Mateo 3:13–17, Bahin 1

Gibunyagan si Jesukristo ni Juan nga Magbubunyag

Si Jesukristo miadto ni Juan nga Magbubunyag aron magpabunyag kaniya. Kini nga leksiyon makatabang kanimo nga masabtan ug mapasabot ang importansya sa bunyag sa ebanghelyo ni Jesukristo.

Paggamit sa Basahon ni Mormon sa paghatag og katin-awan sa kamatuoran. Tabangi ang mga estudyante nga makadawat og mas dakong panabot sa importante nga doktrina nga gitudlo sa Biblia pinaagi sa pagbasa sa Basahon ni Mormon aron sa pagkompirmar ug paghatag og katin-awan sa kamatuoran.

Pag-andam sa estudyante: Awhaga ang mga estudyante nga mag-andam para sa klase pinaagi sa paghunahuna mahitungod sa kon unsaon nila pagpasabot ang importansya sa bunyag sa usa ka tawo nga gimahal nila nga dili miyembro sa Ang Simbahan ni Jesukristo sa mga Santos sa Ulahing mga Adlaw.

Posible nga mga Kalihokan sa Pagkat-on

Ang importansya sa bunyag

Hunahunaa ang mga tawo nga gimahal nimo nga dili mga miyembro sa Ang Simbahan ni Jesukristo sa mga Santos sa Ulahing mga Adlaw. Hunahunaa nga ang usa kanila makigkita sa mga misyonaryo. Unsay imong bation? Hunahunaa nga gihangyo ka sa mga misyonaryo nga ipasabot ang importansya sa pagpabunyag. Hunahunaa kon unsa ang lagmit nimong isulti nga makatabang sa imong minahal sa kinabuhi nga buhaton kining importanteng lakang.

• Sa sukdanan nga 1 hangtod sa 10 (1 = dili andam; 10 = hilabihan kaandam), sa imong pamati unsa ka kaandam sa pagpasabot sa importansya sa bunyag sa paagi nga makatabang sa usa ka tawo nga imong gimahal nga gustong magpabunyag?

Ikonsiderar ang pag-awhag sa mga estudyante nga tubagan kini nga pangutana pinaagi sa pagpataas sa tukma nga gidaghanon sa mga tudlo sa ilang mga kamot.

• Unsa kaha ang gusto pa nimo nga mahibaloan mahitungod sa bunyag aron bation nga mas andam nga mopasabot sa importansya niini?

Hinumdomi ang mga aspeto sa bunyag nga gusto pa nga mahibaloan sa mga estudyante. Samtang nagtudlo, paningkamoti ang paghatag og gibug-aton sa bisan unsang materyal sa leksiyon nga makatabang sa pagtubag sa ilang mga pangutana.

Sa leksiyon karong adlawa, makabaton ka og oportunidad nga tun-an ang doktrina sa bunyag ug tubagan ang lainlaing mga pangutana sa hilisgotan. Makabaton usab ka og higayon nga praktison ang pagpasabot sa unsay imong nakat-onan.

Gibunyagan si Jesukristo aron ipakita kanato ang dalan

Ikonsiderar ang pagpakita sa mapa 11, “ Ang Balaan nga Yuta sa mga Panahon sa Bag-ong Tugon ,”sa seksiyon sa Mga Tabang sa Pagtuon sa Gospel Library nga app o sa ChurchofJesusChrist.org.

Mibiyahe si Jesus gikan sa Galilea padulong sa Bethabara, pinaagi sa paglakaw, aron magpabunyag ni Juan nga Magbubunyag (tan-awa sa Mateo 3:13 ; Juan 1:28 ; 1 Nephi 10:9). Si Juan ang naghupot sa mga yawe sa Aaronic nga Pagkapari ug namunyag og mga tawo sa Suba sa Jordan (tan-awa sa Giya nagto sa mga Kasulatan, “ Juan Bautista ,” scriptures.ChurchofJesusChrist.org). Gamit ang usa sa mga sukdanan sa mapa, bana-banaa ang distansya nga gilakaw sa Manluluwas.

