Fakafuofuaʻi Hoʻo Akó 3

Mātiu 8–13; Maʻake 2–5; Luke 7–9; 11; 13

ʻĪmisi

Mendoza, Argentina. A group of young men and young women attend an early morning seminary class.

ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú pea mo e ako mo e tupulaki fakafoʻituitui kuó ke aʻusia ʻi hoʻo ako e Fuakava Foʻoú he taʻu ní.

Ngaahi ʻEkitivitī Ako ʻOku Ala Fakahokó

Fakakaukau ki hoʻo tupulaki kimuí ni

ʻOange ha faingamālie ki he kau akó ke nau fakakaukau ai ki heʻenau tupulaki fakalaumālie kimuí ni maí. Ko e founga ʻe taha ʻe lava ke fai ai ʻení ko hono fakaʻaliʻali ʻa e ngaahi fehuʻi ko ʻení pea ʻoange ha taimi ki he kau akó ke hiki ʻenau ngaahi fakakaukaú mo e talí ʻi heʻenau tohinoa akó.

Ko e taha ʻo e ngaahi tefitoʻi taumuʻa ʻo e seminelí ke tokoniʻi koe ke ke haʻu kakato ange kia Sīsū Kalaisi pea hoko ko ʻEne ākonga, pe ko ʻEne tokotaha muimui. Toʻo ha kiʻi taimi ke ke fakakaukau ai ki ho’o tupuaki fakalaumalie kimuí ni maí. ʻE lava ke tataki koe ʻe he ngaahi fehuʻi ko ʻení. Fakakaukau ke hiki hoʻo ngaahi tali ki he ngaahi fehuʻi ko ʻení ʻi hoʻo tohinoa akó.

Ko e hā ha liliu ʻe taha kuó ke toki fai kimuí ni ʻi hoʻo moʻuí kuó ne ʻomi koe ke ke ofi ange kia Sīsū Kalaisi?
Ko e hā kuó ke ako fekauʻaki mo e Fakamoʻuí ʻi hoʻo ako kimuí ni maí, ʻa ia ʻoku fuʻu mahuʻingamālie makehe kiate koe?
Ko e hā ha ngaahi founga ʻokú ke ongoʻi ʻokú ke hoko ai ʻo hangē ko Sīsū Kalaisí?

ʻI he ʻosi e fakakaukau ʻa e kau akó ki heʻenau tupulaki fakalaumālié, fakaafeʻi kinautolu ke vahevahe ha niʻihi ʻo ʻenau ngaahi fakakaukaú mo e kalasí.

ʻOku fakataumuʻa ʻa e ngaahi ʻekitivitī ko ʻení ke tokoni ki he kau akó ʻi hono fakafuofuaʻi ʻenau akó mo e tupulakí. Fakaʻaongaʻi e ngaahi ʻekitivitī ko ʻení, pe fakakaukau ki ha ngaahi ʻekitivitī kehe te ne feau lelei ange e ngaahi fiemaʻu ʻa e kau akó.

Fakafuofuaʻi hoʻo taukei ki hono mahinoʻi ʻa e folofolá

Kuo akoʻi kiate koe ʻi he seminelí he taʻú ni ha ngaahi taukei kehekehe ke tokoni ke mahino lelei ange kiate koe ʻa e folofolá. Ko e niʻihi ʻo e ngaahi taukei ko ʻení, hangē ko hono fakamatalaʻi e ngaahi foʻi lea faingataʻá, naʻe mei tokoni ia ke mahino lelei ange kiate koe ʻa e lea ʻoku fakaʻaongaʻi ʻi he folofolá. Mahalo naʻe tokoni atu ha ngaahi taukei kehe, hangē ko e sīpinga sitepu ʻe fā ki hono maʻu ha mahino ki he ngaahi fakataipe ʻoku fakaʻaongaʻi ʻi he ngaahi talanoa fakatātaá, ke mahino lelei ange kiate koe ʻa e ngaahi fekau ʻi he folofolá.

Ko e savea ko ʻení ko ha founga pē ia ʻe taha ʻo hono tokoniʻi e kau akó ke nau fakakaukau ki he meʻa kuo nau fai ke fakatupulaki ai ʻenau malava ke mahino ki he folofolá. Ko ha founga ʻe taha ko hono tataki ha fepōtalanoaʻaki fakakalasi fekauʻaki mo e meʻa ʻoku ngāue lelei ʻi heʻenau ako folofola fakatāutahá pea mo e ngaahi faingataʻa ʻoku nau kei fehangahangai mo iá. Ko e fili hono tolú ke ʻoange ki he kau akó ha faingamālie ke fakatātaaʻi ai hono fakaʻaongaʻi ha taukei kuó ne tokoniʻi kinautolu.

