Gibuntog ni Jesukristo ang mga Pagtintal ni Satanas
Imahe
Christ standing on a rocky ledge as He rebukes Satan who appears below Him. The painting depicts the event wherein Satan tried to tempt Christ after Christ’s forty day fast in the wilderness. Christ is commanding Satan to depart from His presence.
Pagkahuman nga mabunyagan ang Manluluwas, miadto Siya sa kamingawan aron makig-uban sa Dios (tan-awa sa Hubad ni Joseph Smith, Mateo 4:1 [[diha sa Apendiks sa Hubad ni Joseph Smith]). Gitintal Siya ni Satanas, pero gibuntog Niya ang mga pagtintal. Niini nga leksiyon mahimo nimong mahibaloan ang mga baroganan aron matabangan ka sa pagsunod sa ehemplo sa Manluluwas sa pagbuntog sa mga pagtintal ni Satanas.
Pagbasa sa mga tudling sa kasulatan. Adunay lain-laing mga paagi aron basahon ang mga tudling sa kasulatan sa klase, lakip na ang pagbasa isip usa ka klase, pagbasa og kusog diha sa gagmay nga mga grupo, o hilom nga pagbasa sa mga estudyante sa ilang kaugalingon. Ikonsiderar ang mga panginahanglan ug mga abilidad sa imong mga estudyante, ug pilia ang paagi sa pagbasa nga pinakahaom sa mga panginahanglan sa klase. Pananglitan, kon naglisod ang pipila ka estudyante sa literasiya, lagmit nga makatabang kon dapiton ang mga estudyante nga maayong mobasa nga mobasa sa atubangan sa klase. Isip alternatibo, ang pagbasa diha sa gagmay nga mga grupo o sa mga managpares lagmit nga makatabang nga madugangan ang kadasig diha sa usa ka klase.
Pag-andam sa estudyante: Dapita ang mga estudyante nga maghunahuna mahitungod sa mga pagtintal nga ilang giatubang ug sa unsang paagi nga ang Manluluwas makatabang sa pagbuntog niini.
Posible nga mga Kalihokan sa Pagkat-on
Kitang tanan nag-atubang og pagtintal
Ayaw paggahin og dakong panahon sa sinugdanang bahin sa leksiyon. Tabangi ang mga estudyante nga mas magpokus sa importansya sa pagbuntog sa pagtintal kay sa mga mismong pagtintal.Ang alternatibong kalihokan para sa pagsugod sa klase makita diha sa seksiyon nga “Dugang nga Kalihokan sa Pagtuon” niini nga leksiyon.
Diha sa imong journal sa pagtuon o sa laing papel, pagdrowing og stick figure nga nagrepresenta og tawo nga sama kanimo ang edad. Sa tapad sa figure, pagsulat og duha o tulo ka pagtintal nga lagmit nga atubangon niining tawhana.
Ngano kaha nga kining tawhana lagmit nga monunot ngadto niini nga mga pagtintal?
Sa unsang paagi nga mas mapausbaw ang ilang kinabuhi kon mabuntog nila kini nga mga pagtintal?
Unsa nga mga panalangin ang imong nasinati sa dihang nabuntog nimo ang pagtintal?
Samtang nagtuon ka karon, hunahunaa ang mga pagtintal nga imong giatubang. Tinguhaa ang pagdasig sa Espiritu Santo samtang nangita ka kon unsa ang imong makat-onan gikan sa ehemplo sa Manluluwas mahitungod sa kon unsaon kini pagbuntog ug ang mga pagtintal sa umaabot.
Giatubang ug gibuntog ni Jesukristo ang mga pagtintal
Ang usa ka kasinatian nahitabo pagkahuman sa pagbunyag Kaniya, sa dihang miadto Siya sa kamingawan aron makig-uban sa Dios (tan-awa sa Hubad ni Joseph Smith, Mateo 4:1 [sa Mateo 4:1 , footnote b]). Pagkahuman sa pakig-istorya ni Jesus sa Dios sulod sa 40 ka adlaw, miabot si Satanas aron tintalon Siya (tan-awa sa Hubad ni Joseph Smith, Mateo 4:2 [diha sa Apendiks sa Hubad ni Joseph Smith ]). Pinaagi sa pagtuon niini nga panghitabo sa kinabuhi sa Manluluwas, makakat-on kita gikan sa Iyang mga ehemplo og mga paagi sa pagbuntog sa pagtintal nga atong giatubang.
