Jesus and Nicodemus standing near a pool of water at night talking. Outtakes include the two sitting by the pool with their fingers near the water, Jesus standing and touching a branch of a tree while Nicodemus sits, and some of the shots taken from above.
Si Nicodemo usa ka Pariseo ug “magmamando sa mga Judeo” (Juan 3:1). Miduol siya sa Manluluwas sa usa ka gabii aron magsukna og mga pangutana mahitungod sa kaluwasan. Kini nga leksiyon makatabang kanimo sa pagsabot ug pagbati sa importansya sa pagkatawo pag-usab “sa tubig ug sa Espiritu” (Juan 3:5) aron makasulod sa gingharian sa Dios.
Pag-andam sa estudyante: Dapita ang mga estudyante sa pag-anha sa klase nga andam sa paghisgot sa mga kabag-ohan nga gibuhat nila o sa ubang tawo nga ilang nailhan aron mahimong mas mahisama kang Jesukristo.
Posible nga mga Kalihokan sa Pagkat-on
Usa ka tinguha nga magbag-o
Paghunahuna og mga paagi aron sugdan kini nga leksiyon nga makatabang sa mga estudyante sa pagsusi sa mga panalangin ingon man usab sa mga pagsulay sa pagbag-o aron mahimong mas mahisama sa Manluluwas. Ang usa ka paagi sa pagbuhat niini mao ang pagdapit sa mga estudyante nga kompletohon ang mosunod nga kalihokan, nga naghangyo kanila sa paghunahuna og may kalabotan nga sitwasyon. Tabangi sila sa pagbutang og igong mga detalye aron mahimong morag tinuod ang sitwasyon ug makadani sa ilang interes.
Paghunahuna og sitwasyon mahitungod sa usa ka tinedyer nga gustong magbag-o, moduol sa Manluluwas, ug makasinati og dugang pang kalinaw pero dili sigurado kon unsaon. Paghunahuna og mga partikular nga butang nga lagmit nga gustong bag-ohon niining tawhana ug pipila ka mga problema nga posibleng ilang maatubang sa pagbag-o. Mahimo usab kang maghunahuna mahitungod sa mga kasinatian nga nasinati nimo o sa ubang tawo sa pagbuhat og mga positibong kabag-ohan nga makahatag niini nga tinedyer og paglaom nga mabag-o sila.
Ngano kaha nga ang Langitnong Amahan nagkinahanglan man nga magbag-o kadtong gustong mosulod sa Iyang gingharian?
Sa imong journal sa pagtuon, isulat ang pipila ka paagi nga gibati nimo nga giaghat ka nga angayng bag-ohon ug mahimong mas mahisama ni Jesukristo.Sa kinatibuk-an niini nga leksiyon, dapita ang inspirasyon sa Espiritu Santo samtang nakakat-on ka kon unsaon pagtinguha sa tabang sa Manluluwas sa pagbuhat og mga kabag-ohan nga gusto Niya kanimo.
Gitudloan ni Jesus si Nicodemo mahitungod sa pagkatawo pag-usab
Adunay tawo nga gihinganlan og Nicodemo nga miduol kang Jesus sa usa ka gabii. Si Nicodemo usa ka Pariseo ug magmamando sa mga Judeo. Sa kaulahian gipanalipdan niya si Jesus sa atubangan sa mga Pariseo (tan-awa sa Juan 7:50–53) ug miapil sa mga tumutuo atol sa lubong ni Jesus (tan-awa sa Juan 19:39–40). Miduol si Nicodemo sa Manluluwas niining gabhiona nga miila nga si Jesus “usa ka magtutudlo nga gikan sa Dios” ( Juan 3:2).
Basaha ang Juan 3:1–5 , ug pangitaa kon unsa ang gitudlo sa Manluluwas kang Nicodemo nga kinahanglan niyang buhaton aron makasulod sa gingharian sa Dios.
Unsa kaha ang gipasabot sa “pagkatawo pag-usab”? ( Juan 3:3).
Kon gikinahanglan, tabangi ang mga estudyante nga makasabot nga ang pagkatawo pag-usab nagpasabot nga magbag-o ug mahimong bag-ong tawo. Lagmit nga makatabang kon ipabasa sa mga estudyante ang Mosiah 27:25 , ug mangita kon unsa ang gitudlo sa Ginoo kang Alma mahitungod sa pagpakatawo pag-usab.
Ngano kaha nga kinahanglan natong magpakatawo pag-usab aron makita ang gingharian sa Dios?
