Матай 14:22–33

“Бүү ай”

Jesus Christ depicted walking on the sea of Galilee toward a small fishing boat. The Apostles are in the fishing boat and are watching Christ walk toward them. There are storm clouds in the sky.

Есүс Христ усан дээгүүр алхсан бөгөөд Петрийг мөн ийн алхахад урьжээ. Петр ширүүн салхи, давлагаа хараад живж эхэлсэн бөгөөд Аврагчаас тусламж хүсэн орилсон. Энэ хичээл танд айдастай үе, цөхөрсөн нөхцөл байдалд Аврагчид хандсан Петрийн жишээг дагахад тусална.

Суралцагчдад хариулах цаг гаргаж өг. Зарим үед суралцагчид үр дүнтэй асуултад нэн даруй хариулж чадахгүй байж болно. Тухайн асуултын талаар бодох цагийг суралцагчдад гаргаж өгөхөөс бүү ай. Суралцагчид зарим үед асуусан зүйлийн талаар болон хэрхэн хариулахаа тунгаан бодох хэрэгтэй байдаг. Энэ нь Ариун Сүнсээр удирдуулахад дөхөмтэй болгодог.

Суралцагчийн бэлтгэл: Суралцагчдыг Ирээд, Намайг дага дээрээс дараах асуултуудыг эргэцүүлэн бодоход урь. “Юу Петрт аймшигт шуурганы үеэр Галилын тэнгисийн дунд завиа орхих урам зоригийг төрүүлсэн бэ? Юу түүнийг Есүс усан дээгүүр алхаж чадаж байгаа шиг алхаж чадна хэмээн итгэхэд хүргэсэн бэ?” (“3-р сарын 27-оос 4-р сарын 2. Матай 14; Марк 6; Иохан 5–6: ‘Бүү ай,’” Ирээд, Намайг дага—Хувь хүн, гэр бүлүүдэд зориулав: Шинэ Гэрээ 2023).

Боломжит суралцах үйл ажиллагаа

Есүс амьдралын шуурганаар биднийг тайвшруулж чадна

Энэ хичээл нь суралцагчдыг гай зовлон тохиолдсон үед амар амгалан, аюулгүй байдлыг олж авахаар Есүс Христэд хандахад уриална. Ирээдүйд өгөгдөх үнэлгээний хичээл дээр суралцагчдыг эдгээр цаг үед Христээс амар амгаланг олоход гарч буй ахиц дэвшлээ тодорхойлоход урих болно. Энэ хичээл дээр ашиглаж болох олон санаа “Нэмэлт суралцах үйл ажиллагаа” дээр байгаа болохыг ажигла. Суралцагчдад хамгийн хамааралтай байж болох үйл ажиллагаануудыг сонго.

Jesus Christ depicted walking on the water of the Sea of Galilee. The Apostle Peter is in the water. Christ is extending His hand to Peter to prevent Peter from sinking.

Матай 14:30 дээрх дараах эшлэлийг самбарт бичээд, суралцагчдыг доорх асуултыг авч ярилцах үед энэ зургийг харуулах талаар бодож үз.

Энэ зурагт төлөөлөгч Петрийн амьдрал дахь айдастай мөчийг харуулжээ. Матай 14:30 дээр “[Петр] айж; мөн живж эхлэв, тэрээр Эзэн, намайг авраач гэж орилжээ” хэмээн гардаг.

Өнөөгийн өсвөр үеийнхнийг Петр шиг байдалд ороход хүргэх орчин цагийн ямар ямар нөхцөл байдал байж болох вэ?

Суралцагчдыг дараах асуултыг дотроо чимээгүй тунгаан бодоход урь.

Айдас төрүүлэм эсвэл живж буй мэт мэдрэмж төрүүлж буй ямар нэг зүйл таны амьдралд байгаа юу?

Танд ийм мэдрэмж төрсөн үед тусламж авахаар ихэвчлэн хаана, хэнд ханддаг тухайгаа нэг хором эргэцүүлэн бод.Есүс Христ таван мянга гаруй хүнийг гайхамшигтайгаар хооллосны дараа Өөрийн шавь нарыг “завинд суулгаж, нөгөө эрэг уруу түрүүлэн явуулахыг” ( Матай 14:22) хүсжээ.

