A ward in the Philippines come to church on bikes, walking and on motorcycles. They walk into the meetinghouse and attend their classes and sacrament meeting. People speak, teachers teach, they sing, they learn and then they leave the building to go home.
Kini ang una sa pipila ka regular nga mga leksiyon sa pagsusi nga imong salmotan sa kinatibuk-an sa imong pagtuon sa Bag-ong Tugon. Tinguha niini nga mga leksiyon ang pagtabang kanimo sa pagsusi sa imong mga tumong, pagkat-on, ug personal nga pag-usbaw.
Pagdasig og kada adlaw nga pagtuon sa kasulatan. Usa ka paagi nga maawhag ang mga estudyante sa pagtuon sa ilang mga kasulatan sa kada adlaw mao ang paghatag og regular nga mga kahigayonan alang nila nga makapaambit diha sa klase sa unsay ilang nakat-onan ug gibati atol sa ilang personal nga pagtuon.
Pag-andam sa estudyante: Dapita ang mga estudyante nga hunahunaon kon unsa ang kalamboan sa ilang pagtuon sa kasulatan ug mag-andam nga ipaambit ang mga ideya nga aduna sila o mga paagi nga miusbaw ang ilang pagtuon bag-ohay lang.
Posible nga mga Kalihokan sa Pagkat-on
Ang katuyoan sa mga leksiyon sa pagsusi
Ipakita ang mosunod nga hulagway ug pangutana aron makita sa mga estudyante samtang manulod sila sa klase.
Imahe
A person’s hand planting seeds into the dirt of a garden.
Pagdrowing og yano nga hulagway sa usa ka tanom sa lain-laing mga punto sa pagdako niini. Makatabang kanimo ang gipakita nga hulagway. Samtang nagdrowing ka, ikonsiderar kon unsaon nimo pagtubag ang mosunod nga pangutana. Kung mahuman na ka sa imong hulagway, isulat ang imong tubag sa pangutana sa parehong papel.
Sa unsang paagi nga ang imong espirituhanong paglambo susama sa pagtubo sa usa ka tanom?
Si Presidente M. Russell Ballard, Akting nga Presidente sa Korum sa Napulog Duha ka Apostoles, mipasabot sa pipila ka mga aksiyon nga atong mabuhat aron madugangan ang atong espirituhanong paglambo ug motutok sa atong mahangturong mga tumong:
Imahe
Official portrait of President M. Russell Ballard of the Quorum of the Twelve Apostles, 2004.
Sulod sa katuigan, nakaobserbar ko nga kadtong makakab-ot og labing daghan niining kalibotana mao kadtong dunay panglantaw sa ilang kinabuhi, gamit ang mga tumong aron magpabilin silang makatutok sa ilang panglantaw ug mga estratehiya kon unsaon kini pagkab-ot. Ang masayod kon asa mo padulong ug unsaon ninyo pag-abot didto makahatag og kahulugan, katuyoan, ug kalamposan sa kinabuhi. …
Ang pagbalik ngadto sa presensya [sa Dios] ug pagdawat sa mahangturong mga panalangin nga moabot gumikan sa paghimo ug pagtuman sa mga pakigsaad mao ang labing importante nga mga tumong nga atong matakda. …
Akong nabantayan nga aron makapabilin nga magtutok sa pagbalik ug pagdawat sa gisaad nga mga panalangin, kinahanglan kong kanunay nga mangutana sa akong kaugalingon, “Kumusta na man ko?”
Sama kini sa pagbaton og personal, pribado nga interbyu sa inyong kaugalingon. Ug kon dili kana kasarangan, hunahunaa kini: kinsa man ang mas nakaila sa inyong kaugalingon kaysa inyong pagkaila sa inyong kaugalingon? Nahibalo kamo sa inyong mga hunahuna, sa inyong pribadong mga lihok; sa inyong mga tinguha; ug sa inyong mga damgo, mga tumong ug mga plano. Ug mas nakaila kamo kay ni bisan kinsa unsa ang inyong paglambo diha sa dalan sa pagbalik ug pagdawat.
