Mataio 25:1–13

O Le Faataoto i Taupou e Toasefulu

Ina ua latalata i le faaiuga o Lana galuega i le lalolagi, sa aoao atu ai e Iesu Keriso Ona soo i le taua o le saunia mo le Afio Mai Faalua e ala i le faamatalaina o le faataoto i taupou e toasefulu. E mafai ona fesoasoani lenei lesona e te malamalama ai ma lagona le taua o le sauniaina o oe lava e fetaiai ma le Alii pe a toe afio mai o Ia.

Sauniunia o lou siosiomaga. O le faatumauina o se siosiomaga faatulagaina lelei ma le filemu e aoao ai e mafai ona fesoasoani i tagata aoga e lagona ai le uunaiga a le Agaga Paia ma faatupuina ai se lagona o le faamoemoe.

Sauniuniga a le tagata o le vasega: Valaaulia tagata aoga e fua i latou lava i se fua mai le 1 i le 10 (o le 1 e te le malie; 10 o lona uiga e te malie) i le faamatalaga lenei: “Ua ou lagona le saunia mo le Afio Mai Faalua o Iesu Keriso.” Valaaulia i latou e mafaufau loloto pe aisea na latou fuaina ai i latou lava i le ala na latou faia ai.

Gaoioiga e ono Mafai Ona Aoao Ai

Sauni pe leai?

Mafaufau i se taimi na e le saunia ai mo se mea na manaomia ai se sauniuniga tele.

• Na faapeī?

• O a nisi o mafuaaga tatou te faatalale ai e saunia mo nisi o mea?

Valaaulia tagata aoga e faasoa ane o latou aafiaga ma lagona. Mafaufau e faasoa atu foi se faataitaiga.

Fesili i tagata aoga e fai faalilolilo mea nei.

Fua oe lava i se fua mai le 1 i le 10 (1 o lona uiga e te le malie; 10 o lona uiga e te malie) i le faamatalaga lea:

Ua ou lagona le saunia mo le Afio Mai Faalua o Iesu Keriso.

O le Mataio 25:1–13 o loo i ai le faataoto a Iesu Keriso i taupou e toasefulu na Ia aoao atu e fesoasoani ai i Ona soo ia saunia mo Lona Afio Mai Faalua. A o e suesue, saili le taitaiga a le Agaga Paia e fesoasoani ia te oe ia iloa auala ua e saunia ai ma auala e mafai ai ona e faaleleia atili. Mafaufau loloto i fesili e pei o le “O ai au i lenei faataoto?”

Mafaufau e faasoa atu faamatalaga nei i tagata aoga ma fesili atu pe aisea latou te manatu ai na faatusatusa e le Faaola Lona Afio Mai Faalua i se fiafia o se faaipoipoga.

A o lei suesueina le faataoto, e taua le malamalama i tu masani o faaipoipoga a Iutaia i le vaitaimi o le Faaola. O le faatoafaiava, faatasi ai ma uo mamae, e o atu i le po i le fale o le faatoanofotane mo le sauniga o le faaipoipoga. A maea le sauniga, ona faagasolo atu lea o le au valaaulia o le faaipoipoga i le maota o le faatoafaiava mo se tausamiga. O le au valaaulia o le faaipoipoga e auai atu i le solo, e aofia ai taupou po o teine o le laina a le tamaitai faaipoipo, na tatau ona ave a latou lava lamepa po o sulu e faailoa atu ai o i latou o le laina o le faaipoipoga, ma ia faaopoopo atu ai le malamalama ma le matagofie o le faamoemoe.

Faitau le Mataio 25:1–4, ma fai se lisi o mea taua i le faataoto a le Faaola e pei o tagata po o mea faitino. I talaane o mea taitasi, tusi ai po o ai pe po o le a foi le mea e te manatu e faatusa i ai.

O faamatalaga nei e mafai ona lisiina i luga o le laupapa pe aoteleina mo tagata aoga. Uunaia tagata aoga e tusi i a latou tusitusiga paia po o a elemene o loo faatusa i ai le faataoto.

O faaaliga o ona po nei ma aoaoga faaperofeta e mafai ona fesoasoani e te malamalama ai i uiga faafaatusa i le faataoto.

1. O le faatoafaiava o se faatusa lea o le Faaola, ma o le afio mai o le faatoafaiava e faatusa i le Afio Mai Faalua (tagai i le Mataupu Faavae ma Feagaiga 33:17 ; 88:92 ; 133:10).

2. Na aoao mai Peresitene Dallin H. Oaks o le Au Peresitene Sili: “O taupou e toasefulu, e faasino i tagata o le Ekalesia a Keriso, aua sa valaaulia uma lava i le tausamaaga o le faaipoipoga ma sa iloa foi e tagata uma mea sa manaomia, ina ia mafai ai ona ulufale atu pe a sau le faatoafaiava” (Dallin H. Oaks, “Sauniuniga mo le Afio Mai Faalua,” Ensign po o le Liahona, Me 2004, 8).

3. O lamepa e mafai ona faatusa i a tatou molimau (tagai i le David A. Bednar, “Faaliliuina i le Alii,” Ensign po o le Liahona, Nov. 2012, 109). Ia matau, o taupou uma e toasefulu sa iai lamepa.