Para niini nga asoy, naghatag ang Hubad ni Joseph Smith og mga kabag-ohan ug mga pagklaro nga makatabang kanato nga mas klarong masabtan ang mga kasulatan. (Mahimo nimong susihon ang impormasyon sa Hubad ni Joseph Smith sa leksiyon nga “Pagtuon sa mga Kasulatan”.)
Samtang imong gigamit ang Hubad ni Joseph Smith sa mosunod nga kalihokan, tan-awa kon sa unsang paagi nga ang paggamit niini nakadugang sa imong panabot sa mga kasulatan. Paghatag og dakong pagtagad sa mga impresyon sa Espiritu Santo, ug paghimo og mga listahan sa bisan unsang mga pag-aghat nga imong nadawat.
Basaha pag-ayo ang Mateo 4:1–11 , lakip na ang mga kabag-ohan nga gihatag sa Hubad ni Joseph Smith. Pagtuki og mga paagi sa pagkompleto niini nga saysay: Ang __________________ makatabang kanato sa pagbuntog sa pagtintal.
Mahimo nimong gamiton ang mosunod nga tsart aron makatabang kanimo.
Ikonsiderar ang pagdrowing sa mosunod nga tsart sa pisara ug pagsulat niini sa mga tubag sa mga estudyante.
Kon dili maka-access ang mga estudyante sa mga footnote nga adunay Hubad ni Joseph Smith, ikonsiderar ang pagpakita sa Hubad ni Joseph Smith niini nga mga bersikulo sa pisara o sa poster. (Gihatag ang mga bersikulo sa seksiyon nga “Komentaryo ug Background nga Impormasyon” niini nga leksiyon.)
Hatagi ang mga estudyante og panahon sa pagtuon pag-ayo sa Mateo 4:1–11 . Mahimo kang makigtambayayong sa tagsa-tagsa ka estudyante aron matabangan sila sa pagtuki sa mga detalye nga lagmit nga makatabang kanila sa pag-ila sa mga baroganan.
Ang mga estudyante lagmit nga moila og pipila ka mga baroganan niini nga mga bersikulo, lakip na ang mosunod:
Ang pagpalig-on sa atong relasyon sa Dios makatabang kanato sa pagbuntog sa pagtintal (tan-awa sa Hubad ni Joseph Smith, Mateo 4:1, 5, 8 [diha sa Appendix sa Hubad ni Joseph Smith ]).
Ang makugihong pagpuasa makatabang kanato sa pagbuntog sa pagtintal (tan-awa sa Hubad ni Joseph Smith, Mateo 4:2 [diha sa Apendiks sa Hubad ni Joseph Smith ]).
Ang pagtangtang sa mga impluwensya sa daotan sa atong mga kinabuhi makatabang kanato sa pagbuntog sa pagtintal (tan-awa sa Mateo 4:10).
Ang pagsabot sa atong tinuod nga kailhanan makatabang kanato sa pagbuntog sa pagtintal (tan-awa sa Mateo 4:3–10).
Ang paghinumdom ug paggamit sa mga kamatuoran gikan sa mga kasulatan makatabang kanato sa pagbuntog sa pagtintal (tan-awa sa Mateo 4:1–10). Hinumdomi nga kini nga kamatuoran ang pokus sa sunod nga leksiyon.
Unsa nga mga baroganan ang imong naila gikan sa ehemplo sa Manluluwas?
Sa unsang paagi nga makatabang kanimo kini nga mga baroganan aron makagamit sa gahom sa Manluluwas aron matabangan ka ug ang ubang tawo sa pagbuntog sa pagtintal?
Sa unsang paagi nga ang paggamit sa Hubad ni Joseph Smith mahimong makapalambo sa imong kaugalingong pagtuon sa kasulatanug makatabang kanimo nga mas makaila sa Manluluwas?
Susiha ang drowing nga imong gihimo sa sinugdanan sa leksiyon ug ang mga baroganan nga imong giila gikan sa ehemplo sa Manluluwas sa Mateo 4:1–11 .
Sa imong pamati, unsa nga mga baroganan ang makatabang kaayo para sa tawo nga imong gidrowing? Ngano man?
