Jesus Christ depicted walking on the sea of Galilee toward a small fishing boat. The Apostles are in the fishing boat and are watching Christ walk toward them. There are storm clouds in the sky.
Milakaw si Jesukristo sa tubig ug giawhag si Pedro nga buhaton usab kini. Samtang nakita ni Pedro ang unos ug ang mga balod, nagsugod siya sa pagkaunlod ug misinggit siya sa pagpangayo og tabang sa Manluluwas. Makatabang kanimo kini nga leksiyon sa pagsunod sa ehemplo ni Pedro sa pagdangop ngadto sa Manluluwas sa panahon sa kahadlok o lisod nga mga sitwasyon.
Paghatag og panahon sa mga estudyante nga motubag. Usahay ang mga estudyante dili dayon makatubag sa usa ka epektibo nga pangutana. Ayaw kahadlok nga hatagan ang mga estudyante og panahon aron hunahunaon ang pangutana. Usahay, ang mga estudyante magkinahanglan og oportunidad nga mamalandong kon unsay gipangutana nila ug sa paghunahuna kon unsaon sa pagtubag. Ang ingon niini nga pagpamalandong makamugna og instruksiyon gikan sa Espiritu Santo.
Pag-andam sa estudyante: Dapita ang mga estudyante sa pagpamalandong sa mosunod nga mga pangutana gikan sa Dali, Sunod Kanako: “Unsa kaha ang nakadasig ni Pedro sa pagbiya sa iyang sakayan sa tunga-tunga sa Dagat sa Galilea atol sa makusog nga unos? Unsay nakapatuo kaniya nga kon si Jesus makalakaw sa tubig, makalakaw usab siya?” (“Marso 27–Abril 2. Mateo 14; Marcos 6; Juan 5–6: ‘Ayaw Kamo Kalisang,’” Dali, Sunod Kanako—Alang sa mga Indibidwal ug mga Pamilya: Bag-ong Tugon 2023).
Posible nga mga Kalihokan sa Pagkat-on
Si Jesus mopakalma kanato sa panahon sa mga unos sa kinabuhi
Madasig niini nga leksiyon ang mga estudyante sa pagdangop kang Jesukristo para sa kalinaw ug kaluwasan sa mga panahon sa pagsulay. Sa leksiyon sa pagsusi sa umaabot, dapiton ang mga estudyante sa pag-ila sa kalamboan nga ilang nahimo sa pagpangita og kalinaw kang Kristo niini nga mga panahon. Himatikdi nga adunay daghang mga ideya sa seksiyon nga “Dugang nga mga Kalihokan sa Pagkat-on” nga magamit niini nga leksiyon. Pilia ang mga kalihokan nga may kalabotan gayod para sa mga estudyante.
Imahe
Jesus Christ depicted walking on the water of the Sea of Galilee. The Apostle Peter is in the water. Christ is extending His hand to Peter to prevent Peter from sinking.
Ikonsiderar ang pagsulat sa mosunod nga kinutlo gikan sa Mateo 14:30 sa pisara ug ipakita kini nga hulagway samtang hisgotan sa mga estudyante ang mosunod nga pangutana.
Nagpakita kini nga hulagway og makahadlok nga panghitabo sa kinabuhi ni Apostol Pedro. Gipahayag sa Mateo 14:30 nga, “Nahadlok si [Pedro]; ug nagsugod sa pagkaunlod, busa misinggit siya, Ginoo, luwasa ako.”
Unsang mga sitwasyon sa panahon karon ang mahimong hinungdan nga mabati sa kabatan-onan nga sama sila ni Pedro?
Dapita ang mga estudyante nga mamalandong sa hilom sa mosunod nga pangutana.
Aduna bay bisan unsang butang sa imong kinabuhi nga maoy hinungdan nga mibati ka og kahadlok o mibati nga morag naunlod ka?
Pamalandong sa pipila ka minuto kon asa o kang kinsa ka kasagarang modangop para sa tabang ug kalinaw kon mobati ka og sama niini.Pagkahuman sa milagrosong pagpakaon sa sobra sa lima ka libo ka tawo, gihangyo ni Jesukristo ang Iyang mga disipulo nga “[mo]sakay sa sakayan, ug [mo]una niya ngadto sa tabok” sa Dagat sa Galilea ( Mateo 14:22).
