Lucas 10:25–37

Ang Mabuting Samaritano

Nang tanungin si Jesus ng isang abugado o dalubhasa sa kautusan, “At sino ang aking kapwa?” (Lucas 10:29), tumugon ang Tagapagligtas sa pamamagitan ng pagbibigay ng talinghaga tungkol sa mabuting Samaritano. Ang lesson na ito ay makatutulong sa iyo na matularan ang halimbawa ni Jesus sa pagmamahal sa kapwa.

Pagmamarka at pagsusulat ng mga tala sa mga banal na kasulatan. Inanyayahan ni Elder Richard G. Scott ng Korum ng Labindalawang Apostol (1928–2015) ang mga kabataan na “markahan ang mahahalagang talata … at sumangguni sa mga ito nang madalas” (“Para sa Kapayapaan sa Tahanan,” Ensign o Liahona, Mayo 2013, 30). Maghanap ng mga pagkakataon na sabihin sa mga estudyante na magmarka at magsulat ng mga tala sa kanilang mga banal na kasulatan. Hikayatin sila na gawin ito sa paraang nauunawaan nila sa halip na ipagawa ito sa kanila sa mga partikular na paraan.

Paghahanda ng estudyante: Sabihin sa mga estudyante na basahin ang Lucas 10:30–35, at hanapin kung saan nila nakikita si Jesucristo sa talinghagang ito. Sabihin sa kanila na hanapin din kung saan nila nakikita ang kanilang mga sarili sa talinghaga.

Mga Posibleng Aktibidad sa Pag-aaral

Maaaring makatulong sa mga estudyante na magkaroon ng mahigit sa isang sesyon ng klase upang pag-aralan ang talinghaga tungkol sa mabuting Samaritano.

May mga karagdagang aktibidad sa pag-aaral sa bahaging “Mga Karagdagang Aktibidad sa Pag-aaral” ng lesson.

Para sa sumusunod na aktibidad, sabihin sa mga estudyante na isulat sa kanilang study journal ang kanilang mga sagot sa mga sumusunod na tanong. Maaari kang magbahagi ng personal na karanasan at mag-anyaya ng ilang boluntaryo na ibahagi rin ang kanilang mga karanasan.

Pagtulong sa mga nangangailangan

Mag-isip ng isang pagkakataon na tinulungan ka ng isang tao noong kinailangan mo ng tulong.

• Sa palagay mo, bakit ka tinulungan ng taong ito?

• Ano ang nadama mo dahil sa ginawa ng taong ito?

Pag-isipang mabuti kung paano mo matutulungan ang isang taong nangangailangan at bakit maaari o maaaring hindi mo siya matulungan. Habang nag-aaral ka, maghanap ng mga katotohanang natutuhan mo tungkol kay Jesucristo na makapagdaragdag sa iyong hangaring tulungan ang mga nangangailangan.

Isang talinghaga

Isang araw habang nagtuturo si Jesucristo, tinanong Siya ng isang abugado kung ano ang kailangan niyang gawin upang magkaroon ng buhay na walang hanggan. Itinuro ng Tagapagligtas na upang magmana ng buhay na walang hanggan, kailangan nating mahalin ang Diyos nang buong puso at mahalin ang ating kapwa gaya ng ating sarili (tingnan sa Lucas 10:27). Pagkatapos ay may isa pang itinanong ang abugado.

Basahin ang Lucas 10:29, at isiping markahan ang itinanong ng abugado kay Jesus.

• Paano mo sasagutin ang tanong ng abugado?

Sumagot si Jesus sa tanong ng abugado sa pamamagitan ng pagkukuwento ng isang talinghaga na kilala bilang talinghaga tungkol sa mabuting Samaritano. Habang pinag-aaralan mo ang talinghagang ito, alalahanin na karaniwang kinamumuhian ng mga Samaritano at Judio ang isa’t isa at madalas na iniiwasan nilang makisalamuha sa isa’t isa. Ang isang dahilan kung bakit itinuturing ng mga Judio na hindi katanggap-tanggap ang mga Samaritano ay dahil pinaghalong Judio at gentil ang mga Samaritano at pinagsama nila ang mga paniniwala sa relihiyon ng dalawang grupo.

