Christ walking on seashore beckoning to Peter and Andrew to become his apostles--fishers of men. Figures are crude; nice glow about Christ.
Gidapit ni Jesus ang Iyang nag-una nga mga disipulo aron makita nila mismo kon kinsa Siya ug mosunod Kaniya. Ang pagtuon niini nga mga asoy sa Juan makatabang kanimo sa pagsabot kon unsaon nimo pagtubag sa pagdapit sa Manluluwas nga “umari kamo ug makita ninyo” mismo sa inyong kaugalingon.
Pag-andam sa estudyante: Dapita ang mga estudyante nga pamalandongan ang usa ka kasinatian nga nakatabang kanila nga mas klarong masabtan kon kinsa si Jesukristo. Sa unsang paagi nga kini nahitabo?
Posible nga mga Kalihokan sa Pagkat-on
“Dali Kamo ug Tan-awa Ninyo”
Kon posible, pagpakita og hulagway sa Korum sa Napulog Duha ka Apostoles.
Hunahunaa nga ikaw ug usa ka higala nagbaktas pauli gikan sa eskuwelahan ug gihisgotan nimo nga imong nahibaloan nga adunay Apostol nga moabot sa dili madugay aron mamulong sa usa ka panagtigom sa imong lugar.
Ngano man kaha nga sultihan nimo ang imong higala nga mouban kanimo ug sa imong pamilya aron makita ug madungog kini nga Apostol, imbes nga ihulagway lamang ang pakigpulong pagkahuman niini?
Gisulat ni Apostol Juan kon giunsa pagpaila ni Juan nga Magbubunyag ang pipila sa iyang mga sumusunod ngadto kang Jesukristo. Tun-i ang Juan 1:35–51 , ug pangitaa kon unsa ang mahitabo samtang nagtinguha kita nga makakat-on ug mosunod kang Jesukristo (tan-awa sab ang Hubad ni Joseph Smith, Juan 1:42 [diha sa Appendix sa Hubad ni Joseph Smith ).
Unsang mga pagdapit niini nga mga bersikulo ang gidawat sa mga disipulo sa Manluluwas aron matabangan sila sa pagsunod Kaniya?
Unsay imong nakat-onan gikan sa mga kasinatian ug mga aksiyon ni Andres ug Felipe niini nga mga bersikulo?
Tabangi ang mga estudyante sa pagpakigbahin sa mga baroganan nga ilang nakat-onan gikan niini nga asoy. Mahimong makatabang kon awhagon ang mga estudyante nga ipaambit ang ilang nakita ngadto sa usa ka klasmeyt, o mahimong modapit og pipila ka estudyante nga magpaambit sa klase. Ang pipila ka ehemplo sa mga baroganan nga ilang ilhon mahimong naglakip sa:
Samtang atong dawaton ang pagdapit aron magkat-on ug mosunod kang Jesukristo, makadawat kita og kaugalingon natong pagsaksi mahitungod Kaniya.
Kon makadawat kita og pagsaksi mahitungod kang Jesukristo, gusto natong tabangan ang ubang tawo nga makadawat og ilang kaugalingong pagsaksi.
Pagsukna og mga follow-up nga pangutana aron makatabang nga mapalambo ang pagsabot sa mga estudyante sa unsay ilang nakit-an. Ang nahibiling bahin sa mga sugyot niini nga leksiyon gitinguha aron tabangan ang mga estudyante nga ikompara ang pagdapit sa Ginoo nga ‘dali kamo ug tan-awa ninyo’ mismo sa ilang kaugalingon, dawaton kini, ug maghunahuna og mga paagi nga magamit nila kini aron mapalig-on ang ilang mga pagpamatuod mahitungod kang Jesukristo.
Unsa ang gitudlo kanimo niini nga asoy mahitungod sa Manluluwas?
Unsa ang mabuhat nimo aron motubag sa pagdapit sa Manluluwas nga “dali kamo ug tan-awa ninyo”?
Pagtagana og 30 ka segundo aron irekord ang unang mga mahunahunaan mahitungod sa kon sa unsang paagi nga makatubag ang usa ka tawo sa pagdapit ni Jesukristo nga “dali kamo ug tan-awa ninyo.”