Матай 14:23–33 -ыг уншаад, танд айдас эсвэл живж буй мэт мэдрэмж төрөх үед Аврагчид хандахад туслах Аврагчийн тухай үнэнийг олж мэд. Ариун Сүнснээс ирдэг мэдрэмж, бодол санаанд анхаарлаа хандуул. Тэр танд амьдралд тань тохиолдож буй зүйлсэд эдгээр үнэнийг хэрхэн ашиглаж болохыг таньж мэдэхэд тусална. Өөрийн тодорхойлсон үнэнүүдийг судлах тэмдэглэл эсвэл судрууд дээрээ бич. (Тайлбар: “Дөрөвдүгээр манаа” шөнийн 3:00 цагаас өглөөний 6:00 цагийн хооронд байсан.)

Суралцагчдад бичих хангалттай цаг гаргаж өгсний дараа, олж мэдсэн үнэнүүдээ самбар дээр бичихэд урь. Шаардлагатай бол суралцагчдад энэ хүүрнэлээс суралцаж, дүн шинжилгээ үргэлжлүүлэн хийхэд нь туслах зорилгоор дараахтай адил асуултуудыг тавих талаар бодож үз.

Та энэ хүүрнэлээс ямар ямар үнэнийг олж мэдсэн бэ?

Усны мандал дээр зогссон байх үедээ Петрийн анхаарал хаашаа чиглэж байсан бэ? Түүнийг живэхэд хүргэсэн зүйл юу вэ?

Танд айдас төрсөн эсвэл цөхөрсөн үед Түүнд хандахад тусалж болох Есүс Христийн тухай юуг та сурч мэдсэн бэ?

Дараах үйл ажиллагаа болон видео бичлэг нь суралцагчдад Есүс Христ дээр анхаарлаа хандуулах нь хэцүү цаг үед тэдэнд хэрхэн тусалж болохыг ойлгоход туслах зорилготой. Суралцагчдын хэрэгцээ шаардлагад тулгуурласны үндсэнд уг түүхэд байгаа бусад үнэнд төвлөрч болно.

Доорх дасгалыг дараах маягаар өөрчлөн, ангиараа хийж гүйцэтгэх боломжтой.

Өрөөний нэг талд Есүс Христийн зургийг харуул. Суралцагчдыг хуудас цаасан дээр цөхөрмөөр санагдсан зүйлийнхээ тухай бичиж, өрөөний нөгөө талд байршуулахад урь. Дараа нь доорх үйл ажиллагаанд санал болгосны дагуу тэднийг анхаарлаа өрөөний нэг талаас нөгөө тал руу хандуулахад урь.

Аврагч дээр төвлөрөх

Петрийн жишээ бидэнд юун дээр төвлөрөх ёстойг заадаг. Петрийг Есүс Христ дээр төвлөрсөн үед түүнд юу тохиолдсоныг болон түүнийг анхаарлаа эргэн тойрондоо болж буй шуурганд хандуулах үед юу тохиолдсон болохыг санаарай ( 28–31-р шүлгийг үзнэ үү). Одоогийн эсвэл ирээдүйн амьдрал дахь цөхөрмөөр санагдаж магадгүй зүйлсийнхээ талаар цаасан дээр бич. Энэ цаасыг өөрийнхөө зүүн гар талд байрлуул. Одоо Есүс Христийг санагдуулах зураг эсвэл ямар нэг зүйлийг баруун гар талдаа байрлуул. Бодол санаа болон хараагаа цөхөрмөөр нөхцөл байдлын тухай бичсэн цаас, Есүс Христийн зураг хоёрын хооронд ээлжлэн төвлөрүүл.

Хүнд хэцүү нөхцөл байдалтай байхдаа, Есүс Христэд итгэх итгэл, хүч чадалд болон бидэнд өгсөн Түүний хайр энэрэлд төвлөрөх нь танд хэрхэн тусалж байна вэ?
Сорилтод орсон үедээ Аврагч дээр төвлөрөх ямар ямар арга зам байдаг вэ?

Та ChurchofJesusChrist.org дээрх “Хүнд хэцүү цаг үед Христийг хайж олох нь” (4:35) видео бичлэгийг үзээд, уг бичлэгт гарч буй залуу эр сорилтод орсон үедээ Есүс Христэд төвлөрөхийн тулд юу хийснийг олж мэд.

Хэцүү бэрх цаг үед Аврагчаас хүч, дэмжлэг хүлээн авахын тулд залбирлаар дамжуулан Бурханд хандсан хувийн туршлагаа хуваалцах талаар бодож үз. Суралцагчдыг өөрсдийн туршлагыг сайн дураараа хуваалцахад урь. Суралцагчдыг хуваалцах зуур эдгээр цаг үед Аврагчид хандахын тулд юу хийсэн болохыг нь асуу.

