A father hugging his prodigal son. altered version
Sa haduol na ang pagtapos sa tawhanong pagpangalagad sa Manluluwas, ang mga Pariseo og mga eskriba mireklamo mahitungod sa pakig-uban ni Jesus sa mga maniningil og buhis ug mga makasasala. Agi’g tubag sa ilang mga reklamo, gitudlo ni Jesus ang sambingay sa karnero nga nawala, ang sinsilyo nga nawala, og ang anak nga nawala. Kini nga leksiyon makatabang nimo sa pag-ila og pagkabatyag kon unsa kadako ang gugma sa Langitnong Amahan ug ni Jesukristo ug paghatag og bili kanimo ug sa uban.
Pagpangandam sa estudyante: Awhaga ang mga estudyante sa pagkat-on og usa o daghan pang mga sambingay sa Lucas 15 sa dili pa magsugod ang klase. Dapita sila sa paghunahuna unsa ang gitudlo sa mga sambingay mahitungod sa gugma sa Dios.
Posible nga mga Kalihokan sa Pagkat-on
Unsa ang bili niini?
Ikonsiderar ang pagdala og mga pagkaon og salapi aron ikapakita atol sa klase sa mosunod nga kalihokan. Gamita ang bisan unsang pagkaon o salapi nga haom o ang unsay anaa, ug ipahiangay ang maong lista sa salapi sa unsay gigamit sa maong dapit. Pananglitan, kini nga kalihokan mahimo pinaagi sa usa ka kendi ug usa ka peso. Dapita ang mga estudyante sa pagpakita gamit ang ilang mga tudlo kon pila ang kantidad sa usa ka butang sa matag ang-ang.
Sa sukod nga 1 ngadto sa 10, diin ang 1 maoy labing ubos ug ang 10 maoy labing taas, unsa kadako ang imong gusto sa mga mosunod?
Ang imong paboritong panghinam-is [desert]
Ang imong paboritong panghinam-is kon kini natagak sa salog
Ang imong paboritong panghinam-is kon kini natamakan sa usa ka tawo
Usa ka 20 pesos nga papel
Usa ka 20 pesos nga papel kon kini natagak sa salog
Usa ka 20 pesos nga papel kon kini natamakan sa usa ka tawo
Paggahin og higayon sa pagpamalandong unsay kalambigitan niining maong kalihokan sa bili sa mga indibidwal.
Sa unsang paagi kini nga pagkumpara ikatandi sa unsa ka tukma ang atong pagtan-aw sa atong kaugalingong bili?
Nganong usahay matintal kita sa paghunahuna o pagtratar sa atong kaugalingon ug sa uban sama nga kita o sila minos ra og bili?
Tingale mapuslanon ang pagpaambit sa pamahayag ni Presidente Dieter F. Uchtdorf nga anaa sa “Dugang nga Kalihokan sa Pagtuon” nga seksiyon dapit sa kataposan sa leksiyon.
Hunahunaa giunsa nimo sa pagtratar kadtong tingale nanginahanglan nga maghinulsol ug molambo, lakip na ang imong kaugalingon. Sa imong pagtuon niini nga leksiyon, pangitaa ang mga kamatuoran mahitungod sa kon unsa ang gibati ug giunsa sa pagtratar sa Ginoo kadtong mga nagkinahanglan nga maghinulsol.
Sa Lucas 15 , gitudlo ni Jesus ang tulo ka sambingay. Basaha ang Lucas 15:1–2 , nga mangita sa mga sitwasyon nga maoy hinungdan nga gitudlo sa Manluluwas kini nga mga sambingay. Timan-i nga ang mga maniningil og buhis mao ang mga Judeo nga mokolekta sa mga buhis alang sa mga Romano ug mao nga sa kinatibuk-an gikayogtan sa ubang mga Judeo.
Unsa ang gitudlo niini nga mga bersikulo diha nimo mahitungod sa Manluluwas? Sa unsang mga paagi kaha kita usahay susama sa mga Pariseo?
Gitubag ni Jesukristo ang reklamo sa mga Pariseo ug sa mga eskriba pinaagi sa pagtudlo mahitungod sa karnero nga nawala, sa sinsilyo nga nawala, ug sa anak nga nawala.
