Mateo 4; Lucas 4–5

Kinatibuk-ang Pagpasabot

Pagkahuman nga mabunyagan ang Manluluwas, miadto Siya sa kamingawan aron makig-uban sa Dios (tan-awa sa Hubad ni Joseph Smith, Mateo 4:1 [diha sa Apendiks sa Hubad ni Joseph Smith]). Gitintal Siya ni Satanas, pero gibuntog Niya ang mga pagtintal. Sa dihang si Simon Pedro, Andres, Santiago, ug Juan milagrosong nakakuha og “daghan kaayong isda” pagkahuman sa pagdapit kanila sa Manluluwas nga “itaktak ang [ilang] mga pukot” (Lucas 5:4, 6), nakadawat sila og daklit nga panglantaw sa unsay ilang mabuhat uban sa tabang sa Manluluwas. Unya gipili niini nga mga mangingisda nga biyaan ang tanan aron mosunod kang Jesukristo. Si Nicodemo, usa ka Pariseo ug usa ka “magmamando sa mga Judeo” (Juan 3:1), miduol sa Manluluwas usa ka gabii niana aron mangutana mahitungod sa kaluwasan.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya sa kon unsa ang lagmit nga kinahanglang andamon nang daan para sa kada leksiyon.

Mateo 4:1–11, Bahin 1

Katuyoan sa leksiyon: Kini nga leksiyon makatabang sa mga estudyante sa pagtuki sa mga baroganan aron matabangan sila sa pagsunod sa ehemplo sa Manluluwas sa pagbuntog sa mga pagtintal ni Satanas.

Pag-andam sa estudyante: Dapita ang mga estudyante nga maghunahuna mahitungod sa mga pagtintal nga ilang giatubang ug sa unsang paagi makatabang kanila ang Manluluwas sa pagbuntog niini.

Sugyot sa pagtudlo pinaagi sa videoconference: Buhata pag-usab sa usa word-processing document ang tsart diha sa kataposan sa leksiyon, ipaambit ang imong screen aron makita kini sa imong mga estudyante, ug tubagi ninyo kini.

Mateo 4:1–11, Bahin 2

Katuyoan sa leksiyon: Kini nga leksiyon makatabang sa mga estudyante sa pagsunod sa ehemplo ni Jesukristo ug paghinumdom sa mga kamatuoran gikan sa mga kasulatan aron matabangan sila sa pagbuntog sa tentasyon sa ilang mga kinabuhi.

Pag-andam sa estudyante: Dapita ang mga estudyante sa pag-anha sa klase nga andam sa pagpaambit og usa hangtod sa duha ka tudling sa kasulatan nga gibati nila nga magamit aron matabangan sila sa pagbuntog sa pagtintal. Kon wala silay makita nga bisan unsa, awhaga sila nga mangutana sa mga ginikanan, uban pang mga sakop sa pamilya, o mga lider sa Simbahan.
App sa Doktrinal nga Kahanas: Dapita ang mga estudyante kinsa maka-access niini nga mobile app nga gamiton kini sa leksiyon.

Sugyot sa pagtudlo pinaagi sa videoconference: Gamita ang feature sa tsart aron tugotan ang mga estudyante nga magpaambit og mga kasulatan nga gibati nila nga makatabang kanila sa pagbuntog sa pagtintal. Ikonsiderar ang pag-save sa chat ug pagpadala unya sa kompletong listahan sa mga kasulatan ngadto sa mga estudyante.

Lucas 5:1–11

Katuyoan sa leksiyon: Kini nga leksiyon makatabang sa mga estudyante nga makabaton og kagustohan nga sundon si Jesukristo aron matabangan Niya sila nga mabuhat ang mas daghang mga butang kay sa ilang mabuhat nga wala Siya.

Pag-andam sa estudyante: Dapita ang mga estudyante nga mag-ampo aron mahibaloan ang katuyoan sa Dios para sa ilang kinabuhi. Ang mga estudyante nga adunay patriyarkal nga panalangin mahimong mobasa niini nga mangita kon unsa ang gipadayag sa Dios mahitungod sa mga katuyoan sa ilang kinabuhi. Lagmit nga makabenepisyo ang ubang tawo gikan sa pakig-istorya sa ilang mga ginikanan o pagpangita og mga pagtulon-an diha sa mga kasulatan.

Mga hulagway: Pag-andam nga magpakita og mga hulagway sa mga indibidwal nga nakabuhat og maayong mga butang sa kinabuhi tungod kay gitabangan sila sa Dios nga masabtan ang ilang katuyoan (pananglitan, si Rebecca, Maria, o Joseph Smith).

Sugyot sa pagtudlo pinaagi sa videoconference: Ikonsiderar ang pagpakita og hulagway sa Manluluwas nga nagtawag kang Pedro isip usa ka disipulo samtang hisgotan ang Lucas 5:1–11.

Juan 3:1–8

Katuyoan sa leksiyon: Kini nga leksiyon makatabang sa mga estudyante sa pagsabot ug pagbati sa importansya sa pagkatawo pag-usab “sa tubig ug sa Espiritu” ( Juan 3:5) aron makasulod sa gingharian sa Dios.

Pag-andam sa estudyante: Dapita ang mga estudyante sa pag-anha sa klase nga andam sa paghisgot sa mga kabag-ohan nga gibuhat nila o sa ubang tawo nga ilang nailhan aron mahimong mas susama kang Jesukristo.

Tan-awa ang video: “Gihigugma Ko ang Sabaan nga mga Batan-ong Lalaki” (10:48), diin si Elder Yoon Hwan Choi sa Seventy nagsaysay mahitungod sa usa ka grupo sa mga batan-ong lalaki kansang kinabuhi nausab samtang nakabig sila ngadto sa Ginoo. Tan-awa ang video gikan sa time code nga 0:00 hangtod sa 4:34. (Kini nga video anaa sa ChurchofJesusChrist.org.)

Sugyot sa pagtudlo pinaagi sa videoconference: Ikonsiderar ang pagdapit sa mga estudyante nga magdala og miyembro sa pamilya o higala nga gibag-o sa Manluluwas pinaagi sa pagdawat sa bunyag ug pagpakumpirma. Kon dili makauban ang tawo nga ilang gipili, mahimong magpakita ang mga estudyante og hulagway nila ug isulti ang ilang sugilanon.

Doktrinal nga Kahanas: Juan 3:5

Katuyoan sa leksiyon: Kini nga leksiyon makahatag sa mga estudyante og oportunidad aron mapraktis ang paggamit sa mga baroganan sa pag-angkon og espirituhanong kahibalo gamit ang doktrina nga kinahanglan kitang matawo pag-usab sa tubig ug sa Espiritu aron makasulod sa gingharian sa Dios.

Pag-andam sa estudyante: Dapita ang mga estudyante sa pag-anha sa klase nga andam sa pagpaambit kon unsa ang ilang itudlo sa klase sa Primary mahitungod sa Juan 3:5 .

Mga materyal: Mga materyal sa pagsulat para sa kalihokan sa pagmemorya (kon posible) o elektronikong device nga adunay app sa Doktrinal nga Kahanas