ʻI hono fakaʻaongaʻi ʻo e meʻafua mei he 0 ki he 5, ko e hā e lahi ʻo e ngaahi taukei ako ko ʻení kuo tokoni ke mahino lelei ange ai kiate koe ʻa e folofolá?

0. Kuo teʻeki ai ke u fakaʻaongaʻi e taukei ko ʻení.

1. Hala ha taha

2. Siʻisiʻi

3. Kiʻi meʻa siʻi

4. Lahilahi

5. Kakato

____ ʻIloʻi e ngaahi tefitoʻi moʻoní

_____ Ngaahi fakataipe mo e lea heliaki (hangē ko ʻení, ʻi he talanoa fakatātā ʻa e Fakamoʻuí)

______ Faitaaʻi (ʻi he Laipeli ‘a e Ongoongo Leleí), fakaʻilongaʻi, laineʻi, mo e ngaahi alā meʻa pehē

______ Lēkooti ʻo e ngaahi fakakaukaú mo e ngaahi ongó ʻi hoʻo akó

______ Fakafehokotaki (ʻi he Laipeli ‘a e Ongoongo Leleí) pe ngaahi veesi fakafekauʻakí

______ Ako ha ngaahi fakakaukau lahi (hangē ko ʻení, ako ʻa e talanoa tatau mei he ngaahi fakakaukau kehekehe)

______Sioloto ki he Folofolá

Ko e hā ha ngaahi taukei kehe te ke tānaki ki he lisi ko ʻení kuó ke ʻahiʻahiʻí?
Kuo tokoniʻi fēfē koe ʻe hono fakahoko e ngaahi taukei ako folofolá ke ke ʻiloʻi lelei ange ai ʻa Sīsū Kalaisi mo mahino kiate koe ʻEne ngaahi akonakí?

Fakamatalaʻi ange ʻa e fatongia mahuʻinga ʻo e kau palōfitá mo e kau ʻaposetoló ʻi he Siasi ʻo e Fakamoʻuí

Naʻá ke ako kimuí ni fekauʻaki mo hono ui ʻe he Fakamoʻuí ʻEne Kau ʻAposetolo ʻe Toko Hongofulu Mā Uá ko ha konga ʻo hono fokotuʻu Hono Siasí (vakai Mātiu 10).

Fakakaukauloto ʻoku ʻi ai haʻo kaungāmeʻa ʻoku ako fekauʻaki mo e Siasí pea ʻokú ne fie ʻilo lahiange ki he fatongia ʻo e kau palōfitá mo e kau ʻaposetoló ʻi he Siasi ʻo e Fakamoʻuí he ʻaho ní. Tau pehē pē ʻoku fai atu ʻe ho kaungāmeʻá ʻa e ngaahi fehuʻi ko ʻení kiate koe. Teuteu ha tali maʻa ho kaungāmeʻá. Mahalo ʻe tokoni ke fakakau ʻa e ngaahi moʻoni meí he Mātiu 10 ko ha konga ʻo hoʻo talí.

Mahalo ʻe tokoni ke fakaafeʻi e kau akó ke ngāue mo hanau hoa ʻi heʻenau teuteu ʻenau ngaahi talí. ʻE lava leva ke kole ki he ngaahi hoá ke vahevahe ʻenau ngaahi talí mo ha hoa ngāue kehe ʻi ha lēsoni fakatātā.

Ko e hā ʻoku ui ai ʻe he ʻEikí ha kau ‘Aposetolo?
Ko e hā ʻoku tau fiemaʻu ai ha ‘Aposetolo moʻui he ʻaho ní?

Fakafuofuaʻi e founga ʻokú ke ngāue ʻaki ai hoʻo tui kia Sīsū Kalaisí ke fakatomala mei hoʻo ngaahi angahalá

Mahalo kuó ke ʻosi sio ʻi he fakatātā ko ʻení ʻi ha lēsoni kimuʻa. Tuku ha kiʻi taimi ke ke fakalaulauloto ai ki ha feituʻu te ke ʻi ai ʻi he fakatātā ko ʻení he ʻahó ni. Fakakaukau ki he ongo ʻokú ke maʻu ʻi hoʻo ofi ki he ʻEikí pea mo e feituʻu ʻokú ke ngaʻunu ki aí.

ʻĪmisi

Shows two stick figures, one going toward Christ, the other going away from Christ

ʻI hoʻo ako ʻa e Fuakava Foʻoú, mahalo naʻá ke ongoʻi naʻe ueʻi koe ke ke toe ofi ange kia Sīsū Kalaisi ʻaki hoʻo tui kiate Ia mo fakatomala mei hoʻo ngaahi angahalá. Neongo ʻe ngali ʻi he taimi ʻe niʻihi ʻe fakaiku ʻa e fakatomalá ki ha ngaahi nunuʻa taʻe fakafiemālie, ka ʻe lava ke tokoniʻi kitautolu ʻe he tui kia Sīsū Kalaisí mo e fakatomala fakamātoató ke tau ikunaʻi ʻa e ngaahi manavasiʻi ko iá.

