Mateo 3; Marcos 1; Lucas 3

Kinatibuk-ang Pagpasabot

Sa wala pa gisugdan ni Jesukristo ang Iyang pangalagad sa publiko, gitinguha ni Juan nga Magbubunyag nga andamon ang ubang tawo sa pagdawat ug pagsunod sa Manluluwas. Gidapit sila ni Juan nga maghinulsol ug magpabunyag. Si Jesukristo gibunyagan ni Juan nga Magbubunyag, ug ang Amahan ug ang Espiritu Santo nagsaksi Kaniya. Ang materyal karong semanaha naglakip og leksiyon sa doktrinal nga kahanas bahin sa dugang nga pagtinguha og pagsabot pinaagi sa balaanong gitakda nga mga tinubdan.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya sa kon unsa ang lagmit nga kinahanglang andamon nang daan para sa kada leksiyon.

Mateo 3:1–12; Marcos 1:1–8

Katuyoan sa leksiyon: Motabang kini nga leksiyon sa mga estudyante sa pagkonsiderar kon sa unsang paagi nila gidawat ug gisunod ang Manluluwas, sa unsang paagi nila mapalig-on ang ilang pagpasalig nga dawaton ug sundon Siya, ug sa unsang paagi sila makatabang sa ubang tawo sa pag-andam sa pagdawat ug pagsunod Kaniya.

Pag-andam sa estudyante: Dapita ang mga estudyante nga pamalandongan kon unsa ang ilang buhaton ug isulti aron tabangan ang laing tawo sa pag-andam sa pagdawat ug pagsunod sa Manluluwas.

Mga materyal para sa mga estudyante: Mo-access sa bag-ohay nga mga pakigpulong sa kinatibuk-ang komperensiya

Sugyot sa pagtudlo pinaagi sa videoconference: Pagkahuman sa pagbuhat sa mga estudyante sa usa sa mga kalihokan nga adunay label nga A, B, o C, dapita sila nga ipakita kini pinaagi sa pag-isa sa mga tudlo sa kamot kon ilang gibuhat ang una, ikaduha, o ikatulo nga kalihokan. Dapita ang mga estudyante sa pagpaambit kon unsay ilang nakat-onan ug gibati.

Lucas 3:7–14

Katuyoan sa leksiyon: Kini nga leksiyon motabang sa mga estudyante nga mas masabtan ang paghinulsol ug ang kalipay nga mahatag sa kanunay nga paghinulsol.

Pag-andam sa estudyante: Dapita ang mga estudyante nga pamalandongan ang ilang mga kaugalingong kinaiya ug mga kasinatian sa paghinulsol. Mahimong magsukna ang mga estudyante sa ilang mga kaugalingon og mga pangutana sama sa mosunod: “Unsay imong mga pamati o mga emosyon kon maghunahuna ka mahitungod sa paghinulsol? Ngano man?” “Unsa ang mga kasinatian nga imong nasinati sa paghinulsol?” “Unsa ang imong mga pangutana mahitungod sa paghinulsol?”

Mga materyal para sa mga estudyante: Alang sa Kalig-on sa mga Kabatan-onan (booklet, 2011)
Sulod [content] nga ipakita: Ang mga pamahayag ni Presidente Russell M. Nelson

Sugyot sa pagtudlo pinaagi sa videoconference: Sa sinugdanan sa leksiyon, ikonsiderar ang paggamit sa chat feature o uban pang magamit nga teknolohiya aron tugotan ang mga estudyante nga ipaambit ang mga butang nga naghatag kanila og kalipay.

Mateo 3:13–17, Bahin 1

Katuyoan sa leksiyon: Kini nga leksiyon makatabang sa mga estudyante nga masabtan ug mapasabot ang importansya sa bunyag diha sa ebanghelyo ni Jesukristo.

Pag-andam sa estudyante: Dapita ang mga estudyante nga mag-andam para sa klase pinaagi sa paghunahuna mahitungod sa kon unsaon nila sa pagpasabot ang importansya sa bunyag sa usa ka tawo nga gimahal nila nga dili miyembro sa Simbahan ni Jesukristo sa mga Santos sa Ulahing mga Adlaw.

Sulod [content] nga ipakita: Mga Mapa sa Biblia, nu. 11, “ Ang Balaang Yuta sa mga Panahon sa Bag-ong Tugon ”; ang listahan sa mga pangutana ug mga pakisayran sa kasulatan mahitungod sa bunyag

Sugyot sa pagtudlo pinaagi sa videoconference: Ikonsiderar ang pagdapit sa mga estudyante nga ipaambit sa mga breakout room ang ilang mga pagpasabot sa importansya sa bunyag. Maghatag kini sa kada estudyante og higayon nga ipaambit ang ilang pagpasabot. Pagkahuman niini, dapita sila nga ipaambit kon kumusta kini ug unsa ang ilang gibati.

Mateo 3:13–17, Bahin 2

Katuyoan sa leksiyon: Makatabang kini nga leksiyon sa mga estudyante nga mapalambo ang ilang pagsabot sa kada sakop sa Dios nga Kapangulohan, nga makaapekto sa ilang mga desisyon sa kinabuhi.

Pag-andam sa estudyante: Dapita ang mga estudyante sa pag-anha sa klase nga andam sa pagpaambit sa ilang nahibaloan mahitungod sa Dios nga Kapangulohan, giunsa nila pagkahibalo niini, ug unsa nga mga pangutana ang lagmit nga aduna sila.

Pag-angkon og Espirituhanong Kahibalo, Bahin 3

Katuyoan sa leksiyon: Makatabang kini nga leksiyon sa mga estudyante sa pagsabot sa importansya sa pagpangita sa kamatuoran pinaagi sa mga tinubdan nga mahigugmaong gihatag para kanato sa Langitnong Amahan ug ni Jesukristo.

Pag-andam sa estudyante: Dapita ang mga estudyante nga maghunahuna kon asa sila kasagarang magkuha og impormasyon kon aduna silay mga pangutana mahitungod sa Dios o sa Simbahan. Awhaga sila nga pamalandongan kini nga pamahayag ni Elder Neil L. Andersen sa Korum sa Napulog Duha ka Apostoles: “Ang espirituhanong mga pangutana nagkinahanglan og espirituhanong mga tubag gikan sa Dios” (“Joseph Smith,” Liahona, Nob. 2014, 28, 30).

Handout: “Pipila ka mga Pangutana para sa Pagsusi sa Kalidad sa Bag-ong Impormasyon”