Lucas 22:47–71; Juan 18:1–27
“Nagtuo ka ba nga dili ko imnon ang kopa sa pag-antos nga gihatag kanako sa akong Amahan?”
Si Jesukristo bug-os sa pasalig nga mobuhat unsay pagbuot sa Langitnong Amahan. Kini makita ilabi na sa Iyang pag-antos didto sa Tanaman sa Getsemani, sa misunod nga pagdakop Kaniya, ug sa mga hitabo nga misangpot ngadto sa ug sa panahon sa Paglansang Kaniya sa krus. Kini nga leksiyon makatabang ninyo nga mosunod sa buhat ni Jesukristo pinaagi sa pagpili nga mobuhat sa kabubut-on sa Langitnong Amahan sa inyong kinabuhi.
Pagpangandam sa estudyante: Dapita ang mga estudyante sa paghunahuna og panahon diin ilang gipili nga mobuhat sa unsay gusto sa Langitnong Amahan imbis sa ilang personal nga ganahan. Hangyoa ang mga estudyante sa paghunahuna kon unsay lisod ug nganong ilang gihimo kana nga pagpili.
Posible nga mga Kalihokan sa Pagkat-on
Pagbutang sa kabubut-on sa Langitnong Amahan labaw kay sa atong kaugalingon
Aron matabangan ang mga estudyante nga makahunahuna mahitungod sa pagbutang og una sa kabubut-on sa Langitnong Amahan kay sa atong kaugalingon, ikonsiderar nga gamiton ang mosunod nga senaryo. Usa ka estudyante ang mahimong dapiton nga moadto sa atobangan sa klase aron mopaambit sa iyang mga hunahuna mahitungod sa mga kapilian nga gipresentar niini nga senaryo.
Ipakita ang hulagway sa ibabaw, o pagdrowing og duha ka yanong mga pultahan sa pisara.
Hunahunaa nga nagtindog mo atobangan sa duha ka pultahan. Pinaagi sa pagpili nga mosulod sa unang pultahan, inyong gisunod ang pagbuot sa Langitnong Amahan, apan mag-atobang kamo sa lisod nga pagsulay. Kon inyong pilion ang pagsulod sa ikaduhang pultahan, makalingkawas kamo sa pagsulay, apan dili ninyo mabuhat ang gusto sa Langitnong Amahan alang kaninyo.
-
Ngano kaha nga aduna may mopili sa unang pultahan? ikaduhang pultahan?
-
Unsa ang inyong nahibaw-an mahitungod sa Langitnong Amahan nga makatabang ninyo sa pagpili sa pagsulod sa unang pultahan?
Paggahin og panahon sa pagpamalandong sa kinabuhi ni Jesukristo ug sa unsang paagi ang pagpili sa unang pultahan maparehas sa giunsa Niya pagpili ang pagpakabuhi. Niini nga leksiyon karon, aduna kay kahigayonan nga mobasa mahitungod sa mga kapilian nga nabuhat sa Manluluwas ngadto sa kataposan sa Iyang mortal nga kinabuhi. Sa inyong pagtuon, pangitaa unsay nakapadasig ninyo mahitungod sa mga gibuhat ni Jesukristo.
Si Jesukristo gibudhian ug gidakop didto sa Getsemani
Didto sa Tanaman sa Getsemani, mihangyo si Jesukristo sa Iyang Amahan nga “kuhaa kining kupa gikan kanako,” apan Iyang giklaro nga Siya mapasaligon nga mobuhat sa kabubut-on sa Amahan diha nga miingon siya, “Apan dili ang akong pagbuot ang matuman, kon dili, ang imo maoy matuman” ( Lucas 22:42). Ang kupa nga gipasabot ni Jesus naghisgot mahitungod sa Iyang pag-antos ug sa kamatayon.
Basaha ang Juan 18:1–4 , nga mangita giunsa sa Manluluwas pagpadayon nga gipakita ang Iyang pasalig sa pagbuhat sa kabubut-on sa Langitnong Amahan.
