Jesús bendice los panes y los peces para dar de comer a las personas que se congregaron para oír Sus enseñanzas.
Pagkahuman sa pagkahibalo ni Jesukristo nga giputlan og ulo si Juan nga Magbubunyag, miadto Siya ug ang Iyang mga Apostoles sa mingaw nga lugar. Gisundan sila sa daghang tawo. Bisan pa kon nag-antos Siya, nalooy ang Manluluwas sa katawhan ug gitudloan ug gipakaon ang mga tawo—5,000 ka lalaki ug mga babaye ug mga bata. Makatabang kini nga leksiyon kanimo nga mahimong mas maloloy-on ug dili hakog sama ni Jesukristo. Makatabang usab kini kanimo nga makabaton og mas dakong pagsalig nga tungod ni Jesukristo mahimong mapaigo ang imong mapaubsanong mga halad.
Pagsalig sa imong mga estudyante. Kinahanglan nga ang mga magtutudlo magbaton og pagsalig nga uban sa hustong paggiya ug pag-awhag, ang mga estudyante makasabot sa mga kasulatan, makakat-on sa pag-ila sa doktrina ug mga baroganan, makapasabot sa ebanghelyo ngadto sa ubang tawo, ug makagamit sa mga pagtulon-an sa ebanghelyo diha sa ilang mga kinabuhi.
Pag-andam sa estudyante: Dapita ang mga estudyante nga mag-ampo ug mangita og oportunidad nga mangalagad sa usa ka tawo sa dili pa ang sunod nga klase. Awhaga sila nga maghatag og pagtagad kon unsa ang ilang bation samtang nangalagad sila.
Posible nga mga Kalihokan sa Pagkat-on
Unsa nga tambag ang ihatag nimo?
Ang mga sitwasyon sa ubos motukma sa duha ka lain-laing baroganan nga gitudlo sa pagpakaon sa Manluluwas sa 5,000. Ikonsiderar ang mga panginahanglan sa mga estudyante, ug tukia kon pinakamaayo na nga tun-an ang usa ka baroganan isip klase o, kon makabenepisyo ang mga estudyante gikan sa pagtuon sa usa ka baroganan nga ilang pilion, sa tagsa-tagsa o diha sa gagmay nga mga grupo. Buwaga ang girekomendang mga kalihokan sa pagtuon nga motukma sa kada sitwasyon.
Basaha ang mosunod nga duha ka sitwasyon, ug pilia kon asa ka magpokus samtang gitun-an kini nga leksiyon. Hunahunaa kon unsa kaha ang imong isulti aron matabangan si Roger o Claire.
Suod kaayo ang imong higala nga si Roger sa iyang ig-agaw nga bag-ohay lang nga namatay nga wala gidahom. Sa kada higayon nga misulay ka sa pagbisita, gisultihan ka ni Roger nga gusto niyang mag-inusara. Pagkahuman nimo sa pagbuhat sa daghang pagsulay, gipasulod na ka niya. Samtang nagsugod siya sa pagsaysay, miingon siya, “Lisod kaayo kini para kanako. Unsaon man nako sa pagsulbad niini?”
Ang imong higala nga si Claire bag-ohay lang gitawag nga mahimong presidente sa iyang klase sa Young Women. Busy na siya kaayo, ug gibati niya nga mas mahigalaon ang ubang mga batan-ong babaye ug mas maayo sila. Gipaambit ni Claire ang iyang mga kabalaka kanimo ug miingon siya, “Dili ako sigurado nga mabuhat nako kini.”
Sa kinatibuk-an niini nga leksiyon, pangitaa ang mga kamatuoran nga makatabang sa usa ka tawo nga mibati og sama kang Roger o Claire. Mas importante, pag-ampo sa imong kasingkasing nga ipadayag sa Langitnong Amahan kanimo kon sa unsang paagi nga makatabang kini nga mga kamatuoran kanimo ug sa mga tawo nga imong gihigugma.Ang asoy ni Jesus nga mipakaon sa 5,000 adunay mga baroganan nga makatabang kanato niini nga mga matang sa mga sitwasyon. Tun-i ang seksiyon nga may kalabotan sa sitwasyon nga imong gipili. Pagkahuman nimo sa pagtuon, ipaambit nimo ang imong nakat-onan.
