Gjoni 14:15–31; 15:10–14

“Nëse Më Doni, Zbatoni Urdhërimet e Mia”

Teksa Shpëtimtari dhe Apostujt e Tij kremtuan Pashkën judease në dhomën e sipërme, Shpëtimtari u dha mësim të vërteta të rëndësishme Apostujve të Tij. Ndërsa vuajtjet e Tij në Gjetseman dhe në Kalvar nuk kishin ndodhur ende, Jezusi i udhëzoi këta burra që Ai i donte shumë: “Nëse më doni, zbatoni urdhërimet e mia” (Gjoni 14:15). Ky mësim mund të të ndihmojë të tregosh dashurinë tënde ndaj Atit Qiellor dhe Jezu Krishtit duke iu bindur urdhërimeve të Tyre.

Vëzhgim dhe dallim. Gjeni kohë për të vëzhguar nxënësit dhe për të kërkuar ndihmën e Shpirtit për të dalluar nevojat e tyre në mënyrë që mësimi të mund të përshtatet në përputhje me to. Mos u shqetësoni shumë për trajtimin e materialit të mësimit ose për atë që duhet të thoni më pas; kjo mund të lërë në hije nevojat e nxënësve dhe nxitjet e Frymës së Shenjtë.

Përgatitja e nxënësve: Ftojini nxënësit të shohin bisedën e Karol M. Stivensit, ish‑pjesëtare në Presidencën e Përgjithshme të Shoqatës së Ndihmës, në konferencën e përgjithshme të tetorit 2015 “Nëse Më Doni, Zbatoni Urdhërimet e Mia” nga kodi kohor 0:00 në 4:31. Kërkojuni nxënësve të mendojnë për atë që ky rrëfim mund të na mësojë rreth arsyes përse Zoti na jep urdhërime.

Veprimtari të Mundshme të të Mësuarit

Merreni parasysh ta nisni orën e mësimit duke treguar shembuj vetjakë të pjesëtarëve të familjes që tregojnë dashuri për njëri-tjetrin. Përndryshe, ftojini nxënësit t’i diskutojnë pyetjet në vijim.

Si e tregon dashurinë?

• Si mund ta kuptosh nëse dikush të do? Cilat fjalë, veprime apo qëndrime e tregojnë dashurinë e tyre?

• Si e tregon dashurinë tënde për të tjerët?

• Po nëse do dikë, por qëndrimi yt ose veprimet e tua nuk e kanë treguar gjithmonë atë dashuri? Çfarë do të mund të bëje?

Ndërsa Shpëtimtari vazhdoi t’i udhëzonte Apostujt e Tij gjatë Darkës së Fundit, Ai dha mësim për dashurinë e Tij për ne dhe dha mësim se si ne mund ta tregojmë dashurinë tonë për Të.

Në varësi të nevojave dhe aftësive të nxënësve, çdo nxënës mund të lexojë të gjitha vargjet vijuese ose klasa mund të ndahet përgjysmë dhe çdo gjysme mund t’i caktohet një nga fragmentet.

Studio te Gjoni 14:15, 21, 23–24 dhe Gjoni 15:10–14 , duke kërkuar atë që Shpëtimtari tha se ne mund të bëjmë për ta treguar dashurinë tonë për Të dhe për Atin Qiellor.

Pasi nxënësit të kenë mbaruar leximin, nxitini ata të bëjnë pyetje ose të bëjnë komente për atë që ata lexojnë. Ndërsa e bëjnë këtë gjë, ndihmojini ata të përcaktojnë se si ne mund ta tregojmë dashurinë tonë për Perëndinë dhe ndihmojini ata gjithashtu që të mbajnë shënim fjalët ose frazat që tregojnë dashurinë e Perëndisë për ne.

• Çfarë theksoi Shpëtimtari në këto vargje për mënyrën se si ne mund të tregojmë dashuri për Të?

Merreni parasysh të shkruani në tabelë të vërtetën vijuese ose një të ngjashme që nxënësit e identifikuan: Ne e tregojmë dashurinë tonë për Jezu Krishtin duke zbatuar urdhërimet e Tij.

• Çfarë japin mësim këto vargje për dashurinë e Shpëtimtarit për ty?

