Иохан 14:1–6; 15:1–11
“Зам, үнэн, амь бол Би байгаа юм”
Есүс Христ шавь нартайгаа өнгөрүүлсэн сүүлчийн үдшийнхээ үеэр тэдэнд Өөрийн мөн чанар, зорилгын талаар заажээ. Тэрээр Өөрийгөө Тэнгэрлэг Эцэг рүү буцах зам хэмээн заасан бөгөөд шавь нартайгаа харилцах харилцаагаа усан үзмийн модны мөчрүүдтэй харьцуулсан байна. Энэ хичээл таныг Есүс Христтэй харилцах харилцаа холбооныхоо талаар болон Түүнийг хэрхэн дагаж, хүч чадал, дэмжлэгийг нь хүлээн авах талаар эргэцүүлэхэд тусална.
Суралцагчдад заахад нь туслах. Сайн мэдээг бусдад заах боломжийг суралцагчдад өгөх үед тэдний мэдлэг, гэрчлэл хүчирхэгждэг. Суралцагчдыг бие биедээ албан ба албан бус аргаар заахад урих боломжийг хайж ол.
Суралцагчийн бэлтгэл: Суралцагчдыг усан үзмийн мод эсвэл мөчиртэй мод, зам харгуйн зураг авах эсвэл олоход урь. Суралцагчдаас эдгээр зураг тэдэнд Есүс Христийн талаар ямар арга замаар сануулдаг болохыг эргэцүүлэн бодож, зургаа ангид авчрахыг хүс.
Боломжит суралцах үйл ажиллагаа
Хичээлийг эхлүүлэхийн тулд дараах сонголтуудыг авч үз.
-
Суралцагчийн бэлтгэлийн нэг хэсэг болгож авсан зургуудаа хуваалцахад суралцагчдыг урь.
-
Хичээлийн танхимд суралцагчдын дагаж явах боломжтой зам харгуйг үүсгэ.
-
Үзүүлэнт хичээл болгож суралцагчдад мөчир үзүүл. Уг мөчир тухайн модтой эсвэл түүнээс урган гарсан усан үзмийн модтой хэрхэн холбогдож буй талаар мөн тэр мөчир нь мод буюу усан үзмийн модтой холбогдохоо боливол юу болох талаар ярилц.
-
Уг хичээлтэй холбоотой хувийн туршлагаа хуваалц.
-
Энэ хичээлээр зам харгуйн эсвэл усан үзмийн модны зураг харуул.
Зам харгуй яагаад хэрэгтэйг мөн мөчир нь усан үзмийн модноос хэрхэн хүч авдаг талаар суралцагчидтай ярилц. Есүс Христ зам харгуй эсвэл усан үзмийн модтой хэрхэн адил болохыг нь суралцагчдаас асуух талаар бодож үз.
Аврагчийн шавь нартаа айлдсан сүүлчийн сургаалуудын зарим нь тэдэнд Түүнтэй харилцах харилцаа, хамаарлаа ойлгоход нь туслах зорилготой байсан. Аврагч Өөрийгөө зам харгуйтай мөн мөчрүүд бүхий усан үзмийн мод, жирийн модтой харьцуулжээ. Таны амьдралд тусламж хэрэгтэй байгаа хэсгийн талаар нэг хором бод. Магадгүй Тэнгэрлэг Эцэг рүү эргэн очихоор оролдох үед танд тусламж хэрэгтэй санагдаж болох юм. Танд амьдралдаа сорилтуудтай нүүр тулахад илүү их хүч чадал хэрэгтэй мэт санагдаж магадгүй. Аврагчийн сургаалыг судлахдаа, Түүний тухай мөн Түүний танд хэрхэн тусалж чадах талаар сурч болох зүйлсийг олж мэд.