Төрсөн сэтгэгдлээ бичиж тэмдэглэснээр энэ хичээлийг дуусга. Та Есүс Христийн тухай юу олж мэдсэн бэ? Бид живж байх үедээ яагаад Түүнд хандах ёстой вэ? Та Түүнд хандахын тулд юу хийхээр төлөвлөж байна вэ?

Тайлбар ба нөхцөл байдлын талаарх мэдээлэл

Биднийг Есүс Христэд төвлөрөх үед амьдрал маань хэрхэн өөрчлөгддөг вэ?

Ерөнхийлөгч Ховард В. Хантэр (1907–95) ийн заасан.

Хэрэв хүмүүс, гэр бүл, нийгэм хамт олон, улс үндэстэн, бид бүгд хараагаа Петр шиг Есүсээс салгахгүй байх юм бол “итгэлгүй байдлын давалгааг” ялгууснаар даван туулж, “эргэлзээний хуй салхин дунд айдасгүй” үлдэж чадна. Харин бид итгэвэл зохих Түүнээс хараагаа холдуулж, бидэнд тусалж, биднийг аварч чадах Түүнд биш, харин өөрсдийнхөө эргэн тойрон дахь аймшигт, хор хөнөөлтөй, сүйрүүлэгч хүчин зүйлсийн хүч нөлөөнд найдах юм бол зөрчил сөргөлдөөн, уй гашуу, гутрал цөхрөлийн далайд зайлшгүй живэх болно. Ийнхүү Их Эзэнээс хараагаа салгахад ядаж цөхөх юмгүй бөгөөд дэлхийд биднийг уруу татах юмс дүүрэн байдаг.

(Ховард В.Хантэр, “Амар амгалангийн боомт дээрх зам заагч гэрэл,” Ensign, 1992 оны 11-р сар, 19)

Maтай 14:27 . Бид хүнд хэцүү цаг үеийг туулж байхдаа хэрхэн “зоригтой байх” вэ?

Арван хоёр Төлөөлөгчийн Чуулгын ахлагч Роналд А. Расбанд ийн тайлбарласан.

Бид айдаст автсан атлаа “зоригтой байж” [ Сургаал ба Гэрээ 68:6 ] чадахгүй. Зориг, айдас хоёр нэг нэгнээ үгүйсгэдэг. …

Зоригтой байх гэдэг нь аливаа зүйл төлөвлөснөөр болохгүй үед [Есүс Христэд] итгэж найдахыг хэлнэ. Энэ нь мөн хүнд хэцүү зүйлүүд биднийг бодож төлөвлөөгүй нөхцөл байдалд оруулж мөн гай зовлон, саад бэрхшээл хүсэл мөрөөдлийг маань үгүй хийж байхад бууж өгөхгүй байхыг хэлнэ. Гэвч Их Эзэн “Энэ дэлхийд та нарын баясал бүрэн биш болой, харин миний дотор та нарын баясал бүрэн болой” [ Сургаал ба Гэрээ 101:36 ] хэмээн бидэнд сануулсан.

(Роналд А.Расбанд, “Jesus Christ Is the Answer,” [Ерөнхий эрх мэдэлтэнтэй хамт нэгэн үдэш, 2019 оны 2-р сарын 8], 1–2)

Айдас хэрхэн биднийг Аврагчийн санал болгодог адислалуудыг алдахад хүргэдэг вэ?

Арван хоёр Төлөөлөгчийн Чуулгын ахлагч Жэффри Р. Холланд дараах мэдэгдлийг хуваалцжээ.

Судрын энэ түүх Христэд ирж, Түүний дүүрэн байдлыг эрэлхийлэхийг эсвэл Тэрээр уг дүүргэлтийг авчрахаар бидэнд ирснийг сануулдаг тул энэхүү анхны алхам асар их айдас төрүүлж болох юм. Ийм байх ёсгүй ч заримдаа айдас төрдөг. Сайн мэдээний хамгийн агуу логик зөрчилдөөний нэг бол бидний хүлээн авдаг тусламж дэмжлэг, аюулгүй байдлын эх сурвалж нь мөнх бус амьдралд сул дорой байдлаасаа болж зугтаж байж болох зүйл маань байдаг явдал юм. Сонирхогчид ямар нэг шалтгаанаар баптисм хүртэхээс зугтаж байхыг би харсан. Би ахлагчид номлолын дуудлагаас, амраг хосууд гэрлэлтээс, залуу хосууд гэр бүлтэй болохоос болон ирээдүйгээс зугтаж байхыг би харсан. Гагцхүү биднийг адисалж, аварч, тайвшруулах тэр зүйлээс бид ихэвчлэн зугтдаг. Түүнчлэн сайн мэдээний дагуу хийнэ хэмээн амладаг зүйлийг айж явах ёстой зүйл хэмээн бодож, яваандаа орхиж байхыг бид олонтоо хардаг.

