Mataio 4:1–11, Vaega 2

Mulimuli i le Faataitaiga a le Faaola e Tetee atu i Faaosoosoga

Jesus is tempted by the devil to change rocks into bread - ch.11-2

I lenei lesona e mafai ona faaauau lau suesuega e uiga i le tetee atu o le Faaola i faaosoosoga. E mafai ona fesoasoani lenei lesona ia te oe e mulimuli i Lona faataitaiga ma manatua mea moni mai tusitusiga paia e fesoasoani atu ia te oe e teena faaosoosoga i lou olaga.

Faaaogaina o le Gospel Library app. Ia e iloa faaaoga lelei tulaga eseese e pei o le faalanuina, fa’aaogaina o sooga faatekinolosi, faailogaina po o le makaina o tusitusiga, tufa atu i isi, sueina, ma le faamauina o tusitusiga, o loo maua i le polokalama faatekinolosi o le Gospel Library ina ia faalelei atili au suesuega o tusitusiga paia. A masani ona faatino nei gaoioiga e ono lelei ai lau tapenaga mo lesona ma lou iloa ina ia fesoasoani i tagata aoga o loo fa’aaogaina lenei polokalama.

Tapenaga mo tagata aoga: Valaaulia tagata aoga e omai tapenapena i le vasega ma ni fuaitau se tasi pe lua e latou te lagonaina e mafai ona fesoasoani e latou te tetee ai i faaosoosoga. Afai e le mafai ona latou mauaina ni fuaitau, faamalosiau atu e fesili i o latou matua, o isi o latou aiga, po o taitai o le Ekalesia.

Faatinoga e Mafai ona Fai mo Nei Lesona

Tetee atu i faaosoosoga

Afai e lei aoaoina muamua le uluai lesona mo le Mataio 4:1–11 mafaufau pe tatau ona toe iloilo lena lesona ma fai ni suiga i le lesona lenei pe a manaomia.

O se isi gaoioiga e mafai ona faatino i le amataga o le vasega e maua i le vaega “Faatinoga Faaopoopo” o lenei lesona.

A talanoaina lenei faataitaiga, faamalosiau i tagata aoga e faasoa atu i le vasega ni auiliiliga e uiga i faaosoosoga sa latou feagai ai.

Vaaifaalemafaufau o lau uo o Iakopo ma ua ia tau atu ua amata ona faafaigata lona tetee i faaosoosoga. Ua ia faamatala mai e tele lona manao e tetee i nei mataupu ae peitai na te le iloa po o le a le mea e fai pe a feagai ma faaosoosoga.

O le a se mea o le a e faasoa atu i lau uo, ma aisea?

Toe manatua le aafiaga a le Faaola e pei ona tusifaamaumauina Mataio 4:1–11, i le taimi sa feagai ai le Faaola ma nei faaosoosoga ma sa Ia tetee atu i faaosoosoga a Satani. O se tasi o auala sa mafai ona Ia faia lenei mea o le avea ma se faataitaiga sili i lenei mataupu autu: o le toe manatu iai ma le fa’aaogaina o mea moni mai tusitusiga paia e fesoasoani ia i tatou e mauaina le malosi o le Atua e tetee atu ai i faaosoosoga.Suesue le Mataio 4:1–11 . Taulai le vaai i fuaiupu 4, 7, ma le 10, ma taumafai e maitau gaoioiga a le Faaola na faaaoga ai lenei mataupu autu. Mo lou silafia, i le taimi sa saunoa mai ai Iesu, “Ua tusia,” sa Ia talanoa i upu ua faamauina i tusitusiga paia.

E faapefea ona fesootai fuaitau o mau sa saunoa mai ai le Faaola ma le auala sa Ia tetee atu ai faaosoosoga?

Faaaoga nai minute e tusi i lalo ou manatu pe aisea e te manaomia ai le fesoasoani e tetee atu i faaosoosoga. Ona tali lea o fesili nei:

E ao ona aoga e tali muamua e le vaega nei fesili i totonu o o latou api talaaga ona faasoa lea i le vasega atoa.

E faafia ona e liliu atu i le Atua e ala i tusitusiga paia e fesoasoani mo le tetee atu i faaosoosoga? Aisea?
O a ni mea sa tutupu ia te oe i lou liliu atu i le Atua e ala i tusitusiga paia e fesoasoani ia te oe e tetee atu i faaosoosoga?