Ikonsiderar ang pagdapit sa mga estudyante sa pag-summarize sa unsay ilang nahibaloan mahitungod niini nga mga sambingay ug kon sa unsang paagi kini naghulagway sa gugma sa Langitnong Amahan ug kang Jesukristo. Ipahiangay ang mga kalihokan sa pagkat-on niini nga leksiyon sigon ngadto sa panabot ug panginahanglan sa mga estudyante.
Ang karnero nga nawala ug ang sinsilyo nga nawala
Imahe
Shepherd carrying the lost lamb. Outtakes include the shepherd holding the sheep, walking with the lamb returning to the other shepherd, as well as some shots with the filming crew.
Imahe
Woman looking for her lost coin.
Basaha o rebyoha ang bisan asa sa sambingay sa karnero nga nawala ( Lucas 15:4–7) o ang sambingay sa sinsilyo nga nawala ( Lucas 15:8–10), nga mangita sa mga pulong o hugpong sa mga pulong nga nagpakita kon sa unsang paagi ang tag-iya sa matag sugilanon mihatag og bili sa unsay nawala.
Unsa nga mga pulong o hugpong sa mga pulong ang nagpakita sa bili nga gihatag sa tag-iya ngadto sa butang nga nawala?
Sa unsang paagi kaha ang karnero o ang sinsilyo niining mga sambingay nagrepresentar sa mga indibidwal?
Sumala niini nga mga bersikulo, unsa ang bation niadtong mga mitabang og pangita sa mga nawala sa espirituhanong paagi kon ang makasasala maghinulsol? Unsa ang gibati sa Langitnong Amahan ug ni Jesukristo?
Unsa nga mga leksiyon ang imong nakat-onan mahitungod sa Manluluwas gikan niini nga mga sambingay?
Kon kinahanglan, tabangi ang mga estudyante sa pag-ila sa mga kamatuoran sama sa: Ang Langitnong Amahan ug si Jesukristo nahibalo sa bili sa matag indibidwal ug sa tinguha nga mapundok ang tanan balik ngadto Kanila ug ang Langitnong Amahan magmaya kon ang Iyang mga anak maghinulsol ug mobalik ngadto Kaniya.
Ang anak nga nawala
Ang ikatulong sambingay sa Lucas 15 komon nga nailhan isip sambingay sa anak nga nawala (ang pulong nga nawala nagpasabot og mausikon, yamhangan, o nagpatuyang). Hinoon, kini nga sambingay nagsugilon sa duha ka anak, nga parehas nga nanginahanglan og tabang gikan sa ilang amahan. Samtang magtuon ka, pangitaa ang mga kamatuoran nga nagbutyag unsa ang gibati ug giunsa sa pagtratar sa Langitnong Amahan ang Iyang tanan nga mga anak kinsa nawala sa espirituhanong paagi sa bisan unsa nga hinungdan.
Alang sa mosunod nga kalihokan, hunahunaa kon mas makabenipisyo ba sa mga estudyante ang pagbasa sa sambingay o ang pagtan-aw sa video.
Basaha ang Lucas 15:11–32, nga maghunahuna nga ang amahan dinhi niini nga asoy nagrepresentar sa Langitnong Amahan. Ikonsiderar ang pagmarka sa mga pulong o hugpong sa mga pulong nga nagbutyag sa unsay Iyang gibati ngadto sa Iyang mga anak.
Imahe
Woman looking for her lost coin.
Ang mga estudyante mahimong magtuon niini nga sambingay pinaagi sa porma sa “Teatro sa Magbabasa” nga may upat ka bahin: ang tigsugilon ( mga bersikulo 11, 13–16, 20, 25–28), ang anak nga nawala ( mga bersikulo 12, 17–19, 21), ang amahan ( mga bersikulo 22–24, 31–32), ug ang mas magulang nga anak ( mga bersikulo 29–30). Ikonsiderar ang pagpahunong-hunong sa mga magbasa aron matabangan sila sa pagsabot ug pagsusi unsa ang gisulti sa karakter ug tingale gihunahuna ug gibati.
