Mātiu 14; Maʻake 6; Sione 5-6

Vakai Fakalūkufuá

Naʻe fafanga ʻe he Fakamoʻuí ha kakai ʻe toko nimaafe ʻaki ha foʻi mā ʻe nima mo ha mataʻi ika ʻe ua. Naʻe tali ia ʻe ha tokolahi ʻaki ʻenau fekumi kiate Ia ki ha meʻakai lahiange. Naʻe ʻaʻeva ʻa Sīsū ʻi he fukahi vaí ki he vaka ʻo e kau ākongá lolotonga ha matangi. Naʻá ne fakaafeʻi ʻa Pita ke lue ʻi he fukahi vaí pea fakahaofi ʻa Pita mei heʻene ngatá hili ʻene veiveiuá. Naʻe akoʻi ʻe he Fakamoʻuí ʻa e malanga ʻo e Mā ʻo e Moʻuí. Naʻá Ne ‘eke ki Heʻene kau ākongá pe te nau liʻaki Ia, ʻo hangē ko ia kuo ʻosi fai ʻe ha kau muimui ʻe niʻihi. Ko e fakamoʻoniʻi ʻe Pita ʻoku maʻu ʻe Sīsū ʻa e ngaahi lea ʻo e moʻui taʻengatá.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Mātiu 14:13–23; Sione 6:5–14

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ke nau manavaʻofa mo taʻe-siokita ʻo hangē ko Sīsū Kalaisí. ʻE lava foki ke tokoni ke nau maʻu ha loto falala lahiange koeʻuhí ko Sīsū Kalaisi ʻe feʻunga pē ʻenau ngaahi foaki fakatōkilaló. 

• Teuteu ʻa e tokotaha akó: Fakaafeʻi e kau akó ke lotua mo kumi ha faingamālie ke tokoniʻi ai ha taha kimuʻa he kalasi hokó. Fakalotolahi’i kinautolu ke nau tokanga ki he ongo ʻoku nau maʻu ʻi heʻenau tokoní.

• Ngaahi Vitioó: “Naʻe Liliu Au ʻe Heʻeku Fai ha Meʻa maʻá ha Taha Kehe” (3:14); “Hoko ko ha Kau Nofotuʻi Moʻoni” (taimi 9:05 ki he 12:28)

• Laʻipepa Tufa: Teuteu kimuʻa pea kamata e kalasí ʻi he laʻipepa tufá mo e ongo tūkunga kehekehe ko ʻení.

• \Fokotuʻu ki hono akoʻi ʻo e konifelenisi vitioó: Fakakaukau ke faʻu ha ongo loki ki he ongo tūkunga kehekehe ko ʻení. Tuku ki he kau akó ke nau fili pe ko e fē loki ʻoku nau fie kau atu ki aí. Tuku ki he ngaahi lokí takitaha, pea tokoniʻi e kau akó ʻi heʻenau fepōtalanoaʻakí.

Mātiu 14:22–33

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau muimui ʻi he sīpinga ʻa Pita ʻo e tafoki ki he Fakamoʻuí lolotonga ha ngaahi tūkunga manavahē pe taulōfuʻu.

• Teuteu ʻa e tokotaha akó: Fakaafeʻi e kau akó ke nau fakalaulauloto ki he ngaahi fehuʻi ko ʻeni mei he Haʻu, Muimui ʻIate Aú: “Ko e hā naʻá ne ueʻi ʻa Pita ke mavahe mei he malu ʻo hono vaká ʻi he lotolotonga ʻo e Tahi Kālelí lolotonga ha matangi mālohi? Ko e hā e meʻa naʻá ne tākiekina ia ke ne tui kapau naʻe lava ʻe Sīsū ʻo ʻaʻeva ʻi he fukahi vaí, te ne lava foki mo ia ʻo fai pehē?” (“ 27 Māʻasi–ʻEpeleli 2. Mātiu 14; Maʻake 6; Sione 5–6: ‘ʻOua Te Mou Manavahē’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻou 2023).

