sa Juan 11:32–36).
Si Jesukristo adunay gahom sa kinabuhi ug kamatayon (tan-awa sa Juan 11:20–27, 39–45).
Makita nato ang gugma ug gahom sa Dios pinaagi sa atong mga panglimbasog (tan-awa sa Juan 11:11–15, 40–42).
Ikonsiderar ang pagpangutana sa mga estudyante sa mosunod nga mga pangutana kon nanginahanglan sila og tabang sa pag-ila og dugang pa nga mga kamatuoran.
Unsa ang gibuhat ni Maria ug Marta aron mabansay ang ilang hugot nga pagtuo kang Jesukristo panahon sa ilang pagsulay?
Unsa ang tubag sa Manluluwas ngadto kanila nga nagtudlo kanimo mahitungod Kaniya?
Unsang mga elemento niini nga asoy ang nagtudlo kanimo nga mas mosalig pa diha sa Manluluwas?
Sa unsang paagi ang paghunong dihang nakakita ka og importanting mga detalye ug sa pagpangutana nakatabang nimo sa imong pagtuon?
Ikonsiderar ang pagpares-pares sa mga estudyante aron idrama-drama ang mosunod nga senaryo.
Hunahunaa nga aduna kay kahigayonan nga makigsulti sa usa ka tawo nga nagsagubang og lisod nga pagsulay. Pagpili og usa ka baroganan nga imong nailhan gikan sa Juan 11:1–46, ug ipaambit kon sa unsang paagi kana nga baroganan makatabang kaniya. Ilakip ang imong mga hunahuna kon unsay ikatabang niini nga baroganan ngadto niining tawhana aron makasabot mahitungod sa Langitnong Amahan ug kang Jesukristo og sa Ilang mga tinguha alang kanato.
Basaha ang baroganan nga imong gisulat diha sa imong papel nga “Unsa ang imong kinahanglan nga mahibaloan kon mag-atubang og mga pagsulay”. Sa kinaubsan sa maong papel, idugang ang imong mga tubag sa mosunod nga mga pangutana.
Unsa nga baroganan ang kinahanglan nimong tutokan pag-ayo sa kaugalingon nimong kinabuhi karon? Ngano man?
Unsa ang imong nakat-onan mahitungod sa Langitnong Amahan ug sa Manluluwas nga makatabang nimo nga mobati og gugma alang Kanila ug gikan Kanila?
Ikonsiderar ang pagdapit og pipila ka estudyante sa pagtubag sa nag-unang mga pangutana. Samtang nagpaambit ang mga estudyante, pangita og mga paagi aron matabangan ang mga estudyante nga mobati sa gugma sa Manluluwas alang kanila. Ikonsiderar ang pagpaambit sa imong kaugalingon nga mga hunahuna ug pagpamatuod bahin sa Manluluwas.
Unsa nga pagdasig ang gibati nimong buhaton base sa unsay imong nakat-onan ug gibati karon? Unsaon man nimo kini sa pagbuhat?
Dapita ang mga estudyante sa paggamit sa kahanas sa pagtuon sa kasulatan mahitungod sa pag-ila sa mga baroganan diha sa ilang personal nga pagtuon sa kasulatan ug sa pagsunod pinaagi sa mga impresyon nga ilang nadawat. Ikonsiderar ang pagpamatuod sa kaimportante niini nga kahanas sa pagtuon. Usa ka paagi sa paghimo niini mao ang pagpaambit og kaugalingong kasinatian sa pagkaplag og giya alang sa hagit panahon sa personal nga pagtuon sa kasulatan.
Komentaryo ug Background nga Impormasyon
Nganong mag-antos man ako nga naningkamot man ko nga mahimong matarong?
Si Elder Matthew S. Holland sa Seventy mitudlo:
Imahe
Matthew S. Holland Official Portrait.
Adunay Usa nga makasab[o]t sa hingpit kon unsay inyong gisinati, kinsa “mas gamhanan pa kay sa tibuok yuta” [1 Nephi 4:1], ug si kinsa “makahimo sa tanang mga butang sa sukod nga labaw pa gay[o]d kadaghan kay sa [inyong] arang mapangayo o mahunahuna” [Mga Taga-Efeso 3:20]. Ang proseso mabutyag diha sa Iyang paagi ug sa Iyang panahon, apan si Kristo andam kanunay sa pag-ayo sa matag tipik ug aspeto sa inyong tumang kasakit.
