Pagkahuman sa pagtudlo ni Jesus nga Siya mao ang Pan nga Naghatag sa Kinabuhi (tan-awa sa Juan 6:35), daghan ang wala makasabot ug mipili nga moundang sa pagsunod Kaniya. Sa dihang gipangutana ni Jesus ang Napulog Duha ka Apostoles kon mobiya ba usab sila, mitubag si Pedro, “Ginoo, kang kinsa man kami moadto? ikaw mao ang adunay mga pulong mahitungod sa kinabuhing dayon” (Juan 6:68). Makatabang kini nga leksiyon kanimo nga molig-on ug magpabiling tinuod sa imong saad nga mosunod kang Jesukristo, bisan pa kon lagmit nga dili pilion sa uban nga mosunod Kaniya.
Pagtabang sa mga estudyante nga nanlimbasog. Ang pipila ka estudyante sa klase lagmit nga personal nga nanlimbasog sa ilang pagtuo. Hinumdomi ang mga pulong ni Presidente M. Russell Ballard sa Korum sa Napulog Duha ka Apostoles: “Ang akong kinasingkasing nga hangyo mao nga kita moawhag, modawat, mosabut, ug mohigugma niadtong nanlimbasug sa ilang pagtuo. Kinahanglan dili gayud kita mobaliwala ni bisan kinsa sa atong mga kaigsoonan. Anaa kita sa lain-laing mga dapit diha sa dalan, ug kinahanglang mangalagad kita sa usag usa tungod niana” (“Kang Kinsa Man Kami Moadto?,” Liahona, Nob. 2016, 92).
Pag-andam sa estudyante: Dapita ang mga estudyante nga pamalandongan ang mga panalangin nga ilang nadawat tungod sa ilang pagkamiyembro ug pagsalmot sa Ang Simbahan ni Jesukristo sa mga Santos sa Ulahing mga Adlaw.
Posible nga mga Kalihokan sa Pagkat-on
Mga reaksyon sa mga pagtulon-an sa Manluluwas
Magmahimong sensitibo sa mga estudyante nga lagmit nga naglisod o nasakitan sa desisyon nga gibuhat sa ubang tawo nga moundang sa pagsalmot sa Simbahan. Lagmit nga andam ang pipila ka estudyante nga ipaambit ang ilang mga sitwasyon sa klase.
Paghimo og sitwasyon, tinuod o dili tinuod, bahin sa usa ka miyembro sa Simbahan ni Jesukristo sa mga Santos sa Ulahing mga Adlaw nga nakadesisyon nga dili na mosunod sa mga pagtulon-an sa Manluluwas. Lagmit nga makatabang kon tubagan ang mga blangko sa mosunod nga sitwasyon:
Nakadesisyon si [ngalan ug ilang relasyon kanimo] nga moundang na sa pagsalmot sa Ang Simbahan ni Jesukristo sa mga Santos sa Ulahing mga Adlaw. Sa dihang nangutana ka kanila sa ilang mga rason sa dili na pagsalmot, miingon sila, “[Rason sa dili na pagsalmot sa Simbahan].” Samtang naghunahuna ka mahitungod sa ilang tubag, gibati nimo nga [ihulagway ang imong gibati].
Ang mga kamatuoran nga gihatagan og gibug-aton niini nga leksiyon mahimong makatabang kanimo nga magpabiling tinuod kon ang mga minahal nimo lagmit nga mobiya sa Simbahan sa Manluluwas. Mahimo usab nga makatabang kanimo kini nga mga kamatuoran kon naningkamot ka sa pagdesisyon kon unsa kadako ang imong kagustohan nga mosalmot sa Simbahan. Ablihi ang imong kasingkasing sa inspirasyon nga gustong ipanalangin sa Ginoo kanimo.
Awhaga ang mga estudyante sa paghunahuna mahitungod sa mosunod nga pagsusi sa kaugalingon.
Pagtagana og panahon aron pamalandongan kon unsa sa mosunod nga mga pamahayag, kon aduna man, ang naghisgot bahin kanimo:
Kon makakita ko og ubang tawo nga nawad-an sa ilang hugot nga pagtuo kang Jesukristo ug sa Iyang Simbahan, makaapekto kini sa akong hugot nga pagtuo.
Bisan pa kon lagmit nga masakitan ang akong kasingkasing, magpabiling lig-on ang akong hugot nga pagtuo kon ang ubang tawo sa akong palibot mawad-an sa ilang hugot nga pagtuo kang Jesukristo ug sa Iyang Simbahan.
