23. Dagat sa Galilea ug ang Bungtod sa mga Kabulahanan

Magtan-aw ngadto sa habagatang kasadpan ibabaw sa amihanang kasadpan nga kanto sa Dagat sa Galilea, usa ka lawa sa tab-ang nga tubig. Ang Tiberias nahimutang sa layong dapit sa baybayon ug ngadto sa layo nga wala sa hulagway. Ang bungtod diha sa taliwala sa atubangang talan-awon mao ang tradisyonal nga nahimutangan sa Bungtod sa mga Kabulahanan. Ang Capernaum anaa sa wala, gawas sa hulagway.

Mahinungdanon nga mga Hitabo: Ang Manluluwas migahin sa kadaghanan sa iyang mortal nga pangalagad niini nga rehiyon. Dinhi siya mitawag ug miorden sa Napulog Duha ka mga Apostoles (Mat. 4:18–22; 10:1–4; Mar. 1:16–20; 2:13–14; 3:7, 13–19; Luc. 5:1–11), mitudlo sa Wali sa Bukid (Mat. 5–7), ug mitudlo sa mga sambingay (Mat. 13:1–52; Mar. 4:1–34). Mga milagro nga iyang gipahigayon naglakip sa mosunod: siya miayo sa usa ka sanglahon (Mat. 8:1–4); mipakalma sa unos (Mat. 8:23–27); mipapahawa sa lehiyon sa mga yawa diha sa usa ka batan-on nga lalaki, kinsa misulod dayon ngadto sa mga baboy nga midagan ngadto sa dagat (Mar. 5:1–15); mipabangon sa anak nga babaye ni Jairo gikan sa mga patay (Mat. 9:18–19, 23–26; Mar. 5:22–24, 35–43); mipakaon sa 5,000 ug sa 4,000 (Mat. 14:14–21; 15:32–38); misugo sa iyang mga tinun-an sa pagtaktak sa ilang mga baling, diin sila nakakuha og daghang mga isda (Luc. 5:1–6); miayo sa daghang mga tawo (Mat. 15:29–31; Mar. 3:7–12); ug mipakita human sa iyang Pagkabanhaw aron pagtudlo sa iyang mga tinun-an (Mar. 14:27–28; 16:7; Juan 21:1–23).