Ioane 11:1-46, Vaega 2

Ua Faatuina e Iesu Lasalo mai le Oti

I le lesona talu ai nei, sa e faaailoaina mataupu faavae mai le tala o le faatuina e le Faaola o Lasalo mai le oti. O le a tuuina atu e lenei lesona se avanoa e aoao atu ai se mataupu faavae ina ia fesoasoani ia te oe ma isi ia maua ai le fesoasoani a le Faaola a o feagai ai ma luitau o le olaga.

Fesoasoani i tagata aoga e aoao le tasi i le isi. O le tuuina atu o avanoa mo tagata aoga e aoao le tasi i le isi e mafai ona fesoasoani ia i latou e malamalama atili ai ma faaaoga upumoni ua latou aoaoina. A o aoaoina e tagata aoga le tasi i le isi, tumau pea ma auai e ala i le fealuai solo mai lea vaega i le isi vaega ma mataitū le gaoioiga aoao, ma tuuina atu i ai le fesoasoani pe a manaomia. O le faia ai faapea e mafai ona fesoasoani ai i tagata aoga ia taulai ai pea i le galuega ma maua le fesoasoani tatau ina ia aoga atili ai mo i latou le gaoioiga.

Sauniuniga a le tagata aoga: Valaaulia tagata aoga ina ia mafaufau e uiga i mea sa latou aoaoina mai i le tala ia Maria, Mareta, Lasalo, ma le Faaola i Ioane 11:1–46 . Fai atu ia i latou o le a latou maua le avanoa e aoao atu ai e uiga i le mataupu faavae ua latou aoaoina mai i lenei tala. Valaaulia i latou ia o mai sauniuni ma manatu e uiga i auala latou te ono aoao atu ai ma le lelei atoatoa lena mataupu faavae.

Gaoioiga e Ono Mafai ona Aoao Ai

Aafiaga aoga o le aoao atu

O lenei lesona o le lona lua ai o lesona e lua i le Ioane 11:1–46 . I le lesona talu ai nei, sa faailoaina mataupu faavae e tagata aoga. Mafaufau e aoao atu lena lesona i le tapenapena ai mo lenei lesona.

E mafai ona faasoa atu e tagata aoga a latou tali i fesili nei i ni paga po o ni vaega laiti.

Toemanatu i se taimi ina ua aoaoina oe i se mea e uiga ia Iesu Keriso po o Lana talalelei sa loloto lona aafiaga ia te oe.

• Sa faapefea ona aotauina oe i lena mea?

• Aisea na matuai aafia ai oe?

O Iesu Keriso o le Faiaoga Sili. A o Ia aoao atu ma le mana ma le Agaga, o e sa faalogo ma le loto maualalo sa lagona ma le loloto le aafiaga o Ana aoaoga (tagai i Ioane 3:2 ; Ioane 6:35, 68-69).

• O a ni faataitaiga o tagata sa matua iloga ona aafia e ala i aoaoga a le Faaola?

Toemanatu i le faataitaiga a le Faaola ma ou lava aafiaga a o e tapena ma aoao atu se lesona puupuu e faavae i le tala i le toefaatuina e le Faaola o Lasalo mai le oti i le Ioane 11:1–46 . O se tasi vaega o le aoaoga a le Faaola o Lona aoao atu pea lea o mataupu ma aoaoga faavae moni. I lenei lesona, o le a e maua le avanoa e mulimuli ai i le faataitaiga a le Faaola a o e aoao atu se mataupu faavae moni. A o e atiina ae lou tomai e aoao atu ai i le auala a le Faaola, e mafai ona avea atili oe e faapei o Ia.

Lasalo

Faamatala i le tele e te mafaia ia le tala i le faatuina e le Faaola o Lasalo mai le oti. A manaomia, faitau le aotelega o loo mulimuli mai.