Энэ хичээлийн агуулгыг хэрхэн тохируулан өөрчлөхөө шийдэхдээ, суралцагчдын хэрэгцээ шаардлага, чадваруудын талаар бодож үз. Дараах суралцах сонголтуудын аль нэгийг эсвэл хоёуланг эргэцүүлэн бодож, хувьдаа суралцах цаг гаргах нь суралцагчдад тустай байж болно.
Суралцагчдад бодол санаа, гэрчлэлээ өөр хоорондоо хуваалцах боломжийг олгох нь мөн тустай байж болох юм. Үүнийг янз бүрийн арга замаар хийж болно. Хичээлийн өмнө суралцагчдаас энэ хичээлийн хэсгээс заахад бэлтгэхийг хүсэж болох юм. Өөр нэг сонголт нь суралцагчдад дараах суралцах сонголтуудаас нэгийг хуваарилж өгөх юм уу сонгох боломжийг олгож, ангийнхаа өөр нэг суралцагчтай хамт эсвэл ангиараа хамтдаа заахад бэлтгэхийг тэднээс хүсэх явдал юм.
Суралцагчид суралцахад болон заахад бэлтгэхийн тулд дараах тараах материалыг ашиглах боломжтой.
Есүс Христ бол “зам, үнэн, амь” ( Иохан 14:6) мөн
Иохан 14:1–6 -г уншаад, Аврагч Өөрийг нь дагадаг хүмүүст хэрхэн туслахаар амласан болохыг олж мэд.
-
Аврагч эдгээр шүлэгт ямар үнэнийг заасан бэ?
-
Эдгээр нэр цол тус бүр танд Есүс Христийн тухай мөн Түүнтэй харилцах харилцааны тань талаар юу зааж байна вэ?
Хэрэв та өмнөх хичээлээр Есүс Христийн янз бүрийн нэр цол, үүргийн талаар жагсаалт үүсгэсэн бол уг жагсаалтдаа Иохан 14 дээр нээн илрүүлсэн зүйлсээ нэмэх боломжтой.
Мормоны Ном нь Шинэ Гэрээнээс таны суралцаж буй зүйлсийн талаарх ойлголтыг нэмэгдүүлнэ. Мозая 3:17 -г уншаад, энэхүү шүлэг нь Иохан 14:6 -г илүү сайн ойлгоход бидэнд хэрхэн тусалж буй талаар эргэцүүлэн бод.
Тэргүүн Зөвлөлийн ерөнхийлөгч асан Дийтр Ф.Угдорф ийнхүү заасан.
ЗурагOfficial portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.Бурхан таныг Өөр лүү нь буцаж очих замаа олоосой гэж хүсдэг бөгөөд тэр зам нь Аврагч мөн болой [ Иохан 14:6 -г үзнэ үү]. Бурхан та бүхнийг Өөрийн Хүү Есүс Христийн талаар олж мэдэн, бурханлаг шавь байх замыг дагаснаар ирэх амар амгалан, баяр баяслыг мэдрээсэй хэмээн хүсдэг.
(Дийтр Ф. Угдорф, “Гэрэл ба үнэний талаар гэрчлэл хүлээн авах нь,” Ensign эсвэл 2014 оны 10-р сарын Ерөнхий чуулган, 22)
-
Та эсвэл таны таньдаг хэн нэгэн Есүс Христийг дагаснаар ирдэг амар амгалан, баяр баясгаланг хэзээ мэдэрсэн бэ?
-
Бид Тэнгэрлэг Эцэг рүү буцан очихын тулд ямар арга замуудаар Аврагчийг дагаж чадах вэ?
-
Бид зөв зам дээр байгаа эсэхээ хэрхэн тодорхойлох вэ?
Есүс Христ бол “усан үзмийн мод” ( Иохан 15:5) юм.
Есүс Христ Өөртэй нь харилцах харилцааны талаар шавь нартаа заахын тулд харьцуулалтыг ашиглажээ. Иохан 15:1–11 -ийг уншаад, энэхүү харьцуулалтыг олж мэд.
