Toe Iloiloga o le Atamai Faapitoa i Aoaoga Faavae 7

Open scriptures that have been highlighted, on table with ribbon bookmark and yellow pencil. (horiz)

O se tasi faamoemoe o le atamai faapitoa i aoaoga faavae o le fesoasoani lea ia te oe e aoao pe faapefea ona faatatau mataupu faavae o loo aoao i totonu o tusitusiga paia i tulaga e ono feagai ma oe po o isi tou te taumasani. O le a tuuina atu e lenei lesona avanoa e faataitai le faatatauina o ni nai aoaoga faavae i lou olaga na e suesueina i lenei tausaga.

Sauniuniga a le tagata aoga: Valaaulia tagata aoga e filifili se tasi o fuaitau o atamai faapitoa i aoaoga faavae ua latou lagona e faigata ona faatatau i o latou olaga ma se tasi ua latou lagona e faigofie ona faatatau. Fesili atu ia i latou e nofo sauni e faamatala mai pe aisea na latou filifilia ai fuaitau taitasi.

Gaoioiga e Ono Mafai Ona Aoao ai

E ono manaomia ona aoaoina se lesona tau i fuaitau o atamai i aoaoga faavae e suitulaga ai i lenei lesona toe iloilo. Feutaga’i ma le kalena faasolosolo o lesona ua saunia e le taitai faatonu po o le taitai faamaopoopo o le eria po o le pitonuu e faamautinoa ai o le a aoaoina lesona taitasi tau i fuaitau o atamai i aoaoga faavae a o faagasolo le seminare.

Amata i le valaaulia o tagata aoga e faasoa o latou manatu mai a latou tapenaga faaletagata aoga. E mafai ona latou faia lea fefaasoaaiga o se vasega po o ni soa ma paga po o ni vaega laiti foi.

O le fesoasoani atu i isi

Ina ia fesoasoani i tagata aoga e faatatau upumoni o loo aoaoina i se tasi o fuaitau o atamai faapitoa i aoaoga faavae, mafaufau e faaaogaina le faataitaiga ua tuuina atu i lalo, pe valaaulia tagata aoga e mafaufau i ni a latou lava faataitaiga.

Manatunatu e faapea o la e te auauna atu i se aiga i lau uarota ua iai se tamā e lei leva tele atu ona leai sana galuega. O lenei tamā ua matuai lotovaivai ma ua le toe auai i sauniga lotu, pe tatalo, pe faitau ni tusitusiga paia. E toatolu se fanau i lona aiga: o se tamaitai talavou e 17 tausaga le matua, o se alii talavou e 15 tausaga le matua, ma se teineitiiti e 10 tausaga le matua. O le e 10 tausaga le matua ma lona tina e masani ona auai i lotu. O le au talavou e toalua sa masani lava ona auai soo, ae ona ua faaauau pea ona le faigaluega le tamā, ua iu ina muta ai ma le la omai i le lotu.

A o e iloilo i lenei lisi o fuaitau o atamai faapitoa i aoaoga faavae, mafaufau i faalogona ma luitau o loo feagai ma tagata taitoatasi i lenei aiga. Mafaufau e uiga i upumoni mai nei tusitusiga paia e ono sili ona mafai ona fesoasoani i tagata taitoatasi ma pe aisea foi.

Faaali atu le siata lenei ina ia mafai ona faasino i ai tagata o le vasega a o faagasolo le lesona. Afai e mafai ona fesoasoani, faaopoopo nisi fuaitau o atamai faapitoa i aoaoga faavae e ono aoga i lenei tulaga.

Mau Faasino o Tusitusiga Paia	Faaupuga Autu o Tusitusiga Paia
Mataio 11:28-30	“Ia outou o mai ia te au, o outou uma o e tigaina ma mafatia i avega, o a’u foi e malolo ai outou.”
Mataio 16:15–19	Na fetalai Iesu, “Ou te avatu foi ia te oe ki o le malo o le lagi.”
Mataio 22:36–39	“E te alofa atu i le Alii lou Atua. … E te alofa atu i lē lua te tuaoi.”
Luka 22:19–20	Na poloai mai Iesu Keriso, ia aai ma feinu i le faamanatuga “e fai ma faamanatuga ia te au.”
Ioane 7:17	“Ai se tasi e fia fai lona finagalo, e iloa ai e ia le mataupu.”

Mafaufau e fai atu i tagata aoga e faataitai i se talanoaga i le va o se tuafafine auauna po o se tuagane auauna ma se tasi o le aiga. O le tagata aoga o loo suitulaga i se tasi o le aiga e mafai ona faaali atu popolega e uiga i le tulaga, ma o le tagata aoga o loo suitulaga i le tuafafine auauna po o se tuagane auauna e mafai ona tuuina atu fautuaga e tusa ai ma fuaitau o atamai faapitoa i aoaoga faavae.

O a ni faalogona ma luitau o loo ono aafia ai tagata taitasi i lenei aiga?
Aisea e fesoasoani ai le manatu i nei faalogona ma luitau ae le i filifili po o a upumoni faaletusitusiga paia e ono sili ona aoga?

Filifili se tasi o fanau ma se tasi o matua mai lenei aiga i le ata faataitai. Filifili se fuaitau se tasi o atamai faapitoa o aoaoga faavae ma se upumoni se tasi e te lagona e ono sili ona aoga mo latou taitoatasi.

O ai tagata na e filifilia? O le a le fuaitau o atamai faapitoa i aoaoga faavae ma upumoni o le a e faasoa ma i latou? Aisea?

Mafaufau i tagata taitoatasi ua e filifilia.

Afai e fesiligia, o a faiga patino e te ono valaaulia i latou taitoatasi e fai ina ia faatino ai upumoni na aoaoina i nei fuaitau o atamai faapitoa i aoaoga faavae?

A o faasoa atu e tagata aoga tali i nei fesili, mafaufau e fai atu ni fesili tulitatao e pei o nei: Po anafea sa maua ai e oe po o isi e te masani ai ni aafiaga i le faatatauina o le upumoni i le auala lenei? O anafea sa e faia ai pe na faia ai e isi na faatinoga, ma o le a se mea na tupu ai o se taunuuga? O le a se mea na e aoaoina e uiga i le Tama Faalelagi ma Iesu Keriso mai na aafiaga?

E fesoasoani faapefea nei faatinoga latou te maua ai le mana ma le malosi mai le Tama Faalelagi ma Iesu Keriso?

Faatatau atili

Filifili se tasi o fuaitau o atamai faapitoa i aoaoga faavae sa le faaaogaina i le gaoioiga talu ai nei. Mafaufau i se tulaga lea e mafai ona fesoasoani ai lenei fasifuaitau i se tasi ia maua ai tali i ana fesili pe taulima ai se luitau. Tusifaamaumau ou manatu i lau api faamaumau suesuega.

Uunaia tagata aoga e faasoa ni manatu o isi tulaga e mafai ona manuia ai se tasi mai le faatatauina o nei fuaitau o atamai faapitoa i aoaoga faavae. Mafaufau e molimau atu i le mafai e le Faaola ona fesoasoani ia i latou e faatatau nei upumoni i o latou olaga.