Valaaulia se tagata aoga e toatasi pe toalua e aotele le tala. A manao ai, tusi ni ata faigofie mo Maria, Mareta, ma Lasalo i le laupapa. Ia faaaoga foi se ata o le Faaola (aua le faaaogaina se ata faigofie e faaalia ai le Faaola). Valaaulia se tagata aoga e faasino i nei mea vaaia fesoasoani a o latou aotele mai le tala. A manaomia, faaaoga nei faamatalaga o loo mulimuli mai e faaaopoopo i ai pe faamanino i ai mea e fai mai ai tagata aoga.

Sa auina atu e Maria ma Mareta se feau ia Iesu o loo ma’i lo la tuagane o Lasalo. Sa faatuai ma le loto i ai e Iesu Lana malaga ma sa taunuu atu ua fa aso talu ona maliu Lasalo. Faatasi ai ma le alofa ma le agaalofa, sa faatuina ai e Iesu ia Lasalo mai le oti. O le faaaliga maoae o le mana paia na faamamafa atu ai o Iesu o le Mesia na filifilia ma e i ai le mana e pule ai i le oti. Ina ua uma ona iloa o lenei vavega, sa taupulepule le au faitaulaga sili ma le au Faresaio e fasioti Iesu ma Lasalo.

O lau lesona

Tapena se lesona a o faaaogaina se mataupu faavae e mafai ona aoao mai le Ioane 11. Filifili se mataupu faavae mai filifiliga o loo mulimuli mai e sili ona e fiafia i ai pe e te lagona e sili ona aoga mo tagata talavou.

Faaali atu filifiliga o lesona nei mo tagata aoga e filifili mai ai. Faaeteete i tagata aoga o e ono aafia i le popolevale ma e ono faafaigata ai ona latou tuuina atu se lesona. E mafai e nei tagata aoga ona tuuina atu se auivi faataatia o se lesona nai lo le fai i ai e aoao atu.

E ono fesoasoani le faaailoa o tagata aoga e ono manaomia se fesoasoani e faitauina, tapenaina, po o le talanoaina ma ia tofia se paga e sauni ma aoao faatasi.

Filifiliga o lesona 1: E mafai e le Faaola ona faatino vavega i o tatou olaga a o tatou galulue ma le faatuatua ia te Ia i o tatou puapuaga ( Ioane 11:20–27,38–45).

Fililiga o lesona 2: E oo mai vavega a le Atua i o tatou olaga e tusa ai ma Lona finagalo ma taimi ( Ioane 11:1–7,11–17, 39–45).

Filifiliga o lesona 3: E mafai ona tatou mulimuli i le faataitaiga a Iesu Keriso e ala i le faaalia o le agaalofa i isi ( Ioane 11:32–36,43–44).

Filifiliga Lesona 4: E mafai ona tatou vaai o le alofa ma le mana o le Atua na faaalia a o Ia faamalosia ma faamafanafana i tatou i taimi o o tatou puapuaga ( Ioane 11:1–7,11–15,38–46).

Filifiliga o lesona 5: Sa ia Iesu Keriso le mana i le ola ma le oti ( Ioane 11:20-27,39–46).

Filifiliga o lesona 6: Filifili sau mataupu faavae mai lenei tala ( Ioane 11:1–46).

Mafaufau pe o le a le umi e manaomia ai tagata aoga e tapena ma aoao atu a latou lesona. Fetuunai le umi o le taimi e tusa ai ma manaoga o tagata aoga.

Tuuina atu i tagata aoga lenei pepa tufaaga ina ia fesoasoani ia i latou e tapena a latou lesona.

Fai sau tali i nei gaoioiga tusitusi ina ia fesoasoani ia te oe e fai se auivi mo lau lesona. Mafaufau e ave se 15 i le 20 minute e tapena ai lau lesona ma se 5 i le 10 minute e aoao atu ai.

1. E mafai faapefea ona e faailoa atu lenei mataupu faavae sa e filifilia i se auala e fesoasoani ai i e e te aoao atu i ai e malamalama pe aisea e taua ai?