Sa dihang wala masabti ni Nicodemo kon unsaon pagpakatawo pag-usab, unsa ang gitudlo sa Manluluwas (sigon sa girekord sa bersikulo 5)?
Ang usa sa mga baroganan nga atong nakat-onan gikan sa mga pagtulon-an sa Manluluwas ngadto kang Nicodemus mao nga kinahanglan kitang matawo pinaagi sa tubig ug sa Espiritu aron makasulod sa gingharian sa Dios.
Samtang hisgotan sa mga estudyante ang mosunod nga mga pangutana, siguroha nga nasabtan nila nga kinahanglan kitang bunyagan ug makompirmahan aron matawo pag-usab pinaagi sa tubig ug sa Espiritu.
Sa imong hunahuna, unsay buot ipasabot sa matawo pinaagi sa tubig ug sa Espiritu?
Sa unsa nga mga paagi sa imong hunahuna nga ang pagpabunyag ug pagpakompirma makatabang kanato nga matawo pag-usab ug makasulod sa gingharian sa Dios?
Unsa ang gitudlo sa Manluluwas kang Nicodemo nga gusto nimong masabtan sa tawo nga anaa sa sitwasyon nga imong gihimo?
Ang bunyag ug ang pagpakompirma mao ang duha ka gikinahanglang mga ordinansa sa kaluwasan ug kahimayaan nga kinahanglang madawat sa kada tawo aron mapanunod ang langitnong gingharian. Kini nga mga ordinansa mao ang ganghaan nga atong sudlan aron makasulod sa dalan sa pakigsaad nga magdala ngadto sa kinabuhing dayon (tan-awa sa 2 Nephi 31:17–20). Samtang naglakaw kita niini nga dalan ug nagtuman sa atong mga pakigsaad, makasinati kita og kabag-ohan ug espirituhanong pagpakatawo pag-usab.Si propeta Alma diha sa Basahon ni Mormon mipasabot sa tahas sa Manluluwas sa pagtugot kanato nga matawo pag-usab. Basaha ang Alma 7:14 , ug pangitaa kon sa unsang paagi nga makatabang kanato ang Manluluwas nga matawo kita pag-usab.
Unsa ang tahas sa Manluluwas sa pagtabang kanato nga matawo pag-usab?
Gikan sa 2 Nephi 31:17 nakat-onan usab nato ang tahas sa Espiritu Santo sa pagtabang kanato nga matawo pag-usab: Ug unya mosunod ang kapasayloan sa inyong mga sala pinaagi sa kalayo ug sa Espiritu Santo.”
Unsa ang tahas sa Espiritu Santo sa pagtabang kanato nga matawo pag-usab?
Ikonsiderar ang paggamit sa mosunod nga video, o laing ehemplo sa pagpakatawo pag-usab, aron tabangan ang mga estudyante nga makita kon sa unsang paagi nga ang pagdawat sa mga ordinansa sa bunyag ug pagpakompirma makatabang kanato sa pagbag-o ug pagpakatawo pag-usab inubanan sa tabang sa Manluluwas.
Tan-awa ang video nga “I Love Loud Boys” (10:48), diin si Elder Yoon Hwan Choi sa Seventy nagsaysay mahitungod sa usa ka grupo sa mga batan-ong lalaki kansang kinabuhi nausab sa dihang nakabig sila ngadto sa Ginoo. Tan-awa ang video gikan sa code sa oras nga 0:00 hangtod sa 4:34. (Kini nga video anaa sa ChurchofJesusChrist.org.)
Unsay nakadasig kanimo mahitungod sa mga kabag-ohan nga gibuhat sa mga batan-ong lalaki?
Mahimong pamalandongan sa mga estudyante ang ilang pag-andam para sa klase samtang gitubagan nila ang mosunod nga mga pangutana.
Unsa ang pipila ka mga kabag-ohan nga gibuhat nimo o sa usa ka tawo nga imong nailhan aron mahimong mas mahisama ni Jesukristo?
Unsay gikatabang sa mga ordinansa sa bunyag ug pagpakompirma niini nga mga kabag-ohan?
Kon naglisod ang mga estudyante sa pagtubag sa miaging pangutana, tabangi sila nga makita kon sa unsang paagi nga kini nga mga ordinansa nagtugot kanila nga makabaton og padayon nga pagpakig-uban sa Espiritu Santo. Ikonsiderar usab ang paghisgot kon sa unsang paagi nga ang pag-ambit sa sakramento makatabang kanato sa pagpadayon sa pagbag-o pinaagi sa pagtabang kanato sa paghinumdom kang Jesukristo ug sa mga pakigsaad nga atong gibuhat atol sa bunyag.
