Luka 15

Faataoto i mea na Leiloloa

I le tau faaiuga o le galuega a le Faaola i le lalolagi, sa muimui Faresaio ma le au tusiupu e uiga i le faatasi atu o Iesu ma telona ma e agasala. I le tali atu i a latou muimuiga, na aoao atu ai e Iesu ia faataoto i le mamoe na se, o le tupe na le iloa, ma le atalii faamaumau oa. O lenei lesona e mafai ona fesoasoani ia te oe e iloa ai ma lagona le tele o le alofa ma le faatauaina o oe ma isi e le Tama Faalelagi ma Iesu Keriso.

Sauniuniga a le tamaitiiti aoga: Uunaia tamaiti aoga e suesue se faataoto se tasi po o faataoto uma i le Luka 15 a o lei faia le vasega. Valaaulia i latou e mafaufau po o a mea o loo aoao mai e faataoto e uiga i le alofa o le Atua.

Gaoioiga e ono Mafai Ona Aoao Ai

O le a lona taua?

Mafaufau e aumai ni nai meaai ma tupe i le vasega mo se faataitaiga vaaia o lenei gaoioiga. Faaaoga soo se meaai po o tupe e faigofie ona maua, ma fetuunai tupe o loo i le lisi e faatatau i mea o loo faaaogaina i totonu o le lotoifale. Mo se faataitaiga, o lenei gaoioiga e mafai ona faatino i se lole ma se tupepepa $1. Valaaulia tamaiti aoga e faaali i o latou tamailima pe fia le aoga o le aitema ia i latou i laasaga taitasi.

I se fua i le va o le 1 ma le 10, o le 1 e aupito maualalo ma le 10 le aupito maualuga, o le a le tele o lou manao i mea nei?

• O lau meaai suamalie e sili ona e fiafia i ai

• O lau meaai suamalie e sili ona e fiafia i ai pe a pau i luga o le fola

• O lau meaai suamalie e sili ona e fiafia i ai pe afai sa soliina e se tasi.

• O se tupepepa $20

• O se tupepepa $20 pe a pau i luga o le fola

• O se tupepepa $20 pe a solia e se tasi

Faaalu sina taimi e mafaufau loloto ai pe faapefea ona fesootai lenei gaoioiga i le taua o tagata taitoatasi.

• E mafai faapefea e lenei talafaatusa ona faatusatusa i le ala tonu tatou te vaai ai i lo tatou lava taua?

• Aisea atonu tatou te lagona ai i nisi taimi le faaosoosoina e mafaufau pe faia i tatou lava faapea ma isi e pei o i tatou po o i latou foi e itiiti so latou taua?

Atonu e aoga le faasoa atu o le saunoaga a Peresitene Dieter F. Uchtdorf o loo maua i le vaega o “Gaoioiga Faaopoopo e Aoao Ai” o loo i le faaiuga o le lesona lenei.

Mafaufau e uiga i le auala e te tausia ai i latou o e atonu e manaomia ona salamo ma faaleleia atili, e aofia ai ma oe lava ia. A o e suesue i lenei lesona, vaai mo upumoni e uiga i lagona o le Alii ma mo i latou o manaomia ona salamo.

I le Luka 15, sa aoao atu ai e Iesu ia faataoto e tolu. Faitau le Luka 15:1–2, vaavaai mo le tulaga na taitaiina atu ai le Faaola e aoao atu nei faataoto. Manatua o telona o tagata Iutaia ia sa aoina lafoga mo tagata Roma ma o lea sa masani ai ona inosia e isi tagata Iutaia.

• O a ni mea o loo aoao mai e nei fuaiupu ia te oe e uiga i le Faaola? O a ni auala atonu tatou te faapei ai i nisi taimi o le au Faresaio?

Na tali atu Iesu Keriso i faitioga a le au Faresaio ma le au tusiupu i le aoao atu e uiga i se mamoe na se, se tupe na leiloa, ma se atalii na leiloa.

Mafaufau e valaaulia tamaiti aoga e aotele mai mea ua latou iloa e uiga i nei faataoto ma pe faapefea ona latou faaalia le alofa o le Tama Faalelagi ma Iesu Keriso. Fetuunai gaoioiga e aoao ai o loo i lenei lesona i malamalamaaga ma manaoga o tamaiti aoga.

O le mamoe na se ma le tupe na leiloa

Faitau pe toe iloilo le faataoto i le mamoe na se ( Luka 15:4–7 ma le anotusi o le Faaliliuga a Iosefa Samita o loo maua i le Luka 15:4, vaefaamatalaga a) po o le faataoto i le tupe na leiloa ( Luka 15:8-10), ma vaavaai mo upu po o fasifuaitau o loo faailoa mai ai le faatauaina e le tagata e onaina i tala taitasi ia mea na leiloloa.

• O a upu po o fasifuaitau ua faailoa ai le faataua na tuu e le onaina i le mea na leiloa?

• O a ni auala e mafai ai e le mamoe po o le tupe i nei faataoto ona faatusa i tagata taitoatasi?

