Lucas 3:7–14

Ang Kalipay sa Paghinulsol

Ang usa ka paagi nga nakatabang si Juan nga Magbubunyag sa mga tawo sa pag-andam sa ilang mga kaugalingon sa pagdawat kang Jesukristo mao ang pag-awhag kanila nga maghinulsol. Tinguha niini nga leksiyon nga tabangan kang mas makasabot sa paghinulsol ug sa kalipay nga mahatag sa makanunayon nga paghinulsol.

Pagpangandam sa estudyante: Dapita ang mga estudyante nga pamalandongan ang ilang kaugalingon nga mga kinaiya ug mga kasinatian sa paghinulsol pinaagi sa pagpamalandong sa mga pangutana sama niini: “Unsa nga mga pagbati o mga emosyon ang moabot kon maghunahuna ka sa paghinulsol? Ngano man?”“Unsa ang mga kasinatian nga imong nasinati sa paghinulsol?”“Unsang mga pangutana ang aduna ka mahitungod sa paghinulsol?”

Posible nga mga Kalihokan sa Pagkat-on

Lagmit nga sensitibong hilisgotan ang paghinulsol. Pag-amping sa pagtabang sa mga estudyante nga makakat-on nga dili magpaambit og mga detalye sa miaging mga sala. Sabta nga ang pipila ka mga estudyante mahimong mobati og sobrang mga pagbati nga dili takos ug pagbati nga adunay sala. Tabangi ang mga estudyante nga makasabot ug mobati sa gugma, kaluoy, ug tabang sa Manluluwas nga ihatag sa tagsa-tagsa kanila.

Unsay makahatag kanimo og kalipay?

Pamalandongi kon unsa ang makahatag kanimo og kalipay. Ikonsiderar ang paglista og daghang ehemplo kutob sa imong mahimo sulod sa 30 ka segundo.

Ikonsiderar ang pagtugot sa mga estudyante nga ipaambit ang pipila sa ilang mga tubag.

Gitudlo ni Presidente Russell M. Nelson ang mosunod mahitungod sa unsa nga paagi nga kita makadawat og kalipay sa atong mga kinabuhi:

Kon kita mopili nga maghinulsol, kita mopili nga mag-usab! Atong gitugotan ang Manluluwas nga mousab kanato ngadto sa labing maayo nga bersiyon sa atong mga kaugalingon. Kita mopili nga molambo sa espirituhanon nga paagi ug makadawat sa hingpit nga kalipay––ang hingpit nga kalipay sa katubsanan diha Kaniya.

(Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 67)

Ang paghinulsol mao ang pagbag-o pinaagi sa pagtalikod sa sala ug pagduol ngadto sa Dios pinaagi sa Pag-ula ni Jesukristo (tan-awa sa Giya ngadto sa mga Kasulatan, “ Hinulsol, Paghinulsol,” scriptures.ChurchofJesusChrist.org).

• Gibutang ba nimo ang paghinulsol sa imong listahan sa mga butang nga makahatag kanimo og kalipay? Ngano o nganong wala man?

Dapita ang mga estudyante nga magdugang pa sa ilang mga hunahuna sa paghinulsol pinaagi sa pagpaambit sa ilang mga tubag gikan sa gisugyot nga kalihokan sa pagpangandam sa estudyante. Ikonsiderar kon unsa nga mga pangutana ang labing maayo nga hisgotan isip usa ka klase, magpaambit og mga tubag nga dili magpaila, o gamiton isip pagpamalandong sa kaugalingon aron masulat sa mga estudyante sa pribadong paagi diha sa ilang mga journal sa pagtuon.

• Kon wala ka maghunahuna sa paghinulsol isip butang nga makahatag kanimo og kalipay, unsa nga mga pagbati o mga emosyon ang moabot kon maghunahuna ka og paghinulsol? Ngano man?

• Ngano kaha nga ang usa ka tawo dili kanunay mobati dayon og kalipay samtang naghinulsol?

Pamalandongi ang bisan unsang mga pangutana nga lagmit nga aduna ka mahitungod sa paghinulsol. Sa ulahing bahin sa leksiyon, makabaton ka og oportunidad nga mangita og mga tubag niini nga mga pangutana.

