Lucas 12–17; Juan 11

Kinatibuk-ang Pagpasabot [Overview]

Gitudlo ni Jesus ang sambingay sa karnero nga nawala, sa salapi nga nawala, ug sa anak nga nawala. Iya usab nga giayo ang napulo ka sanglahon ug gibuhi si Lazaro gikan sa pagkamatay. Karong semanaha naglakip og pagrebyo sa usa ka doktrinal nga kahanas aron matabangan ang mga estudyante sa paggamit sa mga tudling sa doktrinal nga kahanas.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

Lucas 15

Katuyoan sa leksiyon: Kini nga leksiyon makatabang sa mga estudyante sa pag-ila ug pagbati unsa kadako ang gugma ug paghatag og bili sa Langitnong Amahan ug ni Jesukristo kanila ug sa uban pa.

Pagpangandam sa estudyante: Dapita ang mga estudyante sa pagtuon og usa o sa tanan nga sambingay nga anaa sa Lucas 15 sa dili pa magklase. Dapita sila sa pagkonsiderar unsa ang gitudlo sa mga sambingay mahitungod sa gugma sa Ginoo.

Mga materyal: Pipila ka pagkaon ug kwarta o usa sa ilang gidrowing

Sugyot alang sa videoconference nga pagtudlo: Human madrowing sa mga estudyante ang magbalantay sa karnero ug ang karnero o ang amahan nga naggakos sa iyang anak ug sa mga sinulat nga pulong ug hugpong sa mga pulong palibot sa ilang mga drowing, pagdapit og usa ka estudyante sa paggunit pataas sa ilang gidrowing ngadto sa screen ug mopaambit og gamay gikan niini nga makahuloganon kaayo sa ilaha. Dapita ang klase nga i-set ang ilang view ngadto sa speaker view aron ilang makita kon kinsa ang nagsulti. Kini makatabang nila nga makita ang drowing nga gipaambit.

Lucas 17:11–19

Katuyoan sa leksiyon: Kini nga leksiyon makatabang sa mga estudyante nga mobati ug makapahayag sa pagpasalamat ngadto sa Langitnong Amahan, kang Jesukristo, ug sa uban.

Pagpangandam sa estudyante: Awhaga ang mga estudyante nga moanhi nga andam mopaambit og usa ka bag-ong kasinatian diin nakabati sila og pagpasalamat ngadto sa Langitnong Amahan o kang Jesukristo. Sa laing paagi, ang mga estudyante puwedeng mohimo og lista nga maghulagway kon unsa ang nabuhat sa Langitnong Amahan o ni Jesukristo alang kanila.

Handout: Ang handout bahin sa pagbasa og maayo ug paghanduraw

Sugyot alang sa videoconference nga pagtudlo: Human mabasa og maayo sa mga estudyante ang Lucas 17:11–14 , lagmit makatabang ang pagpost diha sa chat nga feature og mga pangutana nga anaa sa handout mahitungod sa pagbasa og maayo ug paghanduraw. Kon ang mga estudyante mosulay pagtubag sa mga pangutana pinaagi sa gagmay nga mga grupo gamit ang feature nga breakout room, dapita sila sa pag-copy ug pag-paste sa mga pangutana ngadto sa lahi nga dokumento. Sa kadaghanan sa mga videoconference nga app, walay access ang mga estudyante diha sa chat nga feature alang sa klase samtang anaa sila sa breakout rooms.

Juan 11:1–46, Bahin 1

Katuyoan sa leksiyon: Kini nga leksiyon makatabang sa mga estudyante sa pag-ila sa mga kamatuoran mahitungod ni Jesukristo ug sa mga baroganan nga makagiya kanila sa pagsagubang sa mga hagit sa kinabuhi.

Pagpangandam sa estudyante: Dapita ang mga estudyante sa pagtuon sa Juan 11 ug pagpangita sa mga baroganan nga makatabang kanila nga makadawat sa tabang sa Manluluwas panahon sa ilang mga pagsulay. Mahimo nila kining buhaton sa ilang kaugalingon o kauban sa ilang mga pamilya. Dapita sila sa pag-adto nga andam mopaambit sa unsay ilang nakat-onan.

Sugyot alang sa videoconference nga pagtudlo: Ikonsiderar ang pagdapit og usa o duha ka estudyante kinsa nakasinati og makahuluganong mga hagit sa pagpaambit mahitungod niadto nga mga hagit dapit sa sinugdanan sa klase kon angay ug kon komportable sila nga mohimo niini. Sa ilang pagsiksik sa Juan 11:1–46 diha sa klase, dapita sila sa pagpaambit og mga baroganan nga sa hunahuna nila makatabang sa ingon niana nga mga hagit. Sa laing paagi, duha ka estudyante ang mahimong modapit og higala o sakop sa pamilya nga moduol sa video aron sa pagpaambit og mga hagit nga ilang nasinati.

Juan 11:1–46, Bahin 2

Katuyoan sa leksiyon: Kini nga leksiyon makahatag sa mga estudyante og kahigayonan sa pagtudlo og usa ka baroganan nga makatabang kanila ug sa uban sa pagdawat sa panabang sa Manunubos panahon sa mga hagit sa kinabuhi.

Pagpangandam sa estudyante: Dapita ang mga estudyante sa paghunahuna unsay ilang nakat-onan gikan sa asoy ni Maria, Marta, Lazaro ug sa Manluluwas diha sa Juan 11:1–46 . Sultihi sila nga aduna silay higayon sa pagtudlo mahitungod sa usa ka baroganan nga ilang nakat-onan gikan niini nga asoy. Dapita sila sa pag-adto nga mag-andam og mga ideya mahitungod sa kon unsaon kaha nila sa pagtudlo ang baroganan sa epektibo nga paagi.

Sugyot alang sa videoconference nga pagtudlo: Ikonsiderar ang pagbutang sa mga estudyante ngadto sa mga breakout room base sa baroganan nga ilang gusto nga itudlo. Ang mga estudyante mahimong mag-andam og mubo nga leksiyon, ug dayon kutob sa daghang grupo nga mahimo mopresentar sa ilang leksiyon ngadto sa klase.

Rebyo sa Doktrinal nga Kahanas 7

Katuyoan sa leksiyon: Kini nga leksiyon mahimong makahatag sa mga estudyante og mga oportunidad sa pagbansay sa paggamit sa pipila ka doktrina nga ilang natun-an karong tuiga sa ilang kinabuhi.

Pagpangandam sa estudyante: Dapita ang mga estudyante sa pagpili og usa ka tudling sa doktrinal nga kahanas nga gibati nila nga lisod gamiton sa ilang kinabuhi ug usa nga gibati nila nga sayon gamiton. Dapita sila nga mangandam sa pagpasabot kon ngano.

Sugyot alang sa videoconference nga pagtudlo: Ang mga estudyante mahimong maghunahuna nga sila online nga mga misyonaryo ug modrama-drama nga nagtudlo sa pamilya (nga girepresentahan sa magtutudlo o uban pang gidapit nga mosalmot niini nga kalihokan). Gamita ang video ug chat nga mga feature sama nga ikaw anaa sa aktwal nga online nga appointment sa misyonaryo.