I-imprinta ug ipanghatag ang mosunod nga mga handout. Kon gikinahanglan, paglibot-libot sa lawak-klasehanan aron tabangan ang mga estudyante sa ilang pagtuon.
Sitwasyon 1: Roger—Unsa ang makatabang kanako sa pagsulbad sa mga problema? ( Mateo 14:13–23)
Sa Mateo 14:1–12 , nahibaloan nato nga giputlan og ulo ni Herodes si Juan nga Magbubunyag. Hunahunaa ang mga pagbati nga lagmit nga gibati ni Jesus sa dihang Iyang nadungog nga gipatay ang Iyang suod nga higala ug ig-agaw.
Tun-i kon unsa ang gibuhat sa Manluluwas sa Mateo 14:13–23 , nga mangita ug magmarka sa ebidensya niini nga baroganan: mahimo natong sundon ang ehemplo ni Jesukristo pinaagi sa pagpakita og kalooy ug pagpangalagad sa ubang tawo bisan pa kon nakasinati kita og atong mga kaugalingong problema.Hinumdomi nga ang “dapit nga awaaw” ( bersikulo 13) usa ka mingaw nga lugar.
Unsa ang imong nakita niini nga mga bersikulo nga nagsuporta niini nga baroganan?
Unsa ang gibuhat ni Jesus bisan pagkahuman sa pagkahibalo nga gipatay si Juan nga Magbubunyag?
Sa unsang paagi nga ang ehemplo sa Ginoo sa dili hinakog nga pagpangalagad makatabang sa usa ka tawo nga naglisod?
Si Elder David A. Bednar sa Korum sa Napulog Duha ka Apostoles mitudlo kon sa unsang paagi kita makabaton og kinaiya nga sama kang Kristo:
Imahe
Elder David A. Bednar, Quorum of the Twelve Apostles official portrait. 2020.
Ang kinaiya mapadayag, sama pananglit, diha sa gahom nga makaila sa pag-antos sa ubang mga tawo kon kita mismo nag-antos; sa abilidad nga makamatikod sa kagutom nga gibati sa uban kon kita gigutom; ug diha sa gahom sa pagtabang ug paghatag og kalooy sa espirituhanong pag-antos sa uban kon kita anaa sa atong kaugalingong espirituhanon nga kasakit. Sa ingon, ang kinaiya mapakita pinaagi sa pagtan-aw ug pagtabang sa uban kon ugaling mosukmat man ang kinaiyanhon natong pagkatawo ug atong reaksyon nga kaugalingon ra ang hunahunaon. …
…Sa pagkatinuod, posible nga kita isip mga mortal nga makapaningkamot diha sa pagkamatarong aron madawat ang espirituhanong mga gasa nga gilangkuban sa kapasidad nga malugwayan ang pagtabang ug makahimo og tukmang reaksyon ngadto sa ubang tawo nga nagsinati sa grabeng hagit o kalisdanan nga nagpabug-at kanato sa hilabihan.
Dili nato maangkon ang ingon nianang kapasidad pinaagi sa hingpit nga determinasyon o personal nga determinasyon. Kondili, kita magdepende ug magkinahanglan sa “mga maayo nga buhat, ug kalooy, ug grasya sa Balaang Mesiyas” ( 2 Nephi 2:8).
Samtang nag-andam ka nga ipaambit ang imong nakat-onan, pamalandongi ang mga kasinatian nga imong nasinati sa pagpangalagad sa ubang tawo.
Ngano kaha nga ang pagpangalagad nga sama kang Kristo makatabang kanato sa atong mga kaugalingong mga hagit?
Sitwasyon 2: Claire—Igo ba ang akong mga paningkamot sa pagbuhat sa gihangyo kanako sa Ginoo? ( Juan 6:5–14)
Sa dihang nakakita si Jesus ug ang Iyang mga disipulo og katawhan nga nagpadulong kanila, nahadlok ang mga disipulo nga wala silay igong pagkaon nga ipakaon sa tanan.