“Paghinulsol kamo. … Andama ninyo ang dalan alang sa Ginoo”

Aron makatabang sa mga tawo sa pagdawat kang Jesukristo, giawhag sila ni Juan nga Magbubunyag nga maghinulsol (tan-awa sa Mateo 3:1–3).

Sa miaging leksiyon, gitun-an nimo kon unsa ang gisulat ni Marcos ug Mateo mahitungod kang Juan nga Magbubunyag. Naglakip si Lucas og dugang pang mga detalye mahitungod kang Juan. Basaha ang Lucas 3:10–14, mangita kon giunsa pagtabang ni Juan ang mga tawo nga maghinulsol.

• Unsang mga kausaban ang giawhag ni Juan nga buhaton sa mga tawo?

• Sa unsang paagi kaha nakatabang kini nga mga kausaban sa mga tawo sa pagtalikod gikan sa sala ug pag-andam aron dawaton ug sundon si Jesukristo?

Tun-i ang mosunod nga pamahayag ni Presidente Russell M. Nelson. Samtang gibuhat nimo kini, paghatag og pagtagad kon unsa ang gitudlo sa Espiritu Santo mahitungod sa paghinulsol ug sa Manluluwas nga si Jesukristo.

Ikonsiderar ang pagpakita sa mosunod nga pamahayag o paghimo niini nga handout para sa mga estudyante.

Daghan ra kaayo ang nagkonsiderar sa paghinulsol isip silot––usa ka butang nga likayan gawas lang sa labing seryoso nga mga sirkumstansiya. Apan kining pagbati nga gisilotan hinimo-himo ni Satanas. Siya mosulay sa pagpugong kanato sa paghunahuna kang Jesukristo, kinsa nagbarog nga andam mogakos, malaumon ug andam nga moalim, mopasaylo, mohugas, mopalig-on, molimpyo, ug mobalaan kanato.

Ang pulong nga paghinulsol sa Griyego nga Bag-ong Tugon mao ang metanoeo. Ang prefix nga meta- nagpasabot og “kausaban.” Ang suffix nga -noeo adunay kalabotan sa Griyego nga mga pulong nga nagpasabot nga “hunahuna,” “kahibalo,” “espiritu,” ug “gininhawa.”

Sa ingon, kon si Jesus moingon kaninyo ug kanako sa “paghinulsol,” [ Lucas 13:3, 5 ], Siya nagdapit kanato sa pag-usab sa atong hunahuna, sa atong kahibalo, sa atong espiritu––bisan sa paagi sa atong pagginhawa. Siya nagsugo kanato sa pag-usab sa atong pamaagi sa paghigugma, paghunahuna, pagserbisyo, paggahin sa atong oras, pagtagad sa atong asawa, pagtudlo sa atong mga anak, ug gani sa pag-atiman sa atong mga lawas.

Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, adlaw-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo.

Makugihon man kamong misubay sa dalan sa pakigsaad, mitipas o mipalayo gikan sa dalan sa pakigsaad, o gani dili makakita sa dalan gikan sa inyong nahimutangan karon, ako mohangyo kaninyo sa paghinulsol. Sinatia ang makapalig-on nga gahom sa adlaw-adlaw nga paghinulsol––sa pagbuhat ug mahimong mas maayo sa matag adlaw.

(Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 67)

• Unsa ang labing mahinungdanon kanimo gikan sa mga pagtulon-an ni Presidente Nelson mahitungod sa paghinulsol ug kang Jesukristo?

Ikonsiderar ang pag-awhag sa mga estudyante nga hunahunaon nga nagtindog ang Manluluwas nga andam nga mogakos, malaomon nga motabang, mopasaylo, moayo, ug mopalig-on kanila. Dapita sila nga hunahunaon ang kalipay nga gusto Niyang masinati nila samtang naningkamot sila sa paghinulsol.

• Kanus-a nimo nasaksihan ang mga panalangin sa paghinulsol sa imong kaugalingon o sa ubang tawo?

