Juan 1:1–16
“Ang Pulong Nahimong Tawo”
Gisulat ni Apostoles Juan ang iyang Ebanghelyo aron matabangan kita nga motuo nga si Jesus mao ang Kristo (tan-awa sa Juan 20:30–31). Gitudlo ni Juan nga mibiya si Jesukristo sa Iyang langitnong pinuy-anan aron mopuyo sa kalibotan ug mahimong atong Manunubos. Ang katuyoan niini nga leksiyon mao ang pagtabang kanimo nga masabtan kon kinsa si Jesukristo sa wala pa ang Iyang mortal nga pagkatawo ug mas makapasalamat pa gayod sa gugma nga Iyang gipakita pinaagi sa pagtuman sa Iyang misyon dinhi sa kalibotan.
Pag-andam sa estudyante: Dapita ang mga estudyante nga pamalandongan kon unsa ang ilang nahibaloan mahitungod kang Jesukristo sa wala pa Siya moanhi sa kalibotan. Awhaga sila nga mangita og bisan usa lamang ka tudling sa kasulatan nga naghulagway Kaniya sa wala pa ang Iyang mortal nga pagkatawo.
Posible nga mga Kalihokan sa Pagkat-on
Unsa ang bili niini?
Ipakita ang mosunod nga hulagway o pagdala og bola nganha sa klase nga gigamit sa sikat nga isport, ug isukna ang mosunod nga mga pangutana. Mahimong mogamit og laing aytem kon ang pagkat-on pa og dugang mahitungod sa aytem makatabang sa mga estudyante nga makaamgo nga mas bililhon kini kay sa ilang orihinal nga gihunahuna.
-
Sa imong hunahuna, unsa kadako ang bili niini nga bola?
-
Unsa kaha kon gigamit kini sa championship sa dula sa tibuok kalibotan o gipirmahan sa usa ka sikat nga magdudula?
Ang pagkahibalo sa kasaysayan sa usa ka butang makadugang sa atong pagsabot sa bili niini. Ingon usab kini diha sa mga tawo.
Sa dili pa isukna ang sunod nga pangutana, ikonsiderar ang pagpakita og hulagway ni Jesukristo, sama sa hulagway sa sinugdanan niini nga leksiyon.
-
Sa unsang paagi nga ang pagsabot kon kinsa si Jesukristo sa wala pa Siya matawo makatabang nimo nga masabtan ang bili sa Iyang kinabuhi ug misyon dinhi sa kalibotan?
Matabangan kita sa Ebanghelyo ni Juan nga masabtan kon kinsa gayod si Jesus sa Nazaret ug nganong kinahanglan kitang magtinguha nga makakat-on gikan sa Iyang mga pulong ug ehemplo. Nagsulat si Juan aron mapalig-on ang atong pagtuo nga si Jesus mao ang Kristo, ang gisaad nga Mesiyas (tan-awa sa Juan 20:30–31). Nagsugod ang Ebanghelyo ni Juan pinaagi sa paghulagway sa himaya ug gahom ni Jesukristo sa wala pa Siya moanhi sa kalibotan.
Kon makabenepisyo ang mga estudyante gikan sa mas detalyadong pasiuna ngadto sa Ebanghelyo ni Juan, ikonsiderar ang paggamit sa unang aytem sa seksiyon nga “Komentaryo ug Background nga Impormasyon” niini nga leksiyon.
Si Jesukristo sa kinabuhi nga wala pa dinhi sa yuta
Ikonsiderar ang pagkopya sa mosunod nga kalihokan sa pisara ug awhaga ang mga estudyante nga isulat ang ilang mga obserbasyon diha sa tukma nga mga kolum sa kinatibuk-an sa leksiyon.