Mafaufau e faatino lenei lesona faatasi ma le vasega atoa, i paaga, po o vaega laiti ma tusi uma o latou tali i luga o le laupapa. A faapea ua maea ona aoao atu le vaega 1 o le lesona e uiga i le Mataio 4:1–11 mafaufau e valaaulia tagata aoga e faaaoga o latou api talaaga mo suesuega e toe manatu ai i faaosoosoga sa latou feagai.Valaaulia tagata aoga e toe mafaufau iai ma faasino mai faitauga sa latou mauaina i a latou tapenaga mo lenei vasega.

Maitau ma faamau i lalo ni faaosoosoga e tele ona feagai ma lau tupulaga.
Maitau ma faamau i lalo fuaitau o mau e fesoasoani atu ia te oe mo faaosoosoga taitasi, e aofia ai ma se faamatalaga puupuu i le auala e fesoasoani atu ai nei fuaitau.

Mo se faataitaiga, e ao ona e mauaina le saunoaga a le Faaola mai le 3 Nifae 18:15 e mafai ona fesoasoani atu ia te oe ia e mataala ma tatalo i taimi uma ao e taumafai e tetee atu i faaosoosoga.A faafaigata ona e mauaina ni mau fesoasoani, e mafai ona e sueina faitauga o le atamai i mataupu faavae, po o lou sueina o autu i totonu o le Taiala i Tusitusiga Paia e pei o le “ Faaosooso, Faaosoosoga,” “ Tumau,” po o se isi autu e fesootai i le faaosoosoga po o se faaosoosoga e patino tonu ia te oe.

Afai o loo faitauina e le vasega o latou tusitusiga paia e ala i masini faaeletonika, faaaoga faamatalaga nei ia latou iloa ai le auala e faailoga ai vaega o tusitusiga paia e latou te manao e toe faitau i se isi taimi.

Mafaufau e faailoga ia tulaga ese ia faitauga o mau ma lisi nei faitauga i totonu o lou api talaaga mo suesuega i se mea e faigofie ona e toe mauaina. Afai o e faaaogaina tusitusiga paia faaeletonika, taumafai e fatufatu se lisi ma tuu iai faitauga. Afai e te manao e iloa pe faapefea ona fai lenei mea, faitau le Gospel Library User Guide (Android) po o le Gospel Library User Guide (iOS) i luga o le ChurchofJesusChrist.org. Filifili le Faailoga anomea i lalo o le ulutala “Toe Aoao Atili”.

Faaali atu nei gaoioiga ma faatonuga i le vasega ina ia filifili e tagata aoga le auala e sili mo latou lava manaoga.

E tele auala e mafai ona e mulimuli ai i le Faaola ma maua ai le malosi mai i tusitusiga paia.Filifili e fai le gaoioiga A po o le E e fesoasoani ia te oe e mulimuli atu i le Faaola i le tetee atu i faaosoosoga. Saili le taitaiga mai le Agaga Paia ao e mafaufau po o le a le faatinoga e sili ona aoga mo oe.

Gaoioiga A: Tauloto

Filifili se mau faasino mai mau na e faailoaina ma a’o tauloto mai ai se fasifuaitau autu po o le fuaitau atoa foi. O nai metotia nei e ono fesoasoani:

Faitau mo ni nai taimi ia te oe lava, ma faaitiitia i taimi taitasi lou tilotilo i le mau.
Tusi i lalo le faitauga po o se fasifuaitau. Tape pe kolosi ese upu a’o e taulotoina, fai ma toe fai sei oo ina tape ese pe kolosi uma upu ma ua mafai ona e taulotoina le faitauga atoa.

Ave i totonu o le polokalama faatekinolosi o le Atamai i Aoaoga Faavae, le fuaitau ua e filifilia ma faaaoga meafaigaluega e maua i lenei polokama mo le taulotoina.

Gaoioiga E: Manatunatu loloto ma tusitusi

Manatunatu loloto pe faapefea e le suesue e le aunoa i tusitusiga paia ona fesoasoani ia te oe e tetee atu i faaosoosoga i lou olaga, pe o a foi ni suiga e mafai ona e fai ia faateleina ai faamanuiaga e te maua e ala i taumafaiga faateleina e suesue e le aunoa i tusitusiga paia.Tusi sau feau i luga o fesootaiga faaleagafesootai po o lau lava itulau i upega tafailagi e mafai ona fesoasoani i isi e faateleina ai lo latou manao e suesue tusitusiga paia. Tusi i se auala e mafai ona fesoasoani ia i latou e saili le mana o le Alii e fesoosoani ia i latou e tetee atu ai i faaososoga. Ia aofia ai pe a ma se tasi se mau faasino na e faailoaina i le aso. E mafai foi ona e faasoa atu i se mea na tupu ia te oe na faateleina ai lou malosi e tetee atu i faaosoosoga, e aunoa ma le faasoaina o ni auiliiliga e uiga i le faaosoosoga.

