Seminelí
Sione 14:17

Sione 14:17

Vakai Fakalūkufuá

Lolotonga ʻEne efiafi fakaʻosi mo ʻEne kau ākongá, naʻe akoʻi mo fakafiemālieʻi kinautolu ʻe Sīsū Kalaisi. Naʻá Ne akoʻi kiate kinautolu ʻa e founga naʻá Ne hoko ai “ko e hala, mo e moʻoni, pea mo e moʻui” (Sione 14:6) mo e founga te nau lava ai ʻo fakahaaʻi ʻenau ʻofa kiate Iá ʻaki ʻenau tauhi ʻEne ngaahi fekaú. Naʻe fakaafeʻi kinautolu ʻe he Fakamoʻuí ke nau nofo maʻu ʻiate Ia mo akoʻi kinautolu fekauʻaki mo e misiona ʻo e Laumālie Māʻoniʻoní. Naʻe lotua kinautolu ʻe Sīsū Kalaisi ʻi Heʻene fai ʻEne Lotu Hūfekina maʻongoʻongá.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Sione 14:1–6; 15:1–11

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau fakakaukau ki honau vā fetuʻutaki mo Sīsū Kalaisí pea mo e founga te nau lava ai ʻo muimui ʻiate Iá mo maʻu Hono mālohí mo e poupoú.

  • Teuteu ʻa e tokotaha akó: Fakaafeʻi e kau akó ke kumi pe faitaaʻi ha hala pe ko ha vaine pe fuʻu ʻakau ʻoku ʻi ai hano ngaahi vaʻa. Kole ki he kau akó ke nau fakakaukau ki he ngaahi founga ʻoku fakamanatu ai kiate kinautolu ʻe heʻenau fakatātaá ʻa Sīsū Kalaisi pea ʻomi ʻenau fakatātaá ki he kalasí.

  • Ngaahi faingamālie akoʻí: Fakakaukau ke fakaafeʻi e kau akó ke nau faiako lolotonga e lēsoni ko ʻení. ʻE lava ke teuteu kei taimi ʻa e kau akó ke akoʻi ha konga ʻo e lēsoní, pe te nau lava ʻo teuteu mo faiako lolotonga e kalasí.

  • Laʻipepa tufa: “Ko Sīsū Kalaisi ʻKo e Halá, Mo e Moʻoní, pea mo e Moʻuíʼ (Sione 14:6)”

  • Naunau: Ko ha vaʻa pe konga ʻo ha vaine

  • Fokotuʻuki hono akoʻi ʻi he konifelenisi vitioó: Fakakaukau ke vahevahe ʻa e kau akó ki ha fanga kiʻi kulupu konifelenisi vitiō iiki ke akoʻi ʻenau lēsoni kuo teuteú ki ha kaungāako.

Sione 14:15-31; 15:10–14

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke fakahaaʻi ʻenau ʻofa ki he Tamai Hēvaní mo Sīsū Kalaisi ʻaki ʻenau talangofua ki Heʻena ngaahi fekaú.

  • Teuteu ʻa e tokotaha akó: Fakaafeʻi e kau akó ke nau mamata ʻi he “Kapau ʻOku Mou ʻOfa Kiate Au, Fai ʻEku Ngaahi Fekau” ko e lea ʻa Kalo M. Sitīveni ne kau kimuʻa ʻi he Kau Palesitenisī Lahi ʻo e Fineʻofá, ʻi he Konifelenisi Lahi ʻo ʻOkatopa 2015, mei he taimi 0:00 ki he 4:31, kole ki he kau akó ke nau fakakaukau ki he meʻa ʻe lava ke akoʻi mai ʻe he fakamatala ko ʻení fekauʻaki mo e ʻuhinga ʻoku ʻomi ai ʻe he ʻEikí e ngaahi fekaú kiate kitautolú.

  • Fokotuʻu ki hono akoʻi ʻi he konifelenisi vitioó: Kole ki he kau akó ke fakaafeʻi ha mātuʻa pe mēmipa kehe ʻo e fāmilí ke kau ʻi he fealeaʻaki fekauʻaki mo hono ʻiloʻi pe ʻoku ʻofa ha taha ʻi he niʻihi kehé.