Usahay naghunahuna kita kon unsa ang atong kahimtang sa atong kaugalingong espirituhanong pagpakatawo pag-usab. Ang Manluluwas mitudlo sa Juan 3:8 nga makita nato ang mga epekto sa hangin pero dili kon asa kini naggikan o asa kini padulong. Ingon usab niini, dili nato masabtan kanunay kon kanus-a magsugod ang pagpakatawo pag-usab, o giunsa pagbuhat ang mga kabag-ohan dinhi kanato. Pero, makita nato ang mga epekto niini samtang nabag-o ang atong mga tinguha ug mga aksiyon (tan-awa sa Mosiah 5:1–2).Pagsulat sa imong journal sa pagtuon mahitungod sa ebidensya nga imong nakita ang tabang sa Manluluwas nga mabag-o ka. Paghatag og pagtagad sa bisan unsang mga pag-aghat, hunahuna, ug impresyon nga lagmit nga imong nadawat gikan sa Espiritu.
Pagtabang sa ubang tawo
Hunahunaa ang sitwasyon nga imong gihimo sa sinugdanan sa leksiyon. Pamalandongi kon unsa ang imong nakat-onan ug gibati karong adlawa. Pagsulat og mubo nga sulat ngadto sa tinedyer gikan sa imong sitwasyon, nga nagpasabot kon sa unsang paagi nga makatabang ang Manluluwas nga mabag-o sila. Lagmit nga makatabang kanimo ang mosunod nga mga pangutana samtang gibuhat nimo kini:
Unsa sa imong hunahuna ang mahimong buhaton niining tawhana aron mangayo og tabang sa Manluluwas sa pagbag-o? Sa imong hunahuna nganong makatabang man kadto nga mga aksiyon?
Sa unsang paagi nga ang mga ordinansa sa bunyag, pagpakompirma, ug pag-ambit sa mga timailhan sa sakramento makatabang niining tawhana nga magbag-o ug matawo pag-usab?
Unsa ang imong nakat-onan mahitungod kang Jesukristo samtang nasinati nimo ang proseso nga matawo pag-usab o nakita kini nga proseso sa ubang tawo?
Dapita ang mga estudyante nga ipaambit nga magkapares o diha sa gagmay nga mga grupo kon unsa ang ilang gisulat para sa tinedyer diha sa sitwasyon. Ikonsiderar ang pagsaksi ug pagpaambit og personal nga mga kasinatian nga lagmit nga makatabang.
Komentaryo ug Background nga Impormasyon
Unsay buot ipasabot sa matawo pag-usab?
Si Elder David A. Bednar sa Korum sa Napulog Duha ka Apostoles mipasabot:
Imahe
Elder David A. Bednar, Quorum of the Twelve Apostles official portrait. 2020.
Ang gitugutan nga mga sulugoon sa Ginoo nagbalik-balik sa pagtudlo nga usa sa importanting mga katuyoan sa atong mortal nga kinabuhi mao ang pag-usab sa espirituhanong paagi ug pag-usab pinaagi sa Pag-ula ni Jesukristo. …
Gimandoan kita sa “pagduol ngadto kang Kristo, ug paghingpit diha kaniya, ug paglimod sa [atong kaugalingon] sa tanan nga dili diosnon” ( Moroni 10:32), aron mahimong “bag-o nang [mga] binuhat” diha ni Kristo (tan-awa sa 2 Mga Taga-Corinto 5:17), sa pagsalikway “sa kinaiyanhon nga tawo” ( Mosiah 3:19), ug sa pagsinati og “dako nga kausaban dinhi kanato, o sa atong mga kasingkasing, nga kita wala nay hilig sa pag buhat og dautan, apan sa pagbuhat og maayo kanunay” ( Mosiah 5:2). Palihog timan-i nga ang pagkakabig nga gihulagway niini nga mga bersikulo dako, dili gamay—usa ka espirituhanong pagkatawo pag-usab ug sukaranang kausaban sa unsay atong gibati ug gitinguha, unsay atong gihunahuna ug gibuhat, ug unsa kita. Sa pagkatinuod, ang lintunganay sa ebanghelyo ni Jesukristo nagkinahanglan sa sukaranan ug permanente nga kausaban sa atong pagkatawo nga mahimong posible pinaagi sa atong pagsalig diha sa “maayo nga buhat, ug kalooy, ug grasya sa Balaan nga Mesiyas” ( 2 Nephi 2:8). Kon kita mopili sa pagsunod sa Ginoo, kita mipili nga mag-usab—espirituhanong magpakatawo pag-usab.
