Seminelí
Mātiu 13; Luke 8; 13

Mātiu 13; Luke 8; 13

Vakai Fakalūkufuá

Lolotonga e uike ní, te ke maʻu ha faingamālie ke ako ha niʻihi ʻo e ngaahi talanoa fakatātā ʻa e Fakamoʻuí, kau ai ʻa e talanoa fakatātā ʻo e tangata tūtuuʻí mo e talanoa fakatātā ʻo e uité mo e teá. ʻE lava ke tokoni hono ako e ngaahi talanoa fakatātā ʻa e Fakamoʻuí ke ke ako ai e ngaahi moʻoni fakalaumālié mo maʻu ha ʻofa lahiange kia Sīsū Kalaisi.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Mātiu 13

Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau ako e ngaahi talanoa fakatātaá, ke nau ʻilo honau ʻuhinga fakalaumālié, pea kumi ha ngaahi founga ke ngāueʻi ai e meʻa ʻoku nau akó.

  • Teuteu ʻa e tokotaha akó: Fakaafeʻi e kau akó ke vakaiʻi ʻenau malava ke mahino kiate kinautolu e ngaahi talanoa fakatātā ʻa e ʻEikí. ʻE lava ke lau ʻe he kau akó ʻa e Mātiu 13:44–48 pea fakafuofuaʻi ʻenau loto falala ki heʻenau malava ke tā ha ngaahi lēsoni fakalaumālie meí he ngaahi talanoa fakatātā nounou ko ʻení.

  • ʻĪmisí: Teuteu ke fakaʻaliʻali ha fakatātā ʻoku ʻi ai ha ngaahi ʻīmisi ʻoku fūfuuʻi.

Mātiu 13:3–8, 18–23

Taumuʻa ʻo e lēsoní: ʻE tokoni e lēsoni ko ʻení ki he kau akó ke teuteuʻi honau lotó ke maʻu mo tanumaki e folofola ʻa e ʻOtuá.

  • Teuteu ʻa e tokotaha akó: Fakaafeʻi e kau akó ke nau fakalaulauloto ki he fehuʻi ʻoku fakaʻilongaʻi ʻi heHaʻu,ʻo Muimui ʻIate Au he uiké ni: “Ko e hā ʻoku faʻa ongoʻingofua ai ʻe hotau lotó he taimi ʻe niʻihi ʻa e moʻoní, ka ʻi he taimi ʻe niʻihi ʻoku ʻahiʻahiʻi kitautolu ke tau tekeʻi ia?” (Māʻasi 20-26. Mātiu 13; Luke 8; 13: ‘Ko Ia ʻOkú ne Telinga Ongó, Ke Ongoʻi Ia’” Hau, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻou 2023.

  • Fokotuʻu ki hono akoʻi ʻo e konifelenisi vitioó: Fakakaukau ke ʻoange ki he kau akó ha faingamālie ke vahevahe ʻenau ngaahi fakatātaá mo honau kaungāakó. ʻE lava ke fakahoko ʻeni ʻi ha ngaahi kulupu iiki.

Mātiu 13:24–30, 36–43

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke fakatupulaki ʻenau holi ke kau ʻi hono tānaki fakataha ʻo ʻIsilelí.

  • Teuteu ʻa e tokotaha akó: Fakaafeʻi e kau akó ke nau haʻu mateuteu ke aleaʻi e ngaahi fehuʻi ko ʻení: Ko hai e taha ʻo e fuofua kakai ʻi ho fāmilí ke kau ki he Siasí? Ko e hā hoʻo ʻilo fekauʻaki mo ‘enau talanoá? ʻE lava ke aleaʻi ʻe he kau akó ʻa e ngaahi fehuʻi ko ʻení mo ha mēmipa ʻo e fāmilí.

  • Fokotuʻu ki hono akoʻi ʻo e konifelenisi vitioó: Ki he ngaahi fehuʻi ʻi he kamataʻanga ʻo e lēsoní, fakakaukau ke fakaafeʻi ʻa e kau akó ke nau fakaʻaongaʻi ʻa e chat feature ke vahevahe ʻenau ngaahi talí. Hili iá pea ʻoange ha taimi ki he kau akó ke nau lau ai e tali honau toʻú. ʻE lava ke ʻiloʻi ʻe ha kau ako ʻe niʻihi ha tali ʻoku nau fie fanongo lahiange ki ai.

Fakamanatu ʻo e Fakataukei Fakatokāteliné 4Taumuʻa ʻo e Lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau akoako fakaʻaongaʻi e ngaahi potufolofola fakataukei fakatokāteliné ki he ngaahi tūkunga tatau mo ia te nau ala fehangahangai mo ia ʻi heʻenau moʻuí.

Fakatokangaʻi ange: Mahalo ʻe fiemaʻu ke akoʻi ha lēsoni fakataukei fakatokāteline ʻo fetongi ʻaki e lēsoni fakamanatu ko ʻení. Vakai ki he taimitēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻotineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e fakataha ʻa e seminelí.

  • Teuteu ʻa e tokotaha akó: Fakaafeʻi e kau akó ke nau fakalaulauloto ki he ngaahi founga kuo nau fakaʻaongaʻi ai ʻi heʻenau moʻuí ha taha ʻo e ngaahi moʻoni ʻoku akoʻi ʻi ha taha pē ʻo e ngaahi potufolofola fakataukei fakatokāteline kuo nau ako he taʻu ní.

  • Ngaahi Nāunaú: Hiki ʻa e ngaahi fakamoʻoni fakafolofola ki he ngaahi potufolofola fakataukei fakatokāteline ʻoku fakaʻaongaʻi ʻi he lēsoni ko ʻení ʻi ha ngaahi laʻipepa (fakamoʻoni fakafolofola ʻe taha ʻi he laʻipepa). Tautau takai e ʻū laʻipepá ʻi he lokí.

Fakafuofuaʻi Hoʻo Akó 3

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau vakaiʻi ʻa e ngaahi taumuʻa kuo nau fokotuʻú pea mo e tupulaki fakatāutaha kuo nau aʻusia ʻi heʻenau ako e Fuakava Foʻoú he taʻu ní.

  • Teuteu ʻa e tokotaha akó:Fakaafeʻi e kau akó ke nau ako ʻa e Mātiu 11:16–19 pea mateuteu ke fakahaaʻi ha taukei ako folofola te nau ala fakaʻaongaʻi ke mahino lelei ange ʻa e ngaahi veesi ko ʻení. Mahalo ʻe tokoni ke lisi ha ngaahi pōtoʻi ngāue hangē ko e fakafehokotaki pe fakafekauʻaki e folofolá, fakaʻaongaʻi ʻo e ngaahi tokoni ki he akó, pe mahino ʻa e ngaahi fakataipé mo e ngaahi lea fakatātā ke toe fakafoʻou e manatu ʻa e kau akó ki ha niʻihi ʻo e ngaahi taukei kuo akoʻi kiate kinautolú.

  • Fokotuʻu ki hono akoʻi ʻo e konifelenisi vitioó: ʻE lava ke fakaafeʻi e kau akó ke vahevahe ʻenau screen mo fakaʻaliʻali ha sīpinga ʻo e founga ne nau fakahoko ai ha taukei ako folofola ʻi heʻenau folofola fakaʻilekitulōniká.