Unsa ang imong nakat-onan mahitungod kang Jesukristo nga mahimo nimong mapaambit niining tawhana? Sa unsang paagi kini makatabang kanila?
Ang Manluluwas makatabang kanato sa pagbuntog sa mga pagtintal kanato
Niini nga bahin sa leksiyon, dapita ang mga estudyante nga hinumdoman ang ilang mga gihunahuna ug gibati gikan sa kalihokan sa pag-andam sa estudyante.
Hunahunaa ang mga pagtintal nga imong giatubang. Usahay tingali mobati kita nga masaypanon o makasasala tungod lamang kay gibati nato nga natintal kita. Pero, importante nga ilhon nga ang pagtintal mismo dili usa ka sala—kondili ang pagbuhat niini. Tungod kay gitintal usab ang Manluluwas mismo ug nagpabilin nga walay sala, nakahibalo kita nga makatabang Siya (makaabag o makasuporta) kanato sa pagbuntog sa atong mga tentasyon (tan-awa sa Mga Hebreohanon 2:18 ; 4:15–16).Si Elder Ulisses Soares sa Korum sa Napulog Duha ka Apostoles nagpahinumdom kanato:
Imahe
Elder Ulisses Soares, Quorum of the Twelve Apostles official portrait.
Alang niadtong kinsa, sa bisan unsa nga rason, nadala sa tentasyon ug nagpuyo sa dili matarong nga mga buhat, ako mopasalig kaninyo nga adunay paagi aron makabalik, ug adunay paglaum diha ni Kristo.
(Ulisses Soares, “Pagtinguha kang Kristo sa Matag Hunahuna,” Liahona, Nob. 2020, 84)
Unsa ang makatabang kaayo nga konsepto nga imong nakat-onan mahitungod sa Manluluwas niini nga leksiyon? Nganong importante man kini kaninyo?
Samtang dili ihulagway ang mga partikular nga pagtintal kanimo, unsa nga butang ang madasigon nimong buhaton aron mas hingpit nga mosalig sa Manluluwas nga tabangan ka nga mabuntog ang pagtintal?
Komentaryo ug Background nga Impormasyon
Hubad ni Joseph Smith, Mateo 4:1–2, 5–6, 8–9, 11. Unsa nga mga kabag-ohan ang gibuhat ni Joseph Smith sa Mateo 4:1–11 sa iyang makadasig nga paghubad?
[Ang naka-italicize nga mga pulong nagpasabot sa mga kabag-ohang gibuhat ni Joseph Smith.]
1 Unya si Jesus gigiyahan sa Espiritu, ngadto sa kamingawan, aron makig-uban sa Dios.
2 Ug sa dihang nagpuasa siya sulod sa kuwarenta ka adlaw ug kuwarenta ka gabii, ug nakig-istorya Siya sa Dios, gigutom siya pagkahuman niadto, ug gitintal Siya sa yawa.
5 Unya si Jesus gidala ngadto sa balaan nga dakbayan, ug ang Espiritu mipahiluna kaniya sa kinatuktukan sa templo.
6 Unya ang yawa miduol ngadto kaniya ug miingon, Kon ikaw mao ang Anak sa Dios, ihulog ang imong kaugalingon, kay kini gisulat, Siya mosugo sa iyang mga anghel sa pagbantay kanimo, ug sa ilang mga kamot sila mosawo kanimo, tingali og sa bisan unsa nga higayon madugmok ang imong tiil sa bato.
8 Ug usab, si Jesus diha sa Espiritu, ug kini midala kaniya ngadto sa hilabihan ka taas kaayo nga bukid, ug nagpakita kaniya sa tanan nga mga gingharian sa kalibotan ug sa himaya diha kanila.
9 Ug ang yawa miduol ngadto kaniya pag-usab, ug miingon, Ang tanan niini nga mga butang ako mohatag kanimo, kon ikaw moluhod ug mosimba kanako.
11 Ug karon si Jesus nasayod nga si Juan gibalh[o]g ngadto sa bilangguan, ug siya mipadala og mga anghel, ug, tan-awa, sila miab[o]t ug nangalagad ngadto kaniya.
Nganong importante man ang pag-amping sa akong mga hunahuna sa pagbuntog sa tentasyon?