Dili ako mahasol kon adunay tawo nga mobiya sa Simbahan kon makalipay kini kanila.
Nakadesisyon na ko nga magpabilin akong magmatinud-anon nga miyembro sa Simbahan.
Nagdesisyon pa gihapon ko kon gusto ba nakong mahimong matinud-anon nga miyembro sa Simbahan.
Sa Juan 6:26–58 , gitudlo ni Jesus nga Siya mao ang Pan nga Naghatag sa Kinabuhi nga minaog gikan sa langit ug kadtong mokaon sa Iyang unod ug moinom sa Iyang dugo makabaton og kinabuhing dayon.
Basaha ang Juan 6:60–66 , nga mangita kon sa unsang paagi mitubag ang pipila sa mga tawo sa mga pagtulon-an sa Ginoo.
Ngano kaha nga naglisod ang mga tawo sa pagdawat niining bag-ong mga pagtulon-an gikan ni Jesus?
Unsa ang pipila sa mga pagtulon-an sa Manluluwas sa atong panahon nga lisod dawaton para sa pipila ka tawo?
Unsa kaha ang pipila ka rason kon nganong gipili sa pipila ka tawo sa atong panahon nga ilayo ang ilang mga kaugalingon sa Ang Simbahan ni Jesukristo sa mga Santos sa Ulahing mga Adlaw?
Hinumdomi nga gihigugma sa Langitnong Amahan ug ni Jesukristo ang tanan—lakip na kadtong mipili nga mobiya sa Simbahan. Mahimo kitang mopadayon sa paghigugma ug pagpaningkamot sa pagsabot niadtong mibiya. Tungod lamang kay nagdesisyon ang usa ka tawo nga mobiya wala kini nagpasabot nga sila mga daotan nga tawoo mahimo silang alaot sa kanunay tungod kay mibiya sila. Wala usab kini nagpasabot nga dili na sila mopili nga mobalik sa Simbahan sa umaabot. Ang Ginoo mahimong modasig kanimo kon unsa ang isulti ug buhaton para niadtong mibiya.
“Buot ba usab kamong mobiya kanako?”
Basaha ang Juan 6:67 , ug himatikdi ang pangutana nga gisukna ni Jesus sa Iyang mga Apostoles.
Si Presidente M. Russell Ballard sa Korum sa Napulog Duha ka Apostoles mitudlo kon sa unsang paagi nga ang pangutana sa Manluluwas may kalabotan kanato.
Imahe
Official portrait of President M. Russell Ballard of the Quorum of the Twelve Apostles, 2004.
Sa kataposan, ang matag usa kanato kinahanglang motubag sa pangutana sa Manluluwas: “Buot ba usab kamong mobiya kanako?” [ Juan 6:67 ]. Kitang tanan kinahanglang magtinguha sa atong kaugalingong tubag niana nga pangutana. Alang sa pipila, ang tubag sayon ra; sa uban, kini lisod kaayo.
Basaha ang Juan 6:68–69 , nga mangita sa tubag ni Pedro sa pangutana sa Manluluwas.
Ngano kaha nga ingon niadto man ang gitubag ni Pedro?
Lagmit nga makabenepisyo ang mga estudyante gikan sa pagbasa sa pagpamatuod ni Pedro sa tudling sa doktrinal nga kahanas nga Mateo 16:15–19 .
Unsa ang atong mahimo aron makasunod sa ehemplo ni Pedro?
Mahimong maghatag ang mga estudyante og lain-laing mga tubag, lakip ang mosunod: mahimo natong pilion nga motuo kang Jesukristo ug magpabilin Kaniya bisan pa kon unsa ang gipili sa ubang tawo.
Mahitungod sa kapilian nga gibuhat sa Napulog Duha ka Apostoles, si Presidente M. Russell Ballard mitudlo:
Imahe
Official portrait of President M. Russell Ballard of the Quorum of the Twelve Apostles, 2004.
Nianang higayuna, sa dihang ang uban nakatutok sa unsay dili nila madawat, ang mga Apostoles mipili sa pagtutok sa unsay ila gayud nga gituohan ug nahibaloan, ug isip resulta, nagpabilin sila kang Kristo.
(M. Russell Ballard, “Kang Kinsa Man Kami Moadto?,” Liahona, Nob. 2016, 90)
Gideklara ni Pedro nga ang Manluluwas adunay “mga pulong sa kinabuhing dayon” ( Juan 6:68). Unsa ang pipila ka pagtulon-an ni Jesukristo nga nahibaloan nimo nga tinuod?
