Mateo 3:1–12; Marcos 1:1–8

“Andama ninyo ang Dalan alang sa Ginoo”

Imahe

John the Baptist and a woman standing in the river Jordan with a group of people watching in the foreground. Outtakes include John the Baptist helping a woman into the water, and various scenes from a distance and close up.

Sa wala pa magsugod si Jesukristo sa Iyang pangalagad sa publiko, nagtinguha si Juan nga Magbubunyag nga andamon ang ubang tawo sa pagdawat ug pagsunod sa Manluluwas. Niini nga leksiyon, ikonsiderar nimo kon giunsa nimo pagdawat ug pagsunod ang Manluluwas, sa unsang paagi nga ikaw mas makadawat ug makasunod Kaniya, ug unsa ang imong mabuhat aron maandam ang ubang tawo sa pagdawat ug pagsunod Kaniya.

Pagtinabangay sa usag usa. Ang kadaghanan sa mga estudyante gustong makakat-on gikan sa usag usa. Tabangi sila sa pagsabot nga samtang misalmot sila sa klase, mahimong aduna silay positibong epekto sa uban. Awhaga sila nga sinserong maminaw sa uban pang estudyante ug motubag nga manggihunahunaon ug magmabination sa usag usa.

Pag-andam sa estudyante: Dapita ang mga estudyante nga maghunahuna kon unsa ang ilang buhaton ug isulti kon sila adunay higayon nga i-andam ang laing tawo sa pagdawat ug pagsunod sa Manluluwas.

Posible nga mga Kalihokan sa Pagkat-on

Pag-andam para kang Jesukristo

Isip alternatibo sa mosunod nga sitwasyon, ikonsiderar ang pagbutang og pipila ka babag aron babagan ang pultahan sa klase o mga lingkoranan sa mga estudyante. Pananglitan, ikonsiderar ang pagbutang og lingkoranan o lamesa sa pultahan o sa atubangan diin manglingkod ang mga estudyante. Sa pagpangabot sa mga estudyante, dapita sila sa pagsulod ug paglingkod sa ilang mga lingkoranan. Obserbahi kon unsa ang buhaton sa mga estudyante aron makasulod sa klase ug makalingkod. Sa sinugdanan sa leksiyon, hisgoti kon unsa ang reaksyon sa mga estudyante niini nga mga babag pinaagi sa mga pangutana sama sa “Unsa ang imong gibuhat sa mga babag?” “Aduna ba kay namatikdang bisan kinsa nga mitabang sa uban sa paglusot sa mga babag?”

Hunahunaa nga moadto ka sa importanteng panaw ug adunay mga babag sa dalan. Unsa ang imong buhaton? Mobalik ba ka? Mosulay ba ka nga molusot o molibot niini? Mosulay ba ka sa pagtangtang sa mga babag para sa mga tawo nga nagsunod kanimo? Hunahunaa nga nadiskobre nimo nga gitangtang na sa tawo nga nahiuna kanimo ang kadaghanan sa lisod nga mga babag.

Unsa ang imong bation mahitungod niadtong nag-andam sa dalan para kanimo?

Karon magtuon ka mahitungod kang Juan nga magbubunyag, nga ang misyon mao ang pag-andam sa mga tawo sa pagdawat ug pagsunod sa Manluluwas (tan-awa sa Lucas 1:17).

Kinsa ang mitabang sa pag-andam sa dalan para kanimo aron dawaton ug sundon ang Manluluwas sa imong kinabuhi?
Kinsa ang kasamtangang nag-andam sa dalan para sa Manluluwas aron mas makasulod sa imong kinabuhi?
Unsa ang nakatabang kanimo nga dawaton ug sundon ang Manluluwas?

Samtang nagtuon ka niini nga leksiyon, hunahunaa ang bisan unsang mga babag nga nagbabag gihapon sa imong dalan o sa uban sa pagdawat ug pagsunod Kaniya, ug unsa ang lagmit nga makatabang kanimo o kanila nga mabuntog kini nga mga babag.