(M. Russell Ballard, “Mobalik ug Modawat,” Liahona, Mayo 2017, 62–64)
Unsay imong nakat-onan gikan ni Presidente Ballard mahitungod sa regular nga pagsukod sa espirituhanong paglambo?
Aron matabangan ka sa regular nga pagsukod sa imong paglambo, ang pipila sa imong mga leksiyon magsilbing mga pagsusi sa pagkat-on. Mahimong tan-awon kini nga mga leksiyon isip mga oportunidad nga pamalandongan ug isaulog kon giunsa nimo pagkat-on ug pag-uswag. Mahimo usab kini nga oportunidad sa pag-ila sa mga butang nga kinahanglan pa nimong makat-onan o mga paagi nga mapausbaw pa nimo.
Pagduol ngadto kang Jesukristo ug mahimong Iyang disipulo
Tabangi ang mga estudyante sa pagsusi sa ilang pag-uswag kalabot sa pagduol ngadto kang Kristo ug mahimong Iyang disipulo. Ang ubang bahin niini nga leksiyon naghatag og pipila ka ideya kon unsaon kini pagbuhat. Depende sa mga kasinatian sa pagkat-on nga nasinati sa mga estudyante, kini nga mga ideya mahimong gamiton o pulihan sa uban pang mga paagi aron tabangan ang mga estudyante sa pagsusi sa ilang nakat-onan.
Ang usa sa nag-unang mga katuyoan sa seminary mao ang pagtabang kanimo nga mas hingpit nga moduol ngadto kang Jesukristo ug mahimong Iyang disipulo, o Iyang sumusunod. Ang pagpaminaw sa mga pulong sa Manluluwas pinaagi sa atong pagtuon sa kasulatan ug personal nga pagpadayag usa ka importante nga bahin sa pagsunod kang Jesukristo.
Pagtagana og pipila ka minuto aron susihon ang imong personal nga pagtuon sa kasulatan ug mga paningkamot aron makadawat og personal nga pagpadayag. Irekord ang imong mga hunahuna diha sa imong journal sa pagtuon. Ania ang pipila ka mga pangutana nga makatabang kanimo sa pagsusi sa mosunod:
Unsa ang kalamboan sa imong personal nga pagtuon sa kasulatan? Unsa nga mga kalamboan ang imong nabuhat sa imong abilidad sa pagtuon ug paggamit sa mga pulong sa Ginoo nganha sa imong kinabuhi? Unsa ang aspeto sa imong pagtuon sa kasulatan nga lisod o wala pa malihok nga gusto nimong palamboon?
Giunsa nimo pagbati nga gitudloan o gi-aghat ka sa Espiritu Santo karong tuiga? Unsang mga pangutana ang aduna ka mahitungod sa pagdawat og personal nga pagpadayag? Unsay imong mabuhat aron mangita og dugang pang mga oportunidad aron mabati ang tingog sa Espiritu?
Ipakita ang imong nakat-onan
Ang mosunod nga mga kalihokan gidisenyo aron mahatagan ang mga estudyante og oportunidad nga ipasabot ang pipila sa mga tahas ni Jesukristo nga lagmit nga bag-ohay lang nilang nakat-onan.
Pilia nga buhaton ang usa o duha sa mosunod nga mga kalihokan aron ipakita ang unsay imong nakat-onan mahitungod kang Jesukristo ug sa Iyang mga tahas gikan sa imong pagtuon sa Mateo 1 – 2 ; Lucas 1 – 2 ; ug Juan 1 . Mahimo nimong rebyohon ang imong journal sa pagtuon aron mapahinumdoman ka sa mga kamatuoran nga imong nakat-onan.
Ipakita ang mosunod nga mga opsiyon nga pakisayran sa mga estudyante samtang ilang gikompleto kini nga kalihokan.
Paghatag og pipila ka mga materyal sa sining kon anaa kini nga mga materyal, sama sa mga lapis, pangsulat, krayola, marker, pintura, papel, ug uban pa. Mahimo usab kining buhaton gamit ang clay o isip kalihokan sa gawas gamit ang sidewalk chalk.
