Pag-angkon og Espirituhanong Kahibalo, Bahin 2

Pagsusi sa mga Konsepto ug mga Pangutana inubanan sa Mahangturon nga Panglantaw

Ang usa sa mga katuyoan sa doktrinal nga kahanas mao ang pagtabang kanimo sa pagkat-on ug paggamit sa mga baroganan para sa pag-angkon og espirituhanong kahibalo aron mahimong mas mahisama ni Jesukristo. Kini nga leksiyon makatabang kanimo sa pagkat-on sa pagsusi sa mga isyu inubanan sa mahangturong panglantaw aron mas klaro kining makita.

Hinumdomi: Tingali pinakamaayo kon itudlo kini nga leksiyon sa sinugdanan sa tuig nga ting-eskuwela. Kon kinahanglang ibalhin kini nga leksiyon gikan niini nga semana ngadto sa mas nag-una o mas ulahi nga semana, ikonsiderar ang pagtudlo sa leksyon sa doktrinal nga kahanas isip puli niini ngamahimong nataligam-an sa mga estudyante niadtong walay klase ang eskuwelahan.

Pag-andam sa estudyante: Awhaga ang mga estudyante nga pamalandongan ang hagit o pangutana nga aduna sila o hunahunaon ang pangutana nga gipili nila nga lihokon nga inubanan sa hugot nga pagtuo sa leksiyon nga “Pag-angkon og Espirituhanong Kahibalo, Bahin 1.” Awhaga sila nga pamalandongan kon unsa ang mahimong sunod nga mga lakang aron makakita og dugang pa nga tabang niini nga pagsulay o pangutana.

Posible nga mga Kalihokan sa Pagkat-on

Mga pangutana ug mga hagit

Usahay makasinati kita og mga hagit o mga pagsulay nga mosulay sa atong hugot nga pagtuo. Nagpaambit si Presidente Russell M. Nelson og usa ka pagsulay nga nasinati sa asawa sa iyang apo.

Tan-awa ang “Let God Prevail” gikan sa code sa oras nga 5:50 hangtod sa 6:39, o basaha ang mosunod nga teksto:

Dili pa lang dugay, ang asawa sa usa sa among mga apo nanlimbasug sa espirituhanong paagi. Ako siyang tawgon og “Jill.” Bisan pa sa pagpuasa, pag-ampo, ug mga panalangin sa pagkapari, himatyon ang amahan ni Jill. Nahadlok siya pag-ayo nga mawad-an siya sa iyang amahan ug sa iyang pagpamatuod.

Sa usa ka lawom na nga kagabhion, ang akong asawa, si Sister Wendy Nelson, misulti kanako sa sitwasyon ni Jill. Pagkasunod buntag gibati ni Wendy nga ipaambit kang Jill nga ang akong tubag sa iyang espirituhanon nga pakigdumog mao ang usa ka pulong! Ang pulong mao ang myopic.

(Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 93)

Ang pulong nga myopic nagpasabot nga sa duol ra makakita o mubo og panglantaw.

• Unsa ang pipila ka kamatuoran mahitungod sa Dios ug sa Iyang plano nga mahimong makatabang kang Jill nga dili mahadlok kon unsa ang lagmit nga mahitabo sa umaabot?

Hunahunaa ang usa ka hagit o pangutana nga imong kasamtangang giatubang. Tingali pareho kini sa imong gituki sa leksiyon nga “Pag-angkon og Espirituhanong Kahibalo, Bahin 1”.

• Nganong ikaw gusto man ug nanginahanglan nga tabangan niini nga pangutana o hagit?

Hinumdomi nga OK lamang nga makasinati og kaguol ug kasakit. Bisan si Jesus naguol para sa Iyang mga minahal (tan-awa sa Juan 11:32–36). Kon tan-awon nato ang atong mga sitwasyon uban sa mahangturong panglantaw, makatabang ang Ginoo kanato sa pagdumala niini nga mga pagbati. Pangitaa ang mga kamatuoran niini nga leksiyon nga makatabang kanimo sa pagbuhat niini diha sa imong kaugalingong mga pangutana ug mga hagit.

Mga baroganan sa pag-angkon og espirituhanong kahibalo

Kon makasinati kita og mga hagit sa kinabuhi o mag-atubang og wala pa matubag nga mga pangutana, makatabang kanato ang mosunod nga mga baroganan sa pag-angkon og espirituhanong kahibalo:

1. Lihokon inubanan sa hugot nga pagtuo.2. Susihon ang mga konsepto ug mga pangutana inubanan sa mahangturong panglantaw.3. Tinguhaon ang dugang nga panabot pinaagi sa balaanong gitudlo nga mga tinubdan.

