Mateo 26:36–46; Lucas 22:39–46, Bahin 1

Si Jesukristo Nag-antos sa Tanaman sa Getsemani

Didto sa Tanaman sa Getsemani, nasinati ni Jesukristo ang dili matugkad nga pag-antos isip kabahin sa Iyang Pag-ula. Kini mao ang una sa duha ka bahin nga leksiyon mahitungod sa pag-antos sa Manluluwas didto sa Getsemani. Ang tumong niini nga leksiyon mao ang pagtabang ninyo aron mas makasabot sa unsay nahitabo didto sa Tanaman sa Getsemani ug sa unsang paagi kadto nahimong usa ka buhat sa gugma alang kaninyo. Sa mosunod nga leksiyon, inyong matun-an ang doktrina sa Pag-ula ni Jesukristo ug makat-onan unsaon ninyo sa pagkadawat og kusog ug tabang gikan sa Manluluwas.

Pagtahod alang sa sagrado nga mga hilisgotan. Sulayi paghimo og usa ka palibot nga anaa ang balaang pagtahod, pagrespeto, ug katuyoan alang sa matag klase. Kon ang sagrado kaayong hilisgotan ang motumaw, paningkamoti nga matabangan ang mga estudyante nga mamintenar ang usa ka kinaiya sa balaang pagtahod. Ikonsiderar ang pagpatukar og musika ug pagpakita og mga hulagway nga makahatag og pagbati og balaang pagtahod. Tingali makatabang usab ang pagtimbaya sa mga estudyante samtang mosulod sila ug pagpahinumdom kanila sa kasagrado sa hilisgotan nga gihisgotan.

Pagpangandam sa estudyante: Dapita ang mga estudyante sa pagbuhat og butang nga makatabang nila pagpamalandong kang Jesukristo ug sa Iyang Pag-ula. Ang mga pananglitan puwede nga mao ang pagrebyo og usa ka himno, pagpamalandong sa usa ka hulagway ni Jesukristo, pagbasa og usa ka tudling sa kasulatan, o uban pa.

Posible nga mga Kalihokan sa Pagkat-on

Kini nga leksiyon mao ang una sa duha ka leksiyon mahitungod sa pag-antos ni Jesukristo didto sa Tanaman sa Getsemani. Kon adunay usa lang ka panahon alang niini nga content aron matudlo sa usa ka klasehan, basaha ang sunod nga leksiyon (“Mateo 26:36–46; Lucas 22:39–46, Bahin 2”) alang sa mga ideya nga lagmit kinahanglan iapil niini nga leksiyon.

Unsa ang nabuhat ni Jesukristo alang kanato?

Si Presidente Dallin H. Oaks mipaambit og usa ka bahin sa panagsulti niya kauban sa miyembro sa Simbahan.

Daghang tuig nang milabay, ako nakahimamat og babaye nga miingon nga gihangyo siya sa iyang mga higala sa pagbalik sa simbahan human sa katuigan nga dili na aktibo, apan wala siya makahunahuna og bisan unsa nga rason nga siya mobalik. Aron sa pagdasig kaniya, miingon ako, “Kon imong hunahunaon ang tanang mga butang nga nabuhat sa Manluluwas kanimo, daghan ka og mga rason nga mobalik aron sa pagsimba ug pagserbisyo Kaniya.” Nakurat ko sa dihang siya mitubag, “Unsay nabuhat Niya alang kanako?”

(Dallin H. Oaks, “Unsa ang Nabuhat sa Atong Manluluwas alang Kanato?,” Liahona, Mayo 2021, 75)

• Unsaon ninyo sa pagtubag kini nga pangutana sa maong babaye?

Si Jesukristo Nag-antos sa Tanaman sa Getsemani

Sa pagkahuman sa Manluluwas og kaon sa Pagsaylo [Passover], sa pagpasiugda sa sakramento, ug pag-adto sa Bukid sa mga Oliba aron ipaambit ang Iyang kataposang mga pagtulun-an ngadto sa Iyang mga Apostoles, Siya miadto kauban ni Pedro, Santiago, ug Juan sa mubo nga gilay-on paingon sa Tanaman sa Getsemani. Ang pulong nga Getsemani nagpasabot og “pug-anan sa lana.” Ang pipila ka mahinungdanon kaayo nga mga elemento sa Pag-ula ni Jesukristo nahitabo sa Getsemani. Samtang magtuon kamo niining mga hitaboa, hunahunaa kon sa unsang paagi ang pagsabot sa Pag-ula ni Jesukristo makatabang ninyo sa pag-ila ug pagbati sa gugma sa Dios alang kaninyo.

Ang mosunod nga mga tudling sa kasulatan naghulagway sa pipila ka mahinungdanong hitabo nga nahitabo isip kabahin sa pag-antos sa Manluluwas didto sa Tanaman sa Getsemani. Ikonsiderar ang pagkopya sa mosunod nga talaan diha sa inyong journal ug pagkompleto niini samtang magtuon kamo sa mga bersikulo. Ikonsiderar usab nga badlisan ang mahinungdanong mga pulong ug mga hugpong sa pulong gikan niini nga mga bersikulo diha sa inyong mga kasulatan.