• Cilat janë disa situata në të cilat të vërtetat që Shpëtimtari dha mësim në këto vargje do të ishin të dobishme?

Nëse nxënësit ishin ftuar të shihnin materialin filmik si pjesë të përgatitjes së nxënësve, ftojini ata të diskutojnë atë që mësuan rreth arsyes përse Perëndia na jep urdhërime, në vend që të rishohin materialin filmik në klasë. Ose nxënësit mund të shohin materialin filmik “Nëse Më Doni, Zbatoni Urdhërimet e Mia” nga kodi kohor 0:00 në 4:31, në dispozicion në ChurchofJesusChrist.org, ose të lexojnë thënien e mëposhtme.

Motra Karol M. Stivens, ish-pjesëtare e Presidencës së Përgjithshme të Shoqatës së Ndihmës, dha mësim për motivin e Perëndisë në dhënien e urdhërimeve për ne dhe për shtysën tonë për të qenit të bindur ndaj tyre.

Shihni materialin filmik “Nëse Më Doni, Zbatoni Urdhërimet e Mia” nga kodi kohor 0:00 në 4:31, që gjendet në ChurchofJesusChrist.org. Në këtë material filmik, Motra Karol M. Stivens, ish‑pjesëtare e Presidencës së Përgjithshme të Shoqatës së Ndihmës, tregon një përvojë që pati me mbesën e saj, Kloin.

“Me raste, ne mund të ndiejmë se ligjet e Perëndisë i vënë cak lirisë sonë vetjake, na heqin lirinë tonë për të zgjedhur dhe e kufizojnë rritjen tonë. Por, kur ne kërkojmë kuptueshmëri më të madhe, kur ne e lejojmë Atin tonë të na mësojë, ne do të fillojmë të shohim se ligjet e Tij janë një shfaqje e dashurisë së Tij për ne dhe se bindja ndaj ligjeve të Tij është një shprehje e dashurisë sonë për Të.”

(Karol M. Stivens, “Nëse Më Doni, Zbatoni Urdhërimet e Mia”, Ensign ose Liahona, nëntor 2015, f. 119)

Merreni parasysh t’u kërkoni disa nxënësve të ndihmojnë për të krijuar listën vijuese duke shkruar përgjigjet e bashkëmoshatarëve të tyre në tabelë.

Rendit disa ligje dhe urdhërime që ti e ndien se tregojnë dashurinë e Atit Qiellor për ty. Për të të ndihmuar të mendosh për disa urdhërime, ti mund të përsërisësh Dhjetë Urdhërimet (shih te Eksodi 20:3–17) ose materialin Për Forcën e Rinisë [broshurë, 2011].

• Si janë urdhërimet që ti rendite një “shfaqje e dashurisë [së Perëndisë] për ne”?

• Si mund të jetë bindja jote ndaj këtyre urdhërimeve një “shrehje e dashurisë [tënde] për Të”?

Zgjidh një nga urdhërimet nga lista jote. Mund të jetë një urdhërim që ti po mundohesh ta zbatosh ose një që ti je tunduar ta shkelësh por ke zgjedhur të bindesh.

Vlerësoni përpjekjet e nxënësve për të qenë të bindur duke identifikuar disa nga urdhërimet që ata i zbatojnë, dhe ndihmojini ata të vlerësojnë shtysat e tyre për zbatimin e këtyre urdhërimeve.

Merreni parasysh t’i paraqitni pyetjet vijuese dhe tʼu jepni nxënësve kohë të përshtatshme për të përsiatur me kujdes dhe për të shkruar përgjigjet e tyre në ditarët e tyre të studimit. Jini të vetëdijshëm për natyrën e ndjeshme të këtyre pyetjeve.

Pyetjet vijuese do të të ndihmojnë të vlerësosh shtysat e tua për zbatimin e urdhërimeve të Perëndisë. Ndërsa mendon për përgjigjet e tua, është e rëndësishme të dish që ti mund të kesh arsye të ndryshme për mbajtjen e urdhërimeve. Pavarësisht shtysave të tua aktuale, vazhdo të jesh i bindur dhe me kohën dëshira jote për t’u bindur prej dashurisë mund të rritet.

