Juan 1:1–51

Mga Titulo ug mga Tahas ni Jesukristo

Si Apostol Juan miila sa daghang tahas ug mga titulo sa Manluluwas diha sa kinaunahang kapitulo sa iyang asoy. Makatabang nimo kini nga leksiyon nga mas makaila kang Jesukristo samtang mag-ila ug magkat-on mahitungod sa pipila sa Iyang mga titulo ug mga tahas.

Pagpokus sa mga titulo ug mga tahas ni Jesukristo. Tudloi ang mga estudyante nga ilhon ang lain-laing mga titulo ni Jesukristo nga makita sa mga kasulatan. Tabangi sila sa pagsusi sa kahulogan sa titulo, nganong gigamit kini niana nga partikular nga sitwasyon, ug unsa ang natabang kanato sa titulo sa pagkat-on mahitungod kang Jesukristo.

Pag-andam sa estudyante: Dapita ang mga estudyante nga pangutan-on ang ilang mga higala ug mga sakop sa pamilya kon unsang mga titulo o mga tahas ni Jesukristo ang pinakamakahuluganon kanila ug kon ngano.

Posible nga mga Kalihokan sa Pagkat-on

Mga titulo ug mga tahas

Sulod sa 60 ka segundo, pagsulat og daghang mga titulo o mga tahas para sa imong kaugalingon sigon sa imong makaya (pananglitan, ig-agaw, estudyante, sekretarya sa imong klase sa Young Women, ug uban pa).

Sa sulagma nga paagi nga pagpili og usa ka titulo o tahas gikan sa imong listahan, ug hunahunaa nga kini lamang ang butang nga nahibaloan sa usa ka tawo mahitungod kanimo.

• Unsang uban pang importanteng impormasyon ang ilang nataligam-an kon kana lamang ang ilang nahibaloan mahitungod kanimo?

• Unsa kalahi kaha ang imong relasyon sa usa ka tawo nga nakasabot sa kada usa sa imong lain-laing mga titulo ug mga tahas?

Ikonsiderar ang pagdapit og pipila ka estudyante sa pagpaambit sa ilang mga listahan. Pagpili og usa ka listahan, ug basaha og kusog ang usa lamang ka tahas o titulo gikan sa panid. Tan-awa kon makatagna ba ang mga estudyante kon kinsa nga estudyante ang gihulagway niini. Unya basaha og kusog ang tibuok nga listahan. Tan-awa kon gusto ba nga bag-ohon sa mga estudyante ang ilang mga tubag pagkahuman sa pagkahibalo sa kadaghanan sa lain-laing mga titulo ug mga tahas niining tawhana.

Nakahibalo si Jesukristo sa tanan mahitungod kanimo ug gihigugma ka Niya. Tungod kay madawat lamang sa kada usa kanato ang gasa sa kinabuhing dayon pinaagi sa pag-ila Kaniya (tan-awa sa Juan 17:3), Siya midapit nimo nga makahibalo usab mahitungod Kaniya. Ang kada titulo ug tahas ni Jesukristo diha sa mga kasulatan nagtudlo og butang nga talagsaon ug importante mahitungod Kaniya. Gisugdan ni Juan ang iyang Ebanghelyo pinaagi sa pagpaambit og daghang mga importanteng titulo nga makatabang kanato nga mas makaila pa gayod sa Manluluwas.

Basaha ang Juan 1:29 , ug pangita og titulo nga gigamit aron ihulagway ang Manluluwas niini nga bersikulo.

Ikonsiderar ang pagsugod og panid sa imong journal sa pagtuon nga gitawag og “Mga Titulo ug Mga Tahas ni Jesukristo” ug pagsulat og “ang Kordero sa Dios.” (Kon aduna na kay gitagana nga mga panid sa journal sa miaging leksiyon sa imong nakat-onan mahitungod kang Jesukristo karong tuiga, ikonsiderar ang pagsugod niini nga listahan sa usa niadto nga mga panid.)

Ikonsiderar ang pagsugod og listahan diha sa pisara sa mga titulo ug mga tahas sa Manluluwas, nga pareho sa gibuhat sa mga estudyante sa ilang mga journal. Idugang niini nga listahan diha sa pisara samtang adunay gituki nga dugang pang mga titulo ug mga tahas sa kinatibuk-an sa leksiyon.

• Unsa ang gitudlo niini nga titulo kanimo mahitungod ni Jesukristo? Unsa man ang gitudlo niini kanimo mahitungod sa Langitnong Amahan?