Opsiyon A: Usa ka buhat nga nag-awhag sa uban nga “tan-awa mao kana ang Kordero sa Dios”
Sa Juan 1, mabasa nato ang pag-awhag ni Juan nga Magbubunyag para sa iyang mga sumusunod nga [motan-aw sa] Kordero sa Dios” ( Juan 1:36). Ang usa ka kahulogan sa pulong nga tan-awa mao ang pagtan-aw, pagmatikod, o paghatag og mainampingong pagtagad sa usa ka butang o usa ka tawo.
Para niini nga kalihokan, paghimo og butang nga makatabang sa mga tawo sa “pagtan-aw sa Kordero sa Dios,” o mohunong ug mamalandong diha Kaniya ug sa mga tahas nga Iyang gibuhat sa atong mga kinabuhi. Pagsugod pinaagi sa paghunahuna mahitungod sa mga kinaiya, mga tahas, ug mga ngalan ni Kristo nga imong nakat-onan. Pangita og mga tudling sa kasulatan diin nakat-onan nimo kini nga mga kamatuoran mahitungod kang Jesukristo. Ikonsiderar ang paggamit og kasulatan isip tema para sa imong gihimo. Para niini nga kalihokan, mahimo nimong buhaton ang usa sa mosunod nga mga proyekto:
Paghimo og artistikong representasyon sa usa ka kinaiya, tahas, ngalan, o titulo ni Kristo nga partikular nga makahuloganon kanimo, ug paghatag og pagpasabot sa imong gihimo.
Pagsulat mahitungod sa personal nga kasinatian nga nakatabang kanimo sa pagpalambo sa imong pagsabot sa Manluluwas.
Hangyoa ang mga klasmeyt, mga higala, o mga sakop sa pamilya nga magpaambit og mga butang mahitungod kang Kristo nga ilang gitan-aw . Gamita ang ilang mga hunahuna sa imong gihimo. Ang lagmit nga pipila ka pananglitan mao ang entry sa journal, artistikong paghulagway, o giusab nga video sa unsay ilang gipaambit.
Opsiyon B: Usa ka pagpaila-ila ngadto kang Jesukristo
Paghimo og listahan sa tulo ka titulo sa Manluluwas nga gamiton nimo aron ipaila-ila ang usa ka tawo ngadto kang Jesukristo. Ilha ug hisgoti ang mga tudling sa kasulatan diin nimo kini nakita. Paglakip og mubo nga pasabot sa kung unsa ang kahulogan sa kada titulo ug sa unsang paagi lagmit nga lahi ang kinabuhi sa usa ka tawo kon nakahibalo sila sa importansya niini nga mga titulo.
Paglakip og sugilanon sa kasulatan o personal nga kasinatian diin gipakita sa Manluluwas ang kada titulo nga imong gipili. Pananglitan, mahimo nimong ilista ang titulo nga “Emmanuel,” nga nagpasabot nga “anaa kanato ang Dios” ( Mateo 1:23). Mahimo kang mag-ila og mga pananglitan gikan sa imong kinabuhi o sa kinabuhi sa ubang tawo diin ang Manluluwas “anaa” kanimo o kanila.
Mahimong kompletohon kini nga kalihokan isip artistikong pagpakita (sama sa drowing, painting, o iskultura) o pagsulat lamang. Ikonsiderar ang pagpangita og mga paagi aron ipadayon ang pagpangita og mga titulo sa Manluluwas samtang nagtuon ka sa Bag-ong Tugon karong tuiga.
Pagkahuman nga makabaton ang mga estudyante og igong panahon aron humanon ang ilang gibuhat, hatagi sila og oportunidad nga ipaambit ang ilang gihimo sa klase (sa magkapares o gagmay nga mga grupo). Ikonsiderar ang pagtapos sa klase pinaagi sa paghatag og pagpamatuod mahitungod ni Jesukristo. Lagmit nga makatabang kon ipokus kini nga pagpamatuod diha sa pipila sa mga tahas ug mga titulo nga gihisgotan niini nga leksiyon.