2. O le fea le fuaiupu e ono faitau e oe faatasi ma tagata e te aoao atu i ai ina ia sili ona faailoa ai lenei mataupu faavae? (Afai ua e iloa se tala o tusitusiga paia, mau, po o se saunoaga faaopoopo a se taitai a le Ekalesia e mafai ona fesoasoani ai i e e te aoao atu i ai e malamalama i le mataupu faavae, mafaufau e tusi foi lena iinei.)

3. O le a se mea ua aoao atu e lenei mataupu faavae ia te oe e uiga i le Faaola? Mafaufau e fesili i e e te aoao atu i ai e faasoa atu mea ua latou aoao e uiga ia Iesu Keriso mai lenei mataupu faavae.

4. O le a se mea e uiga i lenei mataupu faavae sa fesoasoani ia te oe e mafai ona e faasoa atu? O a ni faamanuiaga na oo mai ona o le faatinoina o lena mataupu faavae? Mafaufau e valaaulia e e te aoao atu i ai e faasoa atu foi o latou aafiaga.

5. Tusi i lalo ou manatu e uiga i le mataupu faavae e te aoaoina atu ma se faamatalaga puupuu i le faapefea ona faamalosi ai lau molilmau e uiga ia Iesu Keriso. Faasoa atu lau molimau pe afai ua e lagona le musuia e faia ai.

O auala faaopoopo e mafai ona aoao atu ai lenei lesona ma punaoa faaopoopo mo tagata aoga e faaaoga e tapena ai a latou lesona e maua i vaega o le “Tala ma Faamatalaga o Talaaga” ma le “Gaoioiga Faaopoopo e Aoao Ai” o lenei lesona.

Valaaulia tagata aoga e aoao atu le tasi i le isi a latou lesona pe faasoa atu ma le puupuu a latou otootoga i ni paga po o ni vaega laiti. E mafai foi ona latou faasoa atu a latou lesona i le fale ma o latou aiga.

• O le a se mea na e aoaoina mai lenei aafiaga?

• E mafai faapefea e le tapenaina o lesona ma le aoao atu i isi ona fesoasoani ia te oe ma isi e faalatalata atili ma avea atili e pei o le Faaola?

Tala ma Faamatalaga o Talaaga

Punaoa faaopoopo

O nei vitio ma tautalaga e mafai ona fesoasoani ia te oe e tapena ma aoao atu lau lesona. E ono faaaoga e oe nei punaoa i se auala e tasi pe sili atu:

• ina ia malamalama atili i le mataupu faavae o loo e aoao atu

• ina ia faailoaina upumoni, tala, ma malamalamaaga e mafai ai ona e faasoa atu i au lava upu a o aoao atu

• ina ia sailia faamatalaaga ma ata vitio e mafai ai ona e faaalia mo e ete aoao atu i ai

O vitio uma o loo lisi atu i luga e mafai ona maua i le ChurchofJesusChrist.org.

Filifiliga o lesona 1: E mafai e le Faaola ona faatino vavega i o tatou olaga a o tatou galulue ma le faatuatua ia te Ia i o tatou puapuaga

Neil L. Andersen, “O Le Faatuatua E Le Tupu Faafuasei, ae e ala i Filifiliga” (konafesi aoao, Oke. 2015) (matamata mai le faailotaimi 1:40 i le 4:32).

“Sailia le Ofoofogia: O Mea E Mafai ona Tatou Aoao Mai Le Kanesa ma Puapuaga” (5:33).

Filifiliga o lesona 2: E oo mai vavega a le Atua i o tatou olaga e tusa ai ma Lona finagalo ma taimi

Jeffrey R. Holland, “Faatalitali i le Alii,” Ensign po o le Liahona, Nov. 2020, 115-17.

Jeffrey R. Holland, “O Mea Lelei O Le A Oo Mai” (4:55).