Хэрэв та өмнөх хичээлээр Есүс Христийн янз бүрийн нэр цол, үүргийг жагсаасан бол уг жагсаалтдаа Иохан 15 дээр нээн илрүүлсэн зүйлсээ нэмэх боломжтой.
-
Есүс Христ энэ харьцуулалтыг ашиглан юуны тухай зааж байна гэж та бодож байна вэ?
-
Та энэхүү харьцуулалтаас Есүс Христтэй харилцах бидний харилцааны талаар ямар үнэнийг олж мэдэж болох вэ?
Арван хоёр Төлөөлөгчийн Чуулгын ахлагч Жэффри Р.Холланд Түүн дотор байгтун гэсэн Аврагчийн урилга нь “үлдэгтүн, … үүрд байгтун” гэж бидэнд өгсөн урилга юм хэмээн тайлбарласан (“Abide in Me,” Ensign эсвэл Liahona, 2004 оны 5-р сар, 32). Ахлагч Холланд Түүн дотор байгтун гэсэн Аврагчийн урилгыг хүлээн авах нь бидэнд яагаад ийм чухал болохыг тайлбарлажээ.
ЗурагOfficial Portrait of Elder Jeffrey R. Holland. Photographed January 2018.Есүс “Надаас ангид та нар юу ч хийж чадахгүй” [ Иохан 15:5 ] хэмээн хэлсэн билээ. Энэ бол Бурханы үнэн гэдгийг би гэрчилж байна. Христ бол бидний хувьд бүх зүйл бөгөөд бид Түүний дотор үүрд мөнхөд бат бөх, тууштай, хөдөлшгүй оршин амьдрах хэрэгтэй. Сайн мэдээний үр жимс цэцэглэн дэлгэрч, бидний амьдралыг адисалж байхын тулд бид бүхний Аврагч болсон Түүнтэй, Түүний ариун нэрийг тээдэг Сүмтэй бид бат бөх холбогдсон байх ёстой. Тэр бол бидний хүч чадлын жинхэнэ эх үүсвэр, мөнх амьдралын цорын ганц булаг болох усан үзмийн мод юм. Бид Түүний дотор зөвхөн тэвчээд зогсохгүй, ялан дийлэх бөгөөд биднийг хэзээ ч үл орхих энэ ариун үйл хэрэгт ялалт байгуулах болно.
(Жэффри Р. Холланд, “Abide in Me,” Ensign эсвэл Liahona, 2004 оны 5-р сар, 32)
Мормоны Ном нь Шинэ Гэрээнээс таны суралцаж буй зүйлсийн талаарх ойлголтыг нэмэгдүүлэхэд тусална. Алма 26:12 -ыг уншаад, энэ нь Иохан 15:1–11 -тэй хэрхэн холбогдож буйг эргэцүүлэн бод.
-
Таны Есүс Христ дотор байхыг оролдох үедээ амьдралдаа олж харсан үр жимснүүдийн (үр дүн эсвэл адислал) зарим нь юу вэ?
-
Өөрийгөө Есүс Христ дотор байлгахын тулд таны хийх боломжтой ямар үйлдлүүд байна вэ?
Хэрэв суралцагчид бие биедээ заасан бол тэднийг тодорхойлсон үнэнүүдээ, ангийнхнаасаа олж мэдсэн зүйлс, Есүс Христийн талаарх гэрчлэлээ ангийнхантай хуваалцахад урь. Хичээл заасанд нь зориулж суралцагчдыг магтан сайшааж, тэднийг заасан, суралцсан зүйлсээ гэр бүлийнхэнтэйгээ хуваалцахад уриал.
Аврагч тэдний одоогийн хэрэгцээ шаардлага, нөхцөл байдалд хэрхэн туслах талаар мэдэрсэн зүйлсээ эргэцүүлэх цагийг суралцагчдад гаргаж өг. Аврагчийн талаарх гэрчлэл эсвэл хувийн туршлагаа хуваалцахыг бодож үз.