Niini nga leksiyon, magpokus kita sa kamatuoran nga samtang magsusi kita sa mga isyu inubanan sa mahangturong panglantaw, ang Espiritu Santo makatabang kanato nga mas klaro kining makita.

Basaha ang parapo [paragraph] 8 sa seksiyon nga “Pag-angkon og Espirituhanong Kahibalo” sa Mahinungdanong Dokumento sa Doktrinal nga Kahanas ug bisan usa lamang sa mosunod nga mga tudling sa kasulatan. Markahi ang mga pulong o hugpong sa mga pulong nga makatabang kang Jill nga makita ang iyang mga pagsulay inubanan sa mahangturong panglantaw.

2 Mga Taga-Corinto 4:17–18

Mosiah 4:9

Doktrina ug mga Pakigsaad 58:2–4

• Base sa imong nabasa, unsa ang gusto nimo nga mahibaloan ni Jill mahitungod sa pagbaton og mahangturong panglantaw?

• Unsa nga mga kasinatian sa pagbaton og mahangturong panglantaw nga nasinati nimo (o sa ubang tawo) nga mahimo nimong ipaambit kang Jill?

Unsaon pagsusi sa mga pangutana o mga kabalaka inubanan sa mahangturong panglantaw

Kon aduna kitay mga pangutana o mga kabalaka, ang usa ka proseso nga atong masunod aron makatabang kanato nga makita ang mga butang gikan sa mahangturong panglantaw mao ang:

Sa tibuok nahibiling bahin sa leksiyon, ipakita para sa mga estudyante ang mosunod nga tulo ka lakang.

1. Pag-ila sa bisan unsang mga pangagpas nga atong gibuhat nga lagmit nga moresulta sa sayop nga pagsabot mahitungod sa Langitnong Amahan o sa Iyang plano.2. Pag-ila sa mga kamatuoran mahitungod sa Langitnong Amahan o sa Iyang plano nga makakorihir niini nga mga pangagpas.3. Pag-usab sa pangutana pinaagi sa pagkonsiderar niini inubanan sa mahangturong panglantaw o pinaagi sa pagbag-o sa pangutana aron pamalandongan ang mga kamatuoran sa ebanghelyo.

• Unsa nga mga pangagpas ang lagmit nga aduna si Jill nga mahimong moresulta ngadto sa mga pagduda o mga kahadlok?

Ang pipila ka mubo nga panglantaw nga mga pangagpas nga lagmit nga buhaton sa usa ka tawo sa sitwasyon ni Jill mahimong maglakip sa: pagkamatay sa minahal sa kinabuhi nga sayo kaayong nahitabo; basin kon dili na gayod nila makita pag-usab ang ilang namatay nga minahal sa kinabuhi; o nagdepende ang ilang pagpamatuod sa usa ka milagro nga nagluwas sa ilang minahal sa kinabuhi gikan sa kamatayon. Kini nga mga pangagpas lagmit nga mag-aghat sa mga tawo nga nag-antos sa ilang kaguol nga mangutana sama sa “Kon gimahal ko sa Dios, nganong kuhaon man Niya kanako ang akong minahal sa kinabuhi?”

Kasagaran, ang pagbuhat og susama nga mga pangagpas mahimong maghatag kanato og dugang pang kaguol o kasakit nga labaw pa sa ato nang nasinati. Makatabang ang pag-ila sa mga kamatuoran mahitungod sa Langitnong Amahan o sa Iyang plano.

• Unsa nga mga kamatuoran ang imong nahibaloan mahitungod sa Langitnong Amahan ug sa Iyang plano nga mahimong makatabang?

Ang posibleng mga tubag mahimong maglakip sa:

• Ang mga hunahuna ug mga pamaagi sa Ginoo mas taas kay sa atoa (tan-awa sa Isaias 55:8–9).

• Kon mohimo ug motuman kita sa mga pakigsaad sa templo, mahiusa kita pag-usab sa atong mga minahal sa kinabuhi pagkahuman niining kinabuhia pinaagi sa gahom sa Manluluwas (tan-awa sa Doktrina ug mga Pakigsaad 138:47–48).