(Жэффри Р.Холланд, “Come unto Me” [Бригам Янгийн Их Сургууль дээр болсон шашны хурал дээр, 1997 оны 3-р сарын 2], 8, speeches.byu.edu)

Нэмэлт суралцах үйл ажиллагаа

Авралын төлөвлөгөөний харьцуулалт

Петр завийг орхиж буй, тусламж хүсэж буй болон Аврагч түүнийг аварч байгаа зэрэг нь бидний мөнх бус амьдралын аялал ба авралын төлөвлөгөөний тухай заадаг. Суралцагчдад дараах асуултуудыг тавь. Та энэ түүх, авралын төлөвлөгөө хоёрын хоорондох ямар харьцуулалтыг олж харж байна вэ? Та энэ түүхийг ийм аргаар харах үедээ Есүс Христийн номлолын тухай юу олж мэдэж авч байна вэ?

Maтай 14:27 “Би байна. Бүү ай”

Тэнгэрлэг Эцэг, Есүс Христ хоёр санал болгодог боловч хүмүүс айдсаасаа болж зарим үед зайлсхийдэг тусламжуудыг жагсаан бичихэд суралцагчдыг урь. Үүнд залбирах, бишоптой ярилцах, номлолд үйлчлэх, дуудлага хүлээн авах эсвэл гэрлэх зэрэг нь багтаж болно. Тэнгэрлэг Эцэг, Есүс Христ хоёрын тэдэнд энэ тусламжийг санал болгосон тохиолдол дээр төвлөрөхөд суралцагчдад тусал. Тэдэн рүү очихоос эсвэл Тэдний бидэнд санал болгож буй зүйлийг хүлээн авахаас айх хэрэггүй. Энэ хэлэлцүүлэгт тусламж болгох үүднээс энэ хичээлийн ”Тайлбар ба нөхцөл байдлын талаарх мэдээлэл” хэсэг дэх ахлагч Жэффри Р. Холландын “Над уруу ирэгтүн” үгийг харуулах талаар бодож үз.

Марк болон Иохан дээрх нэмэлт мэдээллүүд

Сайн мэдээний өөр өөр зохиогч нэг ижил түүхийн талаар өөр өөр онцгой мэдээллийг олонтоо хуваалцсан байдаг. Тиймээс, өөр өөр өнцгөөс бичсэн хэд хэдэн Сайн мэдээг унших нь Шинэ гэрээг судлах үед бидэнд Есүс Христийн тухай илүү ихийг олж мэдэхэд тусална. Жишээлбэл, Иохан 6:16–19 дээр бидний олж мэдсэн мэдээлэлд Аврагчийг шавь нар луугаа ирэхээс өмнө шуурга тэднийг шөнийн турш сэлүүрдэн, хүчээ барсны эцэст ( Марк 6:48 -ыг үзнэ үү) аяллын замынхаа 70 хувьд буюу хорин таваас гучин стадиа орчим газарт хүрэхэд (ойролцоогоор 3.1-ээс 3.8 бээр буюу 5-аас 6 километр) хүргэсэн гэж гардаг.

Самбар дээр Марк 6:47–51 болон Иохан 6:19–21 гэж бичээд, суралцагчдыг Матайн түүхэд гараагүй мэдээллийг эдгээр хэсгээс хайж олоод, уг нэмэлт мэдээллүүдээс Аврагчийн талаар юу олж мэдсэн болохоо хуваалцахад урь.

Maтай 14:27 “Зоригтой бай”

Хүнд хэцүү нөхцөл байдалд байсан хэдий ч Аврагч Өөрийн шавь нарыг “зоригтой байхад” ( Матай 14:27) хэрхэн урьсанд суралцагчдын анхаарлыг хандуул. Аврагч биднийг “зоригтой байхад” урьсан судрын бусад хэсгийг хайж олоход суралцагчдыг урь. Хүнд хэцүү нөхцөл байдалд ч зоригтой байж чадах аргуудын талаар ярилц.