Ang usa ka paagi sa pagpalambo sa atong pagsabot bahin sa mga titulo ug mga tahas sa Manluluwas mao ang pagtuon sa uban pang mga kasulatan o mga pamahayag sa komperensiya nga mas nagpasabot sa Iyang mga titulo ug mga tahas. Makatabang kanimo sa imong pagtuon ang Giya ngadto sa mga Kasulatan, ug sa pagpangita sa mga function diha sa ChurchofJesusChrist.org ug sa Gospel Library nga app.

Pangitaa ang “Jesukristo, Kordero sa Dios” diha sa Giya sa Mga Kasulatan ug basaha ang uban pang mga tudling sa kasulatan nga nagtudlo kanimo mahitungod sa Manluluwas ug sa Iyang misyon pinaagi niining balaang titulo nga gigamit ni Juan.

• Unsa nga mga panabot ang imong naangkon gikan kang Jesukristo isip ang Kordero sa Dios?

Pagkahuman sa pagpaminaw sa mga tubag sa miaging pangutana, tukia kon makabenepisyo ang mga estudyante gikan sa pagpasabot ni Presidente Nelson niini nga titulo, nga makita sa seksiyon nga “Komentaryo ug Background nga Impormasyon” sa leksiyon.

Ikonsiderar ang pag-awhag sa mga estudyante nga kompletohon ang mosunod nga pagpangita sa kasulatan kauban ang usa ka pares.

Basaha ang Juan 1:1–14, 41, 49 , ug ipadayon sa pagdugang sa imong panid sa journal ang mga titulo ug mga tahas ni Jesukristo nga imong nakita niini nga mga tudling. Mahimo usab nimong basahon ang Hubad ni Joseph Smith, Juan 1:1–14 (sa appendix sa Hubad ni Joseph Smith).

Pagdapit og mga boluntaryo nga ipaambit ang ilang nakita sa klase, ug awhaga ang mga estudyante nga idugang sa ilang mga listahan ang bisan unsang mga titulo o mga tahas nga ilang nataligam-an.

• Unsang uban pang mga titulo o mga tahas sa Manluluwas ang imong nahibaloan nga wala sa Juan 1?

• Hain niini ang adunay espesyal nga kahulogan nganha kanimo? Ngano man?

Pagkat-on mahitungod ni Kristo

Ang pagpasabot og konsepto sa imong mga kaugalingong pulong makatabang kanimo nga mas masabtan kini ug makatabang kanimo nga ang Espiritu Santo nagpamatuod bahin sa mga kamatuoran nga imong gipasabot.

Dapita ang mga estudyante sa pagkompleto sa mosunod nga kalihokan diha sa ilang mga journal sa pagtuon. Ikonsiderar ang pagpakita sa mosunod nga tulo ka pangutana para sa pakisayran sa mga estudyante.

Gikan sa listahan sa imong journal sa pagtuon, pagpili og titulo o tahas ni Jesukristo nga nakakuha sa imong pagtagad, o pagpili og laing titulo o tahas nga gusto nimong makat-onan pa. Hunahunaa nga gusto nimong magpasabot mahitungod kang Jesukristo sa usa ka tawo gamit ang titulo o tahas nga imong gipili. Andama kon unsa ang imong isulti kanila sa usa ka parapo [paragraph] sa dili minos sa lima ka pamahayag. Paglakip og dili minos sa duha ka pakisayran sa kasulatan nga sa imong hunahuna makatabang sa imong pagtuon. Ikonsiderar ang paggamit sa Giya ngadto sa mga Kasulatan, ug uban pang mga kapanguhaan ingon man ang mosunod nga mga pangutana aron giyahan ka sa imong tubag.

• Unsa ang gitudlo niini nga titulo o tahas nganha kanimo mahitungod ni Jesukristo?

• Nganong importante man nganha kanimo ang mas makasabot og maayo sa Manluluwas niini nga tahas?

• Kanus-a nimo nakita nga milihok ang Manluluwas niini nga titulo o tahas sa imong kinabuhi o sa kinabuhi sa usa ka tawo?

Ikonsiderar ang pagdapit sa mga estudyante nga gamiton ang titulo o tahas nga ilang gitun-an aron tudloan ang usa ka pares mahitungod kang Jesukristo. Paglakaw-lakaw sa kuwarto ug paminaw samtang nagpaambit ang mga estudyante sa ilang mga kauban.

Dasiga ang mga estudyante nga ipadayon ang pagkat-on mahitungod sa Manluluwas pinaagi sa Iyang mga titulo ug mga tahas ug pagpaambit sa klase kon unsa nga bag-ong mga panabot ang aduna sila mahitungod Kaniya sa tibuok tuig.

Komentaryo ug Background nga Impormasyon

Unsay ipasabot nga si Jesukristo mao ang Pulong?