• Unsa ang lagmit nga gitudlo kanimo sa paningkamot sa Manluluwas nga mabunyagan ni Juan mahitungod Kaniya ug sa bunyag?

Basaha ang Mateo 3:13–17 , ug hunahunaa nga anaa ka sa pagbunyag sa Manluluwas. Pangita og mga importante nga detalye mahitungod sa Manluluwas ug sa bunyag nga gusto nimong hinumdoman. Ang pulong nga “pasagdi” sa bersikulo 15 nagpasabot nga “hatagan og permiso o tugotan.”

• Kon anaa ka sa bunyag sa Manluluwas, unsa ang gusto nimong mahinumdoman gikan sa kasinatian?

• Sa imong hunahuna unsa kaha ang imong makat-onan mahitungod sa Manluluwas ug sa bunyag?

Ang pipila sa mga kamatuoran nga mahimong madiskobre sa mga estudyante mahimong nakasentro sa Dios nga Kapangulohan. Kon ang “Mateo 3:13–17, Bahin 2” mao ang sunod nga leksiyon nga itudlo, ikonsiderar ang pagpahibalo sa mga estudyante nga hisgotan ang Dios nga Kapangulohan nga mas detalyado sa sunod nga bahin.

Huna-hunaa ang mahitungod sa kon unsa ang mahimo nimong ipaambit sa imong higala o sakop sa pamilya mahitungod sa pagbunyag kang Jesukristo nga lagmit nga makatabang kaniya.

Mahimong mapuslanon usab kon ikonsiderar kon unsa nga mga pangutana ang lagmit nga aduna ang imong higala o sakop sa pamilya mahitungod sa bunyag. Ang pipila sa ilang mga pangutana mahimong matubag diha sa Mateo 3 . Dugang pa niini, ang Basahon ni Mormon usa ka dinasig nga kapanguhaan nga naghatag og katin-awan sa daghang mga kamatuoran mahitungod sa bunyag. Ang mosunod nga mga pangutana mao ang mga ehemplo sa mga pangutana nga lagmit nga aduna ang usa ka tawo nga wala nakasabot sa importansya sa bunyag. Pagpili og usa ka pangutana nga gihuna-huna nimo nga lagmit nga aduna ang imong higala o sakop sa pamilya. Unya tun-i ang may kalabotan nga mga bersikulo sa Basahon ni Mormon ug tan-awa kon sa unsang paagi nga kini mahimong makatabang sa pagtubag niana nga pangutana.

Ikonsiderar ang pagsulat diha sa pisara sa mosunod nga mga pangutana ug mga pakisayran sa kasulatan.

• Bisan pa kon gibunyagan si Jesus, kinahanglan ba nakong magpabunyag? Ngano o nganong dili man? (Tan-awa sa 2 Nephi 9:21, 23–24 ; 2 Nephi 31:5, 10–11 .)

• Nganong gusto man nakong magpabunyag? Unsa nga mga panalangin ang akong madawat? (Tan-awa sa 2 Nephi 31:12–13, 17–18 .)

• Si Jesus miadto ni Juan nga Magbubunyag aron magpabunyag. Kinsa ang makabunyag nako? (Tan-awa sa 3 Nephi 11:19–22 .)

• Gibunyagan si Jesus sa Suba sa Jordan ug mihaw-as sa tubig. Kinahanglan ba kong iunlod sa tubig, o aduna bay laing paagi aron mabunyagan? (Tan-awa sa 2 Nephi 31:13 ; 3 Nephi 11:23–26 .)

• Kon bunyagan ako aron malimpyohan gikan sa sala, nganong gibunyagan man si Jesus? Di ba wala Siyay sala? (Tan-awa sa 2 Nephi 31:5–11 .)

Gamit ang imong nakat-onan gikan sa Mateo 3:13–17 ug sa Basahon ni Mormon, isulat kon unsaon nimo pagpasabot ang importansya sa bunyag ngadto sa imong sakop sa pamilya o higala.