Maunawaan ang bahagi ng Tagapagligtas sa talinghaga

Basahin ang talinghaga tungkol sa mabuting Samaritano sa Lucas 10:30–35 .

Habang pinag-aaralan mo ang talinghagang ito, pag-isipan kung paano naging simbolo ni Jesucristo ang Samaritano.

Maaari kang magpakita ng larawan ni Jesucristo bago itanong ang sumusunod:

• Ano ang matututuhan natin tungkol kay Jesucristo mula sa talinghagang ito? (Maaari mong ilista sa iyong study journal ang mga sagot mo sa tanong na ito.)

Itinuro ni Elder Neil L. Andersen ng Korum ng Labindalawang Apostol:

Ang Tagapagligtas ang ating Mabuting Samaritano, na isinugo “upang magpagaling ng mga bagbag na puso” [ Lucas 4:18 ; tingnan din sa Isaias 61:1 ]. Lumalapit Siya sa atin samantalang nilalampasan lamang tayo ng iba. Mahabagin Niyang inilalagay ang Kanyang nagpapagaling na balsamo sa ating mga sugat at binebendahan ang mga ito. Binubuhat Niya tayo. Inaalagaan Niya tayo.

(Neil L. Andersen, “Sugatan,” Ensign o Liahona, Nob. 2018, 85)

• Ano ang ilang halimbawa sa mga banal na kasulatan kung saan ginagawa ng Tagapagligtas ang inilarawan ni Elder Andersen?

• Kailan naging katulad ng mabuting Samaritano ang Tagapagligtas para sa iyo?

Maaari kang magbahagi ng personal na karanasan kung saan nakita mo ang pagkahabag at kahandaan ng Tagapagligtas na tulungan ang lahat ng espirituwal na nasaktan.

Tularan ang halimbawa ni Jesucristo

Pagkatapos ikuwento ang talinghaga tungkol sa mabuting Samaritano, tinanong ni Jesucristo, ang dalubhasang guro, ang abugado kung ano ang natutuhan niya at inanyayahan Niya ang abugado na gawin iyon. Basahin ang Lucas 10:36–37 , at hanapin ang paanyaya ng Tagapagligtas sa abugado.

• Paano mo magagawa ang paanyaya ng Tagapagligtas sa sarili mong buhay?

• Ano ang itinuturo sa iyo ng paanyayang ito tungkol sa mga nadarama ng Tagapagligtas para sa lahat ng anak ng Ama sa Langit?

Marami tayong pagkakataong sundin ang payo ng Tagapagligtas na “humayo ka, at gayundin ang gawin mo” ( Lucas 10:37) sa iba’t ibang sitwasyong kung saan tayo naroroon, tulad sa tahanan, sa paaralan, online, sa ating ward o branch, at sa mga estranghero.

Maaari mong hatiin ang klase sa maliliit na grupo upang talakayin ang mga sumusunod na tanong. Bigyan ang bawat grupo ng isa o mahigit pa sa mga sitwasyong nakalista sa naunang talata na pagtutuunan nila habang sinasagot ang mga tanong na ito.

• Ano ang ilang partikular na paraan na matutularan mo ang halimbawa ng Tagapagligtas na magpakita ng pagmamahal sa iyong kapwa sa sitwasyong ito?

• Ano ang maaaring maging dahilan para mahirapan kang magpakita ng pagmamahal sa iyong kapwa sa sitwasyong ito?

• Kung nahihirapan ang isang tao na magpakita ng pagmamahal sa kanyang kapwa sa sitwasyong ito, ano ang maituturo mo sa kanya tungkol kay Jesucristo na maaaring makatulong?