Basaha ang Mateo 14:23–33 , ug pangitaa ang mga kamatuoran mahitungod sa Manluluwas nga makatabang kanimo sa pagdangop Kaniya kon mobati ka og kahadlok o mobati nga morag naunlod ka. Bantayi ang mga hunahuna ug mga pamati nga gikan sa Espiritu Santo. Makatabang Siya kanimo sa pag-ila kon unsaon nga kini nga mga kamatuoran magamit sa unsay imong nasinati sa imong kinabuhi. Isulat ang mga kamatuoran nga imong natuki diha sa imong journal sa pagtuon o sa imong mga kasulatan. (Hinumdomi: “Ang ikaupat nga hugna sa bantay sa kagabhion” mao ang gikan sa alas 3:00 sa buntag hangtod sa alas 6:00 sa buntag.)
Pagkahuman sa paghatag og igong panahon aron magsulat ang mga estudyante, dapita ang mga estudyante nga isulat ang mga kamatuoran nga ilang nakat-onan diha sa pisara. Kon gikinahanglan, ikonsiderar ang pagsukna og mga pangutana sama sa mosunod aron tabangan ang mga estudyante sa pagpadayon sa pagsusi ug pagkat-on gikan niini nga asoy.
Unsa nga mga kamatuoran ang imong nakat-onan gikan niini nga asoy?
Asa man ang pokus ni Pedro sa dihang nagpabilin siya sa ibabaw sa tubig? Unsa ang nakapaunlod kaniya?
Unsa ang imong nakat-onan mahitungod kang Jesukristo nga lagmit nga makatabang kanimo sa pagdangop Kaniya kon mobati ka og kahadlok o kalisod?
Tinguha sa mosunod nga kalihokan nga tabangan ang mga estudyante sa pagsabot kon sa unsang paagi nga ang pagpokus kang Jesukristo makatabang kanila sa ilang mga kalisdanan. Base sa mga panginahanglan sa mga estudyante, mahimong magpokus sa lain-laing mga kamatuoran gikan sa asoy.
Mahimong kompletohon ang praktis sa ubos isip usa ka klase gamit ang mosunod nga pagpahiangay:
Pagpakita og hulagway ni Jesukristo sa usa ka bahin sa kuwarto. Dapita ang mga estudyante nga magsulat og bisan unsa nga gibati nga lisod diha sa usa ka papel ug ibutang kini sa pikas nga bahin sa kuwarto. Unya dapita sila nga ibalhin ang ilang pokus gikan sa usa ka bahin sa kuwarto ngadto sa pikas nga bahin sigon sa gisugyot sa kalihokan sa ubos.
Pagpokus diha sa Manluluwas
Gitudloan kita sa ehemplo ni Pedro kon asa kita kinahanglang magpokus. Hinumdomi kon unsa ang nahitabo kang Pedro sa dihang nagpokus siya kang Jesukristo ug kon unsa ang nahitabo sa dihang gibalhin niya ang iyang pokus ngadto sa unos sa iyang palibot (tan-awa sa mga bersikulo 28–31). Pagsulat sa usa ka papel og butang sa imong kinabuhi o sa umaabot nga morag lisod para kanimo. Ibutang kini nga papel sa wala nga bahin nimo. Karon pagbutang og hulagway ni Jesukristo o laing butang nga nagpahinumdom kanimo Kaniya sa imong tuo nga bahin. Ibalhin-balhin ang pagpokus sa imong mga hunahuna ug mga mata sa lisod nga sitwasyon ug unya sa hulagway ni Jesukristo.
Sa unsang paagi nga ang pagpokus sa imong hugot nga pagtuo diha kang Jesukristo ug sa Iyang gahom ug gugma para kanimo makatabang atol sa lisod nga mga sitwasyon?
Unsa ang pipila ka paagi sa pagpokus diha sa Manluluwas atol sa mga hagit?
Imahe
Jesus Christ depicted walking on the water of the Sea of Galilee. The Apostle Peter is in the water. Christ is extending His hand to Peter to prevent Peter from sinking.
