Ioane 3:1–8
“E Ao Ina Toe Fanau Mai Outou”
O Nikotemo sa fai ma Faresaio ma se “faipule o Iutaia” (Ioane 3:1). Na alu ane o ia i le Faaola i le po e fesili iai ni fesili taua e uiga i le faaolataga. E mafai ona fesoasoani lenei lesona e te malamalama ma lagonaina ai le taua o le toe fanau mai “i le vai ma le Agaga” (Ioane 3:5) ina ia ulufale ai i le malo o le Atua.
Tapenaga mo tagata aoga: Valaaulia tagata aoga e o mai sauniuni e talanoaina suiga ua latou faia po ua faia e isi latou te iloa ina ia avea atili ai e pei o Iesu Keriso.
Faatinoga e Mafai Ona Fai mo nei Lesona
O se naunautaiga ia suia
Mafaufau ni auala e amata ai lenei lesona e mafai ona fesoasoani ai i tagata aoga e suesue i faamanuiaga faapea luitau o le suia ia avea atili e pei o le Faaola. O se tasi auala o le valaaulia o tagata aoga e faamae’a le faatinoga lenei o le a mulimuli mai, o loo talosagaina latou e fa’aata i o latou mafaufau se tulaga fesootai. Fesoasoani ia i latou ia lava ni auiliiliga ina ia pei le tala faatusa o se mea moni ma faaosofia ai le latou fia auai.
Mafaufau i se tala faatusa e uiga i se tagata talavou ua manao e suia, faalatalata atili i le Faaola, ma lagonaina atili le filemu ae e le o mautinoa pe faapefea. Mafaufau i mea patino e ono manao lea tagata e sui ma ni faigata atonu latou te feagai ai a o suia. E ao foi ona e mafaufau i ni aafiaga sa faalogoina e oe po o isi a o faia ni suiga lelei e mafai ona fai ma faamalosiau mo lenei tagata talavou o loo mafai ona latou sui.
-
Mata e aisea e manaomia ai e le Tama Faalelagi ona suia i latou o naunau e ulufale i Lona malo?
I totonu o lau api faamaumau o suesuega, tusi i lalo ni auala o uunaia ai oe e sui ma avea atili e pei o Iesu Keriso.A o faasolo lenei lesona, valaaulia le musumusuga o le Agaga Paia a o e aoao pe faapefea ona saili le fesoasoani a le Faaola i le faia o suiga ua Ia naunau e te faia.
Na aoaoina e Iesu ia Nikotemo e uiga i le toe fanau mai
Na alu ane se alii e igoa ia Nikotemo ia Iesu i le po. O Nikotemo sa fai ma Faresaio ma se faipule o Iutaia. Na mulimuli ane ia puipuia Keriso i luma o Faresaio (tagai i le Ioane 7:50–53) ma auai ma tagata talitonu i le tanuga o Iesu (tagai i le Ioane 19:39–40). Na alu ane Nikotemo i le Faaola i lenei po ma faailoa o Iesu o “se aoao ua maliu mai mai le Atua” ( Ioane 3:2).
Faitau i le Ioane 3:1–5, ma saili mo le mea na aoaoina e le Faaola ia Nikotemo e manaomia ona ia faia ina ia ulufale ai i le malo o le Atua.
-
O le a sou manatu i le uiga o le “toe fanau mai”? ( Ioane 3:3).
A manaomia, fesoasoani i tagata aoga ina ia malamalama o le uiga o le toe fanau mai o le suia e avea ma se tagata fou. E ono fai ma fesoasoani le faafaitau o tagata aoga i le Mosaea 27:25, ma saili po o le a se mea na aoaoina e le Alii ia Alema e uiga i le toe fanau mai.
-
Aisea e te manatu e manaomia ona tatou toe fanau mai ina ia vaaia ai le malo o le Atua?
-
I le taimi na lē malamalama ai Nikotemo pe faapefea ona toe fanau mai, o le a se mea na aoao iai e le Faaola (e pei ona faamaumauina i le fuaiupu 5)?