Filifiliga o lesona 3: E mafai ona tatou mulimuli i le faataitaiga a Iesu Keriso e ala i le faaalia o le agaalofa i isi

Dieter F. Uchtdorf, “O Outou o O’u Lima,” Ensign po o le Liahona,, Me 2010, 68–75.

“Ia Outou Tagi Faatasi Ma E Ua Fetagisi” (matamata mai le faailotaimi 8:54 i le 11:36).

Filifiliga o lesona 4: E mafai ona tatou vaai i le faatinoina o le mana ma le alofao le Atua

a o Ia faamalosi ma faamafanafana ia i tatou i o tatou puapuaga

John C. Pingree Jr., “Ua ia te A’u Se Galuega mo Oe” (konafesi aoao, Oke. 2017) (matamata mai le faailotaimi 5:49 i le 6:48).

“Faaaogaina O Tatou Tofotofoga ina ia Fesoasoani i Isi—E Aoga le Faamoemoe” (matamata mai le faailotaimi 4:05 i le 10:54).

Filifiliga o lesona 5: Ua ia Iesu Keriso le mana i le ola ma le oti

D. Todd Christofferson, “O Le Toetu o Iesu Keriso,” Ensign po o le Liahona,, Me 2014, 111–14.

Paul V. Johnson, “Ma e Leai Foi Se Toe Oti” (konafesi aoao, Ape. 2016) (matamata mai le faailotaimi 0:17 i le 4:56).

Gaoioiga Faaopoopo e Aoao Ai

Tamaitusi o le taulimaina-o-luitau

E mafai e tagata aoga ona faaaogaina mataupu faavae o loo maua i Ioane 11:1–46 ma meafaitino i lenei lesona (ma soo se isi o loo latou iloaina) mo lenei gaoioiga. E mafai e tagata aoga taitasi ona faamaeaina se tasi pe sili atu o nei gaoioiga.

• Tusi se ata e faaali atu ai se tasi o mataupu faavae o loo aoao atu i lenei lesona.

• Toe manatua se tala e patino ia te oe o lea sa faatinoina e oe po o se tasi e te masani ai se mataupu faavae o loo aoao atu i lenei lesona ma sa maua ai faamanuiaga.

• Fai se lisi o mau po o tala o tusitusiga paia, saunoaga a taitai a le Ekalesia, ma faasino i tautalaga ma vitio e ono fesoasoani i se tasi o le e feagai ma ni luitau.

A maea le taimi e tatau ai, aoina mea ua faia e tagata aoga ma faaputuputu faatasi i se tamaitusi faapitoa mo le vasega ua fausia ina ia fesoasoani i tagata e taulimaina luitau. E mafai ona kopi lenei tamaitusi mo tagata aoga e tausi ma faaaoga i le lumanai pe a manaomia e i latou po o se tasi o alofa iai se fesoasoani mo ni luitau o loo feagai ma i latou. Tuuina atu i tagata aoga punaoa moomia e faamaeaina ai lenei gaoioiga e pei o pepa ma sapalai faatufugaga.

O se isi gaoioiga e mafai ona filifili ai

E mafai e tagata aoga ona filifili se tasi o loo faaalia i totonu o le tala faamaumau o Ioane 11:1–46 (Maria, Mareta, Lasalo, po o se tasi sa molimauina) ma e mafai ona tusitusi e uiga i le tala mai le manatu vaaia o lena tagata. Valaaulia tagata aoga e fai mea nei i a latou faamatalaga:

• o faalogona ma manatu o le tagata i lenei aafiaga

• o a mea a le tagata na ono aoao mai ai e uiga i le Faaola e ala i lenei aafiaga

E mafai e tagata aoga ona faasoa atu nei tala o le tasi i le isi ona faatatau ai lea i o latou lava olaga ma fai ni fuafuaga e faatinoina ai le faatuatua ia Iesu Keriso.