Tinguhaon ang Dugang nga Panabot pinaagi sa Balaanong Gitakda nga mga Tinubdan
Imahe
Young man with brace on wrist, doing family history work on a laptop computer. (horiz)
Ang usa sa mga katuyoan sa doktrinal nga kahanas mao ang pagtabang kanimo sa pagkat-on ug paggamit sa mga baroganan para sa pag-angkon og espirituhanong kahibalo. Makatabang kini nga leksiyon kanimo sa pagsabot sa importansya sa pagpangita sa kamatuoran pinaagi sa mga tinubdan nga mahigugmaong gihatag sa Langitnong Amahan ug ni Jesukristo.
Pag-andam sa estudyante: Dapita ang mga estudyante nga maghunahuna kon asa sila kasagarang modangop para sa impormasyon kon aduna silay mga pangutana mahitungod sa Dios o sa Simbahan. Dapita sila nga pamalandongan kini nga pamahayag ni Elder Neil L. Andersen sa Korum sa Napulog Duha ka Apostoles: “Ang espirituhanong mga pangutana nagkinahanglan og espirituhanong mga tubag gikan sa Dios” (“Joseph Smith,” Liahona, Nob. 2014, 28, 30).
Posible nga mga Kalihokan sa Pagkat-on
Asa ka mangita og mga tubag?
Kon wala sa klase ang mga kapanguhaan aron makita ang mosunod nga impormasyon, pangutan-a ang mga estudyante kon asa sila sagad lagmit nga modangop para sa impormasyon. Ang laing alternatibo mao ang pagpuli og mas may kalabotan o mas makapainteres nga mga bahin sa impormasyon nga pangitaon sa mga estudyante.
Ang kahimtang sa panahon para sa umaabot nga kataposan sa semana
Ang ngalan sa kapital nga lungsod sa Greenland
Usa ka recipe para sa pasta o rice dish
Ikonsiderar ang mosunod nga mga pangutana.
Unsa nga mga tinubdan ang imong gigamit (o kasagaran nimong gamiton) aron mapangita ang impormasyon?
Nganong misalig man ka niini nga mga tinubdan para sa impormasyon mahitungod niini nga mga matang sa mga pangutana?
Asa man kita makakita og mga tubag gikan sa Dios?
Asa nimo isugyot nga mangita ang mga tawo og mga tubag para sa importante nga mga pangutana mahitungod sa Dios, sa Simbahan, o sa plano sa kaluwasan?
Ikonsiderar ang pagsulat sa mga tubag sa mga estudyante sa pisara sa ubos sa “Balaanong Gitakda nga mga Tinubdan.” Ikonsiderar ang pagdugang diha niini nga listahan sa kinatibuk-an sa leksiyon samtang nagkat-on ang mga estudyante mahitungod sa dugang pang mga tinubdan sa kamatuoran gikan sa Dios.
Paghunahuna og bisan unsang mga pangutana nga aduna ka mahitungod sa Dios, sa Simbahan, o sa plano sa kaluwasan. Mahimong maglakip kini sa impormasyong nga imong nabasa o nadungog nga imong gihunahuna o nakahasol kanimo. Pangayoa ang giya sa Espiritu Santo sa pagkat-on sa mga baroganan niini nga leksiyon nga makatabang kanimo.
Basaha ang mga mosunod nga mga tudling, ug pangitaa kon sa unsang paagi nga ang mga tinubdan sa kamatuoran nga gitudlo niini nga mga tudling makapanalangin kanato.
Mahimong magbuhat ang mga estudyante nga magkapares, ug basahon sa kada estudyante ang duha sa mosunod nga mga tudling ug ipaambit kon unsa ang ilang nakat-onan kauban sa ilang pares.
Samtang gitubagan sa mga estudyante ang mosunod nga mga pangutana, ikonsiderar ang pagdugang sa listahan sa balaanong gitakda nga mga tinubdan sa pisara.
Unsa nga mga tinubdan sa kamatuoran ang imong nakita niini nga mga tudling? Nganong hingpit man kitang makasalig niini nga mga tinubdan?
Asa man lagmit nga mangita ang daghang mga tawo og impormasyon mahitungod sa mga espirituhanong pangutana nga kinahanglan nimo sila nga pasidan-an? Ngano man?
Unsa kaha kon dili ako sigurado kon unsa ka kasaligan ang tinubdan sa impormasyon?
Ikonsiderar ang pagpangutana sa mga estudyante kon unsa nga tambag ang ilang ihatag sa usa ka tawo nga migamit sa internet aron mangita og mga tubag sa importante nga espirituhanong mga pangutana. Base sa ilang mga tubag, tukia kon ang pipila o ang tanang impormasyon sa mosunod nga parapo [paragraph] mapuslanon bang ipaambit.