• ʻĪmisí: Ko ha ʻīmisi ʻo Pita ʻoku luelue ʻi he fukahi vaí

• Vitiō: “Ko Hono Maʻu ʻo Kalaisi lolotonga e Ngaahi Taimi Faingataʻá” (4:35)

• Fokotuʻu ki hono akoʻi ʻo e konifelenisi vitioó: Fakakaukau ke fakaafeʻi e kau akó ke nau kumi e ʻīmisi ʻoku nau saiʻia taha ai ʻo Pita mo e Fakamoʻuí ʻoku hāʻele ʻi he fukahi tahí. Tuku leva ke vahevahe ʻe he kau akó ʻenau screen ke fakamahinoʻi e ngaahi fakaikiiki ʻi he fakatātā ne nau filí pea vahevahe e meʻa ne nau ako meí he fakamatala fakafolofolá.

Sione 6:22–58

Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau ʻiloʻi ʻa e ngaahi founga ʻe lava ke nau haʻu ai ki he Fakamoʻuí ke Ne fakakakato ʻenau ngaahi fiemaʻu fakalaumālié.

• Teuteu ʻa e tokotaha akó: Fakaafeʻi e kau akó ke nau fakakaukau ki he founga ʻoku hangē ai ʻa Sīsū Kalaisi ko e maá pea ke haʻu mateuteu ke vahevahe ʻenau ngaahi fakakaukaú.

• Ngāue mo e me’a: Fakakaukau ke ʻomi ha mā ki he kalasí ke fakaʻaongaʻi ʻi he kamataʻanga ʻo e lēsoní.

• Vitiō: “Ko Au ko e Mā ʻo e Moʻuí” (meí he taimi 3:20 ki he 5:08)

• Fokotuʻu ki hono akoʻi ʻo e konifelenisi vitioó: Fakakaukau ke kole ki he kau akó ke nau kumi ha mā ʻi honau ʻapí ke fakaʻaongaʻi ki he ʻuluaki ʻekitivitī ʻo e lēsoní.

Sione 6:60–71

Taumuʻa ʻo e lēsoní: ʻE tokoniʻi ʻe he lēsoni ko ʻení e kau akó ke nau tuʻu maʻu ʻi heʻenau tukupā ke muimui ʻia Sīsū Kalaisí, neongo he ʻikai fili e niʻihi kehé ke muimui kiate Ia.

• Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi tāpuaki kuo nau maʻu koeʻuhí ko ʻenau kau Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

• Vitiō: “Te Tau ʻAlú Kia Hai?” (taimi 2:46 ki he 8:16)

• Fokotuʻu ki hono akoʻi ʻo e konifelenisi vitioó: Fakakaukau ke fakaafeʻi e kau akó ke ʻi ai ha mēmipa ʻo e fāmilí pe kaungāmeʻa kuó ne fili ke kei mālohi ʻi he Siasí neongo ʻoku teʻeki vahevahe ʻe he niʻihi ʻoku nau feohí ʻenau aʻusiá mo e fakamoʻoní.

Ngaahi ʻEkitivitī Fakamanatu ʻo e Fakataukei Fakatokāteliné 5

Taumuʻa ʻo e lēsoní: ʻE tokoni e lēsoni ko ʻení ke ako maʻuloto ʻe he kau akó e ngaahi fakamoʻoni fakafolofolá mo e ngaahi kupuʻi lea fakatokāteline mahuʻinga ki he ngaahi potufolofola fakataukei fakatokāteliné.

• Teuteu ʻa e tokotaha akó: Fakaafeʻi e kau akó ke nau fakakaukau pe ko e fē ngaahi potufolofola fakataukei fakatokāteline kuo nau maʻu ai ha ʻamanaki lelei ʻia Kalaisí.

• Nāunau maʻá e Kau Akó: pepa, tohi helekosi, mo e helekosi

• Fokotuʻu ki hono akoʻi ʻo e konifelenisi vitioó: Fakakaukau ke teuteuʻi ha fakamatala ʻaki e ngaahi foʻi lea mo e kupuʻi lea kehekehe meí he ngaahi potufolofola fakataukei fakatokāteliné pea ʻai ia ke hoko ko ha vaʻinga moʻui, ʻi he ʻinitanetí.