• Gitugotan sa Dios nga makasinati kita og mga pagsulay aron sulayan ang atong hugot nga pagtuo (tan-awa sa Ether 12:6 ; Doktrina ug mga Pakigsaad 98:14).

• Unsa ang pipila ka paagi nga mahimo nimong mabag-o gikan sa mahangturong panglantaw ang posibleng mga kabalaka sa usa ka tawo sa sitwasyon ni Jill? (Pananglitan, mahimo kang magsukna og mga pangutana nga nagpakita og mahangturong panglantaw, sama sa “Unsaon nako nga mabati ang gugma sa Dios samtang nakasinati ako niini nga kasakit nga nawad-an sa minahal sa kinabuhi bisan pa kon nakahibalo gayod ako nga temporaryo lamang kini?” o “Unsaon nako pagsalig sa akong hugot nga pagtuo diha sa Manluluwas aron mosalig nga makita nako pag-usab ang akong minahal sa kinabuhi?”)

Gipaambit ni Presidente Nelson kon sa unsang paagi nga gipanalanginan si Jill pinaagi sa pagbaton og mahangturong panglantaw diha sa iyang pagsulay.Tan-awa ang “Let God Prevail,” nga anaa sa ChurchofJesusChrist.org, gikan sa code sa oras nga 6:58 hangtod sa 8:24, o basaha ang pamahayag sa ubos:

Human mitaliwan ang amahan ni Jill, ang pulong nga myopic nagbalik-balik sa iyang huna-huna. Giablihan niya ang iyang kasingkasing aron mas makasabot og maayo nga ang myopic nagpasabot og “mubo nga panglantaw.” Ug ang iyang panghunahuna misugod sa pagkausab. Si Jill miingon, ang “Myopic nakapahimo nako sa paghunong, paghunahuna, ug pagkaayo. Kana nga pulong karon mipuno kanako og kalinaw. Nagpahinumdom kini kanako nga palapdan ang akong panglantaw ug magtinguha sa mahangturon. Nagpahinumdom kini kanako nga adunay balaanong plano ug nga ang akong papa buhi pa ug nagmahal ug nagbantay kanako. Ang myopic nagdala kanako ngadto sa Dios.”

Mapagarbuhon kaayo ko sa bililhong asawa sa among apo. Atol niining makaguol kaayo nga panahon sa iyang kinabuhi, si Jill nakakat-on sa paghangop sa kabubut-on sa Dios para sa iyang papa, uban sa mahangturong panglantaw para sa iyang kaugalingong kinabuhi. Pinaagi sa pagpili nga ipatigbabaw ang Dios labaw sa tanan, nakakaplag siya og kalinaw.

(Russell M. Nelson, “Ipatigbabaw ang Dios Labaw sa Tanan,” 93)

• Sa unsang paagi gipanalanginan si Jill samtang nagpabilin siya nga may mahangturong panglantaw?

Pamalandongi ang hagit o pangutana nga imong giila sa unang bahin niini nga leksiyon. Trabahoa ang imong pangutana o hagit diha sa imong journal sa pagtuon gamit ang tulo ka lakang nga bag-ohay nimong nakat-onan.

Human sa igong panahon, dapita ang mga estudyante sa pagpakigbahin kon unsay ilang nakat-onan gikan niini nga kalihokan ug magsukna og bisan unsang mga pangutana nga aduna gihapon sila. Mohatag og pagpamatuod sa mga kamatuoran nga gihisgotan niini nga leksiyon, ug dapita ang mga estudyante sa pagpaambit usab sa ilang mga pagpamatuod.

Komentaryo ug Background nga Impormasyon

Sa unsa nga paagi nga ang pagpabilin nga may mahangturong panglantaw makatabang kanako kon makasinati ako og kaguol o mamatyan og minahal sa kinabuhi?

Gipasabot ni Presidente Russell M. Nelson kon sa unsang paagi nga ang pagpabilin nga may mahangturong panglantaw nakatabang kaniya sa dihang kalit nga namatay ang iyang asawa nga si Dantzel ug sa dihang namatay ang iyang anak nga babaye nga si Wendy pagkahuman sa dugay nga pakigbatok sa kanser:

Niadtong 2005, human sa dul-an 60 ka tuig nga kaminyoon, ang akong minahal nga si Dantzel wala damha nga gitawag ngadto sa langitnong panimalay. Sulod sa usa ka panahon, hapit dili ko makalihok sa kasubo. Pero ang mensahe sa Pasko sa Pagkabanhaw ug ang saad sa pagkabanhaw mipalahutay kanako.

(Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 94)

Gimingaw kaayo kami sa among anak. Pero, tungod sa gipahiuli nga ebanghelyo ni Jesukristo, wala kami mabalaka bahin kaniya. Samtang padayon namong gitahod ang among mga pakigsaad sa Dios, nagpuyo kami nga nagpaabot sa among pagpakig-uban kaniya pag-usab. Sa pagkakaron, nagserbisyo kami sa Ginoo dinhi ug siya nagserbisyo Kaniya didto—sa paraiso.

(Russell M. Nelson, “Dali, Sunod Kanako,” Liahona, Mayo 2019, 88)

Nganong importante man ang atong mga pangagpas?

Gipaambit ni Presidente Dallin H. Oaks sa Unang Kapangulohan nga:

Tungod kay ang mga Santos sa Ulahing mga Adlaw nahibalo sa plano sa Langitnong Amahan para sa Iyang mga anak, atong nahibaloan nga kining mortal nga kinabuhi dili usa ka hugna nga dula nga gitaliwad-an sa wala mahibaloi nga kagahapon ug sa walay kasigurohang umaabot. Kining kinabuhia sama og maoy ikaduhang akto sa tulo ka akto nga drama. Ang katuyoan niini gipasabot pinaagi sa gipadayag mahitungod sa atong pagpuyo isip mga espiritu diha sa Akto 1 ug ang mahangturon natong destinasyon diha sa Akto 3. Tungod sa atong kahibalo sa plano ug sa ubang kamatuoran nga gipadayag sa Dios, nagsugod kita sa managlahing pangagpas kaysa niadtong wala makahibalo sa atong nahibaloan. Isip resulta, magkalahi kita og mga konklusyon sa daghang importante nga mga hilisgotan nga hukman lamang sa uban pinasubay sa ilang mga opinyon mahitungod sa mortal nga kinabuhi.

(Dallin H. Oaks, “As He Thinketh in His Heart” [gabii kauban sa usa ka Kinatibuk-ang Awtoridad, Peb. 8, 2013], 3–4)

Unsaon nako sa pag-usab ang akong mga pangutana ug mga kabalaka aron makita kini gikan sa mahangturong panglantaw?

Si Brother Chad H Webb, administrator sa Seminaries and Institutes of Religion, miingon:

Kon sugdan nato uban sa mahangturong panglantaw, moabot kita sa mga konklusyon nga nagpakita sa mahangturong kamatuoran. Pero kon sugdan nato uban sa kalibotanong panghunahuna malagmit nga mosangko kita sa kalibotanong mga konklusyon. Mao nga kinahanglan natong usbon ang ubang mga pangutana tungod kay dili kita yanong modawat sa mga ebidensya diin kini gipasikad.

Sama pananglit, tingali ikaw gipangutana, “Dili ba angay nga magminyo ang duha ka tawo nga nagkahigugmaay sa usag usa?” Gikan sa panglantaw sa kalibotan, ang tubag mora og oo. Pero hunahunaa ang unsay inyong nahibaloan sa plano sa kaluwasan ug mahitungod sa katuyoan sa Langitnong Amahan alang sa kaminyoon. Ang plano sa kaluwasan naghatag og mahangturong panglantaw ug ebidensya sa ebanghelyo nga nag-usab sa pangutana. Ang ubang mga pangutana nga mahimo ninyong ikonsiderar mao ang “Ngano ang pamilya giorden sa Dios?” o “Nganong giestablisar sa Ginoo ang kaminyoon tali sa lalaki ug babaye?” Hunahunaa unsay inyong nahibaloan mahitungod sa espiritu nga mga anak sa Langitnong Amahan—diin sila gikan ug unsay Iyang gusto para kanila karon ug sa kahangtoran. Hunahunaa nganong Iya kitang gipanalanginan og gahom sa pagbugkos sa mga pamilya diha sa mga templo. Sa unsa nga paagi nga ang inyong pagsabot niini nga mga baruganan makapausab sa pangutana ug makatugot ninyo nga makakita sa isyu pinaagi sa kahayag sa ebanghelyo?

(Chad H Webb, “That They May Know How to Come unto Him and Be Saved” [Brigham Young University–Hawaii devotional, Mar. 22, 2016], byuh.edu)