Pasiuna sa Ebanghelyo ni Marcos ug pagpangalagad ni Juan nga Magbubunyag

Gisugdan ni Marcos ang iyang Ebanghelyo pinaagi sa asoy ni Juan nga Magbubunyag. Dili sama ni Mateo o Juan, dili Apostol ni Jesukristo si Marcos pero usa ka ulahi nga kinabig. Lagmit nga gisulat ni Marcos ang iyang Ebanghelyo sa ubos sa direksyon ni Apostol Pedro. Sa iyang Ebanghelyo, nagsulat si Marcos ngadto sa hentil nga mga tawo ug mas naghatag og gibug-aton kon unsay gihimo sa Manluluwas kay sa unsay Iyang gipanulti.

Ikonsiderar ang pagdapit sa mga estudyante nga magtrabaho nga magkapares o sa gagmay nga mga grupo samtang nagtuon sila sa mga bersikulo sa ubos.

Basaha ang Marcos 1:1–8 , ug pangitaa kon unsa ang gibuhat ni Juan nga Magbubunyag nga nakatabang sa pag-andam sa ubang tawo sa pagdawat ug pagsunod kang Jesukristo.

Mga kagamitan sa pagtuon sa kasulatan.

Ang pipila ka kagamitan ug mga paagi sa pagtuon makapalambo sa imong pagkat-on. Aron mapalambo ang imong pagtuon bahin sa mga asoy sa kasulatan, sulayi sa pagtan-aw ang parehong asoy gikan sa lain-laing mga tigsulat sa Ebanghelyo.

Ang pagbasa mahitungod sa parehong panghitabo sa lain-laing mga asoy sa Ebanghelyo sa kasagaran makatabang sa imong pagkat-on. Basaha ang Mateo 3:7–12 , ug pangita og dugang pang mga detalye mahitungod sa pagpangalagad ni Juan nga Magbubunyag. Sa panahon sa Manluluwas, daghan sa nakigsaad nga mga Israelita ang hilabihan ka mapasigarbohon ug mitalikod sa mga pagtulon-an ni Jehova. Nagtuo ang uban nga ang pagka-manununod lamang ni Abraham igo na aron maluwas sila (tan-awa sa Hubad ni Joseph Smith, Mateo 3:36 [Giya ngadto sa mga Kasulatan] ).

Unsa ang gibuhat ni Juan nga Magbubunyag aron makatabang sa pag-andam sa mga tawo sa pagdawat ug pagsunod sa Manluluwas?

Samtang nagtubag ang mga estudyante, ikonsiderar ang pagsukna og mga follow-up nga pangutana sama sa “Sa unsang paagi nga ang pagpangumpisal ug paghinulsol sa mga sala makaandam sa mga tawo nga mas modawat ug mosunod sa Manluluwas?” Hinumdomi nga ang sunod nga duha ka leksiyon mas lawom ang pagahisgotan mahitungod sa paghinulsol ug bunyag.

Mahimong makatabang kon klarohon nga ang mga pulong ni Juan nga girekord sa Marcos 1:7–8 naghisgot mahitungod sa Manluluwas.

Unsa ang dugang pang mga ideya ang imong nakuha gikan usab sa pagtuon sa asoy ni Mateo mahitungod ni Juan nga Magbubunyag?
Unsa nga ebidensya ang imong nakita sa atong panahon nga ang Langitnong Amahan naningkamot gihapon sa pag-andam sa mga tawo sa pagdawat ug pagsunod sa Manluluwas?

Pagdawat sa Manluluwas ug pagtabang sa ubang tawo sa pagdawat Kaniya

Kompletoha ang duha sa mosunod nga mga kalihokan. Hunahunaa kon sa unsang paagi nga ikaw mismo mas hingpit nga modawat ug mosunod sa Manluluwas ug motabang sa pag-andam sa ubang tawo sa pagbuhat usab niini.

Ikonsiderar ang pagpakita sa mosunod nga mga opsiyon sa kalihokan o paghimo og mga gagmay nga handout sa kada usa para sa mga estudyante aron gamiton samtang gikompleto nila ang ilang gipili nga kalihokan.

Kalihokan A: Pag-journal

Pamalandongi ug irekord sa imong journal sa pagtuon ang mga kasinatian nga nakatabang kanimo sa pagdawat ug pagsunod sa Manluluwas. Ikonsiderar ang paglakip kon unsa ang nakatabang kanimo nga motuo kang Jesukristo ug mas mapasaligon nga magkinabuhi sigon sa Iyang mga pagtulon-an. Unya tubagi ang mosunod nga mga pangutana:

Sa imong hunahuna, unsa ang lagmit nga ipabuhat kanimo sa Langitnong Amahan aron mas modawat ug mosunod ni Jesukristo sa umaabot?
Unsa ang pipila ka mga butang nga imong mahimo sa pagtabang sa ubang tawo sa pagdawat ug pagsunod kang Jesukristo?