Kapag natapos na ng mga estudyante ang kanilang talakayan, mag-anyaya ng mga boluntaryo mula sa bawat grupo upang ibahagi ang ilan sa kanilang mga sagot.

Sabihin sa mga estudyante na pag-isipan ang natutuhan nila sa lesson na ito. Maaari mo silang bigyan ng oras na isulat sa kanilang study journal ang mga saloobin at impresyon nila. Maaari mo ring bigyan ang mga estudyante ng pagkakataong ibahagi ang nadama nila na dapat nilang gawin dahil sa napag-aralan nila ngayon.

• Ano ang isang bagay na nadama mong dapat mong gawin dahil sa napag-aralan mo ngayon?

Komentaryo at Pinagmulang Impormasyon

Paano naging simbolo ng ating paglalakbay sa buhay ang talinghaga tungkol sa mabuting Samaritano?

Itinuro ni Elder Gerrit W. Gong ng Korum ng Labindalawang Apostol:

Sa ating maalikabok na daan patungong Jerico, tayo ay sinasalakay, nasusugatan, at iniiwang nasasaktan.

Bagama’t dapat nating tulungan ang isa’t isa, kadalasa’y lumilipat tayo sa kabilang kalsada, sa anumang kadahilanan.

Gayunman, nang may pagkahabag, tumitigil ang Mabuting Samaritano at tinatalian ang ating mga sugat at may gamit na alak at langis. Ang alak at langis, na mga simbolo ng sakramento at iba pang mga ordenansa, ay itinuturo tayo sa espirituwal na paggaling kay Jesucristo. Isinasakay tayo ng Mabuting Samaritano sa Kanyang asno o, sa ilang kuwento sa stained-glass, pinapasan Niya tayo sa Kanyang mga balikat. Dinadala Niya tayo sa bahay-panuluyan, na maaaring kumatawan sa Kanyang Simbahan. Sa Bahay-Panuluyan, sinabi ng Mabuting Samaritano, “Alagaan mo siya; … babayaran kita sa aking pagbabalik” [ Lucas 10:35 ]. Ang Mabuting Samaritano, isang simbolo ng ating Tagapagligtas, ay nangangakong babalik, sa pagkakataong ito nang may kamahalan at kaluwalhatian.

(Gerrit W. Gong, “Silid sa Bahay-Panuluyan,” Liahona, Mayo 2021, 24–25)

Bakit gumamit ang Tagapagligtas ng Samaritano sa halip na isang Judio bilang taong tumulong sa sugatang lalaki?

Ipinaliwanag ni Pangulong M. Russell Ballard ng Korum ng Labindalawang Apostol:

May malaking pagkapoot sa pagitan ng mga Judio at mga Samaritano noong panahon ni Cristo. Karaniwan ay iniiwasan ng dalawang grupong ito ang makahalubilo ang isa’t isa. Maganda at may aral pa rin ang parabula kung ang taong nahulog sa kamay ng tulisan ay tinulungan ng kapwa niya Judio.

Ang sadyang paggamit Niya ng mga Judio at Samaritano ay malinaw na nagtuturo sa atin na tayong lahat ay magkakapitbahay, at na dapat nating mahalin, pahalagahan, igalang, at paglingkuran ang isa’t isa sa kabila ng malaking kaibhan—kabilang na ang kaibhan sa relihiyon, pulitika, at kultura.

(M. Russell Ballard, “Doktrina ng Pagsasali ng Iba,” Ensign o Liahona, Nob. 2001, 36)

Ano ang dapat kong gawin kapag dumating sa mahirap na panahon ang mga pagkakataong tumulong sa iba?