Kopyaha ang mosunod nga tsart diha sa imong journal sa pagtuon:
|
Si Jesukristo sa kinabuhi nga wala pa dinhi sa yuta |
Kinabuhi ni Jesus dinhi sa yuta |
Gamit ang imong kasamtangang kahibalo mahitungod kang Jesukristo, isulat sa wala nga kolum ang mga pulong ug hugpong sa mga pulong nga naghulagway kon kinsa si Jesukristo, sama Siya sa unsa, ug unsa ang Iyang gibuhat sa wala pa Siya matawo.
Basaha ang mga mosunod nga tudling sa kasulatan ug ang pamahayag ni Elder Robert E. Wells sa Seventy, ug pagrekord og dugang pang mga paghulagway mahitungod ni Jesukristo sa pareho nga kolum. (Ang hugpong sa mga pulong nga “sa sinugdanan” sama sa gigamit niini nga mga tudling nagpasabot sa kinabuhi nga wala pa dinhi sa yuta.)
Ikonsiderar ang pagsulat sa mosunod nga pakisayran sa kasulatan diha sa wala nga bahin sa pisara. Kon gikinahanglan, tabangi ang mga estudyante sa pagpangita sa Hubad ni Joseph Smith sa appendix sa Biblia o sa “Study Helps” sa Gospel Library nga app.
Hubad ni Joseph Smith, Juan 1:1–5 (sa Bible appendix o Gospel Library app)
Doktrina ug mga Pakigsaad 93:21
Si Jesus gipili usab ug gipadala sa Amahan sa pag-organisar ug paglalang niini nga yuta, sa atong solar system, sa atong galaxy, ug gani sa mga kalibotan nga dili maihap.
Si Jesukristo mao ang Jehova sa Daang Tugon, ang Dios ni Adan ug ni Noe, ang Dios ni Abraham, Isaac, ug Jacob. Si Jehova mipakita ug nakigsulti sa karaang mga propeta. Sa dihang namulong Siya gibuhat Niya kini para sa Amahan, ug Iyang gisulti ang unsay isulti unta sa Iyang Amahan. Si Jehova sa Daang Tugon nahimong si Jesukristo sa Bag-ong Tugon sa dihang Siya natawo sa mortalidad.
(Robert E. Wells, “Our Message to the World ,” Ensign, Nob. 1995, 65)
Susiha ang listahan nga imong gibuhat diha sa wala nga bahin sa panid sa imong journal, ug pagsulat og usa ka minubo nga saysay bahin kon kinsa si Jesukristo sa kinabuhi nga wala pa dinhi sa yuta.
Pagdapit og mga boluntaryo aron mopaambit sa ilang mga minubo nga saysay.
Kinabuhi ni Jesus dinhi sa yuta
Tan-awa ang mosunod nga hulagway. Sa tuo nga kolum sa imong tsart, pagsulat og pipila ka paghulagway sa mapaubsanong mga panghitabo mahitungod sa paghimugso sa Manluluwas.
Imbis nga ipakita ang hulagway, ikonsiderar ang pagpakita sa video nga “The Nativity” (5:52) gikan sa code sa oras nga 2:30 hangtod sa 5:31. Makita kini nga video sa ChurchofJesusChrist.org.
Ang usa ka kahulogan sa pulong nga pagkunsad mao ang “pagkanaog.” Busa, ang pagkanaog sa Manluluwas aron mopuyo sa yuta kauban nato gihulagway usahay isip “ang pagpakig-angay sa Dios” ( 1 Nephi 11:26). Boluntaryong mibiya si Jesukristo sa Iyang langitnong trono ug mianhi sa napukan nga kalibotan diin makasinati Siya og dagkong pagsulay ug pag-antos.
Basaha ang mga mosunod nga tudling sa kasulatan, nga nangita sa mga kalisod nga giantos sa Manluluwas dinhi sa yuta ug kon ngano. Idugang kini nga mga paghulagway diha sa tuo nga bahin sa imong panid sa journal sa pagtuon.
Doktrina ug mga Pakigsaad 88:6
Rebyoha ang listahan nga imong gibuhat diha sa tuo nga bahin, ug pagsulat og usa ka minubo nga saysay kon unsa ang giantos ni Jesukristo dinhi sa yuta.