Unsa ang pipila ka panalangin nga nahatag nganha kanimo tungod sa Ang Simbahan ni Jesukristo sa mga Santos sa Ulahing mga Adlaw?
Ikonsiderar ang paghimo og listahan diha sa pisara mahitungod sa mga tubag sa miaging mga pangutana.
Si Presidente M. Russell Ballard nakig-istorya sa mga indibidwal nga lagmit nga nagkonsiderar nga mobiya sa Simbahan sa Manluluwas. Tan-awa ang “Kang Kinsa Man Kami Moadto?,” nga anaa sa ChurchofJesusChrist.org, gikan sa code sa oras nga 5:35 hangtod sa 8:16. Samtang naminaw ka kang Presidente Ballard, paghatag og pagtagad sa mga pangutana nga iyang gisukna.
Unsa nga mga hunahuna ang aduna ka samtang naminaw kang Presidente Ballard?
Unsa nga mga kasinatian ang nasinati nimo nga nakatabang kanimo nga motuo kang Jesukristo ug mipasakop o nagpabilin sa Iyang Simbahan?
Sa unsang paagi nga ang paghinumdom niini nga mga kasinatian makatabang kanimo kon sulayan ang imong hugot pagtuo?
Ikonsiderar ang pagpaambit og pagpamatuod mahitungod sa Manluluwas ug usa o duha ka personal nga rason sa pagpamiyembro sa Iyang Simbahan.
Kon nanlimbasog ka sa imong hugot nga pagtuo, hinumdomi nga gihigugma ka sa Langitnong Amahan ug ni Jesukristo. Mahimo kang mag-ampo kanunay sa imong Langitnong Amahan para sa tabang. Mahimo usab kang makig-istorya sa imong mga ginikanan, mga lider sa Simbahan, o magtutudlo sa seminary mahitungod sa mga pangutana ug mga kabalaka nga aduna ka.
Ikonsiderar ang pagpakita sa mosunod nga mga pangutana ug dapita ang mga estudyante sa pagtubag sa tulo o labaw pa diha sa ilang mga journal sa pagtuon.
Unsaon man nimo pagtubag kon pangutan-on ka sa Ginoo, “Buot ba usab [kang] mobiya kanako?” ( Juan 6:67).
Unsa man ang imong mabuhat aron makabaton ug mapalig-on ang imong pagpamatuod kang Jesukristo ug sa Iyang Simbahan?
Unsa ang gusto nimong mahinumdoman kon ang usa ka tawo nga imong gihigugma lagmit nga magdesisyon nga mobiya sa Simbahan sa Manluluwas?
Unsa man ang imong isulti sa usa ka tawo nga nasakitan tungod kay ang mga tawo nga importante kanila nagdesisyon nga mobiya sa Simbahan sa Manluluwas?
Komentaryo ug Background nga Impormasyon
Juan 6:67–69 . Unsa ang nasabtan ni Pedro ug sa Napulog Duha nga nakatabang kanila nga magpabiling matinud-anong mga sumusunod ni Jesukristo?
Si Elder D. Todd Christofferson sa Korum sa Napulog Duha ka Apostoles nagsulat:
Imahe
Portrait of Elder D. Todd Christofferson. Photographed in March 2020.
Wala ko kahibalo kon, nianang gutloa, si Pedro ug ang iyang Kaigsoonan nakasabut kon unsay gitudlo sa Ginoo labaw pa sa mga disipulo kinsa mibiya sa Agalon, apan si Pedro nasayud pinaagi sa piho nga pagsaksi sa Espiritu nga si Jesus mao ang Kristo, ang Anak sa buhi nga Dios (tan-awa usab sa Mateo 16:15–17), ug ang kaluwasan dili makit-an sa bisan asang dapita. Hingpit siya nga mapasaligon nga mosunod ni Jesus bisan unsa pay mahitabo. Kon siya dunay mga pangutana, masulbad ra kini sa saktong panahon, apan dili siya mapugngan gikan sa pagkamatinud-anon ngadto sa Anak sa Dios—nga nagpakita og usa ka talagsaong ehemplo alang natong tanan.
(D. Todd Christofferson, “Ang Buhing Tinapay nga Nanaug gikan sa Langit,” Liahona, Nob. 2017, 39 note 8)
Unsa ang gibati sa Langitnong Amahan ug ni Jesukristo sa mga mibiya?