Ikonsiderar ang pag-awhag sa mga estudyante nga magbuhat og kalihokan aron susihon ang lain-laing mga paagi nga dawaton nila ang pagdapit sa Manluluwas nga “dali kamo ug tan-awa ninyo.” Pananglitan, paghatag og mga dry-erase marker o pipila ka buok nga chalk sa pipila ka estudyante, ug dapita sila nga magsulat diha sa pisara og usa ka paagi nga makatubag sila sa pagdapit sa Manluluwas nga “dali kamo ug tan-awa ninyo”. Unya hangyoa kadtong mga estudyante nga ihatag ang ilang chalk o marker sa laing estudyante nga wala pa nakasulat diha sa pisara aron makasulat sila og tubag. Mahimo nimong balikon kini sigon sa imong gusto.
Si Elder Ulisses Soares sa Korum sa Napulog Duha ka Apostoles mihatag sa mosunod nga mga ideya sa kon sa unsang paagi kita makatubag sa pagdapit sa Manluluwas nga “dali kamo ug tan-awa ninyo.” Tan-awa ang video nga “Unsaon Nako Pagkasabot?” gikan sa code sa oras nga 6:24 hangtod sa 7:04, o basaha ang pamahayag sa ubos. Ang video makita sa ChurchofJesusChrist.org.
Imahe
Elder Ulisses Soares, Quorum of the Twelve Apostles official portrait.
Kon modawat kita sa pagdapit sa Manluluwas nga “dali kamo ug tan-awa ninyo,” kinahanglan kitang magpabilin diha Kaniya, isubsob ang atong kaugalingon diha sa mga kasulatan, magmaya diha niini, magkat-on sa Iyang doktrina, ug magpakabuhi sa paagi sa Iyang pagpakabuhi. Niini lamang nga kita makaila Kaniya, si Jesukristo, ug makaila sa Iyang tingog, masayod nga samtang kita moduol Kaniya ug motuo Kaniya, dili gayud kita gutumon ni uhawon. Makahimo kita sa pag-ila sa kamatuoran sa tanang panahon, sama sa nahitabo niadtong duha ka disipulo nga mipabilin uban kang Jesus nianang adlawa.
(Ulisses Soares, “Unsaon Nako Pagkasabut?,” Liahona, Mayo 2019, 7)
Unsa ang imong nakat-onan gikan niini nga saysay mahitungod sa kon unsaon nato pagdawat ang pagdapit sa Manluluwas nga “dali kamo ug tan-awa ninyo”?
Ikonsiderar ang pag-awhag sa pipila ka boluntaryo nga ipaambit kon unsa ang nakatabang kanila nga mas makaila kon kinsa ang Manluluwas ug sama Siya sa unsa.
Hatagi og panahon ang mga estudyante nga mopili og usa sa mosunod nga mga kalihokan ug sugdan ang pagbuhat sa ilang plano. Ipakita ang mga opsiyon aron makita sa mga estudyante, ug paghatag og bisan unsang mga materyal nga mahimong kinahanglanon sa mga estudyante aron mabuhat nila ang ilang plano.
Pagpili og usa sa mosunod nga mga sugyot gikan sa pamahayag ni Elder Soares nga motabang kanimo sa pagsunod sa pagdapit sa Manluluwas nga “dali kamo ug tan-awa ninyo.” Kon bag-ohay lang nimong nabuhat ang usa niini nga mga kalihokan, pagpili og usa nga bag-o kanimo.
Isubsob ang imong kaugalingon diha sa mga kasulatan. Paghimo og bag-o o gipalambo nga plano sa pagtuon sa kasulatan. Ang imong plano mahimong maglakip og mga butang sama sa pagtino og oras sa adlaw ug gidugayon sa oras sa pagtuon, pagsugod sa imong pagtuon pinaagi sa pag-ampo, pagtagana og panahon para sa pagpamalandong ug pag-cross reference, ug uban pa. Unsay imong nakat-onan mahitungod ni Jesukristo gikan sa imong regular nga pagtuon?