• E tusa ai ma nei fuaiupu, e faapefea e i latou o e fesoasoani e saili e ua leiloloa faaleagaga ona lagona pe a salamo se tagata agasala? O a ni lagona o le Tama Faalelagi ma Iesu Keriso?

• O le a se mea sa e aoaoina e uiga i le Faaola mai nei faataoto?

Afai e tatau ai, fesoasoani i tamaiti aoga e faailoa upumoni e pei o le: Ua silafia e le Tama Faalelagi ma Iesu Keriso le taua o tagata taitoatasi ma ua finagalo e toe faapotopoto uma mai ia i Laua ma E olioli le Tama Faalelagi pe a salamo Lana fanau ma toe foi atu ia te Ia.

O le atalii faamaumau oa

O le faataoto lona tolu i le Luka 15 e masani ona taua o le faataoto i le atalii faamaumau oa (o le upu faamaumau oa o lona uiga faamaumau, le mafaufau, pe soona fai foi). Peitai, o lenei faataoto o loo faamatala mai ai le tala e uiga i ni atalii e toalua, o i laua uma na manaomia le fesoasoani mai lo la tama. A o e suesue, vaai mo upu moni e faaalia ai lagona o le Tama Faalelagi i Lana fanau o e ua leiloloa faaleagaga mo soo se mafuaaga.

Mo le gaoioiga lenei, mafaufau pe mata e sili atu le aoga mo tamaiti o le vasega ona faitau le faataoto pe matamata i le vitio.

Faitau le Luka 15:11–32, vaai faalemafaufau o le tama i lenei tala o loo fai ma sui o le Tama Faalelagi. Mafaufau e faailoga upu po o fasifuaitau o loo faaalia ai Ona lagona i Lana fanau. E mafai foi ona e mafaufau e matamata i le vitio “O Le Atalii Faamaumau Oa” (5:33), o loo maua i le ChurchofJesusChrist.org, ma mulimuli i tusitusiga paia.

E mafai ona suesueina e tamaiti aoga lenei faataoto i se faatulagaga e pei o se “fale tifaga mo le faitauina leotele” e fa tagata o i ai i le tala: o le faamatala tala ( fuaiupue 11, 13–16, 20, 25–28), o le atalii faamaumau oa ( fuaiupue 12, 17–19, 21), o le tama ( fuaiupue 22–24, 31–32), ma le atalii ulumatua ( fuaiupue 29–30). Mafaufau e taofi soo le au faitau e fesoasoani ia latou malamalama ma suesue tala a tagata taitasi o loo fai mai ma mea atonu o mafaufau ma lagonaina.

O fesili o loo i lalo ua fuafuaina e fesoasoani i tamaiti aoga e faavasega le faataoto ma faafesootai i o latou lava olaga.

Manatua le ala na faitioina ai e le au Faresaio le Faaola mo le talia ma aai ma tagata agasala.

• O le a sou manatu o le a le mea na faamoemoe le Faaola i le au Faresaio e aoao mai lenei faataoto?

• O le a le mea i lenei faataoto e te manatu e sili ona talafeagai mo oe ia malamalama ma manatua? Aisea?

O se tasi o upumoni ua tatou aoaoina mai lenei faataoto o le e faatauaina ma alofa le Tama Faalelagi i Ana fanau uma ma o loo faatali mai ma lima mafola e faafeiloai tagata uma o le a liliu atu ia te Ia.

Mafaufau e fai atu ni fesili faaopoopo e pei o le “O le a le mea na e matauina e uiga i le ala na leiloa ai le atalii faamaumau oa?” “O a ni auala e ono manatu ai ua leiloa foi le isi atalii?” “O le a se mea e mafai ona tatou aoao mai lenei faataoto e uiga i le auala e tali atu ai le Tama Faalelagi ia i latou o e saili e toe foi atu ia te Ia ma ia i latou o e na taumafai pea e tumau faamaoni ia te Ia? Aisea e ono taua ai ia te oe le malamalama i lenei mea e uiga i le Tama Faalelagi?”

• E faapefea ona faatatau ia faataoto i le Luka 15 ia i latou ua leiloloa faaleagaga ona o le agasala faapea foi ia i latou atonu e ese lagona, le talisapaia, pe le o vaaia?

O le iloaina o loʻu taua faaletagata lava ia

I luga o se itulau i lau api faamaumau suesuega, mafaufau e tusi se ata faigofie o se leoleo mamoe o loo uuina se mamoe po o se tamā o fusi lona atalii. Faaaoga avanoa o loo siomia ai lenei ata e faamaumau ai mea nei o loo mulimuli mai:

• Upu po o fasifuaitau (aofia ai ma i latou mai le Luka 15) e faamanatu ai ia te oe le alofagia o oe ma isi uma e le Tama Faalelagi, tusa lava pe manaomia le salamo e oe ma isi.

• Auala e mafai ai ona e tausia i latou e manaomia le salamo ma le agaalofa, e aofia ai ma oe lava.

