Luke 12–17; Sione 11

Vakai Fakalūkufuá

Naʻe akoʻi ʻe Sīsū ʻa e talanoa fakatātā ki he sipi heé, paʻanga siliva naʻe molé, mo e foha maumau koloá. Naʻá Ne fakamoʻui foki mo ha kau kilia ʻe toko hongofulu pea fokotuʻu ʻa Lāsalosi mei he maté. ʻOku kau ʻi he uiké ni ha toe vakaiʻi ʻo e fakataukei fakatokāteliné ke tokoni ki he kau akó ke fakaʻaongaʻi e fakataukei fakatokāteliné ki he ngaahi potufolofolá.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Luke 15

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau ʻiloʻi mo ongoʻi ʻa e lahi ʻo e ʻofa mo e mahuʻingaʻia ʻa e Tamai Hēvaní mo Sīsū Kalaisi ʻiate kinautolú pea mo e niʻihi kehe kotoa pē.

Teuteu ʻa e tokotaha akó: Poupouʻi e kau akó ke nau ako ha talanoa fakatātā ʻe taha pe kātoa ʻi he Luke 15 kimuʻa he kalasí. Fakaafeʻi kinautolu ke nau fakakaukau ki he meʻa ʻoku akoʻi mai ʻe he ngaahi talanoa fakatātaá fekauʻaki mo e ʻofa ʻa e ʻOtuá.

Ngaahi Naunaú: Ko ha meʻakai mo ha paʻanga pe ko ha fakatātā ʻo kinaua
Vitiō: “Ko e Foha Maumau Koloá” (5:33)

Fokotuʻu ki hono akoʻi ʻi he konifelenisi vitioó: Hili hono tā ʻe he kau akó ʻa e tauhi sipí mo e sipí pe ko e tamai ʻokú ne fāʻofua ki hono fohá mo hiki ha ngaahi foʻi lea mo ha ngaahi kupuʻi lea takatakai ʻi heʻenau ngaahi fakatātaá, fakaafeʻi ha tokotaha ako ke puke hake ʻenau fakatātaá pea vahevahe ha meʻa mei ai ʻoku ʻuhingamālie moʻoni kiate kinautolu. Kole ki he kalasí ke seti e meʻa ʻoku nau mamata ki aí ki he tokotaha leá ke nau lava ʻo sio pe ko hai ʻoku leá. ʻE tokoni ʻeni kiate kinautolu ke nau vakai ki he fakatātā ʻoku vahevahé.

Luke 17:11–19

Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi mo fakahaaʻi ʻe he kau akó ʻenau houngaʻia ki he Tamai Hēvaní, Sīsū Kalaisi, mo e niʻihi kehé.

Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha aʻusia kimuí ni ʻi he taimi ne nau ongoʻi houngaʻia ai ki he Tamai Hēvaní pe ko Sīsū Kalaisi. ʻE lava pē ke faʻu ʻe he kau akó ha lisi ʻo fakamatalaʻi e meʻa kuo fakahoko ʻe he Tamai Hēvaní mo Sīsū Kalaisi maʻanautolú.

Laʻipepa Tufá: Ko e laʻipepa tufa ʻi he laukonga fakaleleí mo e fakakaukaulotó

Fokotuʻu ki hono akoʻi ʻi he konifelenisi vitioó: Hili hono lau fakalelei ʻe he kau akó ʻa e Luke 17:11–14, mahalo ʻe tokoni ke hiki ʻi he polokalama fepōtalanoaʻakí ʻa e ngaahi fehuʻi ʻi he laʻipepa tufá fekauʻaki mo e lau fakaleleí mo e fakakaukaulotó. Kapau ʻe feinga e kau akó ke tali e ngaahi fehuʻi ko ʻení ʻi ha fanga kiʻi kulupu iiki ʻo fakaʻaongaʻi e polokalama ki he kulupu konifelenisi vitiō īkí, fakaafeʻi kinautolu ke nau hiki tatau pea ʻave e ngaahi fehuʻí ki ha fakamatala fakapepa kehe. Ko e lahi ʻo e ngaahi polokalama konifelenisi vitioó, ʻoku ʻikai maʻu ʻe he kau akó ʻa e polokalama fepōtalanoaʻakí maʻá e kalasí lolotonga ʻenau ʻi he ngaahi kulupu konifelenisi vitiō īkí.

Sione 11:1–46, Konga 1

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ʻilo ʻe he kau akó ʻa e ngaahi moʻoni fekauʻaki mo Sīsū Kalaisí mo e ngaahi tefitoʻi moʻoni te nau lava ʻo tataki kinautolu ʻi he ngaahi faingataʻa ʻo e moʻuí.