• Çfarë të motivon ta zbatosh këtë urdhërim?

• Si ndihesh për arsyet e tua për zbatimin e urdhërimeve krahasuar me shembullin e Zotit të bindjes prej dashurisë?

• Përse mund të jenë të rëndësishme arsyet (shtysat e tua) për bindjen tënde?

• Çfarë këshille do t’i jepje dikujt që dëshiron t’u bindet urdhërimeve të Perëndisë prej dashurisë?

Shembulli i dashurisë i Shpëtimtarit tonë

Jezu Krishti na dha shembullin e përsosur të mënyrës se si t’u bindemi ligjeve dhe urdhërimeve të Perëndisë prej dashurisë së dëlirë. Pas Darkës së Fundit Ai tha: “Por kjo ndodh që bota ta njohë se unë e dua Atin dhe se bëj ashtu siç Ati më ka urdhëruar” ( Gjoni 14:31). Më pas Jezusi shkoi të vuante për mëkatet tona dhe “dhimbje dhe hidhërime dhe tundime të çdo lloji” tonat ( Alma 7:11) në Kopshtin e Gjetsemanit dhe sërish në kryq.

• Përse ishte Shpëtimtari i gatshëm t’i bindej Atit Qiellor? (Shih te Gjoni 15:13 ; Hebrenjve 12:2 .)

Plaku D. Tod Kristoferson, i Kuorumit të Dymbëdhjetë Apostujve, na ftoi të marrim parasysh me kujdes atë që dashuria e Jezu Krishtit mund të na motivojë të bëjmë. Ti mund të duash të shohësh materialin filmik “Qëndroni në Dashurinë Time”, në dispozicion në ChurchofJesusChrist.org, nga kodi kohor 14:27 deri në 14:50, ose të lexosh thënien vijuese:

“A nuk do ta doni Atë që ju deshi i pari? [shih te 1 Gjon 4:19 ]. Atëherë, zbatojini urdhërimet e Tij [shih te Gjoni 14:15 ]. A nuk do të jeni një mik i Atij që dha jetën e Tij për miqtë e Tij? [Shih te Gjoni 15:13 .] Atëherë, zbatojini urdhërimet e Tij [shih te Gjoni 15:14 ]. A nuk do të qëndroni në dashurinë e Tij dhe ta pranoni gjithçka që Ai ua ofron plot hir? Atëherë zbatojini urdhërimet e Tij [shih te Gjoni 15:10 ].”

(D. Tod Kristoferson, “Qëndroni në Dashurinë Time”, Ensign ose Liahona, nëntor 2016, f. 51)

• Si mundet zotimi yt për bindje më të madhe, i bazuar në dashuri, të ndikojë te marrëdhënia jote me Atin Qiellor dhe Jezu Krishtin? (Shih te Mosia 5:13 .)

Teksa mundohesh të zbatosh urdhërimet prej dashurisë për Atin Qiellor dhe Jezu Krishtin, ti do të ndiesh një rritje të dashurisë së Tyre në jetën tënde (shih te Gjoni 14:21). Nëse e ke të vështirë të jesh i bindur ose madje të dëshirosh të jesh i bindur, Ati Qiellor mund të të ndihmojë nëse ti i kërkon përulësisht për një ndryshim të zemrës. Gjithashtu, mbaj mend që një nga urdhërimet është të pendohesh dhe ne mund ta zbatojmë këtë urdhërim teksa përpiqemi të kapërcejmë dobësitë tona.

Komente dhe Informacion për Rrethanat

Përse Perëndia kërkon bindjen tonë ndaj urdhërimeve të Tij?

Presidenti Dallin H. Ouks, i Presidencës së Parë, dha mësim:

“Perëndia na kërkon që t’u bindemi urdhërimeve të Tij, sepse vetëm nëpërmjet asaj bindjeje, përfshirë pendimin, ne mund të kthehemi për të jetuar në praninë e Tij dhe mund të bëhemi të përsosur siç është Ai.”

(Dallin H. Ouks, “Dy Urdhërimet e Mëdha”, Ensign ose Liahona, nëntor 2019, f. 74)

A ka rëndësi fakti se përse u bindem urdhërimeve?