Pagtagana og panahon aron ikompara kon unsa ang gibiyaan ni Jesus ngadto sa kon unsa ang andam Niyang antoson dinhi sa yuta.
Ikonsiderar ang paghatag sa mga estudyante og panahon sa pagtubag sa mosunod nga mga pangutana diha sa ilang mga journal sa pagtuon. Dayon pagdapit og mga boluntaryo nga isulti og kusog ang bahin sa ilang mga tubag.
-
Unsa ang imong nakat-onan o gibati mahitungod sa Langitnong Amahan ug ni Jesukristo samtang nagtuon niini nga mga tudling sa kasulatan?
-
Sa imong hunahuna, nganong andam man si Jesukristo nga mokunsad “sa tanan nga mga butang” ( Doktrina ug mga Pakigsaad 88:6)?
-
Sa unsang paagi nga ang pagsabot bahin sa pagkunsad ni Jesukristo makaapekto sa imong mga pagbati ngadto Kaniya?
Paghatag og pagpamatuod bahin sa gugma ni Jesukristo, ug pagpahayag og pasalamat para sa Iyang pagkaandam nga mokunsad aron luwason kita.
Komentaryo ug Background nga Impormasyon
Unsa ang nakahimong talagsaon mahitungod sa Ebanghelyo ni Juan?
Mga 92 porsyento sa materyal diha sa Ebanghelyo ni Juan dili makita diha sa uban nga mga istorya sa Ebanghelyo. Kini lagmit tungod kay nagsulat si Juan para sa mga miyembro sa Simbahan nga nakasabot na mahitungod kang Jesukristo—usa ka nadesisyonan nga lahi nga mga magbabasa kay sa diha sa kang Mateo, Marcos, ug Lucas. Ang Ebanghelyo ni Juan puno sa doktrina; ang pipila ka nag-unang mga tema niini mao ang mahitungod sa kabalaan ni Jesus isip Anak sa Dios, ang Pag-ula ni Kristo, kinabuhing dayon, ang Espiritu Santo, ang panginahanglan sa pagpakatawo pag-usab, ang kaimportante sa paghigugma sa uban, ug ang kaimportante nga motuo sa Manluluwas. Ang usa sa dagkong mga natampo ni Juan mao ang iyang paglakip sa mga pagtulon-an sa Manluluwas ngadto sa Iyang mga disipulo sa mga takna sa wala pa Siya dakpa, lakip ang talagsaong Pangamuyo sa Pagpataliwala [Intercessory Prayer].
1 Nephi 11:26.
Ang Langitnong Amahan ug si Jesukristo pareho ba nga mao ang gipasabot diha sa mga kasulatan isip Dios?
Adunay tulo ka managlahi nga personahe sa Dios nga Kapangulohan: Ang Dios, nga Mahangturong Amahan; Iyang Anak, si Jesukristo; ug ang Espiritu Santo.
Ang Dios nga nailhang si Jehovah mao ang Anak, nga si Jesukristo ( Isa. 12:2 ; 43:11 ; 49:26 ; 1 Cor. 10:1–4 ; 1 Tim. 1:1 ; Pin. 1:8 ; 2 Ne. 22:2). Si Jesus nagbuhat ubos sa kamandoan sa Amahan ug anaa sa hingpit nga pagkahiuyon uban Kaniya. Ang tanan nga katawhan Iyang igsoon nga mga lalaki ug igsoon nga mga babaye, kay Siya ang kamagulangan sa mga anak nga espiritu ni Elohim. Ang pipila ka pakisayran sa kasulatan nagpasabot Kaniya pinaagi sa pulong nga Dios.Pananglitan, miingon ang kasulatan nga “Gilalang sa Dios ang langit ug ang yuta” ( Gen. 1:1), pero si Jesus ang tinuod nga Tiglalang ubos sa kamandoan sa Dios nga Amahan ( Juan 1:1–3, 10, 14 ; Heb. 1:1–2).
