Mataio 4:1–11, Vaega 1

Na Teena e Iesu Keriso Faaosoosoga a Satani

Ina ua maea ona papatisoina le Faaola, sa malaga o Ia i le vao, ina ia faatasi ma le Atua (tagai i Faaliliuga a Iosefa Samita, Mataio 4:1 [i le Mataio 4:1, vaefaamatalaga e]). Na faaosoosoina o Ia e Satani, ae na Ia teena nei faaosoosoga. I lenei lesona e mafai ona e faailoa mataupu faavae e fesoasoani ia te oe e mulimuli i le faataitaiga a le Faaola e teena faaosoosoga a Satani.

Faitauina o mau. E i ai ni auala eseese e faitau ai mau i totonu o le vasega, e aofia ai le faitau faatasi o le vasega atoa, faitau leotele i vaega toalaiti, po o le faitau le leoa foi e tagata o le vasega. Mafaufau i manaoga ma tomai o au tagata aoga, ma filifili le auala e pito sili ona fetaui ma manaoga o le vasega. Mo se faataitaiga, afai e vaivai le faitau a nisi o le vasega, e mafai ona valaaulia tagata e lelei a latou faitau e faitau i luma o le vasega. O se isi foi auala, o le galulue i vaega toalaiti po o paga e mafai ona faateleina ai le malosi o le vasega.

Tapenaga mo tagata aoga: Valaaulia tagata aoga e mafaufau i faaosoosoga o latou feagai ai ma auala e mafai ona fesoasoani atu ai le Faaola ia i latou e teena.

Gaoioiga e Mafai ona Fai e Aoao Mai Ai

Tatou te feagai uma lava ma faaosoosoga

Aua le soona faaaluina se taimi i le vaega amata o le lesona. Fesoasoani i le vasega e taulai tele i le taua o le teena o faaosoosoga nai lo o faaosoosoga lava latou.O se isi gaoioiga mo le amataina o le vasega e maua i le vaega o “Gaoioiga Faaopoopo e Aoao Mai Ai” o le lesona lenei.

I lau api talaaga mo suesuega po o se laupepa, tusi faafasilaau se ata o se tagata faapea lua te tupulaga. I autafa o le ata, tusi ai ni faaosoosoga se lua pe tolu e ono feagai ma le tagata lea.

• Aisea e ono faamatuu atu ai lea tagata i nei faaosoosoga?

• E faapefea ona sili atu o latou olaga pe a mafai ona latou teena nei faaosoosoga?

• O a faamanuiaga ua e mauaina ona ua e teena faaosoosoga?

Ao e suesue i le aso, mafaufau i faaosoosoga o loo e feagai ai. Saili le taitaiga mai le Agaga Paia ao e saili mo mea e mafai ona e aoaoina mai le faataitaiga a le Faaola e uiga i auala e tetee atu ai i nei faaosoosoga ma faaosoosoga foi i le lumanai.

O Iesu Keriso sa feagai ma sa tetee atu foi i faaosoosoga

Ua aoao mai i tusitusiga paia na feagai le Faaola ma ituaiga uma o faaosoosoga “ae lei gauai atu i ai” ( Mataupu Faavae ma Feagaiga 20:22 ; tagai foi i le Mosaea 15:5 ; Alema 7:11).

O se tasi o nei tofotofoga sa tulai mai ina ua maea ona papatiso o Ia, sa Ia alu atu i le vao ina ia faatasi ai o Ia ma le Atua (tagai i Faaliliuga a Iosefa Samita, Mataio 4:1 [i le Mataio 4:1, vaefaamatalaga e]). Ina ua maea ona mafuta Iesu ma le Atua mo aso e 40, sa oo atu Satani e faaosooso ia te Ia (tagai i le Faaliliuga a Iosefa Samita, Mataio 4:2 [i le Mataio 4:2, vaefaamatalaga i]). I le suesueina o lenei mea na tupu i le soifuaga o le Faaola, e mafai ona tatou aoaoina mai i Lana faataitaiga ia auala e teena ai i faaosoosoga e tulai mai.