Kon Siya inyong tug[o]tan sa pagbuhat sa ingon, inyong madisk[o]br[e]han nga ang inyong pag-ant[o]s wala makawang. … Nakita ninyo, ang kinaiyahan gay[o]d sa Dios ug ang tumong sa atong yutan-ong pagpakabuhi mao ang kalipay, apan kita dili mahimong hingpit nga mga binuhat sa balaan nga kalipay kon walay mga kasinatian nga mosulay nato, usahay sa atong tibuok kusog. Si Pablo miingon pa gani nga ang Manluluwas Mismo sa kahangt[o]ran nahimong “hingpit [o kompleto] pinaagi sa mga pag-ant[o]s” [Mga Hebreohanon 2:10]. Busa pagbantay sa yawan-ong paghunghong nga kon kamo usa pa ka mas maayong tawo, inyong malikayan ang maong mga pagsulay.
Kinahanglan usab ninyong pakigbat[o]kan ang may kalab[o]tan nga bakak nga ang inyong mga pag-ant[o]s nagsugyot nga kamo walay labot sa sirkulo sa mga pinili sa Dios, kinsa nakasinati og kalipay ug mga panalangin ug wala gay[o]d maglis[o]d. …
Mga kaigsoonan, ang pag-antos sa pagkamatar[o]ng makatabang sa pagpasarang kaninyo, kay sa ipalahi kamo gikan sa, pinili sa Dios.
Ikonsiderar ang paggamit sa sugilanon ni Maria, Marta ug Lazaro sa paghulagway sa baroganan nga atong ikabutang ang atong pagsalig diha saDios, sa pagkasayod nga ang Iyang milagro sa atong kinabuhi moabot sumala sa Iyang kabubut-on ug panahon. Mahimo kini pinaagi sa pagtandi ug pagkompara sa sugilanon ni Nephi sa 3 Nephi 1:4–20 , o pinaagi sa pagbasa niining mosunod nga pamahayag ni Presidente Dallin H. Oaks sa Unang Kapangulohan.
Imahe
Matthew S. Holland Official Portrait.
Ang unang bar[o]ganan sa ebanghelyo mao ang hugot nga pagtuo diha ni Ginoong Jesukristo. Ang hugot nga pagtuo nagpasabot sa pagsalig—pagsalig sa kabubut-on sa Dios, pagsalig sa Iyang paagi sa pagbuhat sa mga butang, ug pagsalig sa Iyang panahon. Dili nato kinahanglang ipamugos ang atong panahon diha sa Iyaha. Si Elder Neal A. Maxwell sa Korum sa Napulog Duha ka Apostoles miingon:
“Ang isyu para nato mao ang igo nga pagsalig sa Dios aron mosalig usab sa Iyang panahon [timing]. Kon tinud-anay kitang makatuo nga naghunahuna Siya sa atong kaayohan, dili ba angay natong tug[o]tan ang Iyang mga plano nga mahitabo base sa unsay Iyang gihunahuna nga labing maayo? Ang mao mahitabo usab sa ikaduhang pag-anhi ug sa tanan niadtong mga mahinungdanon diin ang atong hugot nga pagtuo nagkinahanglan nga maglakip sa hugot nga pagtuo sa plano sa Ginoo alang kanato sa personal nga paagi, dili lamang sa Iyang kinatibuk-an nga plano ug mga katuyoan” (Even As I Am [1982], 93).
(Dallin H. Oaks, “Timing,” Ensign, Okt. 2003, 12)
Ikapuli nga sinugdanan sa leksiyon
Ikonsiderar ang pagdapit sa mga estudyante sa pag-ila og mga milagro nga gihimo ni Jesus ug sa gipakita sa maong mga milagro nga Siya adunay labaw nga gahom. Ang pipila ka mga sanglitanan naglakip og gahom labaw sa kamatayon (tan-awa sa Lucas 7:11–18), gahom labaw sa suliran sa pangisip (tan-awa sa Lucas 8:27–35 , ug gahom sa pagtabang sa inadlaw nga kinabuhi (tan-awa sa Mateo 17:24–27 ; Lucas 5:1–6).
Dapita ang mga estudyante sa paghunahuna og butang diin sila manginahanglan sa panabang sa Manluluwas ug sa pagpangita og mga baroganan nga makatabang nila nga mahibalo unsaon sa pagdawat ang Iyang panabang.