Iosefa Samita—Mataio
Tulimatai le Afio Mai o le Alii
I se talanoaga patino i luga o le Mauga o Olive, na tali atu ai Iesu Keriso i fesili a Ona soo e uiga i Lona Afio Mai Faalua. O lenei lesona e mafai ona fesoasoani e te malamalama ai i le mea na aoao mai e le Faaola e uiga i faailoga o Lona afio mai ma tulimatai atu i le aso o le a Ia toe afio mai ai i le lalolagi.
Fesoasoani i tagata aoga ia maua ni aafiaga anoa. Manatua o lau sini i le avea ai ma se faiaoga e le o le aoao atu o se lesona po o le tautalagia o anotusi. Ae o lenei, ia fesoasoani i tagata aoga e suesue i tusitusiga paia i se auala o le a fesoasoani ia i latou ia iloa ma mulimuli i le Faaola.
Sauniuniga a le tagata o le vasega: Valaaulia tagata aoga e faitau le Iosefa Samita—Mataio 1:22–55 ma mafaufau i o latou manatu ma lagona e uiga i le Afio Mai Faalua o le Faaola.
Gaoioiga e ono Mafai Ona Aoao Ai
Vaai faalemafaufau i le afio mai o Iesu Keriso
Afai e talosagaina tagata aoga e faitau Iosefa Samita—Mataio 1:22–55 ma mafaufau i le Afio Mai Faalua o Iesu Keriso a o lei amataina le vasega, mafaufau e tuu atu ia i latou e faasoa mai o latou manatu ma lagona i le taimi nei. Faaali atu le ata o loo i luga, ma fai atu ni fesili e mafai ona fesoasoani i tagata aoga e faaleo ai o latou manatu ma lagona e uiga i le mataupu. Faalogo i mea o faasoa mai e tagata aoga, ma mafaufau i mea nei e faaleleia atili ai o latou aafiaga.
Mafaufau i mea ua e iloa e uiga i le Afio Mai Faalua o Iesu Keriso ma faailoga o le a tupu i ona luma mai. Vaai faalemafaufau pe faapei ona tino mai.
-
O le a se mea e te vaaia faalemafaufau pe a e mafaufau e uiga i le Afio Mai Faalua o Iesu Keriso?
-
O a ni ou lagona pe a mafaufau i le afio mai o le Faaola?
Faalogo totoa i mea o fai mai ai tagata aoga. Afai e foliga popole pe fefefe tagata aoga e uiga i le Afio Mai Faalua o Iesu Keriso, vaavaai mo avanoa i le taimi atoa o le lesona e fesoasoani ai ia latou lagonaina le filemu. Fesoasoani ia i latou ia malamalama i faailoga o le afio mai o le Faaola ma tulimatai atu i Lona toe afio mai.
A o e suesue ai i le aso, faalogo mo musumusuga mai le Agaga Paia e fesoasoani e te iloa ai mea e mafai ona e faia e tulimatai atu ai i le aso o le a toe afio mai ai Iesu Keriso.
O faailoga e faatomua i le Afio Mai Faalua o Iesu Keriso
Ina ua fesili atu le au soo i le Faaola, “O le a le faailoga o lou afio mai?” ( Iosefa Samita—Mataio 1:4), sa Ia aoao atu ia i latou e uiga i mea e tutupu e tau atu i Lona Afio Mai Faalua. E ui lava e leai se tasi sei vagana ai le Tama Faalelagi na te silafia le aso po o le itula tonu o le a tupu ai lenei mea, ae na faamalamalama mai e Iesu le taua o le mataala mo faailoga eseese na Ia tuuina mai (tagai i le Iosefa Samita—Mataio 1:40, 46).
O se tasi o vaega i tusitusiga paia o loo otooto mai ai faailoga o le afio mai o le Alii o loo otooto mai i le Iosefa Samita—Mataio . O le faaliliuga lenei a Iosefa Samita, po o le toe iloiloga, o le Mataio 24, o loo maua i le Penina Tau Tele.
-
O a nisi o faailoga e te iloa o le a faatomua i le Afio Mai Faalua o Iesu Keriso?
Mafaufau e valaaulia tagata aoga e fai se lisi o faailoga i luga o le laupapa. A uma ona faasoa mai e tagata aoga mea ua latou iloa, mafaufau e valaaulia i latou e siaki i mau mo nei faailoga ma vaavaai mo isi.
Ina ia maua nisi o faailoga na faaali mai e le Alii ma se mafuaaga na Ia faaalia mai ai, faitau Iosefa Samita—Mataio 1:22–23, 28–36, 48 . E mafai foi ona e vaai “ Faailoga o Taimi ” i le Taiala i Tusitusiga Paia, o lo o maua i le scriptures.ChurchofJesusChrist.org.
-
O le a se mea e tulaga ese ia te oe e uiga i faailoga na tuuina mai e le Faaola o Lona Afio Mai Faalua?
