Ang Balaan nga Yuta sa mga Panahon sa Bag-ong Tugon

Tiro ug Sidon Si Jesus mitandi sa Corazin ug Betsaida ngadto sa Tiro ug Sidon (Mat. 11:20–22). Siya miayo sa anak nga babaye sa usa ka hentil nga babaye (Mat. 15:21–28).

Bungtod sa Transpigurasyon Nausab ang panagway ni Jesus sa atubangan nila ni Pedro, Santiago, ug Juan, ug sila nakadawat sa mga yawe sa gingharian (Mat. 17:1–13). (Pipila nagtuo nga ang Bungtod sa Transpigurasyon mao ang Bungtod sa Hermon; ang uban nagtuo niini nga mao ang Bungtod sa Tabor.)

Cesarea Filipo Si Pedro mipamatuod nga si Jesus mao ang Kristo ug gisaaran sa mga yawe sa gingharian (Mat. 16:13–20). Si Jesus nanagna sa iyang kaugalingon nga kamatayon ug Pagkabanhaw (Mat. 16:21–28).

Rehiyon sa Galilea Si Jesus migahin sa kasagaran sa iyang kinabuhi ug pangalagad sa Galilea (Mat. 4:23–25). Dinhi siya mihatag sa Wali sa Bukid (Mat. 5–7); miayo sa usa ka sanglahon (Mat. 8:1–4); ug mipili, miorden, ug mipadala sa Napulog Duha ka mga Apostoles, kinsa si Judas Iscariote lamang sa pagkatinuod ang dili taga-Galilea (Mar. 3:13–19). Sa Galilea ang nabanhaw nga Kristo mipakita ngadto sa mga Apostoles (Mat. 28:16–20).

Dagat sa Galilea, sa kaulahian gitawag og Dagat sa Tiberias Si Jesus mitudlo diha sa sakayan ni Pedro (Luc. 5:1–3) ug mitawag nila ni Pedro, Andres, Santiago, ug Juan nga mahimong mga mangingisda og mga tawo (Mat. 4:18–22; Luc. 5:1–11). Siya usab mipahunong sa unos (Luc. 8:22–25), mitudlo sa mga sambingay diha sa sakayan (Mat. 13), milakaw diha sa dagat (Mat. 14:22–32), ug mipakita ngadto sa iyang mga tinun-an human sa iyang Pagkabanhaw (Juan 21).

Betsaida Sila si Pedro, Andres, ug Felipo natawo dinhi sa Betsaida (Juan 1:44). Si Jesus milakaw sa tago uban sa mga Apostoles duol sa Betsaida. Ang mga panon sa katawhan misunod kaniya, ug siya mipakaon sa 5,000 (Luc. 9:10–17; Juan 6:1–14). Dinhi si Jesus miayo sa usa ka tawo nga buta (Mar. 8:22–26).

Capernaum Kini ang kanhiay nga pinuy-anan ni Pedro (Mat. 8:5, 14). Sa Capernaum, diin gitawag ni Mateo nga kang Jesus nga “kaugalingong dakbayan,” si Jesus miayo sa usa ka paralitiko (Mat. 9:1–7; Mar. 2:1–12), miayo sa sulugoon sa senturyon, miayo sa inahan sa asawa ni Pedro (Mat. 8:5–15), mitawag ni Mateo nga mahimong usa sa iyang mga Apostoles (Mat. 9:9), mipabuka sa buta nga mga mata, mipapahawa sa yawa (Mat. 9:27–33), miayo sa mikuyos nga kamot sa adlaw nga Igpapahulay (Mat. 12:9–13), mihatag og pan-sa-kinabuhi nga pakigpulong (Juan 6:22–65), ug miuyon sa pagbayad sa mga buhis, misulti kang Pedro sa pagkuha og salapi gikan sa baba sa isda (Mat. 17:24–27).

Magdala Kini mao ang pinuy-anan ni Maria Magdalena (Mar. 16:9). Si Jesus mianhi dinhi human mopakaon sa 4,000 (Mat. 15:32–39), ug ang mga Pariseo ug mga Saducio mihangyo nga siya mopakita kanila og usa ka timaan gikan sa langit (Mat. 16:1–4).

Cana Si Jesus mihimo sa tubig ngadto sa bino (Juan 2:1–11) ug miayo sa anak nga lalaki sa usa ka halangdon nga tawo kinsa didto sa Capernaum (Juan 4:46–54). Ang Cana mao usab ang pinuy-anan ni Natanael (Juan 21:2).

Nazaret Ang mga pagpahibalo sa anghel ngadto nila ni Maria ug Jose nahitabo sa Nazaret (Mat. 1:18–25; Luc. 1:26–38; 2:4–5). Human sa pagpauli gikan sa Ehipto, si Jesus migugol sa iyang pagkabata ug pagkabatan-on dinhi (Mat. 2:19–23; Luc. 2:51–52), mipahibalo nga siya mao ang Mesiyas, ug gisalikway sa iyang kaugalingong mga katawhan (Luc. 4:14–32).

Jerico Si Jesus miayo sa panan-aw sa usa ka buta nga tawo (Luc. 18:35–43). Siya usab nakigsalo sa pangaon ni Zaqueo, “hepe sa mga maniningil sa buhis” (Luc. 19:1–10).

Bethabara Si Juan Bautista mipamatuod nga siya mao “ang tingog sa magasinggit diha sa mga awaaw” (Juan 1:19–28). Si Juan mibunyag ni Jesus sa Suba sa Jordan ug mipamatuod nga si Jesus mao ang Kordero sa Dios (Juan 1:28–34).

Kamingawan sa Judea Si Juan Bautista misangyaw dinhi niining kamingawan (Mat. 3:1–4), diin si Jesus mipuasa og 40 ka mga adlaw ug gitintal (Mat. 4:1–11).

Emmaus Ang nabanhaw nga Kristo milakaw sa dalan paingon sa Emmaus uban sa duha sa iyang mga tinun-an (Luc. 24:13–32).

Betfage Duha ka mga tinun-an midala kang Jesus og nati nga asno diin siya misugod sa iyang madaugon nga pagsulod sa Jerusalem (Mat. 21:1–11).

Betania Kini mao ang pinuy-anan nila ni Maria, Marta, ug Lazaro (Juan 11:1). Si Maria mipatalinghug sa mga pulong ni Jesus, ug si Jesus misulti ngadto ni Marta sa pagpili sa “maayo nga bahin” (Luc. 10:38–42); si Jesus mipabangon ni Lazaro gikan sa mga patay (Juan 11:1–44); ug si Maria midihog sa mga tiil ni Jesus (Mat. 26:6–13; Juan 12:1–8).

Bethlehem Si Jesus natawo ug gipahigda diha sa pasungan (Luc. 2:1–7); mga anghel mipahibalo ngadto sa mga magbalantay sa karnero sa pagkatawo ni Jesus (Luc. 2:8–20); maalamon nga mga tawo gigiyahan pinaagi sa usa ka bitoon ngadto ni Jesus (Mat. 2:1–12); ug si Herodes mipapatay sa mga bata (Mat. 2:16–18).