Ang mga pangutana sa ubos gituyo aron matabangan ang mga estudyante nga makaanalisar sa sambingay ug mogamit niini sa ilang kaugalingon nga kinabuhi.
Hinumdomi giunsa sa mga Pariseo sa pagsaway ang Manluluwas sa Iyang pagdawat ug pakigsawo og kaon sa mga makasasala.
Unsa kaha ang gipanghinaot sa Manluluwas nga makat-onan sa mga Pariseo gikan niini nga sambingay?
Unsa niini nga sambingay sa imong hunahuna ang mahinungdanon kaayo nga imong masabtan ug mahinumdoman? Ngano man?
Usa ka kamatuoran nga atong makat-onan gikan niini nga sambingay mao nga ang Langitnong Amahan naghatag og bili ug nahigugma sa tanan Niyang mga anak ug nagahulat nga bukas ang mga kamot sa pagdawat sa tanan nga moduol Kaniya.
Ikonsiderar ang pagpangutana og dugang sama sa “Unsa ang imong namatikdan mahitungod sa giunsa sa pagkawala sa anak nga nawala?” “Sa unsang paagiha kaha ang lain pang anak makonsiderar usab nga nawala?” “Unsa ang atong makat-onan gikan niini nga sambingay mahitungod sa giunsa pagsanong sa Langitnong Amahan ang mga tawo nga naghandom nga mobalik Kaniya ug niadtong kinsa padayong naningkamot nga magpabiling matinud-anon Kaniya? Ngano kaha nga ang pagsabot niini mahitungod sa Langitnong Amahan mahinungdanon kanimo?”
Sa unsang paagi kaha kini nga mga sambingay sa Lucas 15 magamit niadtong mga nawala sa espirituhanong paagi tungod sa sala lakip na kadtong may pagbati nga lahi, wala madayeg, o wala makita?
Pag-ila sa akong kaugalingon nga bili
Sa usa ka panid sa imong journal sa pagtuon, ikonsiderar ang yano nga drowing bahin sa usa ka magbalantay sa karnero nga naggunit og karnero o usa ka amahan nga naggakos sa iyang anak nga lalaki. Gamita ang luna nga palibot niini nga drowing sa pagrekord sa mosunod:
Mga pulong o hugpong sa mga pulong (lakip kadtong gikan sa Lucas 15) nga nagpahinumdom kanimo sa kadako sa paghigugma kanimo ug sa tanan sa Langitnong Amahan, bisan pa kon ikaw o ang uban nagkinahanglan nga maghinulsol.
Mga paagi nga ikaw makatratar niadtong nanginahanglan og paghinulsol uban sa kalooy, lakip ang imong kaugalingon.
Ikonsiderar ang pagdapit sa mga estudyante nga mopaambit og usa sa paborito nga bahin sa ilang nahuman nga kalihokan.
Sa imong paghunahuna mahitungod sa kon giunsa nimo sa pagtratar ang imong kaugalingon ug kadtong mga nagpalibot kanimo, unsay gusto nimong paagi nga magamit ang imong mga nakat-onan karon?
Pamatud-i ang kamanggiloy-on sa Langitnong Amahan ug ni Jesukristo ug ang Ilang tinguha nga ang tanan makabalik ngadto Kanila.
Komentaryo ug Background nga Impormasyon
Lucas 15:7 . Unsa ang gipasabot sa Ginoo sa “kasiyaman og siyam ka matarong nga tawo, nga wala manginahanglan og paghinulsol”?
Si Joseph Smith mitudlo nga usa ka paagi sa paghubad sa sambingay sa karnero nga nawala mao ang pagtandi sa kasiyaman og siyam ka karnero ngadto sa mga Pariseo ug Saduseo kinsa wala maghunahuna nga sila nagkinahanglan nga moduol ni Jesukristo ug maghinulsol (tan-awa sa Kasaysayan, 1838–1856 [Manuskrito sa Kasaysayan sa Simbahan], volume D-1, 1459, josephsmithpapers.org).
Nganong mahinungdanon man kaayo ang pagpangita, pagkaplag, ug pag-amuma sa mga nahisalaag?