Tun-i ang asoy ni Jesus nga nagpakaon sa 5,000 sa Juan 6:5–14 , nga mangita ug magmarka sa ebidensya niini nga baroganan: kon kita mohalad sa Manluluwas sa tanan nga anaa kanato, Siya makapilo-pilo sa atong mga paningkamot aron matuman ang Iyang mga katuyoan.
Unsa ang imong nakita niini nga mga bersikulo nga nagsuporta niini nga baroganan?
Unsa kaha ang gibati sa mga disipulo o sa batan-ong lalaki mahitungod sa unsay ilang matanyag kompara sa kon unsa ang gikinahanglan?
Basaha ang mosunod nga pamahayag ni Sister Michelle D. Craig, Unang Magtatambag sa Kinatibuk-ang Kapangulohan sa Young Women:
Imahe
Sister Michelle D. Craig, first counselor, Young Women general presidency. Official Portrait as of October 2018.
Mibati ba mo sukad nga ang inyong mga talento ug mga gasa gamay ra kaayo alang sa umaabot nga buluhaton? Ako mibati. Pero kamo ug ako makahatag kon unsay anaa kanato ngadto kang Kristo, ug Iyang pilo-piloon ang atong mga paningkamot. Unsay inyong mahalad sobra na kaayo—bisan pa sa inyong tawhanong mga kahuyang—kon mosalig kamo sa grasya sa Dios.
Unsa ang lain-laing mga paagi nga kita “makahatag kon unsay anaa kanato ngadto kang Kristo”?
Unsa ang imong nakat-onan gikan niini nga asoy ni Jesus sa pagpakaon sa 5,000 nga makatabang sa usa ka tawo nga nabalaka nga dili paigo ang ilang mahatag?
Samtang nag-andam ka sa pagpaambit sa imong nakat-onan, hunahunaa ang mga pananglitan sa imong kinabuhi o sa mga kinabuhi sa ubang tawo nga nakita nimong gipilo-pilo sa Manluluwas ang mga paningkamot sa usa ka tawo aron matuman ang Iyang gitinguha.Hunahunaa kon sa unsang paagi nga imong magamit ang ehemplo ni Jesus sa pagpakaon sa 5,000 aron matabangan ang imong higala nga adunay hagit nga sama sa sitwasyon nga imong gipili.
Ikonsiderar ang pagpakita sa mosunod nga instruksiyon ug pag-awhag sa mga estudyante nga ipaambit ang ilang mga tubag sa ilang mga kapares.
Ipaambit kon unsa ang gusto nimong ipahibalo ug ipabati kanila mahitungod kang Jesukristo.
Ipasabot kon unsa ang ilang mabuhat aron makasunod sa ehemplo sa Ginoo ug magamit ang Iyang gahom.
Paglakip og dili mominos sa usa ka hugpong sa mga pulong gikan sa mga kasulatan o ang kinutlo nga imong gitun-an.
Pagpaambit og personal nga kasinatian o pagpamatuod aron suportahan ang imong gitudlo.
Ikonsiderar ang pagtapos pinaagi sa pagpaambit og personal nga kasinatian ug pagpamatuod mahitungod sa kalinaw nga naangkon pinaagi sa pagpangalagad sa ubang tawo o mahitungod sa abilidad sa Manluluwas nga pilo-piloon ang atong matinud-anong mga paningkamot.
Komentaryo ug Background nga Impormasyon
Pila ka tawo ang gipakaon ni Jesus?
Ang Greek nga teksto diha sa Marcos 6:44 nagklaro nga ang hugpong sa mga pulong nga “lima ka libo ka tawo” nagpasabot og lima ka libo nga lalaki. Ang Mateo 14:21 mihimo niini nga dili masayop pinaagi sa pagdugang sa pamahayag nga “walay labot sa mga babaye ug sa mga bata.”
(Manwal sa Estudyante sa Bag-ong Tugon [2014], 115)
Sa lahi nga okasyon, gipakaon ni Jesus ang katawhan nga 4,000 ka lalaki ug mga babaye ug mga bata. (Tan-awa sa Mateo 15:32–38 ; Marcos 8:1–9 .)
Sa unsang paagi nga ang pagtabang sa ubang tawo nakapalig-on kanako?
Si Presidente Henry B. Eyring sa Unang Kapangulohan miingon:
Imahe
Official Portrait of President Henry B. Eyring taken March 2018.