Ikonsiderar ang pagpakita sa mosunod nga talaan [table] diha sa pisara, ug ang paghangyo sa mga estudyante sa pagkopya niini diha sa ilang mga journal sa pagtuon. Depende sa mga panginahanglan ug mga abilidad sa mga estudyante, tinoa kon labing maayo ba nga ipakompleto sa mga estudyante ang talaan sa tinagsa-tagsa, tingob sa tibuok klase, o kauban sa kapares o sa gagmayng grupo.

Makatabang usab ang pagpatukar og may balaang pagtahod nga musika ug pagpakita og mga litrato ni Jesukristo samtang nagtuon ang mga estudyante.

Basaha ang mosunod nga mga tudling sa kasulatan.	Unsa ang inyong nakat-onan o gibati mahitungod kang Jesukristo niini nga mga bersikulo?
Mateo 26:36–39
Mateo 26:40–46
Lucas 22:39–44
Mosiah 3:7
Doktrina ug mga Pakigsaad 18:10–11

Human makakuha og igong panahon ang mga estudyante aron matun-an ang mga bersikulo ug makompleto ang talaan, dapita sila nga mopaambit sa ilang nakat-onan o gibati. Hatagi og kahigayonan ang daghan nga estudyante aron makapaambit sa ilang mga hunahuna, mga pagbati, ug mga impresyon. Ang mosunod nga mga pangutana tingali makatabang nga ipangutana isip kabahin sa panaghisgotan.

• Unsa nga mga hunahuna, mga pagbati, o mga impresyon ang inyong nasinati samtang kamo nagsiksik niini nga mga bersikulo?

• Unsa ang pipila ka pihong mga pulong o mga hugpong sa pulong gikan niining mga bersikulo ang labing importante kaninyo? Ngano man?

• Unsay natabang niining mga bersikuo sa inyong pagbati mahitungod sa anaa nga gugma sa Langitnong Amahan ug ni Jesukristo alang kaninyo?

Ang bili sa gugma sa Dios

Si Elder D. Todd Christofferson sa Korum sa Napulog Duha ka Apostoles mipaambit sa unsang paagi ang pag-antos sa Manluluwas didto sa Getsemani nagpakita sa Iyang wala’y kataposang gugma alang kanato. Tan-awa ang video nga “Magpabilin Kamo sa Akong Gugma” gikan sa time code 11:33 hangtod 14:02. Kini nga video anaa sa https://www.churchofjesuschrist.org/study/general-conference/2016/10/abide-in-my-love?lang=ceb

Hunahunaon nato ang kantidad sa bililhong gugma sa Dios. Gipadayag ni Jesus nga aron makaula sa atong mga sala ug matubos kita gikan sa kamatayon, sa pisikal ug sa espiritwal, ang Iyang pag-antos naghimo Kaniya “gani ang Dios, ang labing halangdon sa tanan sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu—ug buot nga Ako unta dili moinom sa mapait nga kopa, ug mobiya” [ Doktrina ug mga Pakigsaad 19:18] . Ang Iyang paghigwaos sa Getsemani ug dayon sa krus mas labaw kay sa maantos sa tawo. Bisan pa, tungod sa Iyang gugma sa Iyang Amahan ug kanato, Siya milahutay, ug isip sangpotanan, makatanyag Siya kanato sa pagka-imortal ug kinabuhing dayon.

Simbolikanhon kaayo nga ang “dugo [migawas] gikan sa matag lungag sa panit” [ Mosiah 3:7 ] samtang nag-antus si Jesus sa Getsemani, sa dapit sa pugaanan sa oliba. Aron makahimo og lana niadtong panahon sa Manluluwas, ang mga oliba unahon og dugmok nga paligiran kini og dakong bato. Ang mga “kupog” ibutang sa humok, dili kaayo hugot nga pagkalala nga mga basket nga ipatong-patong. Ang gibug-aton niini maoy makapagula sa una ug pinakanindot nga lana. Dayon dugangan ang pagpuga pinaagi sa pagbutang og dakong tuod o kahoy sa ibabaw sa gipatong-patong nga mga basket, aron makapagula og daghan pa nga lana. Sa katap[o]san, aron makuha ang pinakatapusang mga tulu, ang tuod pabug-atan pa gyud og mga bato sa isig ka tumoy aron mahimo ang kinabug-atang dat-og. Ug oo, ang lana sama og dugo sa unang pag-agas niini.

Naghunahuna ko sa giistorya ni Mateo bahin sa Manluluwas dihang misulod Siya sa Getsemani nianang mapait nga kagabhion—nga Siya “nagsugod sa pagkasubo ug nabug-atan kaayo. …

“Ug sa nakalakaw siya sa unahan og diyutay, siya mihapa ug nag-ampo nga nag-ingon, Amahan ko, kon mahimo man, isaylo lang kanako kining kopa; gani, dili sumala sa akong pagbuot kon dili sa imo” [ Mateo 26:37, 39 ].