Ikonsiderar ang pagpaambit og personal nga kasinatian sa pagdangop sa Dios diha sa pag-ampo aron makadawat og kalig-on ug suporta gikan sa Manluluwas atol sa kalisdanan. Dapita ang andam nga mga estudyante sa pagpaambit usab og mga kasinatian. Samtang nagpaambit ang mga estudyante, pangutana kon unsa ang ilang gibuhat aron modangop atol niadto nga mga panahon.
Sa pagtapos niini nga leksiyon, irekord ang mga impresyon nga imong nadawat. Unsa ang imong nakat-onan mahitungod kang Jesukristo ug nganong kinahanglan kitang modangop Kaniya kon maunlod kita? Unsa ang plano nimong buhaton aron modangop Kaniya?
Komentaryo ug Background nga Impormasyon
Sa unsang paagi nga ang atong mga kinabuhi mausab kon magpokus kita kang Jesukristo?
Si Presidente Howard W. Hunter (1907–95) mitudlo:
Imahe
Howard W. Hunter
Kini ang akong lig-ong pagtuo nga isip mga indibidwal nga katawhan, isip mga pamilya, mga komunidad, ug mga nasud, kita mahimong sama ni Pedro, mopunting sa atong panan-aw ngadto kang Jesus, kita usab makalakaw nga madaugon tabok sa “dagkong mga balod sa kawalay pagtuo” ug magpabiling “dili mahadlok bisan sa nagkakusog nga hangin sa pagduha-duha.” Apan kon atong ilingiw ang atong mga mata gikan kaniya kang kinsa kita kinahanglan gayud nga motuo, ingon nga kini sayon kaayo nga buhaton ug ang kalibotan gitintal og maayo sa pagbuhat, kon kita motan-aw ngadto sa gahum ug sa kapintas niadtong makalilisang ug malaglagon nga mga elemento nga naglibot kanato kay sa ngadto kaniya kinsa makatabang ug makaluwas kanato, niana dili malikayan nato nga maunlod diha sa dagat sa panagbangi ug kaguol ug sa kawalay paglaum.
(Howard W. Hunter, “The Beacon in the Harbor of Peace,” Ensign, Nob. 1992, 19)
Mateo 14:27 . Sa unsang paagi kita “magmalipayon” kon nakasinati kita og mga kalisod?
Si Elder Ronald A. Rasband sa Korum sa Napulog Duha ka Apostoles mipasabot:
Imahe
Howard W. Hunter
Dili kita makahimo sa “paglipay” [ Doktrina ug mga Pakigsaad 68:6 ] ug mapundo sa kahadlok. Ang duha—kalipay ug kahadlok—dili mahimong magdungan sulod kanato sa samang higayon. …
Ang pagmaya mao ang pagsalig [kang Jesukristo] kon dili mahitabo ang mga butang sumala sa atong giplano. Nagpasabot kini nga mopadayon kon ang lisud nga mga buluhaton ug mga sitwasyon mousab sa atong kinabuhi, kon ang mga pagsulay moguba sa atong mga damgo. Apan ang Ginoo mipahinumdom kanato, “Dinhi niini nga kalibutan ang imong kalipay dili hingpit, apan kanako hingpit ang imong kalipay” [ Doktrina ug mga Pakigsaad 101:36 ].
(Ronald A. Rasband, “Si Jesukristo Mao ang Tubag” [gabii uban sa usa ka General Authority, Peb. 8, 2019], 1–2)
Sa unsang paagi nga ang kahadlok maoy hinungdan nga mawala ang mga panalangin nga gitanyag sa Manluluwas?
Si Elder Jeffrey R. Holland sa Korum sa Napulog Duha ka Apostoles mipakigbahin sa mosunod nga pamahayag:
Imahe
Official Portrait of Elder Jeffrey R. Holland. Photographed January 2018.
Kining istorya sa kasulatan nagpahinumdom kanato nga ang unang lakang sa pagduol ngadto ni Kristo—o sa iyang pagduol ngari nato—mopuno kanato og labihang kahadlok. Dili unta, apan usahay mahitabo gayud. Usa sa dakong mga kasungian sa ebanghelyo mao nga ang tinubdan sa tabang ug kahilwasan nga gitanyag kanato mao ang butang nga tingali kita, sa pagkamubo sa atong mortal nga panan-aw, mopalayo. Sa bisan unsang rason, ako nakakita sa mga tawo nga gitudloan nga misibog sa pagpabunyag, nakakita ko og mga elder nga mipalayo sa tawag sa pagmisyon, nakakita ko og mga hinigugma mipahilayo gikan sa kaminyoon, ug nakakita ko og batan-ong mga magtiayon nga mipahilayo tungod sa kahadlok sa mga pamilya ug sa umaabot. Sa kasagaran kita mopalayo sa mismong mga butang nga moluwas kanato ug mohupay kanato. Sa kasagaran atong makita ang mga pasalig ug mga sugo sa ebanghelyo isip usa ka butang nga kahadlokan ug dayon biyaan.