Si Presidente Henry B. Eyring sa Unang Kapangulohan mitudlo:
Imahe
Official Portrait of President Henry B. Eyring taken March 2018.
Sa wala pa ang kalibotan, ang mahigugmaong Amahan sa Langit ug ang Iyang Pinalanggang Anak nahigugma ug mitabang niadtong nahibaloan nila nga motipas. Ang Dios nahigugma nila sa kahangturan.
(Henry B. Eyring, “Ngadto sa Akong Mga Apo,” Liahona, Nob. 2013, 72)
Unsa ang akong mabuhat para sa mga tawo nga dili kaayo aktibo o mibiya sa Simbahan?
Si Presidente M. Russell Ballard sa Korum sa Napulog Duha ka Apostoles mitudlo:
Imahe
Official portrait of President M. Russell Ballard of the Quorum of the Twelve Apostles, 2004.
Ang akong tubag kay palihog ayaw pagsangyaw ngadto kanila! Nakahibalo na ang mga sakop sa imong pamilya o mga higala sa mga pagtulon-an sa Simbahan. Wala na sila nanginahanglan og laing pagtudlo! Ang ilang gikinahanglan—ang gikinahanglan natong tanan—mao ang gugma ug pagsabot, dili paghukom. Ipaambit ang imong mga positibong kasinatian sa pagpakabuhi sa ebanghelyo. Ang pinakagamhanang butang nga imong mabuhat mao ang pagpaambit sa imong espirituhanong mga kasinatian ngadto sa pamilya ug mga higala. Usab, pagpabiling tinuod nga interesado sa ilang mga kinabuhi, sa ilang mga kalamposan, ug sa ilang mga pagsulay. Pagpabilin nga kanunay nga mainiton, maaghop, mahigugmaon, ug maluluy-on.
(M. Russell Ballard, “Questions and Answers” [Brigham Young University devotional, Nob. 14, 2017], 5, speeches.byu.edu)
Dugang nga mga Kalihokan sa Pagkat-on
Moabot ang mga tubag sa imong mga pangutana sa panahon sa Ginoo
Daghan sa mga disipulo ang nagbagutbot tungod kay wala sila makasabot kon unsa ang buot ipasabot sa Manluluwas sa dihang nag-istorya Siya mahitungod sa pagkaon sa Iyang unod ug pag-inom sa Iyang dugo (tan-awa sa Juan 6:51–61). Lagmit usab nga wala nakasabot ang Iyang mga Apostoles. Pero, gipili nila nga mosalig sa ilang nahibaloan ug gituohan.
Hisgoti kon sa unsang paagi makatabang kini nga ehemplo sa mga estudyante kon lagmit nga wala sila nakakuha sa tanang mga tubag sa ilang mga pangutana.
Ikonsiderar ang pagbasa sa Lucas 22:19–20 ug hisgoti kon sa unsang paagi nga ang pagkat-on mahitungod sa sakramento lagmit nga nakatabang sa mga Apostoles nga masabtan ang mga pagtulon-an sa Ginoo sa Juan 6:51–61 . (Lagmit nga makatabang kon tukion nga ang Lucas 22:19–20 usa ka tudling sa doktrinal nga kahanas.)
Ang pagpili nga motuo
Kon lagmit nga naglisod ang pipila ka estudyante sa pagdesisyon kon magpabilin o mobiya ba sa Simbahan, ikonsiderar ang pagtan-aw sa “Kang Kinsa Man Kami Moadto?” sa ChurchofJesusChrist.org gikan sa code sa oras nga 2:46 hangtod sa 5:35. Mahimong hisgotan sa mga estudyante ang mga paagi sa paggamit sa tambag ni Presidente M. Russell Ballard.
Ang pagpili nga masilo
Ang pipila sa mga disipulo sa Manluluwas nasilo sa Iyang doktrina (tan-awa sa Juan 6:60–61). Ikonsiderar ang paghisgot sa mga estudyante sa mga rason kon nganong masilo ang pipila ka tawo sa atong panahon ug kon unsa ang ilang mabuhat aron makapili nga dili masilo. Lagmit nga makatabang ang mga tudling gikan sa mosunod nga mga pamahayag:
David A. Bednar, “Ug Walay Makapasilo Kanila,” Liahona, Nob. 2006, 89–92
Neil L. Andersen, “Ayaw Gayud Pagbiya Kaniya,” Liahona, Nob. 2010, 39–42