Secili nga ne duhet ta pyesë veten pse u bindemi urdhërimeve të Perëndisë. E bëjmë këtë sepse kemi frikë nga ndëshkimi? Apo sepse dëshirojmë shpërblimet e të jetuarit të një jete të mirë? Apo sepse i duam Perëndinë dhe Jezu Krishtin dhe duam t’u shërbejmë Atyre?

Është më mirë t’u bindemi urdhërimeve për shkak se i druhemi ndëshkimit sesa të mos u bindemi fare. Por do të jemi shumë më të lumtur nëse i bindemi Perëndisë sepse e duam Atë dhe duam t’i bindemi. Kur i bindemi Atij lirisht, Ai mund të na bekojë lirisht. Ai tha: “Unë, Zoti, … gëzohem t’i nderoj ata që më shërbejnë në drejtësi dhe në të vërtetë deri në fund” [ Doktrina e Besëlidhje 76:5 ]. Bindja gjithashtu na ndihmon të përparojmë dhe të bëhemi më tepër si Ati ynë Qiellor. Por ata që nuk bëjnë asgjë deri sa të urdhërohen dhe më pas i mbajnë urdhërimet pa dëshirë [do ta] humbasin shpërblimin e tyre [shih Doktrina e Besëlidhje 58:26–29 ].

(Parimet e Ungjillit [2009], f. 201–202)

Veprimtari Plotësuese të të Mësuarit

Gjoni 15:18–25 . “Nëse bota ju urren”

Nëse nxënësit e kanë të vështirë t’u binden urdhërimeve për shkak të ndikimeve të botës ose përndjekjes, këto vargje mund t’i ndihmojnë ata të marrin kurajë ose të fitojnë këndvështrim.

Ftojini nxënësit të mendojnë për mënyrën se si Jezu Krishti do të pritej nëse shërbesa e Tij në vdekshmëri do të ndodhte në ditët tona.

Nxënësit mund të studiojnë te Gjoni 15:18–25 duke kërkuar atë që Shpëtimtari tha për botën dhe arsyet përse njerëzit e Tij kanë pësuar gjithmonë kundërshtim dhe përndjekje nga bota. Çfarë ngushëllimi dhe force për t’u bindur mund të gjejmë në mesazhin e Tij?

Ne mund t’i mbajmë urdhërimet edhe nëse nuk e kuptojmë përse janë dhënë

Profeti Jozef Smith (1805–1844) tha: “Unë e bëra këtë rregullin tim: Kur Zoti urdhëron, bindu” (Mësimet e Presidentëve të Kishës: Jozef Smith [2009], f. 168). Shkrimet e shenjta dhe historia e Kishës përfshijnë shumë rrëfime të njerëzve të cilët zgjodhën të ishin të bindur edhe kur nuk e kuptonin plotësisht përse urdhërimi apo këshilla ishte dhënë. Fragmentet në vijim përfshijnë shembuj të bindjes së mbushur me besim dhe disa nga bekimet që këta individë morën për shkak se ishin të bindur:

Adami dhe Eva: Moisiu 5:5–12

Simon Pjetri dhe bashkëshoqëruesit e tij: Lluka 5:4–11

Nefi: 1 Nefi 9:5–6

Nxënësit mund të ftohen t’i përsiatin këto pyetje: Cilat janë disa urdhërime që nuk i kuptoni plotësisht? Si mund t’ju ndihmojë dashuria për Perëndinë që të jeni besnikë dhe të bindur derisa të vijë kuptueshmëri e mëtejshme?

Shqyrtoni zotimet tuaja

Ftojini nxënësit të përsëritin ndonjë plan apo zotim që kanë bërë kohët e fundit për të qenë më të bindur ndaj Atit Qiellor dhe Jezu Krishtit. Ata mund ta kenë bërë këtë në një mësim të mëparshëm seminari ose si pjesë e qëllimeve të tyre për programin Fëmijët dhe Rinia. Nëse nuk e kanë tashmë një qëllim apo plan për të qenë më të bindur, ata mund të mendojnë për një nga urdhërimet që renditën në këtë mësim.