(David A. Bednar, “Kinahanglang Matawo Kamo Pag-usab,” Liahona, Mayo 2007, 19–20)
Sa unsang paagi nga matawo ako pag-usab?
Si Elder David A. Bednar sa Korum sa Napulog Duha ka Apostoles naghatag og pamahayag nga adunay ulohan nga “Kanunay nga Magbaton og Kapasayloan sa Inyong mga Sala” (Liahona, Mayo 2016, 59–62) nga naglangkob og mga ideya bahin niini nga pangutana.
Nganong lisod man ang pag-ila kon natawo ba ako pag-usab?
Si Elder D. Todd Christofferson sa Korum sa Napulog Duha ka Apostoles mitudlo:
Imahe
Portrait of Elder D. Todd Christofferson. Photographed in March 2020.
Mangutana kamo, Ngano nga kining dako nga kausaban dili dayon mahitabo kanako? … Alang sa kadaghanan kanato, ang mga kausaban mas hinayhinay ug mahitabo sa kadugayan. Ang pagkatawo pag-usab … mas labaw pa sa usa ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagka-mortal.
Sa samang higayon kinahanglan nga dili kita mangatarongan sa atong mga kaugalingon sa dili tininuod nga paningkamot. Kinahanglang dili kita makontento nga ipabilin ang pipila ka kinaiya sa pagbuhat og daotan. Kinahanglang takos kitang moambit sa sakramento matag semana ug magpadayon sa pagtawag sa Balaan nga Espiritu sa pagwagtang sa kataposang mga timailhan sa pagkadili putli nga ania kanato. Ako mopamatuod nga samtang kamo mopadayon diha sa dalan sa espirituhanon nga pagkatawo pag-usab, ang maulaon nga grasya ni Jesukristo mokuha sa inyong mga sala ug sa lama niadto nga mga sala ninyo, ang mga pagtintal mawad-an sa ilang pagkamadanihon, ug pinaagi ni Kristo kamo mahimong balaan, sama nga Siya ug ang atong Amahan mga balaan.
(D. Todd Christofferson, “Natawo Pag-usab,” Liahona, Mayo 2008, 78)
Unsa ang kalainan taliwala sa “makakita” ug “makasulod” sa gingharian sa Dios?
Si Propeta Joseph Smith (1805–44) mitudlo mahitungod sa mga pulong sa Manluluwas diha sa [ Juan 3:3, 5 ], diin gihisgotan ang “makakita” ug “makasulod” sa gingharian sa Dios: “Usa ka butang ang makakita sa gingharian sa Dios, ug lain nga butang ang pagsulod niini. Kinahanglan gayod nga aduna kitay kausaban sa kasingkasing aron makakita sa gingharian sa Dios, ug modawat ug motuman sa mga pakigsaad aron makasulod niini” (sa Journal, Disyembre 1842–Hunyo 1844; Book 3, 15 Hulyo 1843–29 Pebrero 1844, 130, josephsmithpapers.org). Kon ang usa ka tawo “makakita” sa gingharian sa Dios, ang Espiritu Santo mao ang migiya sa tawo nga makabaton og dakong “kausaban sa kasingkasing” (tan-awa sa Alma 5:14). Dayon ang tawo kinahanglang moapil sa mga ordinansa sa ebanghelyo aron “makasulod” sa gingharian sa Dios.
(“Juan 2–4,” sa Manwal sa Estudyante sa Bag-ong Tugon [2018], ChurchofJesusChrist.org)
Dugang nga Kalihokan sa Pagkat-on
Ang dalan sa pakigsaad
Gitudlo ni propeta Nephi nga ang paghinulsol, pagpabunyag, ug pagdawat sa gasa sa Espiritu Santo mao ang “ganghaan pinaagi diin [kita] kinahanglan nga mosulod” ( 2 Nephi 31:17). Ang dalan nga gipasabot ni Nephi sa mosunod nga mga bersikulo mao ang kanunayng gipasabot sa mga lider sa Simbahan nga mao “ang dalan sa pakigsaad.”Basaha ang 2 Nephi 31:19–20 , ug hisgoti kon sa unsang paagi nga ang paglakaw sa dalan sa pakigsaad makatabang kanato nga makagamit sa gahom sa Manluluwas aron matabangan kitang magbag-o.