O se tasi o mataupu autu tatou te aoao iai mai aoaoga a le Faaola ia Nikotemo o le ao ona tatou fanau i le vai ma le Agaga ina ia ulufale ai i le malo o le Atua.
A o talanoaina e tagata aoga fesili nei o le a mulimuli mai, faamautinoa latou te malamalama e tatau ona tatou papatisoina ma faamauina ina ia toe fanau ai i le vai ma le Agaga.
-
O le a sou manatu i le uiga o le fanau i le vai ma le Agaga?
-
O a ni auala e te manatu e mafai e le papatisoina ma le faamauga ona fesoasoani ia i tatou e toe fanau mai ma ulufale i le malo o le Atua?
-
O le a se mea na aoaoina e le Faaola ia Nikotemo e te ono manao e malamalama iai le tagata i le tala faatusa sa e foafoaina?
O le papatisoga ma le faamauga o ni sauniga manaomia e lua o le faaolataga ma le faaeaina e tatau ona taliaina e tagata taitoatasi ina ia maua le malo faalelagi. O nei sauniga o le faitotoa tatou te ulufale ai ina ia oo i luga o le ala o feagaiga e tau i le ola e faavavau (tagai i le 2 Nifae 31:17–20). A o tatou savalia lenei ala ma tausia tatou feagaiga, tatou te faalogoina ni suiga ma le toe faaolaina faaleagaga.Sa faamatala mai ai Alema le perofeta i totonu o le Tusi a Mamona i le matafaioi a le Faaola i le faaagavaaina o i tatou e toe fanau mai. Faitau i le Alema 7:14, ma saili pe faapefea ona fesoasoani le Faaola ia i tatou e toe fanau mai.
-
O le a le matafaioi a le Faaola i le fesoasoani ia i tatou e toe fanau mai?
Mai le 2 Nifae 31:17 tatou te aoao i le matafaioi a le Agaga Paia i le fesoasoani ia i tatou e toe fanau mai: “Ona oo mai ai lea o se faamagaloga o a outou agasala i le afi ma i le Agaga Paia.”
-
O le a le matafaioi a le Agaga Paia i le fesoasoani ia i tatou e toe fanau mai?
Mafaufau pe faaaoga le ata pue lenei o le a mulimuli mai, po o se isi faataitaiga o le toe fanau mai, e fesoasoani i tagata aoga e vaai pe faapefea e le taliaina o sauniga o le papatisoga ma le faamaoniga ona fesoasoani ia i tatou e suia ma toe fanau mai i le fesoasoani a le Faaola.
Matamata i le vitio “O le Suia o le Loto” (4:39), mai le taimi 0:40 i le 4:09, e iloa ai aafiaga o se alii talavou e igoa ia Ever. Vaavaai mo ni mea faapitoa na ia faia na mafai ai ona fesoasoani le Faaola e suia o ia. (O loo maua lenei vitio i le ChurchofJesusChrist.org.)
-
O le a se mea na faaofoina ai oe e uiga i suiga na fai e nei alii talavou?
E mafai ona mafaufau loloto tagata aoga i latou sauniga mo le vasega a o latou talia fesili nei o le a mulimuli mai.
-
O a ni suiga ua faia e oe po o se isi e te iloa ina ia avea atili e pei o Iesu Keriso?
-
O le a le matafaioi o sauniga o papatisoga ma faamauga na iai i le faia o nei suiga?
A faafaigata ona talia e tagata aoga le fesili talu ai, fesoasoani ia i latou e vaai pe faapefea e nei sauniga ona faaagavaaina latou ia maua le faigauo tumau ma le Agaga Paia. Mafaufau pe talatalanoa pe faapefea e le tagofia o le faamanatuga ona fesoasoani ia i tatou e faaauau pea ona suia ma manatua Iesu Keriso ma feagaiga na tatou faia i papatisoga.