-
O le a se mea e mafai ona tatou aoaoina e uiga ia Iesu Keriso e ala i le iloaina na Ia faaalia mai nei faailoga a o lei taitai oo i Lona Afio Mai Faalua?
-
O a ni ou lagona a o e vaai faalemafaufau i le talalelei o loo “talaiina atu i le lalolagi atoa” ( Iosefa Samita—Mataio 1:31) ma le Faaola “ua afio mai i ao o le lagi, ma le mana ma le mamalu tele”? ( Iosefa Samita—Mataio 1:36). Aisea?
Mafaufau e valaaulia tagata aoga e iloilo fuaiupu na latou suesueina i lenei lesona ma faailoga faamatalaga taua e uiga i le Faaola ma Ona naunautaiga mo i latou. A uma ona latou faasoa mai mea na latou faailogaina, atonu e aoga le gaoioiga lenei. Ia iai le lagona saoloto e faaopoopo i ai fasifuaitau faaopoopo na latou faailoa mai e uiga i le Faaola ma Ona naunautaiga mo i latou.
Filifili se tasi o fasifuaitau nei ma mafaufau e faailoga i totonu o au mau. A o e faailogaina upu, mafaufau i le savali a Iesu Keriso. Vaavaai mo mea e mafai ona aoao atu e afioga a le Faaola ia te oe e uiga ia te Ia ma Ona naunautaiga mo oe.“Vaai ia le atuatuvale outou” ( Iosefa Samita—Mataio 1:23).“O ia o le e nofo tumau ma lē faatoilaloina, o ia lava lea o le a faaolaina” ( Iosefa Samita—Mataio 1:30).“E le mavae atu a’u upu, ae o le a faataunuuina uma lava” ( Iosefa Samita—Mataio 1:35).“Ia saunia foi outou” ( Iosefa Samita—Mataio 1:48).
-
O le a se uiga e te manatu e finagalo le Faaola ia e maua e faatatau i Lona afio mai?
-
O le fea o afioga a Iesu Keriso e fesoasoani ia te oe ina ia alofa ai ma faalagolago ia te Ia?
I lenei vaiaso atoa, o le a e suesue atili ai e uiga i le Afio Mai Faalua o Iesu Keriso ma le auala e mafai ona e saunia ai.
Faatalitali i le toe afio mai o le Alii
E mafai ona fesili i tagata aoga e vaai i se ata pe moeiini o latou mata ma vaai faalemafaufau i mea na tutupu i le Afio Mai Faalua o Iesu Keriso a o faalogologo i le faamatalaga lenei a Elder Neil Elder Neil L. Andersen.
A o e faitauina le saunoaga lenei mai ia Elder Neil L. Andersen o le Korama a Aposetolo e Toasefululua, vaai faalemafaufau i mea na ia fai mai ai ma mafaufau i ou lava uiga faaalia e faatatau i le Afio Mai Faalua.
O le mafaufau i Lona afio mai e faagaeetia ai lo’u agaga. O le a ofoofogia! O le lautele ma le matagofie, o le tele ma le ofoofogia, o le a sili ae i soo se mea ua vaai i ai mata faaletino pe aafia ai.
I lena aso … o le a Ia faaali mai ai “i ao o le lagi, ua faaofuina i le mana ma le mamalu tele; faatasi ma agelu paia uma” [ Mataupu Faavae ma Feagaiga 45:44 ]. … O le a suia le la ma le masina, ma “o fetu [o le a] lia’i ese mai o latou nofoaga” [ Mataupu Faavae ma Feagaiga 133:49 ]. …
… O le a tatou tootutuli ma le migao, “ma o le a tulei mai e le Alii lona siufofoga, ma o le a lagona e tuluiga uma o le lalolagi” [ Mataupu Faavae ma Feagaiga 45:49 ]. …
I lena aso, o le a gugu le au masalosalo, “aua o le a faalogo tagata uma …, ma tootuli tulivae uma, ma tautino atu e laulaufaiva uma” [ Mataupu Faavae ma Feagaiga 88:104 ] o Iesu o le Keriso, o le Alo o le Atua, o le Faaola ma le Togiola o le lalolagi.
… Ia tatou sauniuni mo Lona toe afio mai e ala i le faataitaia pea lava pea o nei mea mamalu ua tutupu i o tatou lava mafaufau ma i latou tatou te alolofa i ai.
(Neil L. Andersen, “Thy Kingdom Come,” Ensign po o le Liahona, Me 2015, 122)
-
O a ni ou manatu po o ni lagona na e maua a o e vaai faalemafaufau i le mea na faamatalaina e Elder Andersen?
-
Na faapefea ona uunaia e lenei lesona ou mafaufauga po o lagona na e maua i le amataga o le vasega e uiga i le Afio Mai Faalua?
-
O le a se mea e mafai ona fesoasoani ia te oe e vaai faalemafaufau ai i le afio mai o le Alii o se mea mamalu?
-
O ai se tasi atonu e te talanoa i ai e uiga i le Afio Mai Faalua o Iesu Keriso?