Mo lenei tala, o le faaliliuga a Iosefa Samita e iai suiga ma faamatalaga e ono fesoasoani tatou te malamalama atili ai i tusitusiga paia. (E ao ona e faitau i faamatalaga e uiga i le Faaliliuga a Iosefa Samita i le lesona “Suesuega i Tusitusiga”.)

Ao e faaaogaina le Faaliliuga a Iosefa Samita i le gaoioiga lea, matau pe faapefea i lou faaaogaina ona faatele ai lou malamalama i tusitusiga paia. Ia e mataituina uunaiga a le Agaga Paia, ma faamau i lalo ni manatu ua e mauaina.

Faitau faalelei le Mataio 4:1–11, e aofia ai ma suiga e maua mai i Faaliliuga a Iosefa Samita. Vaai ni auala e mafai ona faaumaina ai lenei fuaiupu: __________________ e mafai ona fesoasoani ia i tatou e teena ai faaosoosoga.

E mafai ona e faaaogaina le siata lea e fesoasoani ai ia te oe.

Mafaufau e tusi le siata lea i luga o le laupapa ma faatumu i tali mai le vasega.

	O mea na faaosooso e Satani ia Iesu e fai	O tali a Iesu i le faaosoosoga
Mataio 4:1–4
Mataio 4:5–7
Mataio 4:8–11

A faapea e leo maua e tagata aoga ia vaefaamatalaga o Faaliliuga a Iosefa Samita, mafaufau e faaali atu faaliliuga a Iosefa Samita o nei fuaiupu i luga o le laupapa po o se laupepa tele. (O nei faitauga e maua i le vaega o “Manatu ma Faamatalaga o Talaaga” o lenei lesona.)

Tuu atu se taimi i tagata aoga e suesue maeaea ai i le Mataio 4:1–11 . Atonu e te manao e galulue ma tagata taitoatasi e fesoasoani ia i latou e matau ia auiliiliga e ono fesoasoani ia i latou e faailoa mai mataupu faavae.

E mafai ona faailoa ai e tagata aoga ni nai mataupu faavae i nei fuaiupu, e aofia ai mea nei:

O le faamalolosia o a tatou sootaga ma le Atua e mafai ona fesoasoani tatou te teena ai faaosoosoga (tagai Faaliliuga a Iosefa Samita, Mataio 4:1, 5, 8 [i le Mataio 4:1, vaefaamatalaga e; Mataio 4:5, vaefaamatalaga a; Mataio 4:8, vaefaamatalaga a]).

O le anapogi ma le maelega e mafai ona fesoasoani tatou te teena ai faaosoosoga (tagai Faaliliuga a Iosefa Samita, Mataio 4:2 [i le Mataio 4:2, vaefaamatalaga i]; Mataio 4:3–4).

O le aveesea o tosinaga leaga mai o tatou olaga e mafai ona fesoasoani tatou te tetee atu ai i faaosoosoga (tagai i le Mataio 4:10).

O le malamalama i lo tatou faasinomaga moni e mafai ona fesoasoani tatou te tetee atu ai faaosoosoga (tagai i le Mataio 4:3–10).

O le manatu i ai ma le faaaogaina o upumoni mai tusitusiga paia e mafai ona fesoasoani tatou te tetee atu ai i faaosoosoga (tagai i le Mataio 4:1–10). Mo le silafia o le upumoni lenei o le a avea ma taulaiga o le isi lesona.

• O a ni mataupu faavae na e faailoa mai le faataitaiga o le Faaola?

• E faapefea ona fesoasoani atu nei mataupu faavae ia te oe ia e maua le fesoasoani mai le mana o le Faaola e tetee atu ai faaosoosoga?

• E mafai faapefea e le faaaogaina o le Faaliliuga a Iosefa Samita i au lava suesuega o tusitusiga paia ona faalelei atili au suesuega ma fesoasoani ia e iloa atili ai le Faaola?

Toe iloilo ata na e tusia i le amataga o le lesona ma mataupu faavae ua e faailoaina mai le faataitaiga a le Faaola i le Mataio 4:1–11 .

• O le fea mataupu faavae e te manatu e sili ona aoga mo le tagata sa e tusia? Aisea?