Mahimong makatabang kon maghatag og pipila ka kopya sa mga magasin nga Liahona nga adunay pinakabag-ohay nga kinatibuk-ang komperensiya para sa mga estudyante nga mopili sa Kalihokan B.

Kalihokan B: Pagpangita sa kinatibuk-ang komperensiya

Hinumdomi kon unsa ang imong nakat-onan sa pinakabag-ohay nga kinatibuk-ang komperensiya. Kon posible, pagrebyo og usa o duha ka pakigpulong sa kinatibuk-ang komperensiya, ug pangita og mga mensahe nga makatabang kanimo nga mas hingpit nga modawat ug mosunod ni Jesukristo.

Unsa ang bag-ohay lang gitudlo sa mga propeta sa modernong panahon aron matabangan kamong mas hingpit nga modawat ug mosunod sa Manluluwas?
Unsaon kaha nimo nga magamit ang usa sa ilang mga pagtulon-an sa imong kinabuhi o mapaambit kini sa uban?

Kalihokan C: Pagpangita sa mga kasulatan

Gamita ang mga kasulatan aron mas masabtan kon giunsa paggiya ang ubang tawo ngadto sa pagdawat ug pagsunod kang Jesukristo. Pananglitan, mahimo nimong tun-an ang mga ehemplo sa Basahon ni Mormon sama sa Enos 1:2–8 ; Mosiah 5:1–2, 5 ; Alma 22:17–18, 22–23 ; o Helaman 5:28–30, 40–42 .

Unsa ang imong nakat-onan gikan sa mga kasulatan nga imong gitun-an?
Sa unsa kaha nga paagi nga mas matabangan ka niini nga mga ideya nga mas hingpit nimong dawaton ug sundon ang Manluluwas o matabangan ang ubang tawo sa pagbuhat usab niini?

Dapita ang pipila ka mga estudyante sa pagpakigbahin kon unsay ilang nakat-onan ug gibati.

Ikonsiderar ang pagtapos pinaagi sa pagpamatuod, o pagdapit sa mga estudyante nga ipaambit ang ilang mga pagpamatuod, bahin sa kalipay ug kamaya nga moabot samtang imong dawaton ug sundon ang Manluluwas ug tabangan ang ubang tawo nga moduol ngadto Kaniya.

Komentaryo ug Background nga Impormasyon

Kinsa si Marcos?

Si Marcos (gitawag usab nga Juan Marcos) dili lakip sa mga orihinal nga disipulo ni Jesukristo, pero sa kaulahian nakabig siya ug nakigtambayayong kuyog sa kadaghanan sa mga Apostoles sa Manluluwas. Siya ang gipasabot ni Pedro isip “Marcos nga akong anak” ( 1 Pedro 5:13), nga nagsugyot sa kasuod sa ilang relasyon. Lagmit nga gisulat ni Marcos ang iyang mubo nga Ebanghelyo ngadto sa mga Taga-Roma, sa uban pang hentil nga mga nasod, ug sa bag-ong mga kinabig sa Kristyanismo. Nag-alagad usab si Marcos kauban ni Pablo sa panahon sa unang pagpangalagad ni Pablo (tan-awa sa Mga Buhat 12:25).

Unsa ang pipila ka feature nga nakalahi sa Ebanghelyo ni Marcos?

Ang Ebanghelyo ni Marcos dali ug kalit nga gisugdan ug nagmentinar og paspas nga pagka-istorya, nagsaysay sa mga panghitabo nga nagsunod-sunod. Si Marcos kanunay nga migamit sa mga pulong nga diha-diha ug dayon, nga naghatag sa epekto nga paspas nga pagkasaysay ug aksiyon.Lakip sa importanteng mga tema sa Marcos mao ang mga pangutana kon kinsa si Jesus ug kinsa ang nakasabot sa Iyang pagkatawo, ingon man usab sa tahas sa disipulo isip usa ka tawo kinsa kinahanglan gayod nga “mopas-an sa iyang krus, ug mosunod [ni Jesus]” ( Marcos 8:34). Agi og dugang, ang Marcos mao lamang ang bugtong Ebanghelyo nga nagsaysay sa sambingay sa liso nga mitubo sa iyang kaugalingon (tan-awa sa Marcos 4:26–27), ang pag-ayo sa bungol nga tawo didto sa kayutaan sa Decapolis (tan-awa sa Marcos 7:31–37), ug ang anam-anam nga pagkaayo sa tawo nga buta didto sa Betsaida (tan-awa sa Marcos 8:22–26).