Paglista og pipila sa mga lisod nga butang nga nahibaloan ni Jesus nga “mahitabo Kaniya” sa pag-abot sa oras apan Iyang gidawat kini ( bersikulo 4).
Basaha ang Juan 18:5–11 , nga mangita giunsa pagtubag sa Manunubos ang armadong panon nga miadto og midala Kaniya.
Alang sa dugang nga mga detalye nga wala marekord ni Juan nga nagpakita sa makahingangha nga gugma og determinasyon ni Jesus, basaha ang Mateo 26:52–54 ug Lucas 22:50–51 .
-
Unsa ang inyong nadayegan mahitungod sa panagtagbo ni Jesus ug sa armadong panon?
-
Unsa ang natabang sa buhat ni Jesukristo aron inyong masabtan ang mahitungod sa pag-atobang sa oposisyon?
-
Ngano kaha sa inyong hunahuna ang Manunubos nakahimo sa pagdumala niining mga kahimtang sa paagi nga Iyang gibuhat? Unsa ang gitudlo niini kaninyo mahitungod Kaniya?
Ang pamahayag gikan ni Elder Bednar sa “Komentaryo ug Background nga Impormasyon” nga seksiyon tingali makatabang dinhi isip usa ka bahin sa panaghisgot mahitungod sa mga kinaiya sa Manluluwas ug unsa ang nakat-onan sa mga estudyante gikan sa Iyang mga buhat. (Tan-awa sa David A. Bednar, “Maagh[o]p ug Mapainubsanon sa Kasingkasing,” Liahona, Mayo 2018, 33.)
Si Jesukristo gidala aron husayon
Human sa pagdakop ni Jesus, siya gidala ngadto sa atobangan sa kadagkoan sa mga pari, kang Caifas, ug sa lain pang mga punoan sa mga Judio. Basaha ang Lucas 22:63–65 aron mahibal-an ang mahitungod sa pipila ka dili makiangayon nga pagtratar nga nadawat ni Jesus gikan kanila.
-
Ngano kaha ang Manluluwas andam nga molahutay sa susamang mapintas ug dili makiangayon nga pagtratar?
Sa Basahon ni Mormon, gitudlo ni Nephi ug Abinadi ang mahitungod sa kon nganong ang Manluluwas andam nga mipaubos sa maong pagtratar. Basaha ang 1 Nephi 19:8–9 ug Mosiah 15:5–7 aron makita ang mga hinungdan nga ilang nalista.
Sa inyong journal sa pagtuon, isulat ang mga leksiyon nga inyong nakat-onan mahitungod o gikan kang Jesukristo gikan niining mga tudling.
Mahimo kamong mosulat og pipila ka mga hinungdan nganong ang pagsabot niining mga leksiyon bililhon o personal nga mahinungdanon alang kaninyo.
Kon ang mga estudyante nanginahanglan og tabang sa paghunahuna og mga leksiyon nga ilang makat-onan gikan niining mga bersikulo, ikonsiderar ang pagpaambit og usa ka sanglitanan. Usa ka sanglitanan, agi’g dugang sa maisugong baroganan sa ubos, mao nga si Jesus andam mag-antos alang kanato tungod kay Siya mahigugmaon ug mabination.Kon ang mga estudyante mopili sa pagsulat mahitungod niining mga kamatuoran diha sa ilang journal sa pagtuon, ikonsiderar ang paghangyo og pipila nga moboluntaryo sa pagpaambit nganong mibati sila nga kining nga leksiyon importante.
Paghangyo og mga moboluntaryo nga mopaambit unsay laing mga leksiyon ang ilang gisulat ug ngano.
Usa ka leksiyon nga importanteng masabtan gikan niining mga tudling mao nga si Jesukristo mitugyan ngadto sa kabubut-on sa Iyang Amahan sa tanan nga butang.
-
Unsa kaha ang nasabtan ni Jesus mahitungod sa Langitnong Amahan nga nakapahimo Niya sa hingpit nga pagtugyan ngadto sa Iyang kabubut-on?
