Luka 12–17; Ioane 11

Vaaiga Aoao

Na aoao mai le Faaola i faataoto i le mamoe na se, o le tupe na leiloa, ma le atalii faamaumau oa. Sa ia faamaloloina foi lepela e toasefulu ma toefaatuina Lasalo mai le oti. O lenei vaiaso e aofia ai se toe iloiloga o le atamai faapitoa i aoaoga faavae ina ia fesoasoani i tagata aoga e faatatau fuaitau o atamai faapitoa i aoaoga faavae.

Ia Saunia e Aoao Atu

O faamatalaga nei e tuuina atu ai i faiaoga ni manatu i mea e ono manaomia ona vave saunia mo lesona taitasi.

Luka 15

Faamoemoega o le lesona: O lenei lesona e mafai ona fesoasoani i tagata aoga e iloa ma lagona po o le a le tele o le alofa ma le tauaogaina e le Tama Faalelagi ma Iesu Keriso o i latou ma isi uma tagata.

Sauniuniga a le tagata aoga: Uunaia tagata aoga e suesue i se tasi po o faataoto uma o loo i le Luka 15 ao le i amataina le vasega. Valaaulia i latou e mafaufau po o a mea o aoao mai e faataoto e uiga i le alofa o le Atua.

Mea e Faaaoga: O ni nai meaai ma se tupe po o se ata tusi o na mea
Vitio: “O Le Atalii Faamaumau Oa” (5:33)

Fautuaga mo aoaoga i feutagaiga faavitio: A maea ona tusi e tagata aoga le leoleo mamoe ma mamoe po o le tamā o loo opoina lona atalii ma ua tusi faataamilo upu ma fasifuaitau i a latou ata, valaaulia se tagata aoga e faaali mai lana ata i luga o le lau o lana komepiuta ma faasoa mai ai se mea e matuai anoa ia i latou. Fai atu i le vasega e faatulaga le vaaiga o le lau o a latou komepiuta i le tagata o loo tautala ina ia latou vaai po o ai lea o loo tautala. O le a fesoasoani lenei ia i latou e vaai i le ata o loo faasoaina mai.

Luka 17:11–19

Faamoemoega o le lesona: O lenei lesona e mafai ona fesoasoani i tagata aoga e lagona ma faaali atu ai le agaga faafetai i le Tama Faalelagi, Iesu Keriso, ma isi.

Sauniuniga a tagata aoga: Valaaulia tagata aoga e o mai sauni e faasoa se aafiaga talu ai nei a o latou lagona le agaga faafetai i le Tama Faalelagi po o Iesu Keriso. O se isi filifiliga, e mafai e tagata aoga ona fai se lisi e faamatala atu ai mea na faia e le Tama Faalelagi ma Iesu Keriso mo i latou.

Tufaaga: O le tufaaga i le faitau ma le faaeteete ma le vaai faalemafaufau

Fautuaga mo aoaoga i fesootaiga faavitio: A maea ona faitau ma le faaeteete e tagata aoga le Luka 17:11–14, atonu e ono fesoasoani le ave i luga i le polokalama o le talanoa ia fesili i totonu o le tufaaga e uiga i le faitau ma le faaeteete ma le vaai faalemafaufau. Afai e taumafai tagata aoga e tali nei fesili i ni vaega laiti ae faaaogaina potu e taapeape i ai, valaaulia latou e kopi ma faasao fesili i se isi pepa o faamatalaga. I le tele o polokalama faatekinolosi tau fesootaiga faavitio, e faatapulaaina ona auai atu tagata aoga i lena polokalama o le talanoa mo le vasega a o i totonu o potu e taapeape i ai.

Ioane 11:1–46, Vaega 1

Faamoemoega o le lesona: O lenei lesona o le a fesoasoani i tagata aoga e faailoa upumoni e uiga ia Iesu Keriso ma mataupu faavae e mafai ona taitaiina i latou e taulimaina luitau o le olaga.

Sauniuniga a tagata aoga: Valaaulia tagata aoga e suesue le Ioane 11 ma saili mo mataupu faavae e ono fesoasoani ia i latou e maua ai le fesoasoani a le Faaola i o latou tofotofoga. E mafai ona latou faia lea nao i latou lava pe faatasi ai ma o latou aiga. Faamalosiau i tagata aoga e o mai sauni e faasoa mai mea na latou maua.

Vitio: “Lazarus I s Raised from the Dead” (7:51)

Fautuaga mo aoaoga i fesootaiga faavitio: Mafaufau pe valaaulia se tasi pe lua o tagata aoga ua aafia i ni luitau matuia e faasoa atu e uiga i na luitau i le amataga o le vasega pe a talafeagai ma ua latou lagona le mafanafana e faia ai. A o latou sailiili i le Ioane 11:1–46 i le vasega, valaaulia i latou e faasoa mataupu faavae latou te manatu e mafai ona fesoasoani i nei luitau. O se isi filifiliga, atonu e i ai i tagata aoga se toalua ni uo po o tagata o aiga e o mai i le vitio ma i latou e faasoa mai i luitau ua latou aafia ai.

Ioane 11:1–46, Vaega 2

Faamoemoega o le lesona: O lenei lesona o le a tuuina atu ai i tagata aoga se avanoa e aoao atu ai se mataupu faavae e mafai ona fesoasoani ia i latou ma isi e maua le fesoasoani a le Faaola i luitau o le olaga.

Sauniuniga a tagata aoga: Valaaulia tagata aoga e mafaufau e uiga po o le a se mea ua latou aoao mai le tala ia Maria, Mareta, Lasalo, ma le Faaola i le Ioane 11:1–46 . Fai atu ia i latou o le a maua e i latou le avanoa e aoao atu ai e uiga i se mataupu faavae sa latou aoaoina mai lenei tala. Valaaulia i latou e o mai sauni ma manatu e uiga i le auala latou te aoao atu ai lena mataupu faavae ma le atoatoa.

Fautuaga mo aoaoga i fesootaigafaavitio: Mafaufau pe tuuina atu tagata aoga i potu e taapeape i ai e tusa ai ma le mataupu faavae ua latou mananao e aoao atu. E mafai e tagata aoga ona tapena se lesona puupuu, ona fai lea e le toatele o vaega e mafai ai ona faasoa atu a latou lesona i le vaega.

Toe Iloiloga o le Atamai Faapitoa i Aoaoga Faavae 7

Faamoemoega o lenei lesona: O lenei lesona o le a tuuina atu ai i tagata aoga avanoa e faataitai ai le faatatauina o nisi o mataupu faavae ua latou suesueina i lenei tausaga o o latou olaga.

Tapenaga a tagata aoga: Valaaulia tagata aoga e filifili se tasi o fuaitau o atamai faapitoa i aoaoga faavae ua latou lagona e sili ona faigata ona faatatau i o latou olaga ma se tasi ua latou lagona e faigofie ona faatatau. Valaaulia i latou e nofo sauni e faamatala atu pe aisea.

Fautuaga mo aoaoga i fesootaigafaavitio: E mafai ona vaai faalemafaufau e tagata aoga o i latou o ni faifeautalai i luga o le upega tafailagi ma faataitai le aoao atu o le aiga (o loo suitulaga ai le faiaoga po o nisi ua valaaulia ina ia auai i lenei gaoioiga). Faaaoga le vitio ma polokalama o le talanoa e faapei lava o se taimi tonu lenei na fuafua e feiloai ai ma faifeautalai i luga o le upega tafailagi.