Si Presidente M. Russell Ballard, akting nga Presidente sa Korum sa Napulog Duha ka Apostoles, mitudlo:
Imahe
Official portrait of President M. Russell Ballard of the Quorum of the Twelve Apostles, 2004.
Ang matag kalag bililhon sa atong Langitnong Amahan. Kinahanglang dili gayod nato kalimtan nga pinaagi sa Pag-ula, si Ginoong Jesukristo mibayad sa dakong bugti alang sa katubsanan sa matag usa kanato. Ang Iyang pag-antos kinahanglang dili gayod makawang tungod kay napakyas kita sa pag-amuma ug pagtudlo niadtong nanglimbasog nga mahimong aktibo sa Simbahan.
(M. Russell Ballard, “Are We Keeping Pace?” Ensign, Nob. 1998, 8)
Lucas 15:12–13 . Unsa ang gipasabot sa anak sa iyang pag-ingon nga, “ Hatagi na ako sa akong bahin sa katigayonan”?
Sumala sa kustombre sa panahon sa Manluluwas, ang anak makadawat lamang sa iyang panulundon human mamatay ang iyang amahan. Alang sa usa ka anak nga mangayo sa iyang panulundon sa wala pa mamatay ang iyang amahan (tan-awa sa Lucas 15:12–13) usa unta ka dakong sala. Ang hangyo sa anak makita unta nga usa ka pagsalikway sa iyang amahan, sa iyang panimalay, sa pagpadako kaniya, ug gani sa iyang tibuok komunidad.
(Manwal sa Magtutuon sa Bag-ong Tugon [2018], ChurchofJesusChrist.org)
Unsay laing mga kapanguhaan ang makatabang nako sa pagsabot ug paggamit sa sambingay sa anak nga nawala?
Dugang nga mga Kalihokan sa Pagkat-on
Usa ka dugang nga pahayag
Human nga mabuhat ang kalihokan dapit sa ulohan sa leksiyon, ikonsiderar ang pagpaambit sa mosunod nga pahayag. Si Presidente Dieter F. Uchtdorf, kanhi sakop sa Unang Kapangulohan, mipaambit sa sugilanon bahin sa “usa ka babaye kinsa nakaagi og mga pagsulay ug kasakit sulod sa mga katuigan misulti nga naghilak, ‘Akong naamg[o]han nga sama ako sa usa ka karaan nga 20 dolyares nga kwarta—kum-ot, gisi, hugaw, giabusahan, ug nausab ang porma. Apan usa gihapon ako ka 20 dolyares nga kwarta. Ako adunay bili. Bisan tuod og dili na kaayo ako maayong tan-awon ug bisan tuod og ako gum-os ug ginamit, sa gihapon ang akong bili 20 dolyares.’” Nakabantay usab si Presidente Uchtdorf nga, “Dili nato masukod ang bili sa laing kalag labaw pa kay sa atong pagsukod sa gilapdon sa kalib[o]tan. Ang matag tawo nga atong mahimamat usa ka VIP [bililhon kaayo] ngadto sa atong Langitnong Amahan. Sa higayon nga ato kanang masabtan, makasugod kita sa pagsab[o]t kon unsaon nato sa pagtratar ang atong isigkatawo (tan-awa sa Dieter F. Uchtdorf, “Ikaw ang Akong Mga Kamot” Liahona, Mayo 2010, 69).
Ang karnero nga nawala ug ang sinsilyo nga nawala
Pangutan-a ang mga estudyante kon sila nawad-an na ba og butang nga bililhon ug kon giunsa nila kini sa pagpangita. Dapita sila sa pagpamalandong unsa kaha ang ipasabot kon adunay mahisalaag sa espirituhanong paagi ug unsa kaha ang mahitabo kon paningkamotan ang pagpangita kanila. Sa ilang pagtuon sa mga sambingay sa Lucas 15, awhaga sila sa paghunahuna kon sa unsang paagi nawala ang karnero, ang sinsilyo, ug ang anak ug ang lainlaing mga paagi nga sila nakaplagan. Awhaga ang mga estudyante sa pagpamalandong sa ilang responsibilidad sa pagpangita niadtong mga nahisalaag.