Kon mahuman na sa mga estudyante ang ilang pagtuon, ipa-role play kanila kon unsaon nila pagpasabot ang importansya sa bunyag ngadto sa ilang mga higala o mga sakop sa pamilya.

Kon madasig ka, ikonsiderar ang pagpaambit sa imong pagpasabot uban sa usa ka higala o sakop sa pamilya nga wala pa mabunyagi isip usa ka miyembro sa Ang Simbahan ni Jesukristo sa mga Santos sa Ulahing mga Adlaw. Ang pagpaambit ngadto sa usa ka tawo nga nabunyagan na mahimong mapuslanon usab nga kalihokan.

Komentaryo ug Background nga Impormasyon

Mateo 3:13 . Nganong miadto man si Jesus kang Juan Bautista?

Gipasabot ni Joseph Smith ang awtoridad nga anaa kang Juan nga Magbubunyag sa dihang miingon siya nga:

Si Juan, niana nga panahon, mao lamang ang legal nga tigdumala sa mga kalihokan sa gingharian nga naa na diha sa kalibotan, ug naghupot sa mga yawe sa gahom. Ang mga Judeo kinahanglang mosunod sa iyang mga instruksyon o panghimarauton, sa ilang kaugalingong balaod. … Ang anak nga lalaki ni Zacarias nakigbisog sa mga yawe, sa gingharian, sa gahom, sa himaya gikan sa mga Judeo, pinaagi sa balaan nga pagdihog ug mando sa langit.

(Mga Pagtulun-an sa mga Presidente sa Simbahan: Joseph Smith [2007], 96; tan-awa usab sa Doktrina ug mga Pakigsaad 84:23–28)

Unsaon nato pagkahibalo nga importante ang bunyag?

Ang Manluluwas nagtudlo mahitungod sa importante nga kinaiyahan sa bunyag sa dihang Iyang giingnan si Nicodemus nga gikinahanglan kini aron makasulod sa gingharian sa Dios (tan-awa sa Juan 3:5). Ang Propeta nga si Joseph Smith nagtudlo usab nga ang bunyag mahinungdanon kaayo alang sa kaluwasan:

Hinulsoli ang tanan ninyong mga kasal-anan, ug magpabunyag sa tubig alang sa kapasayloan sa inyong mga sala, diha sa ngalan sa Amahan, ug sa Anak, ug sa Espiritu Santo, ug modawat sa ordinansa sa pagpandong sa mga kamot kaniya kinsa gi-orden ug gisilyohan ngadto niini nga gahom, nga unta kamo makadawat sa Balaang Espiritu sa Dios, ug kini sumala sa Balaang mga Kasulatan, ug sa Basahon ni Mormon, ug sa mao lamang nga paagi nga ang tawo makasulod sa celestial nga gingharian.

(Mga Pagtulun-an sa Mga Presidente sa Simbahan: Joseph Smith [2007], 182)

Sa unsang paagi nga ang Basahon ni Mormon makahatag og katin-awan sa doktrina sa bunyag nga gitudlo sa Biblia?

Si Elder Tad R. Callister sa Kapangulohan sa Seventy mitudlo:

Sa kanunay ang Basahon ni Mormon maoy magpamatuod, moklaro, mohiusa nga saksi sa mga doktrina nga gitudlo sa Biblia busa adunay “usa ka Ginoo, usa ka pagtuo, usa ka bunyag.” …

Dihay nagkadaiyang matang sa mga bunyag sa kalibotan karon bisan og ang Biblia nagsulti nato sa paagi sa pagbunyag sa Manluluwas, atong labing maayo nga Ehemplo: “[Siya] mihaw-as dayon gikan sa tubig” ( Mateo 3:16). Makahaw-as kaha Siya gikan sa tubig gawas kon Siya miunlod una ngadto sa tubig? Basin og duna pay panaglalis niini nga hilisgotan, ang Basahon ni Mormon makapawala niini sa direkta nga pamahayag sa doktrina mahitungod sa sakto nga paagi sa bunyag: “Ug unya kamo mopaunlod kanila diha sa tubig” ( 3 Nephi 11:26).