Marcos 1:8 . Unsa ang bunyag sa Espiritu Santo?

Namahayag si Juan nga Magbubunyag nga mobunyag siya pinaagi sa tubig pero si Jesus “magbunyag … sa Espiritu Santo” ( Marcos 1:8). Kini nga pagbunyag sa Espiritu Santo ug sa kalayo nagpasabot sa resulta sa pagkompirma pagkahuman sa bunyag, unya sa pagdawat sa pagpakig-uban sa Espiritu Santo. Dayon ang Espiritu Santo mohimo kanato nga limpyo ug putli, susama sa makalimpyo ug makaputli nga epekto sa kalayo.

Mateo 3:7 . Kinsa ang mga Pariseo ug mga Saducio?

Ang mga Pariseo mao ang mga sakop sa relihiyosong grupo sa Judeo kinsa mapagarbuhon sa ilang kaugalingon sa istrikto nga pagsunod sa balaod ni Moises. Ilang gitumong ang pagpakunhod sa relihiyon ngadto sa pagtuman sa daghang mga seremonya. Ang mga Saducio mao ang adunahang grupo sa mga Judeo nga adunay dakong impluwensya sa relihiyon ug politika. Wala sila motuo sa doktrina sa pagkabanhaw. Kining duha ka grupo mipalayo gikan sa orihinal nga katuyoan sa mga balaod sa Dios, ug daghan sa ilang mga miyembro ang nagdumili sa pagdawat sa mensahe sa propeta sa Dios nga si Juan nga Magbubunyag.

(Dali, Sunod Kanako—Alang sa mga Indibidwal ug mga Pamilya: Bag-ong Tugon 2019, 19)

Mateo 3:12 . Unsay buot ipasabot ug gisimbolohan sa paliran, sawog, trigo ug uhot?

Ang “paliran” nga gipasabot sa Mateo 3:12 nga usa ka taphanan nga gigamit sa pagpapha sa trigo ngadto sa hangin. … Ang mga lugas sa trigo mahulog balik sa yuta samtang ang hangin mohuyop sa mas gaan nga uhot. Ang trigo pundukon dayon ngadto sa usa ka pundukanan, o balay-tipiganan, ug ang uhot sunugon sa kalayo. Si Juan nga Magbubunyag nagtudlo nga ang Manluluwas, nga moabot sunod kaniya, molain sa mga tumutuo gikan sa mga dili tumutuo sa samang paagi sa paglain sa trigo gikan sa uhot.

(Manwal sa Estudyante sa Bag-ong Tugon[2018], ChurchofJesusChrist.org)

Dugang nga mga Kalihokan sa Pagkat-on

Usa ka alternatibong paagi sa pagsugod sa leksiyon

Tugoti ang mga estudyante nga ipaambit ang ilang nahibaloan mahitungod kang Juan nga Magbubunyag ug sa iyang misyon nga “andamon niya ang katawhan alang sa Ginoo” ( Lucas 1:17). Dapita sila nga ibutang ang ilang mga kaugalingon sa posisyon ni Juan, pamalandongan kon unsang mga matang sa mga butang ang ilang buhaton ug isulti aron maandam ang ubang tawo sa pagdawat kang Jesukristo, ug maghunahuna kon unsa ang mahimong makapalisod niini nga buluhaton.

Ang Panag-uyon sa mga Ebanghelyo

Tabangi ang mga estudyante sa pagsabot nga kini nga kagamitan nagpakita diin girekord ang parehong mga panghitabo diha sa lain-laing mga Ebanghelyo. Awhaga sila nga mangita og mga kasulatan mahitungod kang Juan nga Magbubunyag nga nagtudlo mahitungod sa iyang kinabuhi sa wala pa niya gibunyagan si Jesukristo.