• O le a se mea na e aoaoina e uiga ia Iesu Keriso e mafai ona e faasoa atu i lenei tagata? E faapefea ona fesoasoani lenei mea ia i latou?

E mafai ona fesoasoani mai le Faaola ia i tatou i o tatou tofotofoga

I le vaega lenei o le lesona, valaaulia tagata aoga e toe mafaufau i o latou manatu ma lagona mai le gaoioiga mo le tapenaga o le tagata aoga.

Mafaufau i faaosoosoga o loo e feagai ai. O nisi taimi tatou te lagonaina le tausalaina pe ua agasala foi, ona ua tatou lagona ua faaosoosoina i tatou. Ae peitai, e taua le iloaina o le faaososoga lava ia e le o se agasala—ao le faatinoina o le faaosoosoga o le agasala lea. Ona sa faaosoosoina le Faaola lava Ia ae na tumau lava Lona le agasala ai, ua tatou iloa e mafai ona Ia laveai (fesoasoani, faamalosiau, lagolagoina) i tatou mai i o tatou faaosoosoga (tagai i le Eperu 2:18 ; 4:15–16). Na faamanatu mai e Elder Ulisses Soares o le Korama a Aposetolo e Toasefululua:

Mo i latou o e, po o le a lava le mafuaaga, ua pauu atu i faaosoosoga ma ua nonofo ai i faatinoga amioletonu, ou te faamautinoa atu ia te outou, e i ai se auala e toe foi ai, o loo i ai le faamoemoe ia Keriso.

(Ulisses Soares, “Saili atu i Keriso i Mafaufauga Uma,” Ensign po o le Liahona, Novema 2020, 84)

• O le a se manatu faavae e pito sili ona aoga ia te oe ua e aoaoina e uiga i le Faaola i lenei lesona? Aisea e aoga tele ai mo oe?

• E aunoa ma le faamatalaina o ou faaosoosoga, o le a se mea ua musuia ai oe ia e fai ina e faalagolago atoatoa ai i le Faaola e fesoasoani ia te oe e tetee atu i faaosoosoga?

Tala ma Faamatalaga o Talaaga

Faaliliuga a Iosefa Samita, Mataio 4:1–2, 5–6, 8–9, 11. O a ni teuteuga sa fai i le Mataio 4:1–11 e Iosefa Samita i ana faaliliuga musuia?

[O upu faatusilima o loo tau mai ai teuteuga musuia na faia e Iosefa Samita.]

1 Ona aveina lea o Iesu e le Agaga, i le vao, ina ia faatasi ai ma le Atua.

2 Ina ua anapogi o Ia i aso e fagafulu ma po e fagafulu, ma mafuta ma le Atua, mulimuli ane sa fia taumafa o ia, ma ua tuua ai e faaosoosoina e le tiapolo.

5 Ona aveina lea o Iesu i le aai paia, ma sa tuu ai o ia e le Agaga i luga o le tumutumu o le malumalu.

6 Ona sau ai lea o le tiapolo ia te ia ma faapea atu, Afai o oe o le Alo o le Atua, inā oso ia oe i lalo: aua ua tusia, o le a Ia tuuina atu i ana agelu le vaaiga mo oe: ma o le a latou tauaveina oe i o latou lima, ina nei tuʼia lou vae i se maa i soo se taimi.

8 Ma sa toe aveina Iesu e le Agaga, ma sa aveina aʼe o ia i se mauga e matuā maualuga lava, ma sa faaali atu ai ia te ia malo uma o le lalolagi ma o latou mamalu.

9 Ma sa toe sau le tiapolo ia te ia, ma faapea atu, O nei mea uma o le a ou tuu atu ia te oe, pe afai e te paʼū i lalo ma ifo ia te aʼu.

11 Ma ua iloa nei e Iesu ua lafoina Ioane i le falepuipui, ma sa ia auina atu agelu, ma, faauta, na latou o atu ma auauna atu ia te ia.

O le a le taua o le tausia lelei o oʼu mafaufauga i le tetee atu o faaosoosoga?