Kinahanglan gayud kitang motimaan sa kalisdanan sa uban ug mosulay sa pagtabang. Kana lisud gayud kaayo kon kita mismo grabe nga gisulayan. Apan atong madiskubrihan samtang moalsa kita sa palas-anon sa laing tawo, bisan gamay lang, nga ang atong likod malig-on ug makabantay kita og kahayag diha sa kangitngit.
(Henry B. Eyring, “Nasulayan, Napamatud-an, ug Nahashasan,” Liahona, Nob. 2020, 98)
Mapilo-pilo ba gayud ni Jesus ang akong mga paningkamot?
Si Elder Jeffrey R. Holland sa Korum sa Napulog Duha ka Apostoles mitudlo:
Imahe
Official Portrait of Elder Jeffrey R. Holland. Photographed January 2018.
Ayaw kabalaka nga si Kristo mahutdan sa abilidad sa pagtabang kaninyo. Ang Iyang grasya paigo. Mao kana ang espirituhanon, mahangturong leksiyon sa pagpakaon sa 5,000.
(Jeffrey R. Holland, Trusting Jesus [2003], 73)
Dugang nga mga Kalihokan sa Pagkat-on
Ang pagpaningkamot sa pagpahimuot sa ubang tawo imbes sa pagbuhat sa unsay atong nasayran nga matarong mosangpot ngadto sa pagbasol
Ikonsiderar ang pagsulat sa kamatuoran nga gipadayag niini nga ulohan diha sa pisara. Dapita ang mga estudyante nga maghunahuna og mga sitwasyon diin kinahanglang mopili ang kabatan-onan tali sa pagpahimuot sa ubang tawo ug pagbuhat og matarong. Unya dapita ang mga estudyante nga basahon ang Marcos 6:17–27 , nga mangita sa mga sayop nga desisyong gibuhat ni Haring Herodes tungod sa iyang tinguha nga mapahimuot ang ubang tawo. Pagkahuman sa pag-report sa mga estudyante sa ilang nakita, pagsukna og mga pangutana sama sa mosunod aron makatabang kanila nga mas masabtan ang kamatuoran sa ulohan.
Unsa sa imong tan-aw nga ang pag-uyon sa negatibong pagpamugos sa kaubanan mosangpot ngadto sa pagbasol?
Kinsa ang maayong ehemplo kanimo mahitungod sa pagsunod sa Manluluwas sa dihang nakasinati og negatibong pagpamugos sa kaubanan? Unsa ang imong nakat-onan pinaagi sa ilang ehemplo?
Unsa ang pipila ka paagi nga makadangop kita sa Manluluwas kon pugson kita sa pagbuhat sa butang nga nahibaloan natong sayop?
Ang pagkamapasalamaton makatabang kanato nga mahimong mas susama kang Jesukristo
Idirekta ang atensyon sa mga estudyante ngadto sa Juan 6:11 . Tabangi sila nga makita nga nagpasalamat si Jesus sa wala pa gipanghatag ang mga pan ug mga isda. Dapita ang mga estudyante nga ikonsiderar ang pagrekord sa mosunod nga pamahayag duol sa bersikulo 11 o diha sa ilang mga journal sa pagtuon:
“Ang pagkamapasalamaton usa ka mahinungdanong bahin sa tanang sama kang Kristo nga mga kinaiya!”
Unsa ang gitudlo kanimo sa ehemplo sa Manluluwas mahitungod sa pagkamapasalamaton?
Sa unsang paagi kaha nga ang pagkamapasalamaton mosangpot ngadto sa uban pang mga kinaiya nga sama kang Kristo?
Pagpalambo og sama kang Kristo nga kalooy og sakripisyo
Ikonsiderar ang paggamit niini nga mga video aron ipakita ang mosunod nga mga kamatuoran:
Mahimo natong sundon ang ehemplo ni Jesukristo pinaagi sa pagpakita og kalooy ug pagpangalagad sa ubang tawo bisan pa kon nakasinati kita og atong mga kaugalingong kalisdanan.
Kon kita mohalad sa Manluluwas sa tanan nga anaa kanato, Siya makapilo-pilo sa atong mga paningkamot aron matuman ang Iyang mga katuyoan.