Kon ang mga estudyante gidapit sa pagbuhat sa pagpangandam sa estudyante nga porsiyon niini nga leksiyon, ikonsiderar ang pagdapit og pipila nga moboluntaryo sa pagpaambit sa ilang mga kasinatian ngadto sa klase.
Aron matabangan ang mga estudyante nga makabaton og makahuloganong panaghisgot kon nganong lisod ang pagtugyan sa atong kabubut-on ngadto sa kabubut-on sa Dios, ikonsiderar ang paggamit sa pamahayag ni Elder Maxwell sa “Komentaryo ug Background nga Impormasyon” nga seksiyon.
-
Unsa nga mga panalangin ang inyong nadawat pinaagi sa pagpili nga mosunod sa kabubut-on sa Langitnong Amahan bisan pa og lisod kini?
Si Presidente Russell M. Nelson nangutana og sunod-sunod nga mga pangutana mahitungod sa atong pagkaandam nga motugyan ngadto sa kabubut-on sa Dios. Paggahin og panahon aron mamalandong unsaon ninyo sa pagtubag kining mga pangutana sa matinuoron nga paagi. Paghunahuna kon unsa kaha ang inyong gikinahanglan aron makatubag og oo sa matag pangutana.
Aron matabangan ang mga estudyante nga makagahin og panahon sa pagpamalandong sa mga pangutana ni Presidente Nelson, ikonsiderar ang pagpakita sa mosunod nga pamahayag.
Andam ba kamo nga ipatigbabaw ang Dios labaw sa tanan diha sa inyong kinabuhi? Andam ba kamo nga tug[o]tan ang Dios nga maoy mahimong labing importante nga impluwens[i]ya sa inyong kinabuhi? Tug[o]tan ba ninyo ang Iyang mga pulong, Iyang mga sugo, ug Iyang mga pakigsaad nga moimpluwens[i]ya sa inyong buhaton matag adlaw? Tug[o]tan ba ninyo ang Iyang tingog nga maoy prayoridad kay sa bisan unsa pang uban? Andam ba kamo nga himoon ang bisan unsa nga Iyang ipabuhat kaninyo nga mas importante kay sa bisan unsang ambisyon? Andam ba kamo nga ipatuhop ang inyong kabubut-on ngadto sa Iyang kabubut-on?
(Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 94)
Base sa inyong nakat-onan mahitungod sa pagtugyan sa Manluluwas ngadto sa kabubut-on sa Iyang Amahan, pagsulat og pipila ka pamahayag mahitungod sa unsa ang inyong gusto nga hinumdoman, buhaton, o himoon. Ikonsiderar ang mosunod nga mga pag-aghat aron matabangan kamo nga marekord ang inyong mga hunahuna ug mga tinguha.
-
Gusto ko nga mahinumdom nga ang Manluluwas …
-
Sama kang Jesukristo, makabuhat ko sa kabubut-on sa Langitnong Amahan pinaagi sa …
-
Usa ka hiyas nga akong paningkamotan sa pagpalambo aron mamahimong mas susama ni Jesukristo mao ang …
Komentaryo ug Background nga Impormasyon
Unsa ang atong makat-onan mahitungod sa Manluluwas gikan sa Iyang pagkaandam nga motugyan ngadto sa Langitnong Amahan?
Si Elder David A. Bednar sa Korum sa Napulog Duha ka Apostoles nagtudlo nga ang kaaghop sa Manluluwas mao ang mahinungdanon nga kinaiya nga nagtugot Kaniya sa pagtugyan sa Iyang kabubut-on ngadto sa kabubut-on sa Langitnong Amahan.