Itinuro ni Pangulong M. Russell Ballard, Gumaganap na Pangulo ng Korum ng Labindalawang Apostol:

Ang mga pagkakataong maglingkod sa iba sa makabuluhang paraan, tulad ng tipang ipinangako nating gawin, ay bihirang dumating sa mga panahong kombenyente sa atin. Ngunit walang espirituwal na kapangyarihan sa kombenyenteng pamumuhay. Dumarating ang kapangyarihan kapag tinutupad natin ang ating mga tipan.

(M. Russell Ballard, “Like a Flame Unquenchable,” Ensign, Mayo 1999, 86)

Ipinaalala sa atin ni Pangulong Thomas S. Monson (1927–2018):

Huwag gawing mas mahalaga kailanman ang problemang lulutasin kaysa taong kailangang mahalin.

(Thomas S. Monson, “Pagkakaroon ng Kagalakan sa Paglalakbay,” Ensign o Liahona, Nob. 2008, 86)

Mga Karagdagang Aktibidad sa Pag-aaral

Mga pagkakatulad ng talinghaga tungkol sa mabuting Samaritano at ng plano ng kaligtasan

Sabihin sa mga estudyante na basahin ang Lucas 10:30–35 , at alamin kung paano maaaring maging simbolo ng plano ng kaligtasan ang talinghaga tungkol sa mabuting Samaritano. Kabilang sa ilang simbolo ang mga sumusunod:

Bumaba mula sa Jerusalem: paglisan sa premortal na buhay at pagparito sa mundo

Isang tao: tayo

Samaritano: Jesucristo

Paglalakbay patungo sa Jerico: ang paglalakbay sa buhay na ito

Sabihin sa mga estudyante na talakayin kung anong mga aral ang itinuturo ng talinghaga tungkol sa mortalidad at pagbabalik sa Ama. Magbigay ng mga karagdagang tanong na tulad ng mga ito: Ano ang ilan sa mga paraan na tayo ay espirituwal na nasugatan sa ating buhay sa mundo? Paano mo naranasan na pinagagaling ng Tagapagligtas ang iyong mga sugat?

Para sa iba pang ideya tungkol sa mga paraan na maisisimbolo ng talinghagang ito ang plano ng kaligtasan, tingnan sa John W. Welch, “Ang Mabuting Samaritano: Limot na mga Simbolo,” Liahona, Peb. 2007, 40–47.

Pag-aaral ng talinghaga mula sa mga pananaw ng saserdote [pari] at ng Levita

Maaari mong anyayahan ang mga estudyante na pag-aralan ang talinghaga mula sa mga pananaw ng saserdote at ng Levita. Sabihin sa kanila na isipin ang ilan sa mga posibleng dahilan kung bakit hindi huminto ang saserdote at Levita upang tulungan ang lalaking nangangailangan.

Sabihin sa mga estudyante na ihambing ang mga posibleng dahilang ito sa mga sarili nilang tugon sa mga pagkakataong maglingkod. Sabihin sa mga estudyante na pag-isipan kung paano nila mapagtatagumpayan ang sarili nilang balakid sa pagmamahal at paglilingkod sa kanilang kapwa.

Pagkatuto kapag pumupunta tayo sa bahay-panuluyan (Simbahan) ng Panginoon

Inihambing ni Elder Gerrit W. Gong ng Korum ng Labindalawang Apostol ang bahay-panuluyan mula sa talinghaga tungkol sa mabuting Samaritano sa Simbahan ng Panginoon (tingnan sa “Silid sa Bahay-Panuluyan,” Liahona, Mayo 2021, 24–25). Sinabi niya na matututo tayo ng mahahalagang aral tungkol sa ating sarili at kay Jesucristo kapag pumunta tayo sa Kanyang bahay-panuluyan. Maaari kang pumili at mag-anyaya ng mga estudyante na pag-aaralan ang mga bahagi ng mensaheng ito upang matutuhan pa kung paano nila matutulungan ang iba na maranasan ang pagpapagaling na ibinibigay ng Tagapagligtas sa pamamagitan ng pag-anyaya sa kanila sa Kanyang Simbahan.