• Ngano kaha nga malaomon man ang Manluluwas nga maghinulsol kita ug andam kaayo nga pasayloon kita?

Para sa sunod nga pipila ka minuto, magpili ka ug magtuon og partikular nga aspeto sa paghinulsol nga makatabang kanimo sa pagduol ug mahimong mas sama kang Jesukristo, makabaton og mas dugang nga paggamit sa Iyang gahom ug kalinaw, ug mobati og dugang nga kalipay. Ang mosunod mao ang partikular nga mga aspeto sa paghinulsol nga mahimo nimong tun-an. Pagpili og usa niini aron tun-an, o pagtuon sa usa sa imong mga kaugalingong pangutana mahitungod sa hilisgotan sa paghinulsol.

Ikonsiderar ang pagtan-aw sa mga pangutana sa mga estudyante mahitungod sa paghinulsol nga ilang gipamalandongan kaganiha ug sa paggamit niini isip puli, o dugang ngadto sa, mosunod nga mga pangutana sa pagtuon.

• Unsaon nako paghinulsol?

• Unsaon nako pagkaplag og dugang nga kalipay diha sa paghinulsol?

• Unsaon man nako pagbuntog ang kahadlok sa paghinulsol?

• Unsa ang lagmit nga kalambigitan sa regular, adlaw-adlaw nga paghatag og gibug-aton sa paghinulsol, o unsa kaha kini sa akong kinabuhi?

Ang mosunod mao ang pipila ka partikular nga mga kapanguhaan nga makatabang kanimo sa pagpalawom sa imong pagsabot sa paghinulsol. Anaa kini sa ChurchofJesusChrist.org o sa Gospel Library nga app. Magamit kini ug ang uban pang mga kapanguhaan aron giyahan ang imong pagtuon sa aspeto sa paghinulsol nga imong gipili. Ikonsiderar ang pagsulat ug pag-highlight sa mga detalye nga pinakaimportante para kanimo.

Pagdesisyon kon unsang mga kapanguhaan ang anaa ug pinakamaayong ihatag sa mga estudyante. Kon gikinahanglan, ipakita sa mga estudyante kon unsaon pagpangita ang lain-laing mga entry.

• Alang sa Kalig-on sa mga Kabatan-onan: Usa ka Giya alang sa Paghimo og mga Pagpili [booklet, 2022], “Si Jesukristo motabang kaninyo,” 6–9

• Giya ngadto sa mga Kasulatan, “ Hinulsol, Paghinulsol,” scriptures.ChurchofJesusChrist.org

• Mga pakigpulong sa kinatibuk-ang komperensiya sama sa Russell M. Nelson, “Kita Makabuhat og Mas Maayo pa ug Mahimong Mas Maayo,” Liahona, Mayo 2019, 67–69

• Dale G. Renlund, “Paghinulsol: Usa ka Mahimayaon nga Pagpili,” Liahona, Nob. 2016, 121–24

Ikonsiderar ang pag-awhag sa mga estudyante nga magpares-pares sa pagbuhat o diha sa gagmay nga mga grupo sa paghisgot ug pagtudlo sa usag usa sa unsay ilang nakat-onan. Magamit nila ang mosunod nga mga pangutana:

• Unsay imong nakat-onan gikan sa imong pagtuon?

• Unsa nga tambag ang imong ihatag sa usa ka tawo nga naglisod sa pagsabot kon nganong kinahanglan niyang maghinulsol? Unsay gusto nimo nga iyang mahibaloan ug masabtan mahitungod kang Jesukristo?

• Unsa ang nakatabang kanimo sa pagpalambo o paglig-on sa imong pagpamatuod bahin sa kalipay sa paghinulsol pinaagi kang Jesukristo?

Komentaryo ug Background nga Impormasyon

Lucas 3:7 . Nganong gitawag man ni Juan ang mga tawo nga “mga anak sa mga bitin”?