Ang pagkamakanunayon sa pagkaandam nga modawat sa Ginoo ug lig-on nga pagpugong sa kaugalingon parehong makapadasig ug mapuslanon alang kanatong tanan. Dihang ang usa ka grupo sa mga gwardiya sa templo ug mga kasundalohang Romano miab[o]t sa Getsemani aron pagsakmit ug pagdakop ni Jesus, si Pedro mihulbot sa iyang espada ug miputol sa tuo nga dunggan sa sulugoon sa labawng sacerdote pangulong pari [lantawa ang Juan 18:10 ]. Ang Manluluwas dayon mihikap sa dunggan sa sulugoon ug miayo kaniya [tan-awa sa Lucas 22:51 ]. Palihog timan-i nga Siya mitabang ug mipanalangin sa hayan modakop Kaniya gamit ang samang langitnong gah[o]m nga makapugong unta sa pagdakop ug paglansang Kaniya sa krus.
… Ang kaagh[o]p sa Manluluwas gipakita sa Iyang disiplinado nga pagtubag, lig-on nga pagpugong sa kaugalingon, ug dili buot mogamit sa Iyang walay kinut[o]bang gah[o]m alang sa personal nga kaayohan.
(David A. Bednar, “Maagh[o]p ug Mapaubsanon sa Kasingkasing,” Liahona, Mayo 2018, 33)
Nganong gusto man ako nga motugyan sa akong kabubut-on ngadto sa Dios?
Si Elder Neal A. Maxwell (1926–2004) sa Korum sa Napulog Duha ka Apostoles nagtudlo:
Daghan kaayo kanato … ang sayop sa paghunahuna nga, sa pagtugot nga ang atong kabubut-on ituhop ngadto sa kabubut-on sa Dios, mawad-an kita sa atong pagkatawo (tan-awa sa Mosiah 15:7). Ang atoa gayod nga gikabalak-an, siyempre, dili ang pag-undang sa kaugalingon, apan ang hinakog nga mga butang—sama sa atong mga tahas, sa atong panahon, sa atong pagkalabaw sa uban, ug atong mga gipanag-iya. Dili ikatingala nga gisugo kita sa Manluluwas nga magawagtang sa atong kaugalingon (tan-awa sa Lucas 9:24). Gihangyo lamang Niya kanato nga pagawagtangon ang karaang kinabuhi aron makita ang bag-ong kinabuhi. Dili kini kabahin sa pagkawala sa pagkatawo apan sa pagpangita sa iyang tinuod nga pagkatawo! …
… Ang pagtugyan sa kabubut-on sa usa ka tawo mao lang gayod ang talagsa nga personal nga butang nga mahalad nato diha sa altar sa Dios. Ang daghan pang mga butang nga atong ‘ihatag’ mga kaigsoonan, sa tinud-anay mao ang mga butang nga Iya nang gihatag o gipahulam kanato. Hinoon, kon kamo ug ako sa kataposan motugyan sa atong kaugalingon, pinaagi sa pagpaubos sa atong indibidwal nga kabubut-on ngadto sa kabubut-on sa Dios, niana naghatag gayod kita og makahuluganong butang ngadto Kaniya! Kini lang ang bugtong gipanag-iya nga tinud-anay natong mahatag!
(Neil L. Maxwell, “Swallowed Up in the Will of the Father,” Ensign, Nob. 1995, 23, 24)
Dugang nga Kalihokan sa Pagkat-on
Ang simbolismo sa kopa nga giimnan ni Jesukristo
Aron matabangan ang mga estudyante nga makabaton og mas dakong pagpasalamat alang sa Manluluwas ug sa Iyang pagkaandam sa pagtuman sa kabubut-on sa Langitnong Amahan, ikonsiderar ang paghatag og empasis sa simbolikanhong kopa nga giimnan ni Jesukristo. Tabangi ang mga estudyante nga makasabot nga ang kopa nga gipaimnan sa Langitnong Amahan kang Jesukristo nagsimbolo sa Iyang pag-antos ug kamatayon, nga maoy nagpahitabo sa Iyang Pagkabanhaw. Mahimong hangyoon ang mga estudyante nga isulat unsa ang ilang nakat-onan mahitungod sa Manluluwas diha sa ilang pagbasa sa mosunod nga mga kasulatan nga nagpasabot sa kopa. Mahimo usab silang hangyoon nga mamalandong sa unsang paagi sila napanalanginan tungod sa pag-inom ni Jesukristo sa mapait nga kopa.