(Giya ngadto sa mga Kasulatan, “ Dios, Dios nga Kapangulohan ,” scriptures.ChurchofJesusChrist.org
Sa Mosiah 15:1 ug Juan 20:26–28 nagrekord og duha ka uban pang ehemplo ni Jesus nga giila isip Dios.
Sa unsa nga partikular nga mga paagi nga si Jesus mipili sa pagkunsad?
Si Bishop Richard C. Edgley, kanhi tigtambag sa Presiding Bishopric, mitudlo:
Mikanaog Siya aron matawo sa mortal nga babaye. …
Mikanaog Siya aron bunyagan sa tawo, bisan pa kon Siya perpekto ug walay sala.
Mikanaog Siya aron mangalagad sa pinakamapaubsanon sa mga mapaubsanon. …
Mikanaog Siya aron ipaubos ang Iyang kaugalingon sa kabubut-on sa Amahan, nag-antos ang Iyang kaugalingon sa pagtintal, pagbugalbugal, pagkastigo, pagpalayas, ug pagsalikway, bisan pa kon aduna Siya sa tanang gahom.
Mikanaog Siya aron hukman sa kalibotan, bisan pa kon Siya mao ang Maghuhukom sa kalibotan.
Mikanaog Siya aron ipataas sa krus ug patyon para sa mga sala sa kalibotan, bisan pa kon walay tawo ang mahimong mokuha sa Iyang kinabuhi.
(Richard C. Edgley, “The Condescension of God,” Ensign, Dis. 2001, 20)
Nganong andam man si Jesukristo nga mokanaog sa kinaubsan nga Iyang gibuhat?
Gipasabot ni Bishop Richard C. Edgley, kanhi tigtambag sa Presiding Bishopric, nga:
Mikanaog Siya dili tungod sa obligasyon, o dili para sa himaya, pero para lamang sa gugma. Ang iyang pagkunsad aron sa pagtubos kanato pinaagi sa Pag-ula mao ang bugti nga Iyang gibayad aron sa paghatag og kaluwasan ug kahimayaan.
(Richard C. Edgley, “The Condescension of God,” Ensign, Dis. 2001, 19)
Dugang nga mga Kalihokan sa Pagkat-on
Ideya sa biswal nga pagkat-on
Pagkahuman sa pagtubag sa mga estudyante sa tsart nga nagkompara sa kinabuhi ni Jesus nga wala pa dinhi sa yuta ug sa Iyang kinabuhi dinhi sa yuta, ikonsiderar ang pagpakita og mga hulagway aron makatabang sa mga estudyante pinaagi sa biswal nga masabtan ang pagkunsad ni Jesukristo. Pananglitan, ang hulagway sa sinugdanan niini nga leksiyon mahitungod ni Jesukristo isip ang Tiglalang mahimong ipakita diha sa wala nga bahin sa pisara. Ang mga hulagway sama sa mosunod mahimong ipakita diha sa tuo nga bahin sa pisara. Dapita ang mga estudyante nga ikompara ang ilang nakita diha sa mga hulagway ug kon nganong nagtuo sila nga boluntaryong mikanaog si Jesus gikan sa unsay ilang nakita diha sa wala nga bahin ngadto sa ilang nakita diha sa tuo nga bahin.
Ang himaya ni Jesukristo human sa kinabuhi dinhi sa yuta
Tabangi ang mga estudyante nga masabtan ang gahom ug himaya nga mibalik si Jesukristo pagkahuman sa Iyang kinabuhi sa yuta ug diin uban niini mokanaog Siya sa Iyang Ikaduhang Pag-anhi. Ikonsiderar ang pagpakita og hulagway sama sa mosunod ug dapita ang mga estudyante nga basahon ang mga tudling sa kasulatan sama sa Mateo 25:31 ug Doktrina ug mga Pakigsaad 29:11 . Mahimo usab nga basahon ug kantahon sa mga estudyante ang “Jesus, Kanhi Kabus” (Mga Himno, nu. 117).