(Tad R. Callister, “Ang Basahon ni Mormon—Basahon gikan sa Dios,” Liahona, Nob. 2011, 75–76)

Dugang nga mga Kalihokan sa Pagkat-on

Mga alternatibong paagi sa pagsugod sa leksiyon

Opsiyon 1Ikonsiderar ang paghimo og maze nga kompletohon sa mga estudyante diha sa papel o sa pisara nga adunay usa lamang ka posibleng solusyon. Mahimong awhagon ang mga estudyante nga maghunahuna mahitungod sa kon unsa nga mga espirituhanong leksiyon ang makat-onan gikan niini nga kalihokan. Unsa ang importansya sa pagbaton og usa lamang ka dalan sa pagkompleto sa maze? Ikonsiderar ang paggamit sa impormasyon sa mosunod nga parapo [paragraph] aron ipaila ang hilisgotan sa bunyag isip importante nga bahin sa dalan sa pagbalik ngadto sa atong langitnong panimalay.Bisan pa kon lahi kaayo ang mga sitwasyon sa atong kinabuhi, adunay usa lamang ka dalan aron makabalik ngadto sa atong Langitnong Amahan, ug kana nga dalan nahimong posible pinaagi sa atong Manluluwas nga si Jesukristo (tan-awa sa Juan 14:6 ; Mosiah 3:9, 17). Pinaagi sa Iyang ehemplo ug mga panudlo, gipakita ni Jesukristo nga ang importanteng bahin sa atong panaw mao ang ordinansa sa bunyag (tan-awa sa Juan 3:5 ; Doktrina ug mga Pakigsaad 76:50–55).

Opsiyon 2Isulat diha sa pisara ang pulong nga Bunyag. Awhaga ang mga estudyante nga magsulat og mga pangutana mahitungod sa bunyag nga nagsugod sa mga pulong nga Kinsa, Unsa, Kanus-a, Asa, Ngano, ug Unsaon. Dapita ang mga estudyante sa pagpangita sa mga tubag niini nga mga pangutana samtang nagtuon sa bunyag ni Jesukristo.

Paggamit sa mga pulong sa Manluluwas sa Basahon ni Mormon sa pagtudlo mahitungod sa bunyag

Ikonsiderar ang pagdapit sa mga estudyante nga gamiton ang mga pulong sa Manluluwas aron ipasabot ang ordinansa sa bunyag. Mahimong hangyoon ang mga estudyante nga tan-awon sa Basahon ni Mormon kon unsa ang gitudlo ni Jesukristo mahitungod sa bunyag. Mahimong gamiton ang mosunod nga mga kasulatan: 3 Nephi 11:21–28 ; 3 Nephi 27:20 .

Paggamit sa doktrina ug mga hiyas ni Jesukristo aron masabtan ang bunyag

Ikonsiderar ang pagpakita sa mosunod nga mga sitwasyon ug pagtugot sa mga estudyante nga magpili og usa ka indibidwal nga matabangan nila sa pagsulbad sa mga kabalaka mahitungod sa bunyag.

Gustong magpabunyag ni Noelle, pero wala sa iyang pamilya ang naghupot og Aaronic o Melchizedek nga Pagkapari.

Gustong magpabunyag ni Makai pero nahadlok siya nga iunlod sa tubig. Andam siyang magpaunlod sa tubig gawas lang sa iyang ulo.

Gidapit sa mga misyonaryo si Mason nga magpabunyag. Wala siya makasabot kon nganong importante ang bunyag.

Gustong mahibaloan ni Nicole kon nganong bunyagan ang mga tawo. Unsa ang mabuhat nga kaayohan niini?

Ang mga estudyante mahimong magtrabaho nga mag-inusara o sa gagmay nga mga grupo aron tun-an ang Mateo 3:13–17 ; 2 Nephi 31:5–12, 17–18 ; ug 3 Nephi 11:19–22 , nga mangita sa mga kamatuoran nga mahimong makatabang sa mga indibidwal sa mga sitwasyon.

Hatagi ang mga estudyante og oportunidad aron ipaambit ang ilang mga tubag sa mga sitwasyon.