Sione 14–16

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ʻiloʻi ʻe he kau akó ʻa e founga ʻoku fakahoko ai ʻe he Laumālie Māʻoniʻoní Hono ngaahi fatongiá ʻi heʻenau moʻuí.

  • Teuteu ʻa e tokotaha akó: Fakaafeʻi e kau akó ke nau teuteu ke tali e fehuʻi “ʻOku tokoniʻi fēfē koe ʻe he Laumālie Māʻoniʻoní?” ʻaki ha ngaahi sīpinga mei he folofolá pe ngaahi aʻusia fakatāutahá.

  • Ngaahi naunau maʻá e kau akó: Fanga kiʻi laʻipepa pe fanga kiʻi kaati tohi ʻe lava ke tohi ai ʻa e kau akó

  • Meʻa ke fakaʻaliʻalí: Ko e saati ʻi he ngaahi fatongia ʻo e Laumālie Māʻoniʻoní

  • Fokotuʻu ki hono akoʻi ʻi he konifelenisi vitioó: Faʻu ha fakamatala fakapepa ʻe vahevahe ʻa ia ʻoku ʻi ai e sātí. Fakaafeʻi e kau akó ke taipeʻi ʻenau ngaahi talí ki he sātí. ʻE lava ke vahe ki he kau akó ha ngaahi tafaʻaki pau. Fakaʻaliʻali ʻa e saati kuo kakató ke vakai ki ai ʻa e taha kotoa.

Sione 17

Taumuʻa ʻo e lēsoní: ʻE poupouʻi ʻe he lēsoni ko ʻení ʻa e kau akó ke nau ʻiloʻi fakataautaha ange ʻa e Tamai Hēvaní mo Sīsū Kalaisi ʻi heʻenau moʻuí.

  • Teuteu ʻa e tokotaha akó: Fakaafeʻi e kau akó ke nau lau ʻa e 3 Nīfai 19:16, 26–33 pea ke fakalaulauloto ki he ongo te nau maʻu ʻi he fanongo ki he lotu ʻa e Fakamoʻuí ki he Tamai Hēvaní maʻanautolú.

  • Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi e fokotuʻu ʻi he konga ki he “Ngaahi ʻEkitivitī Tokoni Ki he Akó” ʻi he lēsoni ko ʻení ʻoku ui ko e “ʻEkitivitī tā fakatātaá—hoko ʻo taha” ke tokoni ke mahino ki he kau akó ʻoku fakanatula pē ʻetau uouangataha ʻiate kitautolu ʻi heʻetau ʻunu ke ofi ange kia Sīsū Kalaisí.

Fakataukei Fakatokāteline: Sione 17:3

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea mahuʻinga ki he Sione 17:3, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

  • Teuteu ʻa e tokotaha akó: Fakaafeʻi e kau akó ke nau feinga ke ʻiloʻi ha taha ʻoku nau ʻiloʻi te ne ʻiloʻi lelei ʻa e Tamai Hēvaní mo Sīsū Kalaisi. Fakaafeʻi e kau akó ke nau fehuʻi ki he tokotaha ko iá ʻa e meʻa kuó ne tokoniʻi kinautolu ke nau ʻiloʻi ʻa e Tamai Hēvaní mo Sīsū Kalaisí.

  • Meʻa ke fakaʻaliʻalí: Ngaahi fakahinohino mo e ngaahi fehuʻi ʻi lalo ʻi he ngaahi ʻuluʻi tohi takitaha ʻe tolu ʻoku fekauʻaki mo e ngaahi tefitoʻi moʻoni ʻo hono maʻu ʻo e ʻilo fakalaumālié

  • Fokotuʻu ki hono akoʻi ʻi he konifelenisi vitioó: Fakakaukau ke fakaʻaongaʻi ha fanga kiʻi kulupu konifelenisi vitiō iiki ke fakaʻatā e kau akó ke nau ngāue ʻi ha fanga kiʻi kulupu iiki ke fakaʻaongaʻi e ngaahi tefitoʻi moʻoni ki hono maʻu e ʻilo fakalaumālié ki he tūkunga ʻi he lēsoní. Hili iá pea toe fakatahaʻi ʻa e kalasí ke aleaʻi ʻa e meʻa naʻe ako ʻe he kulupu takitaha.

Paaki