Ang Palistinian nga bitin mao ang pinakasagad nga makahilo nga bitin sa Israel. Ang mga bitin aktibo sa gabii ug kasagarang mangita og pagkaon pinaagi sa pag-ukoy ug dayon pagtukob sa ilang biktima. Kon bation niini nga nameligro, ang mga bitin molikos sa lawas niini, mohishis, ug moatake sa mga kaaway niini. Sama niini, ang mga Pariseo ug mga Saduceo nahulga ni Juan tungod kay nakadani siya og daghang mga tawo gikan sa sayop nilang mga pagtulon-an.

Lucas 3:8 . Unsa ang “mga bunga nga mahiangay sa paghinulsol”?

Sa mga kasulatan, ang mga matang sa mga tawo usahay gisimbolo pinaagi sa mga kahoy nga namunga og maayong bunga o bati nga bunga. Ang “[pag]pamunga … og mga bunga nga mahiangay sa paghinulsol” nagpasabot sa pag-usab sa atong mga kagustohan ug mga binuhatan aron mosunod sa mga pagtulon-an sa Dios.

Lucas 3:12 . Unsa ang mga kobrador og buhis?

Sa karaang Roma, ang mga kobrador og buhis mao ang mga tigkolekta og buhis para sa gobyerno sa Roma. Ang mga kobrador og buhis gikasilagan sa mga Judio, tungod kay mga traydor sa ilang kaugalingong nasod ang tan-aw kanila sa mga tawo ug tungod kay ang mga kobrador og buhis kasagarang manukot og mas daghang kuwarta para sa mga buhis kay sa gikinahanglan (tan-awa sa Hubad ni Joseph Smith, Lucas 3:19–20 [sa appendix sa Biblia]; Lucas 3:12–13). Andam nga gidawat sa pipila ka kobrador og buhis ang ebanghelyo (tan-awa sa Mateo 9:9–10 ; Lucas 19:1–10 ; Giya ngadto sa mga Kasulatan, “ Publikano,” scriptures.ChurchofJesusChrist.org).

Makaluwas ba kanato ang paghinulsol?

Dili ingon nga ang paghinulsol lang gayod ang makaluwas sa tawo. Ang dugo ni Jesukristo mao ang makaluwas kanato. Dili pinaagi sa atong sinsero ug matinuoron nga pagbag-o sa pamatasan lamang nga kita maluwas, apan “pinaagi sa grasya [kita] maluwas, human sa tanan nga atong mabuhat” ( 2 Nephi 25:23). Apan, ang tinuod nga paghinulsol mao ang kondisyon nga gikinahanglan aron moabot sa atong mga kinabuhi ang kapasayloan sa Dios. Ang tinuod nga paghinulsol makahimo og “usa ka masanagon nga adlaw [gikan] sa labing ngitngit nga kagabhion” (Spencer W. Kimball, The Miracle of Forgiveness [1969], 362).

(Dieter F. Uchtdorf, “Punto sa Luwas nga Pagbalik,” Liahona, Mayo 2007, 100)

Dugang nga Kalihokan sa Pagkat-on

Usa ka alternatibo sa pag-awhag sa mga estudyante nga magtuon og partikular nga aspeto sa paghinulsol

Ihatag sa mga estudyante ang mosunod nga pag-aghat:

Hunahunaa nga gibati sa imong bishop nga ang kabatan-onan sa imong ward adunay negatibong kinaiya sa paghinulsol. Isip pag-andam para sa umaabot nga miting sa konseho sa kabatan-onan sa ward, gihangyo ka niya nga mag-andam og mga pangutana ug mga tubag gikan sa panglantaw sa kabatan-onan bahin sa hilisgotan sa paghinulsol. Gamiton dayon kini sa bishopric nga mga hilisgotan aron maghimo og debosyonal aron tabangan ang kabatan-onan. Sa tagsa-tagsa o sa tabang sa imong mga klasmeyt, pagbuhat og pipila ka posibleng pangutana ug mga tubag mahitungod sa paghinulsol nga gibati nimo nga pinakamapuslanon para sa kabatan-onan sa imong ward. Sa imong mga tubag, paglakip og partikular nga mga kasulatan ug mga propetikanhong mga kinutlo nga makatabang aron ang kabatan-onan makahibalo ug makasabot.