A maea ua lava se taimi, mafaufau e valaaulia tagata aoga e faasoa mai le taunuuga o le gaoioiga. Ona valaaulia lea o tagata aoga e tali fesili nei ia latou api talaaga mo suesuega.

Mafaufauga patino

Ina ia faai’u, toe tomanatu i mea sa e aoaoina i le aso, ma manatunatu loloto i au tali i fesili nei:

E faapefea ona fesoasoani le fausia i luga o mea na e faia i le aso (suesue, tauloto, ma toe mafaufau i mau) ia te oe ia avea atili ai e faapei o Iesu Keriso?
O a ni mea e te manatu e tatau ona e amataina, taofi le faia, pe faaauau foi ona fai?

Tala ma Faamatalaga o Talaaga

E faapefea ona fesoasoani ia te au le suesue i tusitusiga paia?

Sa faamatala mai e Peresitene Russell M. Nelson le auala e mafai ai e le suesue e le aunoa i le Tusi a Mamona ona aumaia ia i tatou le mana e tetee atu ai i faaosoosoga:

O’u uso e ma tuafafine pele, ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu—iaso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava ia i le Tusi a Mamona i aso taitasi, e mafai ona puipuia oe mai mea leaga o le aso, e aofia ai le mala faataumaoi o ponokalafi ma isi vaisu ua punitia ai le mafaufau i mea faaleagaga.

(Russell M. Nelson, “O Le Tusi a Mamona: E Faape’i Lou Olaga e aunoa ma Ia,” Ensign po o le Liahona, Nov. 2017, 62–63)

E faapefea ona aoga ia te au le taulotoina o mau?

Na aoao mai Elder Richard G. Scott (1928–2015) o le Korama a Aposetolo e Toasefululua:

Ia atamai i le ala e te taulima ai tekinolosi. Faailoga mau taua i lau masini ma ia toe alu soo i ai e faitau. Afai e faitau soo e outou tagata talavou ni mau e faapei o le tele o taimi e auina atu ai e nisi o outou ia savali i tesi, o le a le umi ae outou taulotoina ni mau se fia selau. O na fuaitau o le a faamaonia le avea ma punavai malosi o musumusuga ma taitaiga a le Agaga Paia i taimi o faafitauli.

(Richard G. Scott, “Mo Le Filemu i le Aiga,” Ensign po o le Liahona, Me 2013, 30)

Gaoioiga Faaopoopo e Aoao Mai Ai

O tusitusiga paia e mafai ona faapei o uo lelei

O se isi auala e mafai ona amata ai le lesona, mafaufau e faaaoga lenei faamatalaga e fesoasoani i tagata aoga ia iloa auala e tutusa ai le taulotoina ma le toe manatunatu i tusitusiga paia ma le faia o uo lelei.Sa saunoa mai Elder Richard G. Scott (1928–2015) o le Korama a Aposetolo e Toasefululua e faapea:

“E mafai ona avea [tusitusiga paia] ma ni uo faamaoni ia e maua i soo se mea i soo se taimi lava. E maua pea i latou pe a manaomia. … O le aoaoina, mafaufau loloto, sailiili, ma le taulotoina o mau ua pei lava o le faatumuina o se kapeneta o faila i uo, tulaga faatauaina, ma upumoni ia e mafai ona tapa i ai i soo se taimi, i soo se mea i le lalolagi.”

(Richard G. Scott, “O Le Mana o Tusitusiga Paia,” Ensign po o le Liahona, Nov. 2011, 6)

E mafai ona fesoasoani le anapogi tatou te tetee atu ai i faaosoosoga

A faapea e ono fesoasoani atu i tagata aoga, o se isi taulaiga o se lesona e mafai ona i ai o le, mana o le anapogi e fesoasoani mai tatou te teenaina ai faaosoosoga. E mafai ona faaaoga punaoa nei:

Isaia 58:6–7
Shayne M. Bowen, “Fasting with Power,” Ensign, Apr. 2009, 64–67
Carl B. Pratt, “O Faamanuiaga o le Faataunuuina Sa’o o le Anapogi,” Ensign po o le Liahona, Nov. 2004, 47–49
Joseph B. Wirthlin, “O Le Tulafono o le Anapogi,” Ensign, May 2001, 73–75