Ang usa sa pinakakasagarang paagi sa pagpangita og impormasyon karon mao ang paggamit sa internet. Pinaagi sa internet, kita maka-access sa daghang maayong mga tinubdan sa impormasyon. Sa samang higayon, ang internet naglantad kanato sa daghang dili kasaligan ug dili tinuod nga mga tinubdan sa impormasyon. Si Elder Neil L. Andersen sa Korum sa Napulog Duha ka Apostoles nagpasidaan:
Imahe
Official portrait of Elder Neil L. Andersen of the Quorum of the Twelve Apostles, 2010, August.
Ang impormasyon sa internet walay salaan sa “kamatuoran”. Ang ubang impormasyon, bisan unsa pa ka makakumbinsir, dili gayud tinuod.
(Neil L. Andersen, “Joseph Smith,” Liahona, Nob. 2014, 29)
Basaha ang parapo [paragraph] 12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas. Ikonsiderar ang pagmarka kon nganong delikado nga mangita og mga tubag sa espirituhanong mga pangutana gikan sa wala mailhi o dili kasaligan nga mga tinubdan.
Kon makakita ka og bag-ong impormasyon mahitungod sa Dios, sa Simbahan, o sa plano sa kaluwasan, makatabang kon magsukna ka sa imong kaugalingon og mga pangutana sama sa mosunod mahitungod sa tinubdan sa impormasyon. Samtang nagbasa ka niini nga mga pangutana, pangitaa ang mga pangutana nga sa imong hunahuna makatabang kaayo kon magdesisyon nga mosalig ba sa usa ka tinubdan o dili. (Mahimo usab nimong tun-an ang kada usa sa mga kauban nga pakisayran sa kasulatan.)
Hatagi ang mga estudyante sa mosunod nga mga pangutana isip handout. Awhaga ang mga estudyante nga ibutang kini nga handout diin sayon nila kining ma-accsess para sa paggamit sa umaabot.
Pipila ka mga Pangutana para sa Pagsusi sa Bag-ong Impormasyon
Unsa ang akong gibati gikan sa Espiritu Santo sa dihang gibasa o nadungog nako kini nga impormasyon? (Tan-awa sa Doktrina ug mga Pakigsaad 50:23–24 .)
Mas gipaduol ba ako niini nga impormasyon ngadto ni Jesukristo ug sa Iyang Simbahan? (Tan-awa sa Moroni 7:15–17 .)
Gidasig ba ako niini nga impormasyon nga sundon ang mga sugo sa Dios?
Gikompirmar ba niini ang gibati na nako nga gisulti kanako sa Espiritu Santo nga tinuod, o gidasig ba ako niini nga magduhaduha sa mga kamatuoran sa ebanghelyo? (Tan-awa sa Moroni 10:5
Naggikan ba ang impormasyon sa tinubdan nga gikonsiderar nga kasaligan sa Manluluwas o sa mga lider sa Iyang Simbahan?
Unsa ang ikasulti sa akong mga ginikanan o mga lider sa Simbahan mahitungod niini nga impormasyon? (Kon matintal ako nga itago kini gikan kanila, unsa ang gisulti niana kanako mahitungod sa tinubdan niini?)
Hain niini nga mga pangutana ang makatabang gayod kanimo? Ngano man?
Unsang uban pang mga pangutana nga sa imong hunahuna angay nga isukna sa usa ka tawo mahitungod sa impormasyon nga ilang nakita?
Para sa mosunod nga kalihokan sa pagpraktis, mahimong magbuhat ang mga estudyante sa tagsa-tagsa o diha sa gagmay nga mga grupo. Pagkahuman sa igong panahon, dapita ang pipila ka mga estudyante nga dili lamang ipaambit kon unsa ang ilang nakaplagan pero ipakita sa klase sa sunod-sunod nga paagi kon giunsa nila pagkaplag ang kasaligan nga impormasyon.
Pagpili og bahin sa impormasyon nga imong nadungog o usa ka pangutana nga aduna ka mahitungod sa Dios, sa Simbahan, o sa plano sa kaluwasan. Unya pagtagana og pipila ka minuto aron magpraktis sa pagpangita og mga tubag gamit ang balaanong gitakda nga mga tinubdan. Sa uban pang mga butang, mahimo nimong ikonsiderar ang
pag-ampo;
pagpangita sa mga kasulatan gamit ang Giya ngadto sa mga Kasulatan, o mga tudling sa doktrinal nga kahanas;
pagpangita sa mga pakigpulong sa kinatibuk-ang komperensiya, o sa Gospel Library nga app;
pagkontak sa usa ka tawo nga imong nailhan ug gisaligan, sama sa ginikanan, bishop, lider sa kabatan-onan sa imong ward o branch, o magtutudlo sa seminary, aron tabangan ka sa pagpangita og mga tubag.