4. O le suauu e mafai ona faatusa i lo tatou liua i le Alii o Iesu Keriso (tagai i le David A. Bednar, “Faaliliuina i le Alii,” Ensign po o le Liahona, Nov. 2012, 109). E mafai ona aofia ai a tatou taumafaiga e mulimuli i le taitaiga a le Agaga Paia ma ola usiusitai i le Faaola ma Lana talalelei (tagai i le Mataupu Faavae ma Feagaiga 45:56–58 ; Spencer W. Kimball, Faith Precedes the Miracle [1972], 256.

• O fea o nei uiga o faailoga e sili ona taua ia te oe, ma aisea?

• E faapefea ona e faamatalaina i au lava upu le eseesega i le va o taupou valea ma popoto?

• O a nisi o faataitaiga o mea e mafai ona tatou faia e tuu ai le suauu faafaatusa ia tatou lamepa?

Filifili po o le a le mea e maua ai le poto masani sili e aoao ai mo tagata aoga a o latou mafaufau loloto i o latou manatu ma lagona. Mo se faataitaiga, e mafai e tagata aoga ona faitau, matamata, pe faalogologo i le faataoto.

Faitau le vaega o totoe o le faataoto i le Mataio 25:5–13 . A o e faia, mafaufau ia te oe lava o se tasi o taupou. E mafai ona e faalogologo i le tala o tusitusiga paia i luga o le ChurchofJesusChrist.org po o le Gospel Library app. E mafai foi ona e matamata i le vitio o le Tusi Paia “The Ten Virgins” (1:40) po o le vitio “They That Are Wise” mai le faailotaimi 0:00 i le 5:41.

I le Mataio 25:12, maitau le tali atu a le faatoafaiava i taupou valea o e na taumafai e ulufale atu ae ua tuai i le tausamaaga ma e aunoa ma le suauu manaomia. O le Faaliliuga a Iosefa Samita i le Mataio 25:11 o loo faamanino mai ai na saunoa le faatoafaiava, “Ou te le iloa outou” (i le Mataio 25:12, vaefaamatalaga a).

• Ina ia manatua le mea e faatusa i ai le suauu, aisea e taua ai le suauu e iloa moni ai le Faaola ma saunia ai e feiloai ma Ia?

• Aisea na le mafai ai e taupou popoto ona tuu atu le suauu i taupou valelea?

Na aoao mai Elder David A. Bednar o le Korama a Aposetolo e Toasefululua:

O se tasi o faamoemoega sili o le olaga faaletino e le o tau na ona aoao e uiga i le Alo e Toatasi na Fanaua o le Tama ae ia taumafai foi ia iloa o Ia. … Tatou te iloaina le Faaola pe a tatou faia le mea silisili tatou te mafaia e ō ai i mea e finagalo o Ia tatou te ō i ai, pe a tatou tauivi e ta’u atu mea e finagalo o Ia tatou te ta’u atu, ma pe a tatou avea ma tagata e finagalo o Ia tatou te avea ai.

(David A. Bednar, “Ana Iloa e Outou o Au,” Ensign or Liahona, Nov. 2016, 103, 104)

Mafaufau e tusifaamaumau le upumoni lenei: E mafai ona ou iloa le Faaola ma saunia mo Lona Afio Mai e ala i le taumafai e mulimuli i Lana faataitaiga o le ola amiotonu.Faaaoga ni nai minute e tusi ai se tala faaonaponei o lenei faataoto. O le a faapefea ona ola taupou popoto i aso nei? E mafai faapefea ona e tau atu ua latou iloa le Alii ma ua liua ia te Ia? E faapefea ona ola taupou valea? O a nisi o mafuaaga latou te faatali ai ina ia latou iloa le Alii?

Valaaulia ni nai tagata aoga e faasoa mai a latou faataoto o aso nei ma soo se malamalamaaga latou te lagona e aoga. E mafai ona fesoasoani i tagata aoga ia lagona atili le to’a e faasoa atu i luma o le vasega pe a latou faasoa muamua i se vaega toalaiti.

Mafaufau e fai atu fesili nei e fesoasoani ai ia latou lagonaina le taua o le iloaina o Iesu Keriso.

• I lou manatu, aisea e aoga ai le taumafaiga ia iloa le Faaola ma saunia e feiloai ma Ia pe a Ia toe afio mai?

• E faapefea ona fesoasoani le taumafai e ola e pei o le Faaola ia tatou iloa atili ai o Ia?

• O a aafiaga ma faatinoga amiotonu na sili ona fesoasoani ia te oe e te iloa ai Iesu Keriso?

Tuu atu i tagata aoga se taimi e mafaufau ai mo le isi gaoioiga.