Mafaufau e valaaulia tamaiti aoga e faasoa se vaega e sili ona fiafia i ai ia latou gaoioiga ua maea.

• A o e mafaufau e uiga i le auala e te tausia ai oe lava ma i latou o siomia oe, e faapefea ona e manao e faaaoga mea ua e aoaoina i lenei aso?

Ia molimau atu i le alofa mutimutivale o le Tama Faalelagi ma Iesu Keriso ma lo Laʻua finagalo mo tagata uma e toe foi atu ia i Laua.

Tala ma Faamatalaga o Talaaga

Luka 15:7 . O le a le uiga o le fetalaiga a le Alii i le “ivagafulu ma le iva o ni tagata amiotonu, e le manaomia le salamo”?

Na aoao mai e Iosefa Samita o se tasi auala e faamatala ai le faataoto i le mamoe na se, o le faatusatusa lea o le ivasefulu ma le iva o mamoe i le au Faresaio ma le au Satukaio o e sa le manatu latou te manaomia ona o mai ia Iesu Keriso ma salamo (tagai History, 1838–1856 [Manuscript History of the Church], volume D-1, 1459, josephsmithpapers.org).

Aisea e taua tele ai le saili, maua, ma faafailele i latou ua leiloloa?

Na aoao mai Peresitene M. Russell Ballard o le Sui Peresitene o le Korama a Aposetolo e Toasefululua e faapea:

E taua tele agaga uma i lo tatou Tama Faalelagi. E le tatau ona tatou faagaloina o le Togiola, na totogiina ai e le Alii o Iesu Keriso se tau maoae mo le togiolaina o tatou uma taitoatasi. O Ona puapuaga e le tatau ona faagaloina ona o lo tatou toilalo e faafailele ma aoaoina i latou o e o loo tauivi ina ia malolosi i le Ekalesia.

(M. Russell Ballard, “Are We Keeping the Pace?” Ensign, Nov. 1998, 8)

Luka 15:12–13 . O le a le uiga o le tala a le atalii, “Aumai ia te au le vaega o oloa ua pau ia te au”?

E tusa ai ma agaifanua i le taimi o le Faaola, na pau le taimi e maua ai e se atalii lona tofi o le, pe a maliu lona tamā. Mo se atalii e tagisā i lona tofi a o le’i maliu lona tama (tagai Luka 15:12–13) e ono avea o se faatiga matua tele naua. O le talosaga a le atalii atonu sa vaaia o se tetee i lona tama, lona aiga, lona tupuaga, ae le gata i lea o tagata lautele.

(Tusi Lesona a Tagata o le Vasega o le Feagaiga Fou [2018], ChurchofJesusChrist.org)

O a nisi punaoa e mafai ona fesoasoani ou te malamalama ma faaaoga ai le faataoto i le atalii faamaumau oa?

Gaoioiga Faaopoopo e Aoao Ai

O se faamatalaga faaopoopo

A uma ona faia le gaoioiga i le amataga o le lesona, mafaufau e fetufaai atu le faamatalaga lenei. Na faasoa mai e Peresitene Dieter F. Uchtdorf, a o ia i i le Au Peresitene sili, le tala “o se tina na feagai ma tausaga o tofotofoga ma faanoanoaga [na] fai mai ma loimata, ‘Ua ou iloa nei ua pei lava au o se pepa 20-tala- tuai—ua maanuminumi, masaesae, palapala, matafi, ma mafugafuga. Ae o au pea lava o se pepa 20-tala. O loo i ai loʻu aoga. Atonu e ui lava ua le lelei o’u foliga, ma e ui ua ou palapala ma ua tuai, ae o loo atoa pea lo’u aoga, o se 20 tala.’” Na tusia foi e Peresitene Uchtdorf, “E tutusa lava le le mafai ona tatou fuaina o le taua o se isi agaga ma le le mafai ona tatou fuaina o le lautele o le lalolagi. O tagata uma tatou te feiloai i ai o se TST (Tagata Sili le Taua) i lo tatou Tama Faalelagi. O le taimi lava tatou te malamalama ai i lena mea, ona mafai lea ona tatou amata malamalama i le auala e tatau ona tatou faia ai o tatou uso a tagata” (tagai i le Dieter F. Uchtdorf, “O Outou o O’u Lima” Ensign po o Liahona, Me 2010, 69).

O le mamoe na se ma le tupe na le iloa

Fesili atu i tamaiti aoga pe na leiloa se latou aitema na taua ia i latou ma o le a le mea na latou faia e maua ai. Valaaulia i latou e mafaufau loloto po o le a le uiga pe afai ua leiloa faaleagaga se tasi ma pe ono faapeī le taumafai e saili ia i latou. A o latou suesueina le faataoto i le Luka 15, uunaia i latou e mafaufau pe na faapefea ona leiloa le mamoe, le tupe, ma le atalii ma auala eseese na maua ai i latou. Valaaulia tamaiti aoga e mafaufau loloto i o latou tiutetauave e saili ai i latou ua leiloloa.