(Jeffrey R. Holland, “Duol Kanako” [Brigham Young University devotional, Mar. 2, 1997], 8, speeches.byu.edu)
Dugang nga mga Kalihokan sa Pagkat-on
Pareho sa plano sa kaluwasan
Ang kasinatian ni Pedro sa pagbiya sa sakayan, pagkinahanglan og tabang, ug luwas nga pagdala og balik sa Manluluwas makatudlo kanato mahitungod sa atong kaugalingong mortal nga panaw ug sa plano sa kaluwasan. Isukna sa mga estudyante ang mosunod nga mga pangutana: Unsa nga mga kapareho ang imong nakita tali niini nga asoy ug sa plano sa kaluwasan? Unsa ang imong nakat-onan mahitungod sa misyon ni Jesukristo sa dihang mitan-aw ka sa asoy niini nga paagi?
Dapita ang mga estudyante nga ilista ang tabang nga gitanyag sa Langitnong Amahan ug ni Jesukristo pero gilikayan sa mga tawo usahay tungod sa kahadlok. Mahimong naglakip kini sa mga butang sama sa pag-ampo, pagpainterbiyo sa bishop, pagserbisyo og misyon, pagdawat og calling, o pagminyo. Tabangi ang mga estudyante sa pagpokus sa kamatuoran nga ang Langitnong Amahan ug si Jesukristo nagtanyag niini nga tabang ngadto kanila. Dili kinahanglang mahadlok sa pagduol Kanila o pagdawat sa Ilang gitanyag kanato. Ikonsiderar ang pagpakita sa pamahayag gikan sa pakigpulong ni Elder Jeffrey R. Holland nga “Duol Kanako,” nga anaa sa seksiyon nga ”Komentaryo ug Background nga Impormasyon” sa leksiyon, aron makatabang niini nga panaghisgotan.
Dugang pang mga detalye anaa sa Marcos ug Juan
Ang lain-laing mga tigsulat sa Ebanghelyo sa kasagaran nagpaambit og talagsaong mga detalye mahitungod sa parehong asoy. Busa, ang pagbasa og daghang mga perspektibo sa Ebanghelyo makatabang kanato nga makakat-on og dugang mahitungod kang Jesukristo samtang gitun-an nato ang Bag-ong Tugon. Pananglitan, ang detalye nga atong nakat-onan sa Juan 6:16–19 mao nga sa wala pa moadto ang Manluluwas sa mga disipulo, ang unos ang hinungdan nga nakapamugsay lamang sila sa ilang sakayan og 5 hangtod sa 6 ka kilometro (mokabat sa 3.1 hangtod sa 3.8 ka milya), mokabat sa 70 ka porsyento sa ilang panaw, pagkahuman sa pagtrabaho sa halos tibuok gabii (tan-awa sa Marcos 6:48).
Isulat ang Marcos 6:47–51 ug Juan 6:19–21 sa pisara, ug dapita ang mga estudyante nga pangitaon kini nga mga tudling para sa mga detalye nga wala sa asoy ni Mateo ug ipaambit ang ilang nakat-onan mahitungod sa Manluluwas gikan niining dugang pang mga detalye.
Ipokus ang pagtagad sa mga estudyante ngadto sa kon giunsa pag-awhag sa Manluluwas ang Iyang mga disipulo nga “magmaya” ( Mateo 14:27) bisan pa kon anaa sila sa lisod nga sitwasyon. Dapita ang mga estudyante nga mangita og uban pang mga tudling sa kasulatan diin giawhag kita sa Manluluwas nga “magmaya.” Hisgoti ang mga paagi nga kita mahimong magmaya, bisan pa sa mga lisod nga sitwasyon.