Afai e mafai, mafaufau e faatau ni ata laiti o le Afio Mai Faalua o le Faaola mo tagata aoga. E mafai ona valaaulia tagata aoga e tuu le ata i se nofoaga e faamanatu ai pea ia i latou le toe afio mai o le Alii i Lona mamalu.
Tala Auiliili ma Faamatalaga o Talaaga
Iosefa Samita—Mataio 1:36–37 . O le a faapei pe a toe afio mai le Faaola?
I se tasi taimi, na saunoa ai Elder Neil L. Andersen ona manatu e uiga i le taimi o le a toe afio mai ai Iesu Keriso i le lalolagi i le mamalu:
E leai se mea e faaosofia ai lo’u manao e tautala e uiga ia Keriso nai lo le vaai atu faalemafaufau i Lona toe afio mai. E ui tatou te le iloa pe o afea o le a Ia toe afio mai ai, ae o mea e tutupu i Lona toe afio mai o le a ofoofogia! O le a afio mai o Ia i ao o le lagi i le mamalu ma le matagofie faatasi ma Ana agelu paia uma. E le na o ni nai agelu, ae o Ana agelu uma lava. E le o le kerupi alafau mūmū na valiina e Lafaele, lea tatou te vaaia i luga o a tatou kata Valenitina. O agelu ia o seneturi, o agelu na auina atu e pupuni gutu o leona [tagai i le Tanielu 6:22 ], e tatala faitotoa o le falepuipui [tagai i le Galuega 5:19 ], e faailoa atu ai Lona soifua mai ua leva ona faatalitali i ai [tagai i le Luka 2:2–14 ], e faamafanafana ia te Ia i Ketesemane [tagai i le Luka 22:42–43 ], e faamautinoa atu i Ona soo i Lona Afio Ae [tagai i le Galuega 1:9–11 ], ma tatala ai le Toefuataiga mamalu o le talalelei.
E mafai ona e vaai faalemafaufau i le aveina ae e faafetaiai ia te Ia, pe i le itu lenei po o le isi itu o le veli? [tagai i le 1 Tesalonia 4:16–17 ; Mataupu Faavae ma Feagaiga 88:96–98 ]. O Lana folafolaga lena i e amiotonu. O lenei aafiaga ofoofogia o le a faailoga ai o tatou agaga e faavavau.
(Neil L. Andersen, “We Talk of Christ,” Ensign po o le Liahona, Nov. 2020, 91)
Ae faapefea pe a ou popole i faailoga o le Afio Mai Faalua o le Faaola?
O le vitio “Aua le Atuatuvale” (5:10) e fesoasoani tatou te malamalama ai e le manaomia ona tatou fefefe i faailoga o aso e gata ai. O loo maua lenei vitio i le ChurchofJesusChrist.org.
//media.ldscdn.org/webvtt/scripture-and-lesson-support/doctrine-and-covenants-visual-resource/2010-07-038-be-not-troubled-en.vtt
Galuega Faatino Faaopoopo e Aoao Mai Ai
Sauniaina o le lalolagi mo le toe afio mai o le Faaola
O nisi o alii talavou o le Perisitua Arona e mafai ona talosagaina e o mai saunia i le vasega e tauloto pe faamatala le vaega o le autu o le korama a le Perisitua Arona e uiga i le sauniaina o le lalolagi mo le toe afio mai o le Faaola. E mafai foi ona talosagaina tamaitai talavou e faasoa mai mea o loo latou faia e saunia ai le lalolagi mo le Afio Mai Faalua o Iesu Keriso.
O faataoto e faatatau i le Afio Mai Faalua o Iesu Keriso
Fesoasoani i tagata aoga e aoao e uiga i le finagalo o le Alii mo i tatou ina ia saunia mo Lona Afio Mai Faalua e ala i le suesueina o faataoto pupuu sa Ia aoao mai i le Iosefa Samita—Mataio . O mau faasino nei e mafai ona faaali atu mo le vasega e filifili mai ai pe mafai foi ona vaevaeina tutusa i tagata aoga. Afai e totofi atu mau faasino, ia nofouta i le umi po o le lavelave o faataoto taitasi. A uma ona faitau tagata aoga, e mafai ona talosagaina i latou e faamatala a latou faataoto i se paga po o ni vaega laiti. Mafaufau e faaaoga le mau faasino muamua ma le faamalamalamaga o se auala e faaali atu ai le faiga i le vasega.
|
O Le Afio Mai Faalua o Iesu Keriso o le a le tupu faalilolilo. E pei o le malamalama o le la ua ufitia ai le lalolagi atoa, o le a iloa e tagata uma. | |
A uma ona faasoa mai tagata aoga, e mafai ona fesoasoani i tagata aoga le aoteleina o le savali a le Alii o loo i totonu o nei faataoto e ala i le taliina o se fesili e pei o lenei: E faavae i mea na e aoaoina mai nei faataoto, o le a sou lagona o le savali a le Alii ia te oe e uiga i Lona Afio Mai Faalua?