Тайлбар ба нөхцөл байдлын талаарх мэдээлэл
Тэнгэрлэг Эцэгийн гэрт орон байр олон бий гэдэг нь ямар утгатай вэ?
Бошиглогч Иосеф Смит (1805–1844) ийн заасан.
ЗурагHalf-length frontal portrait of the Prophet Joseph Smith, Jr. Joseph’s head is turned to the side in a three-quarter view, right hand on hip and his left hand holds sheets of papers. He is depicted wearing a dark brown suit and a white shirt and tie.“Миний Эцэгийн гэрт орон байр олон бий [ Иохан 14:2 ] … [хэмээх мэдэгдэл] нь —Та нар Бурханы өв залгамжлагчид мөн Надтай хамт өв залгамжлагчид байхын тулд ‘Миний Эцэгийн хаант улсад олон хаант улс бий’ гэсэн үг байх ёстой. Селестиел хуулийг дуулгавартай дагадаг хүмүүст зориулсан, бас дагадаггүй хүмүүст зориулсан гэх мэтчилэн хүн бүрд өөр өөрийнх нь нөхцөлд тохируулсан орон байрууд байгаа билээ.
(Сүмийн ерөнхийлөгчдийн сургаалаас: Иосеф Смит [2007], 247–248)
Нэмэлт суралцах үйл ажиллагаа
Зураг зурах
Зарим суралцагч уран зургаар дамжуулан өөрсдийгөө илэрхийлдэг. Суралцагчдыг Иохан 14:1–6 эсвэл Иохан 15:1–11 дээрээс Есүс Христийн талаар олж мэдсэн зүйлсээ илэрхийлсэн зураг зурахад урих талаар бодож үз. Хэрэв суралцагчид нэг нэгэндээ хичээл заавал энэхүү зураг нь тэдний заах хичээлийн нэг хэсэг болж болох юм.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F34%2F09%2F34093afba2db77b82c837c16e2152764fb138a70%2F34093afba2db77b82c837c16e2152764fb138a70.jpeg/full/!250,/0/default)
Иохан 14:6 . “Зам, үнэн, амь бол Би байгаа юм”
Суралцагчдыг Есүс Христ хэрхэн “зам,” “үнэн,” “амь” болохыг тодорхойлоход урь. Тэд эдгээр үүргийг тайлбарласан харьцуулах эшлэлийг олж болох юм. Мөн суралцагчид эдгээр үүргийг тэдний амьдралд биелүүлж буй Есүс Христийн туршлагыг хуваалцаж болно.
Байх гэдэг үгийг тоол
Судрын хэсэгт үг, хэллэгийг олон давтамжтай ашиглах нь чухал захиасыг хэрхэн тодотгож өгч болохыг олж харахад нь суралцагчдад тусал. Байх гэдэг үгийг Иохан 15:4–10 дээр хэд хэдэн удаа ашигласан байдаг. Суралцагчдыг энэ үг хэдэн удаа гарахыг тоолж, судрууд дээрээ энэ үгийг тэмдэглэж эсвэл тэмдэглэгээ хийж, олон давтамжтай ашигласнаар ямар утга санааг илэрхийлсэн болохыг бодож үзэхэд урь.
Иохан 15:10 . “Та нар тушаалыг минь сахивал хайранд минь байх болно”
Самбар дээр усан үзмийн мод зураад, суралцагчдаас өөрсдийгөө илэрхийлэхийн тулд усан үзмийн модонд холбогдсон мөчрүүд зурахыг хүс. Суралцагчдыг самбар дээр усан үзмийн модны эргэн тойронд зарлигуудыг жагсаахад урь. Зарлигуудыг сахих нь Аврагчийн хайранд байж, усан үзмийн модонд холбогдсон хэвээр үлдэхэд бидэнд хэрхэн тусалж болох талаар ярилц.