Sa faamatala mai e Elder Ulisses Soares o le Korama o Aposetolo e Toasefululua se tasi o auala e mafai ai ona tatou mulimulitai i le faataitaiga a le Faaola e teena faaosoosoga. Matamata “Saili Atu ia Keriso i Mafaufauga Uma” mai le vaega taimi 10:56 agai i le 12:37 (e maua i le ChurchofJesusChrist.org), pe faitau le faamatalaga lea.

A o tapenapena e faataunuu Lana misiona paia i le lalolagi, sa faaa’oa’o mai e le Faaola, o Iesu Keriso le taua o le teena e le aunoa o mea uma e ta’a’ina ese mai ai i tatou mai le faataunuuina o lo tatou faamoemoega e faavavau. Ina ua mavae le mau osofaiga e lei faamanuiaina e le fili, o le sa taumafai e tataiese o Ia mai Lana misiona, sa tuliesea e aunoa ma le fefe e le Faaola le tiapolo e ala i le fetalai atu: “Alu ese ia oe, Satani. … Ona tuua ai lea o ia e le tiapolo, faauta foi, ua o mai agelu ma auauna mai ia te ia.”

Mata o le a so outou manatu, o’u uso e ma tuafafine, o le a le mea semanu e tupu pe ana mafai ona tatou aumaia le malosiaga ma le lototoa mai le Faaola ma fai atu “E leai” ma “Aluese ia oe” i ni mafaufauga e le mama i lena uluai taimi e oo mai ai i o tatou mafaufau? Mata o le a le aafiaga i faanaunauga o o tatou loto? E faapefea e taunuuga o a tatou faatinoga ona tausisia ai lo tatou latalata atu i le Faaola ma faatagaina ai le tosinaga faifai pea a le Agaga Paia i o tatou olaga? Ou te iloa o le mulimuli i le faataitaiga a Iesu Keriso, o le a tatou aloese ai mai le tele o mala ma amioga e ono afua ai faafitauli faaleaiga ma feeseeseaiga, o lagona e le lelei ma mea e lilifa atu i ai, o le faia o mea e le tonu ma sauaga i isi, o le faapologa e ala i vaisu leaga, ma soo se isi lava mea o le a faasagatau i poloaiga a le Alii.

(Ulisses Soares, “Saili Atu ia Keriso i Mafaufauga Uma,” Ensign poo le Liahona, Novema 2020, 84–85)

Pe aisea o le a ou manao ai e tetee atu i faaosoosoga?

Matamata e vitio “Stay within the Lines” (5:10), o loo maua i le ChurchofJesusChrist.org, e vaai ai i ni tali i lenei fesili.

E mafai faapefea ona fesoasoani tusitusiga paia ia te au e faatoilalo ia faaosoosoga?

Sa faamatala mai e Elder Kelly R. Johnson o le Fitugafulu:

E ala i sauniuniga, sa tupu a’e ai le Faaola i le mana ma sa mafai ai ona ia teena faaosoosoga uma a Satani. A o tatou mulimuli i faataitaiga a le Faaola ma sauniuni e ala i le suesue i le afioga a le Atua ma ia loloto lo tatou faatuatua, e mafai foi ona tatou utuvai mai le mana o le Atua e teena ai faaosoosoga.

(Kelly R. Johnson, “Mana e Mausali,” Ensign po o le Liahona, Nov. 2020, 113)

Gaoioiga Faaopoopo e Aoao Mai Ai

O se fiilifiliga e amata ai le lesona

O se “potu e sola iai” o se faatosinaga e faaaoga e lui ai tagata e sue auala e sosola ese mai ai i se tulaga faapitoa. E mafai ona aoga i tagata aoga le vaai i le Mataio 4:1–11 e fai ma fuafuaga e fesoasoani ia i latou “sola ese mai faaosoosoga” (tagai i le 1 Korinito 10:13). Saunia ni faaataataga ma ni aitema faitino e fesootai i le Mataio 4:1–11, ma valaaulia le vasega e mulimuli i le faataitaiga a le Faaola e sosola ese mai faaosoosoga. Mo se faataitaiga, e mafai ona tuu atu se teutusi mo le taulaga anapogi i tagata aoga e faapea o le anapogi, po o se seti o tusitusiga paia e suitulaga i le suesueina o le afioga a le Atua i tusitusiga paia.