Magmaya sa mga kasulatan. Pagmaya sa mga kasulatan pinaagi sa pagpaambit sa imong nakat-onan ngadto sa laing tawo. Tinoa kon unsa ang mahimo nimong ipaambit, unsa ka sagad, ug kang kinsa. Samtang nagpaambit ka, paghatag og hingpit nga pagtagad sa imong gibati. Unsay imong nabantayan?
Magkat-on sa Iyang doktrina. Dugangi ang imong pagsabot sa doktrina sa Ginoo pinaagi sa pagpili og doktrinal nga hilisgotan nga gusto nimong mas makat-onan. Isulat ang doktrinal nga hilisgotan sa ibabaw sa limpyong panid sa papel, o pagsugod og bag-ong “Notebooks” sa seksiyon sa Gospel Library. Unya sugdi ang pagtuon, gamit ang mga kapanguhaan sama sa Giya ngadto sa mga Kasulatan . Paghatag og pagtagad sa kon unsa ang epekto niini nga pagtuon sa imong pagpamatuod mahitungod kang Jesukristo.
Magpakabuhi sa paagi sa pagpakabuhi ni Jesus. Subaya ang imong pag-uswag pinaagi sa paggamit sa Personal nga Kalamboan: Giya nga Basahon sa Kabatan-onan. Ang pagpokus sa upat ka aspeto (espirituhanon, sosyal, pisikal, ug intelektuwal) makatabang kanimo sa pagbalanse sa imong kinabuhi ug pagduol kang Kristo. Kon wala pa nimo natakda kini nga mga tumong, ikonsiderar ang pagbuhat niini karon.
Paghimo og imong kaugalingon. Aduna bay laing paagi nga bation nimo nga nadasig nga motubag sa pagdapit sa Manluluwas nga “dali kamo ug tan-awa ninyo”? Mahimo kang maghalad og hilom nga pag-ampo aron mohangyo alang sa giya sa Langitnong Amahan. Unya irekord ang imong mga hunahuna sa kon sa unsang paagi nimo mahimong sundon kadto nga mga pagbati.
Unsaon nimo pagdawat ang pagdapit sa Manluluwas nga “dali kamo ug tan-awa ninyo”?
Unsa ang imong plano para sa kon unsaon pagpatuman niini sa imong kinabuhi?
Ikonsiderar ang pagpamatuod nga ang Langitnong Amahan ug si Jesukristo motabang sa mga estudyante nga makaila ug mosalig sa Manluluwas samtang motubag sila sa pagdapit sa Manluluwas nga “dali kamo ug tan-awa ninyo.”
Komentaryo ug Background nga Impormasyon
Juan 1:38 . Sa unsa nga paagi nga magamit nimo ang pangutana sa Manluluwas nga “Unsa ang inyong gipangita?”
Sa wala pa gidapit ni Jesus ang duha ka disipulo nga “dali kamo ug tan-awa ninyo,” gisukna Niya sila sa pangutana nga, “Unsa ang inyong gipangita?” ( Juan 1:38).Gitudlo ni Elder Jeffrey R. Holland sa Korum sa Napulog Duha ka Apostoles ang mahitungod sa kamahinungdanon sa pagpamalandong kon unsa ang atong tinuod nga tinguha sa kinabuhi samtang gikonsiderar nato ang pagdapit sa Manluluwas nga sundon Siya.
He Hath Filled the Hungry with Good Things
Imahe
Official Portrait of Elder Jeffrey R. Holland. Photographed January 2018.
Inyong mahinumduman nga sa dihang si Andres ug ang laing disipulo, tingali si Juan, unang nakadungog ni Kristo nga namulong, naimpluwensyahan ug nadani sila pag-ayo kang Jesus nga misunod sila Kaniya sa Iyang pagbiya sa panon. Nakamatikod nga Siya gisundan, si Kristo milingi ug nangutana sa duha ka tawo, “Unsa may inyong gipangita?” [ Juan 1:38 ]. Ang ubang mga hubad misulat niini sa yano nga “Unsay inyong gusto?” Sila mitubag, “Hain ka man magpuyo?” o “Taga-diin ka?” Si Kristo yanong misulti, “Dali kamo ug tan-awa ninyo” [ Juan 1:39 ]. Wala madugay human niana pormal Niyang gitawag si Pedro ug ang uban nga bag-ong mga Apostoles uban sa samang diwa sa pagdapit. Kanila Siya miingon, Dali, “kuyog kamo kanako” [ Mateo 4:19 ].