Naʻe vahevahe ʻe ʻEletā Teli G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ha aʻusia naʻá ne maʻu ʻokú ne fakatātaaʻi ʻa e ngaahi tāpuaki te tau lava ʻo maʻu meí he Fakamoʻuí ʻi heʻetau fakatomala mei heʻetau ngaahi angahalá. Fakakaukau ke mamata ʻi he foʻi vitiō “Fakatomala: Ko e Fili Fakafiefia”(4:36), ʻoku maʻu ʻi he ChurchofJesusChrist.org. ʻI hoʻo mamatá, fakakaukau ki he ngaahi tāpuaki kuó ke maʻu ʻo fakafou ʻi he fakatomalá.

Kapau naʻe ʻikai akoʻi ʻa e lēsoni ʻi he Luke 7:36–50,fakakaukau ke liliu ʻa e fakamatala ko ʻení ʻi ha founga ʻe kei tokoni ai ki he kau akó ke nau fakakaukau ki heʻenau ngaahi feinga kimuí ni ke ngāue ʻaki ʻenau tui kia Sīsū Kalaisí ke fakatomala mei heʻenau ngaahi angahalá.

Kapau naʻá ke kau ʻi he lēsoni ʻi he Luke 7:36–50, mahalo te ke manatuʻi naʻe kole atu ke ke faʻu ha palani ke fakaloloto hoʻo ʻofa ki he Fakamoʻuí ʻaki haʻo fakatomala mei hoʻo ngaahi angahalá. ʻI he lēsoni ko iá, naʻe kole atu ai ke ke tali ʻa e ngaahi fehuʻi ko ʻení ʻi hoʻo tohinoa akó:

Ko e hā ha meʻa ʻe taha ʻoku fiemaʻu ke taʻofi hoʻo fai ke ofi ange ai ki he Fakamoʻuí? Te ke ta’ofi fēfē?
Ko e hā ha meʻa ʻe taha ʻoku fiemaʻu ke ke kamata fai ke ofi ange ai ki he Fakamoʻuí? Te ke kamatá fefē?

Kapau ʻe lava, toe vakai ki he fakamatala ko ʻení ʻi hoʻo tohinoa akó ke toe vakaiʻi e founga naʻá ke tali ʻaki e ongo fehuʻi ko ʻení. Fakakaukau ki he fakalakalaka kuó ke fai ki he ngaahi taumuʻa naʻá ke fokotuʻú. ʻE lava ke tataki koe ʻe he ngaahi fehuʻi ko ʻení.

Fakakaukau ke fakaʻaliʻali ʻa e ngaahi fehuʻi ʻe tolu hono hokó ke tali fakatāutaha ʻe he kau akó ʻi heʻenau tohinoa akó. ʻOku ʻikai fakataumuʻa ʻa e ngaahi fehuʻi ko ʻení ke aleaʻi mo e niʻihi kehé.

Ko e hā ha ngaahi faingataʻa kuó ke fehangahangai mo ia pe ko e hā ha fakalakalaka kuó ke fai lolotonga hoʻo feinga ke liliu pea ofi ange kia Sīsū Kalaisí?
Kuo tokoniʻi fēfē nai koe ʻe he Fakamoʻuí?
Makatuʻunga ʻi hoʻo fakalakalaka lolotongá, ʻokú ke pehē ko e hā hoʻo sitepu hokó?

Hili hono ʻoange ha taimi feʻunga ke tali ai ʻe he kau akó ʻa e fehuʻi kimuʻá, aleaʻi fakalūkufua ange ʻa e fakatomalá. Fakapapauʻi ke fakalotolahi ki he kau akó ke ʻoua ʻe vahevahe ha fakamatala ʻoku fuʻu fakataautaha lolotonga e fealēleaʻaki ko ʻení. Fai ki he kau akó ha ngaahi fehuʻi hangē ko ʻení:

Ko e hā ha ngaahi fehu’i ʻokú ke maʻu fekauʻaki mo e fakatomalá?
Kuo tokoniʻi fēfē koe ʻe hoʻo fili ke fakatomalá ke ke tupulaki fakalaumālie mo maʻu ʻa e fiefiá?
Kuó ke ongoʻi fēfē ʻa e ʻofa ʻa e Fakamoʻuí ʻi hoʻo feinga ke fakatomala pe liliú?

Fai ha fakamoʻoni te tau lava ʻo ongoʻi e ʻofa ʻa e Fakamoʻuí ʻi heʻetau fakatomala fakamātoato mo loto fakatōkilaló, pea poupouʻi e kau akó ke ngāue ʻaki e tui ki he Fakamoʻuí pea fakatomala.