Ang mga estudyante lagmit nga aduna lamang igong panahon sa klase aron sugdan ang ilang pagtuon. Kon mao, awhaga sila nga ipadayon ang ilang pagtuon sa gawas sa klase.
Unsay imong nakat-onan niini nga leksiyon nga makatabang kanimo kon aduna kay makitang bag-ong impormasyon mahitungod sa Dios o sa Simbahan?
Sa imong hunahuna ngano nga ang mga tinubdan nga imong dangpan para sa mga tubag ug impormasyon importante man sa Langitnong Amahan ug ni Jesukristo?
Ikonsiderar ang paghatag og pagpamatuod bahin sa gugma nga gipakita sa Langitnong Amahan ug ni Jesukristo pinaagi sa paghatag kanato og balaanong mga gigikanan sa kamatuoran.
Komentaryo ug Background nga Impormasyon
Unsay angay nakong buhaton kon dili nako makit-an ang tubag sa pangutana pinaagi sa balaanong gitakda nga mga tinubdan?
Si Elder Neil L. Andersen sa Korum sa Napulog Duha ka Apostoles mitudlo:
Imahe
Official portrait of Elder Neil L. Andersen of the Quorum of the Twelve Apostles, 2010, August.
Dili tanang tubag moabot diha-diha dayon, apan kasagaran sa mga pangutana masulbad pinaagi sa sinsero nga pagtuon ug pagtinguha sa tubag gikan sa Dios. …
Ang pagtuo dili gayud mangayo og tubag sa matag pangutana pero magtinguha sa kasiguroan ug kaisog sa pagpadayon, usahay sa pag-ila nga, “Wala ko masayod sa tanan, pero nasayod ko og igo aron magpadayon diha sa dalan sa pagkadisipulo.”
Ang pagtugot sa kaugalingon diha sa kanunayng pagduha-duha, nga maoy giawhag gikan sa mga walay pagtuo ug sa mga dili matinud-anon, makapahuyang sa pagtuo diha ni Jesukristo ug sa Pagpahiuli.
Nganong mag-amping man ako sa pagpangita og mga tubag mahitungod sa Simbahan gikan niadtong mibiya niini?
Si Elder Neal A. Maxwell (1926–2004) sa Korum sa Napulog Duha ka Apostoles miingon:
Imahe
Last official portrait of Elder Neal A. Maxwell, 1992.
Ang uban moinsister sa pagtuon mahitungod sa Simbahan pinaagi lamang sa mga tawo nga mibiya niini—sama sa pag-interbiyo ni Judas aron makasabot ni Jesus. Ang mga mibiya sa Simbahan kanunay nga mosulti kanato mahitungod sa ilang kaugalingon kaysa sa ilang gibiyaang organisasyon.
(Neal A. Maxwell, “All Hell Is Moved” [debosyonal sa Brigham Young University, Nob. 8, 1977], 3; speeches.byu.edu)
Dugang nga Kalihokan sa Pagkat-on
Leksiyon nga mogamit og butang
Ikonsiderar ang pagpakita sa pulong nga “Kamatuoran gikan sa Dios” sa pikas nga bahin sa kuwarto ug “Mga Bakak gikan ni Satanas” sa laing pikas nga bahin sa kuwarto.
Dapita ang mga estudyante nga hunahunaon nga ang kada tinubdan sa impormasyon sa kalibotan (lakip na ang balaanong gitakda nga mga tinubdan ug ang uban pang mga tinubdan sama sa mga libro, post sa social media, opinyon, panukiduki, artikulo sa balita, ug uban pa) girepresenta sa lat-ang taliwala niining duha ka hugpong sa mga pulong. Ipasabot nga kon ang usa ka partikular nga tinubdan sa impormasyon maghatag og mas daghang kamatuoran gikan sa Dios kay sa laing tinubdan, ibutang kini nga mas duol sa hugpong sa mga pulong nga “Kamatuoran gikan sa Dios” kay sa laing tinubdan. Isukna sa mga estudyante ang mosunod nga mga pangutana:
Unsang mga tinubdan sa kamatuoran ang ibutang nga pinakaduol sa hugpong sa mga pulong nga “Kamatuoran gikan sa Dios”?
Unsang mga tinubdan ang mas lisod ibutang sa tapad sa usa ka hugpong sa mga pulong o sa lain tungod kay parehong anaa niini ang kamatuoran ug sayop?