Seminary
Juan 1

Juan 1

Kinatibuk-ang Pagpasabot

Gisulat ni Apostol Juan ang iyang Ebanghelyo sa katuyoan nga tabangan ang mga miyembro sa Simbahan ug ang kalibotan nga motuo nga si Jesus mao ang Kristo (tan-awa sa Juan 20:30–31). Gitudlo ni Juan nga mibiya si Jesukristo sa Iyang langitnong pinuy-anan aron moanhi sa yuta isip ang Manluluwas sa tanang katawhan. Ang Ebanghelyo ni Juan adunay daghang mga sugilanon sa mga lalaki ug mga babaye nga nakabaton og pagpamatuod nga si Jesus mao ang Kristo, ang gisaad nga Mesiyas. Ang mainampoong pagbasa ug pagpamalandong niana nga mga asoy makagiya usab sa moderno nga panahon nga mga magbabasa nga moduol ngadto Kaniya.

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya sa kon unsa ang lagmit nga kinahanglanon aron sayo nga makaandam para sa kada leksiyon.

Juan 1:1–16

Katuyoan sa leksiyon: Kini nga leksyon makatabang sa mga estudyante nga mobati og mas lawom nga pagdayeg kon kinsa si Jesukristo sa wala pa ang Iyang mortal nga pagkatawo ug ang gugma nga Iyang gipakita para kanato pinaagi sa pagtuman sa Iyang misyon dinhi sa yuta.

  • Pag-andam sa estudyante: Dapita ang mga estudyante nga pamalandongan kon unsa ang ilang nahibaloan mahitungod sa kon kinsa si Jesukristo sa wala pa Siya mianhi sa yuta.

  • Butang: Ikonsiderar ang pagdala sa klase og usa ka bola nga gigamit sa sikat nga isport o ipakita ang hulagway sa bola nga anaa sa leksiyon.

Mga sugyot sa pagtudlo pinaagi sa videoconference: Ikonsiderar ang paghimo nang daan sa spreadsheet o word-processing program sa tsart ni Jesus sa kinabuhi nga wala pa dinhi sa yuta ug kinabuhi ni Jesus dinhi sa yuta. Sa panahon sa leksiyon, ipakita ang tsart pinaagi sa pagpaambit sa imong screen. Mahimo kining tubagan sa mga estudyante sa panahon sa klase samtang nagpaambit sila sa ilang mga ideya.

Juan 1

Katuyoan sa leksiyon: Makatabang kini nga leksiyon sa mga estudyante sa mas lawom nga pag-ila kang Jesukristo pinaagi sa pagtuki ug pagkat-on mahitungod sa pipila sa Iyang mga titulo ug mga tahas.

  • Pag-andam sa estudyante: Dapita ang mga estudyante nga hangyoon ang mga higala ug mga sakop sa pamilya nga ipaambit kon unsa nga mga titulo o mga tahas ni Jesukristo ang pinakamakahuluganon kanila ug ngano.

  • Sugyot sa pagtudlo pinaagi sa videoconference: Sa kataposan sa leksiyon, ikonsiderar ang paggamit og breakout room feature sa imong videoconference software aron tugotan ang mga estudyante nga tudloan ang pares mahitungod kang Jesukristo gamit ang usa sa Iyang mga titulo o mga tahas.

Juan 1:35–51

Katuyoan sa leksiyon: Kini nga leksiyon makatabang sa mga estudyante nga mas makatubag sa imbitasyon sa Manluluwas nga “[moduol ug tan-awon]” mismo sa ilang kaugalingon (tan-awa sa Juan 1:39).

  • Pag-andam sa estudyante: Dapita ang mga estudyante nga pamalandongan ang usa ka kasinatian nga nakatabang kanila nga mas klarong masabtan kon kinsa si Jesukristo. Sa unsa nga paagi nahitabo kini nga kasinatian?

Pag-angkon og Espirituhanong Kahibalo, Bahin 2

Katuyoan sa leksiyon: Kini nga leksiyon makatabang sa mga estudyante sa pagsusi sa mga isyu nga adunay mahangturong panglantaw aron mas klaro kining makita.

  • Pag-andam sa estudyante: Dapita ang mga estudyante nga pamalandongan ang hagit o pangutana nga aduna sila o, kon angay, hunahunaon ang pangutana nga gipili nilang lihokon inubanan sa hugot nga pagtuo diha sa leksiyon nga “Pag-angkon og Espirituhanong Kahibalo, Bahin 1.”

  • Sugyot sa pagtudlo pinaagi sa videoconference: Ikonsiderar ang paghimo og slide presentation aron ipaambit sa imong screen ang mga pamahayag nga mapuslanon gikan ni Presidente Nelson ug gikan sa seksiyon nga “Komentaryo ug Background nga Impormasyon”.

Susiha ang Imong Nakat-onan 1

Katuyoan sa leksiyon: Hatagan niini nga leksiyon ang mga estudyante og oportunidad nga susihon ang ilang mga tinguha, pagtuon, ug personal nga paglambo. Ang mga partikular nga resulta sa kurso nga susihon mismo sa mga estudyante naglakip sa ilang abilidad sa pagtuon sa mga kasulatan ug paggamit sa mga pulong sa Ginoo sa ilang kinabuhi, aron makadawat og personal nga pagpadayag gikan sa Espiritu Santo, ug aron mapasabot ang pipila sa mga tahas ni Jesukristo.

  • Pag-andam sa estudyante: Dapita ang mga estudyante nga hunahunaon kon unsa ang kalamboan sa ilang pagtuon sa kasulatan ug mag-andam nga ipaambit ang mga ideya nga aduna sila o mga paagi nga miusbaw ang ilang pagtuon bag-ohay lang.

  • Mga Materyal: Kon anaa, pag-andam og daghang mga materyal sa sining kon posible aron tugotan ang mga estudyante nga kompletohon ang mga kalihokan sa pagsusi sa paagi nga gusto nila.

  • Sugyot sa pagtudlo pinaagi sa videoconference: Sa higayon nga ang mga estudyante mopaambit sa ilang mga hinimo sa klase, tugoti sila nga ipaambit ang ilang mga screen aron mas klarong makita sa ilang mga klasmeyt ang ilang mga hinimo.

Iprinta