Maingon nga ang pinakamahinungdanon sa atong mortal nga panaw ug ang mga tubag sa pinakamakahuluganong mga pangutana sa kinabuhi gisumada niining duha ka mubo kaayong mga elemento sa sinugdanan nga eksena sa yutan-ong pagpangalagad sa Manluluwas. Ang usa ka elemento mao ang pangutana para sa matag usa kanato dinhi niining kalibotan: “Unsa may inyong gipangita? Unsay inyong gusto?” Ang ikaduha mao ang Iyang tubag sa atong tubag, bisan unsa pa kanang tubaga. Bisan kinsa pa kita ug bisan unsa pa ang atong tubag, ang Iyang tubag sa kanunay mao ra gihapon: “Dali,” mahigugmaon Siyang mosulti. “Dali, sunod kanako.”
(Jeffrey R. Holland, “He Hath Filled the Hungry with Good Things,” Ensign, Nob. 1997, 65)
Unsaon man kon kadtong akong gidapit nga “dali kamo ug tan-awa ninyo” mobalibad sa akong pagdapit?
Usahay mabalaka kita nga basin dili dawaton sa usa ka tawo ang atong pagdapit aron makahibalo pa og dugang mahitungod sa ebanghelyo o sa Simbahan. Si Elder Dieter F. Uchtdorf sa Korum sa Napulog Duha ka Apostoles mipakigbahin sa mosunod nga mga hunahuna:
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Ang uban kinsa moduol ug motan-aw, tingali dili gayud mopasakop sa Simbahan, ang uban mopasakop sa dugay pa nga panahon. Ila kanang pagpili. Apan dili kana makapausab sa atong gugma alang kanila. Ug dili kana makausab sa atong mga madasigong paningkamot sa pagpadayon sa pagdapit sa mga indibidwal ug mga pamilya nga moduol ug motan-aw,moduol ug motabang, ug moduol ug magpabilin.
… Sabta nga dili inyong trabaho ang pagkabig sa mga tawo. Mao kana ang tahas sa Espiritu Santo. Inyong tahas ang pagpakigbahin kon unsa ang anaa sa inyong kasingkasing ug ang pagpuyo sumala sa inyong gituohan.
Busa dili mo kinahanglang maluya kon ang tawo dili dayon modawat sa mensahe sa ebanghelyo. Dili kini usa ka personal nga kapakyasan.
Tali ra kana sa indibidwal ug sa Langitnong Amahan.
Ang inyo mao ang paghigugma sa Dios ug sa inyong silingan, nga Iyang mga anak.
(Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Liahona, Mayo 2019, 17)
Dugang nga Kalihokan sa Pagkat-on
Pagdapit sa uban nga “dali kamo ug tan-awa ninyo”
Ang atong pagpamatuod mahitungod kang Jesukristo makadasig kanato sa pagtabang sa uban nga mosunod sa pagdapit sa Manluluwas nga “dali kamo ug tan-awa ninyo.”Ikonsiderar ang pagdapit sa mga estudyante nga pamalandongan ang mga ehemplo ni Andres ug Felipe nga anaa sa Juan 1:41, 43–46 para sa pamatuod niini nga kamatuoran.Mahimong makatabang kon ipakita ang mosunod nga video ni Elder David A. Bednar sa Korum sa Napulog Duha ka Apostoles, diin nagpaambit siya og sugilanon mahitungod sa giunsa pagtabang sa iyang mas maguwang nga anak nga lalaki ang iyang mas manghod nga anak nga lalaki sa dihang nasakitan kini. Sa unsang paagi nato makompara kini nga ehemplo sa pagpakigbahin sa ebanghelyo ngadto sa ubang tawo?