Dayon, sa akong paghunahuna nga ang kapait nag-anam og kagrabe, nangaliyupo Siya og kahupayan sa ikaduhang higayon ug, sa katap[o]san, tingali sa kinagrabihan sa Iyang pag-antus, sa ikatulong higayon. Iyang nalah[o]tay ang pag-antus hangt[o]d ang kaangayan nahatagan og katagbawan ngadto sa katap[o]sang patak. Kini Iyang gihimo sa pagtubos kanimo ug kanako.

Ang balaang gugma bililhon kaayo nga gasa!

(D. Todd Christofferson, “Magpabilin Kamo sa Akong Gugma,” Liahona, Nob. 2016, 51)

• Unsa nga mga pulong o mga hugpong sa pulong gikan sa pamahayag ni Elder Andersen ang importante kaninyo?

• Sa unsang paagi ang pag-antos sa Manluluwas sa Getsemani nagpakita sa Iyang dakong gugma alang kaninyo sa personal?

Si Presidente Ezra Taft Benson (1899–1994) nagpamatuod nga ang pag-antos sa Manluluwas didto sa Tanaman sa Getsemani, ug sa wala madugay sa Kalbaryo, “mao ang labing dako nga bugtong nga buhat sa gugma nga girekord sa kasaysayan” (Mga Pagtulun-an sa mga Presidente sa Simbahan: Ezra Taft Benson [2014], 113).

Dapita ang mga estudyante nga ipaambit ang ilang mga tubag sa mosunod nga pangutana ug ang uban pang mga hunahuna o mga pagbati nga gusto nilang ipaambit mahitungod kang Jesukristo. Pahibaloa ang mga estudyante nga aduna silay mga kahigayonan nga makadugang sa ilang mga tubag sa umaabot nga mga semana samtang magtuon sila sa laing mga hitabo nga may kalabotan sa Pag-ula ni Jesukristo. Pamatud-i ang mga kamatuoran nga gitudlo niini nga leksiyon.

• Unsa ang nabuhat ni Jesukristo alang kanako?

Komentaryo ug Background nga Impormasyon

Unsa man ang kahulogan sa Getsemani?

Si Presidente Russell M. Nelson nagtudlo:

Ang pulong Gethsemane [Getsemani] naggikan sa duha ka Hebreo nga pulong: gath, nagpasabot nga “pagpuga,” ug shemen, nagpasabot nga “lana,” ilabi na sa oliba.

Didto ang mga oliba gipuga gamit ang gibug-aton sa dakong bato nga ligid aron pigsaton ang mahalon nga lana gikan sa mga oliba. Mao nga ang Kristo sa Tanaman sa Getsemani sa literal nga paagi gipuga tungod sa mga sala sa kalibotan. Gipaningot Siya og dagkong tulo sa dugo—ang Iyang “lana” sa kinabuhi, nga nanglugsot sa matag lungag sa panit. …

… Hinumdomi, sama sa lawas sa oliba, nga gipuga alang sa lana nga naghatag og kahayag, mao nga ang Manluluwas gipuga. Gikan sa matag lungag sa panit miagas ang dugo sa kinabuhi sa atong Manunubos. Sa tanan nga malipayong mga adlaw sa inyong misyon, kon ang inyong kopa sa kalipay magaawas, hinumdomi ang Iyang kopa sa kapaitan nga maoy naghimo niini nga posible. Ug kon ang mga masakit nga mga pagsulay moabot kaninyo, hinumdomi ang Getsemani.

(Russell M. Nelson, “Why This Holy Land?,” Ensign, Dis. 1989, 17–18)

Unsa ang nahimo sa atong Manluluwas kanato?

Si Presidente Dallin H. Oaks sa Unang Kapangulohan miingon:

Ubos sa plano sa atong Langitnong Amahan, [si Jesukristo] “milalang sa mga langit ug yuta” ( Doktrina ug mga Pakigsaad 14:9) aron nga ang matag usa kanato makabaton og mortal nga kasinatian nga gikinahanglan sa pagkaplag sa atong balaang kapalaran. Isip kabahin sa plano sa Amahan, ang Pagkabanhaw ni Jesukristo mibuntog sa kamatayon aron sa pagsiguro sa imortalidad sa matag usa kanato. Ang maulaong sakripisyo ni Jesukristo mihatag sa matag usa kanato sa oportunidad sa paghinulsol sa atong mga sala ug mobalik nga putli ngadto sa atong langitnong panimalay. Ang Iyang mga sugo ug mga pakigsaad nagpakita kanato sa agianan, ug ang Iyang pagkapari naghatag sa katungod sa pagpahigayon sa mga ordinansa nga gikinahanglan aron makab-ot kana nga padulngan. Ug ang atong Manluluwas andam nga misinati sa tanang mortal nga kasakit ug mga kahuyang nga Siya masayod kon unsaon pagpalig-on kanato diha sa atong mga kasakit.

Si Jesukristo mibuhat niining tanan tungod kay Siya nahigugma sa tanang mga anak sa Dios. Ang gugma mao ang hinungdan niining tanan, ug kini mao gikan pa sa sinugdanan.

(Dallin H. Oaks, “Unsay Nabuhat sa Atong Manluluwas alang Kanato?,” Liahona, Mayo 2021, 77)