O isi o taimi tatou te mafaufau po o faapei le faagasologa o le tatou toe fanauina faaleagaga. Sa aoao mai le Faaola i le Ioane 3:8 e mafai ona tatou vaaia aafiaga o le matagi ae tatou te lē iloa le mea na sau ai ma le mea e alu atu iai. E faapena foi la, e lē mafai ona tatou malamalama i taimi uma po o afea e amata mai ai le toe fanau mai, faapea foi pe faapefea ona faia suiga ia i tatou lava. E ui i lea, e mafai ona tatou vaaia ona aafiaga a o suiao tatou naunautaiga ma gaoioiga (tagai i le Mosaea 5:1–2).Tusi i totonu o lau api faamaumau suesuega e uiga i faamaoniga o e vaaia i le fesoasoani atu o le Faaola e te suia. Maitau soo se uunaiga, mafaufauga, ma manatu e te ono mauaina mai le Agaga.
O le fesoasoani atu i isi
Mafaufau i le vaaiga faataitai na e foafoaina i le amataga o le lesona. Mafaufau loloto i mea ua e aoao iai ma lagonaina i lenei aso. Tusi se tusi puupuu i le tagata talavou mai lau vaaiga faataitai, e faamatala iai pe faapefea ona fesoasoani le Faaola ia te ia ina ia suia. O fesili nei o le a mulimuli mai e ono fesoasoani ia te oe a o e faia lenei mea:
-
O le a se mea e te manatu e mafai ona fai e lenei tagata e sailia ai le fesoasoani a le Faaola ina ia suia? Aisea e te manatu ai e fesoasoani na faatinoga?
-
E mafai faapefea e sauniga o papatisoga, faamauga, ma le tagofia o faatusa o le faamanatuga ona fesoasoani i lenei tagata e suia ma toe fanau mai?
-
O le a se mea ua e aoao iai e faatatau ia Iesu Keriso a o e aafia i le faagasologa o le toe fanau mai pe sa e vaaia i lenei faagasologa mo isi?
Valaaulia tagata aoga e faasoa i ni paga po o i totonu o ni vaega laiti mea na latou tusia mo le tagata talavou mai le vaaiga faataitai. Mafaufau pe molimau atu pe faasoa i ni mea na tutupu ia te oe lava ia e ono fai ma fesoasoani.
Manatu ma Faamatalaga o Talaaga
O le a le uiga o le toe fanau mai?
Sa faamalamalama mai ai Elder David A. Bednar o le Korama a Aposetolo e Toasefululua:
O loo saga aoao mai pea e auauna faamaonia a le Alii o se tasi o faamoemoega autu o le tatou iai i lenei olaga faaletino o le suia faaleagaga lea ma liua e ala i le Togiola a Iesu Keriso. …
O loo faatonuina i tatou e “o mai ia Keriso, ma faaatoatoaina ia te ia, ma faafiti [tatou] lava mai mea uma e lē faaleatua” ( Moronae 10:32), ina ia avea ma ni “foafoaga fou” ia Keriso (tagai i le 2 Korinito 5:17), tuu ese le “tagata natura” ( Mosaea 3:19), ma ia faia “se liuga tele i totonu o i tatou, po o i totonu o o tatou loto, ia lē toe iai se tatou manao e fai mea leaga, ae ia faia mea lelei e lē aunoa” ( Mosaea 5:2). Faamolemole ia matau o le liua o loo taua i nei fuaiupu e maoae, e lē laitiiti—o se toe faafanauina faaleagaga ma se suiga faavae o mea tatou te lagonaina ma naunau iai, o mea tatou te mafaufau iai ma fai, ma o tatou ituaiga tagata. Ioe, o le agaga moni o le talalelei a Iesu Keriso e afua ai se suiga faavae ma le mautu i o tatou lava natura ua mafai i le tatou faalagolago i “taui, ma le alofa mutimutivale, ma le alofa tunoa o le Mesia Paia” ( 2 Nifae 2:8). A o tatou filifili e mulimuli i le Matai, ua tatou filifili ina ia suia—ia toe fanauina faaleagaga.