Si Presidente Russell M. Nelson mipasabot:

Ubos sa sugo sa Amahan, si Jesus ang Tiglalang. Ang iyang titulo mao “ang Pulong.” … “Sa pinulongan nga Griyego sa Bag-ong Tugon, kana nga Pulong mao ang Logos, o “ekspresyon.” Laing ngalan kana sa Agalon. Kana nga terminolohiya daw katingad-an, pero haom. Mogamit kita og mga pulong sa pagpahayag sa atong ekspresyon ngadto sa uban. Mao nga si Jesus mao ang Pulong, o ekspresyon, sa Iyang Amahan ngadto sa kalibotan.

(Russell M. Nelson, “Jesus the Christ: Our Master and More,” Ensign, Abr. 2000, 4)

Nganong tawgon man si Jesukristo nga Kordero sa Dios?

Si Presidente Russell M. Nelson mitudlo:

Sa Daang Tugon adunay daghang paghisgot sa pag-ula, nga nagkinahanglan sa pagsakripisyo og mananap. Dili puwede ang bisan unsa lamang nga mananap. Ang espesyal nga mga konsiderasyon naglakip sa:

• pagpili sa kinamaguwangang mananap sa panon, nga walay ikasaway [tan-awa sa Levitico 5:18 ; 27:26 ],

• pagsakripisyo sa kinabuhi sa mananap pinaagi sa pagpaagas sa dugo niini [tan-awa sa Levitico 9:18 ],

• kamatayon sa mananap nga walay nabali nga bukog [tan-awa sa Exodo 12:46 ; Numeros 9:12 ], ug

• usa ka mananap mahimong isakripisyo isip pagpuli nga buhat para sa lain [tan-awa sa Levitico 16:10 ].

Ang Pag-ula ni Kristo mituman niini nga mga sundanan sa Daang Tugon. Siya ang unang natawo nga Kordero sa Dios, nga walay ikasaway. Ang Iyang sakripisyo nahitabo pinaagi sa pagpaagas og dugo. Walay nabali nga bukog sa Iyang lawas—makapaikag nga ang duha ka kriminal nga gilansang sa krus uban sa Ginoo gibalian sa ilang mga bitiis [tan-awa sa Juan 19:31–33 ]. Ang Iya mao ang usa ka sakripisyo nga puli para sa uban.

(Russell M. Nelson, “The Atonement,” Ensign, Nob. 1996, 34–35)

Juan 1:14 . Tungod kay kitang tanan mga anak sa Dios, sa unsang paagi nga gikonsiderar si Jesus nga Bugtong Anak sa Amahan?

Bisan pa kon ang kada usa sa atong mga espiritu literal nga anak sa Dios, si Jesukristo ang bugtong anak sa Dios nga natawo sa unod, nga nagpasabot sa pagkamortal. Si Elder James E. Talmage (1862–1933) sa Korum sa Napulog Duha ka Apostoles mitudlo:

Kana nga Bata nga matawo kang Maria anak ni Elohim, ang Amahan sa Kahangtoran. … Ang Batang Jesus mopanunod sa pisikal, mental, ug espirituwal nga mga kinaiya, mga kalagmitan, ug mga gahom nga naghulagway sa Iyang mga ginikanan—ang usa imortal ug nahimaya—ang Dios, ang usa tawo—babaye.

(James E. Talmage, Jesus the Christ [1916], 81)

Juan 1:18 . Ang pamahayag ba niini nga bersikulo nagpasabot nga imposibleng makita ang Dios?

Ang Hubad ni Joseph Smith sa Juan 1:18 (tan-awa ang footnote c) nagklaro nga sa dihang mipakita ang Langitnong Amahan sa Iyang mga anak, nagsaksi Siya sa Iyang Anak, si Jesukristo. Ang usa ka ehemplo niini anaa sa Joseph Smith—Kasaysayan 1:17 .

Dugang nga Kalihokan sa Pagkat-on

Uban pang mga titulo ug mga tahas ni Jesukristo

Dapita ang mga estudyante nga pangitaon ang “Jesukristo” sa Giya ngadto sa mga Kasulatan nga mangita og dugang pang mga titulo ug mga tahas ni Jesukristo. Kon ang mga estudyante unang moila og partikular nga mga butang sa ilang kinabuhi nga gikinahanglan nila ang tabang sa Manluluwas, mahimo dayon silang awhagon nga pangitaon ang Iyang mga titulo ug mga tahas nga nagpakita sa Iyang abilidad sa pagtubag sa ilang partikular nga mga panginahanglan. Pananglitan, kon naglisod ang usa ka estudyante nga mahibalo kon sa unsang paagi sila mapasaylo sa ilang mga sala, ang pagsabot sa tahas ni Kristo isip ang Kordero sa Dios makatabang kanila nga makita nga posible ang kapasayloan.