Teuteu ʻa e tokotaha akó: Fakaafeʻi e kau akó ke nau ako ʻa e Sione 11 pea kumi e ngaahi tefitoʻi moʻoni ʻe lava ʻo tokoni ke nau maʻu ai e tokoni ʻa e Fakamoʻuí ʻi honau ngaahi faingataʻaʻiá. Te nau lava ʻo fai ʻeni ʻiate kinautolu pē pe mo honau ngaahi fāmilí. Fakaafeʻi kinautolu ke nau haʻu mateuteu ke vahevahe e meʻa naʻa nau maʻú.

Fokotuʻu ki hono akoʻi ʻi he konifelenisi vitioó: Fakakaukau ke fakaafeʻi ha tokotaha ako pe toko ua kuó na aʻusia ha ngaahi faingataʻa mahuʻinga ke vahevahe fekauʻaki mo e ngaahi faingataʻa ko iá ʻi he kamataʻanga ʻo e kalasí kapau ʻoku taau pea ʻoku nau ongoʻi fiemālie ke fai ia. ʻI heʻenau fekumi ʻi he Sione 11:1–46 ʻi he kalasí, fakaafeʻi kinautolu ke vahevahe ʻa e ngaahi tefitoʻi moʻoni ʻoku nau pehē ʻe ala tokoni ki he ngaahi faingataʻa peheé. Ko e founga ʻe tahá, ʻe lava ke ʻomi ʻe ha ongo tamaiki ako ha ngaahi kaungāmeʻa pe kau mēmipa ʻo e fāmilí ki he vitioó ke nau vahevahe fakataha e ngaahi faingataʻa kuo nau aʻusiá.

Sione 11:1–46, Konga 2

Taumuʻa ʻo e lēsoní: ʻE ʻoange ʻe he lēsoni ko ʻení ha faingamālie ki he kau akó ke nau akoʻi ha tefitoʻi moʻoni te ne lava ʻo tokoniʻi kinautolu mo e niʻihi kehé ke nau maʻu e tokoni ʻa e Fakamoʻuí lolotonga e ngaahi faingataʻa ʻo e moʻuí.

Teuteu ʻa e tokotaha akó: Fakaafeʻi e kau akó ke nau fakakaukau ki he meʻa ne nau ako mei he fakamatala kia Mele, Māʻata, Lāsalosi, mo e Fakamoʻuí ʻi he Sione 11:1–46 . Talaange te nau maʻu ʻa e faingamālie ke akoʻi ha tefitoʻi moʻoni ne nau ako mei he fakamatala ko ʻení. Fakaafeʻi kinautolu ke nau haʻu mateuteu mo ha ngaahi fakakaukau fekauʻaki mo e founga te nau lava ai ʻo akoʻi lelei ʻa e tefitoʻi moʻoni ko iá.

Fokotuʻu ki hono akoʻi ʻi he konifelenisifakavitioó: Fakakaukau ke tuku ʻa e kau akó ʻi he ngaahi kulupu konifelenisi vitiō iiki ange ʻo fakatefito ʻi he tefitoʻi moʻoni ʻoku nau fie akoʻí. ʻE lava ke teuteu ʻe he kau akó ha lēsoni nounou, pea ko e lahi taha ʻo e ngaahi kulupu te nau lavá te nau lava ʻo fakahoko ʻenau lēsoní ki he kalasí.

Toe Vakaiʻi ʻo e Fakataukei Fakatokāteline 7

Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau akoako fakaʻaongaʻi ha niʻihi ʻo e tokāteline kuo nau ako he taʻú ni ʻi heʻenau moʻuí.

Teuteu ʻa e tokotaha akó: Fakaafeʻi e kau akó ke fili ha potufolofola fakataukei fakatokāteline ʻe taha ʻoku nau ongoʻi ʻoku faingataʻa ke fakaʻaongaʻi ʻi heʻenau moʻuí pea mo e taha ʻoku nau ongoʻi ʻoku faingofua ke fakaʻaongaʻí. Fakaafeʻi kinautolu ke nau mateuteu ke fakamatalaʻi hono ʻuhingá.

Fokotuʻu ki hono akoʻi ʻo e konifelenisivitioó: ʻE lava ke fakakaukauloto ʻa e kau akó ko ha kau faifekau kinautolu ʻi he ʻinitanetí pea nau fakatātaaʻi hono akoʻi ʻo e fāmilí (ʻoku fakafofongaʻi ʻe he faiakó pe niʻihi kehe ne fakaafeʻi ke kau ʻi he ʻekitivitī ko ʻení). Fakaʻaongaʻi ʻa e ongo polokalama vitioó mo e fepōtalanoaʻakí ʻo hangē ko ha ʻapoinimeni fakafaifekau moʻoni ʻeni ʻi he ʻinitanetí.