(David A. Bednar, “E Ao Ina Toe Fanau Mai Outou,” Ensign poo le Liahona, Me 2007, 19–20)
E mafai faapefea ona ou toe fanau mai?
Sa faia e Elder David A. Bednar o le Korama o Aposetolo e Toasefululua se tautalaga na ulutalaina “Faatumauina Pea le Faamagaloina o a Outou Agasala” (Ensign po o le Liahona, Me 2016 59–62) o loo iai ni malamalamaaga e faatatau i lenei fesili.
Aisea e ono faigata ai ona iloa po o ua ou toe fanauina?
Sa aoao mai Elder D. Todd Christofferson o le Korama a Aposetolo e Toasefululua:
E te ono fesili, Aisea e lē vave ai ona tupu lenei suiga tele mo au? … Mo le toatele lava o i tatou, e faifai malie suiga ma e umi se taimi e tulai mai ai. O le toe fanau mai … o se mea faagasolo ae le o se mea e tupu i se taimi e tasi. Ma o le auai ai i lena faagasologa o le faamoemoega tutotonu lea o le olaga faaletino.
I le taimi e tasi foi lea, aua nei o tatou tauamiotonuina i tatou lava i a tatou taumafaiga faasamasamanoa. Aua nei faamalieina i tatou e taofiofi ni amioga e faia le leaga. Ia tatou aai ma feinu ma le agavaa i le faamanatuga i vaiaso taitasi ma faaauau pea ona pipiimau i le Agaga Paia ina ia veleeseina ia muiaa o mea eleelea o loo totoe i totonu o i tatou. Ou te molimau atu a o outou faaauau ai i le ala o le toe faafanauina faaleagaga, o le a aveeseina e le alofa togiola o Iesu Keriso a outou agasala ma pisipisia o na agasala o loo ia te outou, o le a mou ese atu faaosoosoga, ma o Keriso o le a faapaiaina ai outou, e pei ona paia o Ia ma lo tatou Tama.
(D. Todd Christofferson, “Toe Fanauina,” Ensign po o le Liahona, Me 2008, 78)
O le a le eseesega o le “vaaia” ma le “ulufale” i le malo o le Atua?
Sa aoao mai le Perofeta o Iosefa Samita (1805–44) e uiga i fetalaiga a le Faaola i le [ Ioane 3:3, 5 ], lea e talanoa e uiga i le “vaaia” ma le “ulufale” i le malo o le Atua: “O le tasi mea o le vaai i le malo o le Atua, a o le isi mea o le ulufale atu i ai. E tatau ona iai se suiga i o tatou loto ina ia vaaia ai le malo o le Atua, ma sainia pepa aloaia mo le vaetamaina ina ia ulufale atu i totonu” (i le Journal, December 1842–June 1844; Book 3, 15 July 1843–29 February 1844, 130, josephsmithpapers.org]. A “vaai” se tagata i le malo o le Atua, ua mafua mai le Agaga Paia le faia o se “suiga tele o le loto” a lea tagata (tagai i le Alema 5:14). Ona tatau lea i le tagata ona auai i le faatinoina o sauniga o le talalelei ina ia mafai ai ona “ulufale” atu i le malo o le Atua.
(“Ioane 2–4,” i le Tusi Lesona mo Tagata Aoga mo le Feagaiga Fou [2018], ChurchofJesusChrist.org)
Gaoioiga Faaopoopo e Aoao Ai
O le ala o feagaiga
Sa aoao mai Nifae le perofeta, o le salamo, papatisoga, ma le mauaina o le meaalofa a le Agaga Paia o “faitotoa e tatau ona [tatou] ulufale atu ai” ( 2 Nifae 31:17). O le ala o loo faasino iai Nifae i fuaiupu nei o le a mulimuli mai o le mea e masani ona faasino iai taitai o Ekalesia e faapea “o le ala o feagaiga.” Faitau i le 2 Nifae 31:19–20, ma talatalanoa pe faapefea e le savalia o le ala o feagaiga ona fesoasoani ia i tatou e maua ai le mana o le Faaola ina ia tatou suia.