Tusi se ata faigofie o se lamepa i totonu o lau api faamaumau suesuega. Saili le taitaiga a le Agaga Paia e iloa ai faataitaiga o mea na e faia e iloa ai le Faaola ma auala e te saunia ai mo Lona afio mai. Mafaufau e tusi nei mea i totonu o le lamepa e fai ma faatusa o lau suauu. Ia saili foi musumusuga e iloa ai po o le a se mea e finagalo le Alii e te faia nei ina ia e iloa atili ai o Ia ma saunia atili ai mo Lona afio mai. Tusi se tasi pe lua o nei mea i fafo o le lamepa, e fai ma faatusa o le suauu o loo e manaomia pea ona maua.

Saili le fesoasoani a le Alii a o e taumafai ia iloa atili o Ia ma saunia e feiloai ma Ia.

Tala Auiliili ma Faamatalaga o Talaaga

Mataio 25:6 . O le a le taua o le sau o le faatoafaiava i le vaeluaga o le po?

O le tele o sauniga o faaipoipoga a Iutaia e faia i le afiafi. O nisi o mau o loo faatatau i le toe afio mai o le Faaola e pei o se gaoi i le po (tagai i le Faaliliuga a Iosefa Samita, Luka 12:44 [i le faaopoopoga o le Tusi Paia]; 1 Tesalonia 5:2 ; 2 Peteru 3:10 ; Mataupu Faavae ma Feagaiga 45:19 ; 106:4). O le oo mai o le faatoafaiava i le vaeluaga o le po e faailoa mai ai le itula e lei faamoemoeina o le toe foi mai o le Faaola. Na faamatala e Peresitene Spencer W. Kimball (1895–1985):

O taupou valelea sa mumusu e faatauina mai ni suauu. Sa latou iloa e tatau ona i ai ni a latou suauu. Ae sa latou faatuutuu, ma le le iloa o le taimi e sau ai le faatoafaiava. … Ua tuai tele le vaeluaga o le po mo i latou ua faatuutuu.

(Spencer W. Kimball, Faith Precedes the Miracle [1972], 256)

E faapefea pe afai o taeao le aso e afio mai ai o Ia?

Na aoao mai e Peresitene Dallin H. Oaks o le Au Peresitene Sili le mea lenei:

Afai tatou te iloa o taeao le aso tatou te fetaia’i ai ma le Alii—e ala i lo tatou oti faafuasei, po o Lona toetu faafuase’i mai foi—o le a sa tatou mea e fai i le aso? O a ni mea o le a tatou ta’uta’u atu? O a ni faatinoga o le a tatou tuua? O a ni o tatou toatuga o le a faaleleia? O a ni faamagaloga tatou te tuuina atu? O a ni molimau o le a tatou faia?

Afai e tatau ona tatou faia na mea i lena taimi, aisea e le faia ai nei? Aisea e le saili ai le filemu manu o mafai ona maua? Afai ua latalata ina uma a tatou lamepa o sauniuniga, ia tatou amata vave nei loa ona tatou toe faatumuina.

(Dallin H. Oaks, “Sauniuniga mo le Afio Mai Faalua,” Ensign po o le Liahona, Me 2004, 9)

Aisea na le mananao ai taupou popoto e faasoa atu a latou suauu?

I le saunoa e faatatau i taupou popoto i le le faasoaina atu o a latou suauu i taupou valelea, na aoao mai ai Peresitene Spencer W. Kimball (1895-1985):

E le o se manatu faapito po o le agaleaga lea mea. O le ituaiga suauu e manaomia e faamalamalama ai le ala ma faasusulu i le pogisa e le mafai ona faasoaina atu. E mafai faapefea e se tasi ona faasoa atu le usiusitai i le mataupu faavae o le sefuluai … ? … E mafai faapefea e se tasi ona faasoa atu uiga faaleatua po o le ola mama, po o le aafiaga o se misiona? E mafai faapefea ona faasoa e se tasi avanoa o le malumalu? E tatau ona tofu maua mai lena ituaiga o suauu mo le tagata lava ia. …

I o tatou olaga o le suauu o le saunia e faaputuputu i lea mataua ma lea mataua i le ola ai amiotonu. … O faatinoga taitasi o le tuuto ma le usiusitai o se mataua faaopoopo i la tatou faaputuga.

(Spencer W. Kimball, Faith Precedes the Miracle [1972], 255-56)

Galuega Faatino Faaopoopo e Aoao Ai

Faaogaina o vaaiga faataitai

I le faaiuga o le lesona, atonu e aoga le tuu atu i tagata aoga e mafaufau pe faapefea ona faaaoga e tagata eseese lesona sa latou aoaoina mai le faataoto i taupou e toasefulu. Mafaufau e valaaulia tagata aoga e tali atu i se tasi o tulaga nei:

• Afai e faatuai e se tasi le faalatalata atili atu i le Alii ma ola amiotonu, o le a se mea e te manao latou te lagonaina i lenei lesona? O le a le laasaga muamua e te valaauliaina i latou e fai?

• Afai o loo tauivi ma le filiga se tasi e sau i le Alii ae sa lagona le popole ma le fefe e uiga i le Afio Mai Faalua o le Faaola, o le a se mea e te manao latou te iloa ma lagonaina pe a uma ona suesueina lenei lesona?

• Afai e le popole se tasi i le Afio Mai Faalua o le Alii, o le a se mea e te manao latou te lagonaina ma faia pe a uma ona suesueina lenei lesona?