Si Elder Ulisses Soares sa Korum sa Napulog Duha ka Apostoles mihulagway og usa ka paagi nga makasunod kita sa ehemplo sa Manluluwas sa pagbuntog sa pagtintal. Tan-awa sa “Pagtinguha kang Kristo sa Matag Hunahuna” gikan sa code sa oras nga 10:56 hangtod sa 12:37 (anaa sa ChurchofJesusChrist.org), o basaha ang mosunod nga pamahayag.
Imahe
Elder Ulisses Soares, Quorum of the Twelve Apostles official portrait.
Samtang nangandam sa pagtuman sa Iyang diosnon nga misyon dinhi sa kalibotan, ang Manluluwas nga si Jesukristo mipakita sa importansya sa kanunay nga pagbuntog sa tanan nga makapugong kanato sa pagkaamgo sa atong mahangturong katuyoan. Human sa pipila ka pakyas nga pag-atake sa kaaway, kinsa misulay sa pagpatipas Kaniya gikan sa Iyang misyon, ang Manluluwas piho nga mipapahawa sa yawa pinaagi sa pag-ingon: “Pahawa, Satanas. … Busa ang yawa mibiya kaniya ug unya nangabot ang mga anghel ug miatiman kaniya.”
Mahanduraw ba ninyo, akong mga igsoon, unsa kaha ang mahitabo kon mokuha kita og kusog ug kaisog gikan sa Manluluwas ug moingon nga “Dili” ug “Pahawa” ngadto sa dili mahiyason nga mga hunahuna sa unang higayon gayod nga kini moabot sa atong mga hunahuna? Unsa man ang mga epekto diha sa mga tinguha sa atong mga kasingkasing? Sa unsang paagi nga ang atong resulta nga mga buhat makapaduol nato kanunay sa Manluluwas ug motugot sa padayon nga impluwensya sa Espiritu Santo sa atong mga kinabuhi? Ako nasayod nga sa pagsunod sa ehemplo ni Jesus, kita makalikay sa mga trahedya ug dili angay nga mga kinaiya nga tingali makahatag og mga problema sa pamilya ug mga panagbangi, negatibo nga mga emosyon ug mga kahilig, maghimo og kahiwian ug pangabuso, mahimong ulipon sa daotan pinaagi sa pagkaadik, ug uban pa nga mahimong sukwahi sa mga sugo sa Ginoo.
(Ulisses Soares, “Pagtinguha kang Kristo sa Matag Hunahuna,” Liahona, Nob. 2020, 84–85)
Nganong gusto man nakong buntugon ang tentasyon?
Sa unsa nga paagi nga ang mga kasulatan makatabang kanako sa pagbuntog sa mga pagtintal?
Si Elder Kelly R. Johnson sa Seventy mipasabot:
Pinaagi sa pagpangandam, ang Manluluwas mitubo diha sa gahum ug nakahimo sa pagbatok sa tanang tentasyon ni Satanas. Kon kita mosunod sa ehemplo sa Manluluwas ug mangandam pinaagi sa pagtuon sa pulong sa Dios ug palambuon ang atong pagtuo, kita makagamit usab sa gahum sa Dios sa pagbatok sa mga tentasyon.
(Kelly R. Johnson, “Molahutay nga Gahum,” Liahona, Nob. 2020, 113)
Dugang nga Kalihokan sa Pagkat-on
Opsiyon sa pagsugod sa leksiyon
Ang “escape room” usa ka attraction nga gamiton aron hagiton ang mga tawo sa pagpangita og mga paagi sa pag-ikyas sa usa ka partikular nga sitwasyon. Lagmit nga makatabang sa mga estudyante ang pagtan-aw sa Mateo 4:1–11 isip usa ka plano sa pagtabang kanila sa “pag-ikyas sa pagtintal” (tan-awa sa 1 Mga Taga-Corinto 10:13). Paghatag og mga clue pinaagi sa pisikal nga mga aytem nga may kalabotan sa Mateo 4:1–11 , ug dapita ang mga estudyante nga sundon ang ehemplo sa Manluluwas sa pag-ikyas sa pagtintal. Pananglitan, mahimong maghatag sa mga estudyante og usa ka sobre alang sa halad sa puasa aron irepresenta ang pagpuasa o pipila ka mga kasulatan aron irepresenta ang pagtuon sa pulong sa Dios diha sa mga kasulatan.
